व्हीएस न्यूज - भावाला भेटण्यासाठी जाणाऱ्या एका दुचाकीस्वार तरूणाचा अज्ञात मोटारीने दिलेल्या धडकेत जागीच मृत्यू झाला. ही घटना सोमवारी रात्री सव्वा दहाच्या सुमारास मोशी आळंदी रोडवर घडली.

ओमप्रकाश नारायण सिरवी (चौधरी) (वय-22, रा. पिंपळे-गुरव) असे मृत्यू झालेल्या तरूणाचे नाव आहे. त्याचे नातेवाईक मोहनलाल चौधरी (वय-54) यांनी एमआयडीसी पोलीस ठाण्यात फिर्याद दिली आहे.

पोलीसांनी दिलेल्या माहितीनुसार, ओमप्रकाश सोमवारी रात्री सव्वा दहाच्या सुमारास मोशीत राहणाऱ्या भावाला भेटण्यासाठी दुचाकीवरून जात होता. मोशी आळंदी रस्त्यावर सस्तेवाडीकडे जाणाऱ्या रस्त्यावर ओमप्रकाशच्या दुचाकीला अज्ञात मोटारीने जोरदार धडक दिली. यामध्ये त्याचा जागीच मृत्यू झाला. घटनास्थळी न थांबता मोटार चालक पसार झाला.

फौजदार मुळे अधिक तपास करत आहेत.

व्हीएस न्यूज - कचरा वेचत असताना क्रेनने धडक दिल्यामुळे एका वृध्द महिलेचा गंभीर जखमी होऊन मृत्यू झाला. ही घटना 22 नोव्हेंबर रोजी एमआयडीसीतील एम स्कवेअर कंपनीत सकाळी साडे नऊच्या सुमारास घडली.

रूक्मिणी लक्ष्मण साळवे (वय-90, रा. महात्मा फुलेनगर, भोसरी) असे मृत्यू झालेल्या वृध्द महिलेचे नाव आहे. त्यांचा मुलगा रामहरी साळवे (वय-66) यांनी एमआयडीसी पोलीस ठाण्यात तक्रार दिली आहे.

एमआयडीसीतील एम स्कवेअर कंपनीत साळवे या 22 नोव्हेंबर रोजी सकाळी साडेनऊ वाजता कचरा वेचत होत्या. यावेळी क्रेनने साळवे यांना जोरदार धडक दिली. त्यांचा गंभीर जखमी होऊन मृत्यू झाला.

फौजदार गायकवाड अधिक तपास करत आहेत.

व्हीएस न्यूज - चारित्र्यावर संशय घेवून शारिरीक व मानसिक छळाला कंटाळलेल्या विवाहितेने विषारी औषध पिवून आत्महत्या केली. ही घटना मंगळवारी वाकड येथे घडली. याप्रकरणी वाकड पोलीस ठाण्यात पतीसह सासरच्या पाच जणांवर गुन्हा दाखल करण्यात आला आहे.

कल्पना ऊर्फ निशा सिध्दार्थ गायकवाड (वय-30) असे आत्महत्या केलेल्या विवाहितेचे नाव आहे. याप्रकरणी तिचा पती सिध्दार्थ सोमनाथ गायकवाड, सासरे सोमनाथ गायकवाड,दिर शाम सोमनाथ गायकवाड यांच्यासह दोन महिला (सर्व रा. रमाबाई आंबेडकर कॉलनी, वाकड) यांच्यावर गुन्हा दाखल करण्यात आला आहे. विवाहितेची आई सुशिला भोसले (वय-55, रा. झाफराबाद, जालना) यांनी वाकड पोलीस ठाण्यात फिर्याद दिली आहे.

पोलीसांनी दिलेल्या माहितीनुसार, कल्पना व सिध्दार्थ यांचे दोन वर्षापुर्वी लग्न झाले आहे. लग्नानंतर काही दिवसांनी पतीसह सासऱ्यांच्या मंडळींनी तिच्या चारित्र्यावर संशय घेण्यास सुरूवात केली. तिचा शारिरीक व मानसिक छळ करून तिला विषारी औषध पिण्यास भाग पाडले.

फौजदार एम.एल. जाधव अधिक तपास करत आहेत.

व्हीएस न्यूज - पिंपरी-चिंचवड प्रभाग क्र. 10 येथील इंदिरा नगर पुनर्वसन प्रकल्पाच्या इमारतींची अत्यंत बिकट अवस्था झालेली असून, महापालिका प्रशासनाचे याकडे दुर्लक्ष होत असल्यामुळे नागरीकांना याचा प्रचंड त्रास सहन करावा लागत आहे. त्यामुळे या इमारतींची तात्काळ दुरूस्ती करण्याची मागणी राष्ट्रवादी कॉंग्रेस पक्षाचे उपाध्यक्ष अमित बच्छाव यांनी आयुक्तांकडे निवेदनाद्वारे मागणी केली आहे.

त्यांनी दिलेल्या निवेदनात म्हटले आहे की, इंदिरा नगर पुनर्वसन प्रकल्पाच्या इमारतींची अत्यंत बिकट अवस्था झालेली असून प्रशासनाचे याकडे दुर्लक्ष होत आहे. येथिल नागरीकांना याचा प्रचंड त्रास सहन करावा लागत आहे. त्या इमारतींचे जिने तुटलेले असून, पावसाळ्यात टेरेस-भिंतींमधून पाणी झिरपत असते, इमारतींमधील शौचालयांचे पाईप्स तुटल्यामुळे परिसरात अत्यंत दुर्गंधी पसरली आहे. येथील रहिवाश्यांच्या आरोग्यास धोका निर्माण झाला आहे. तसेच येथे कचरा जमा करण्यासाठी पालिकेकडून उपलब्ध करण्यात आलेल्या घंटागाड्यांपैकी एकही घंटागाडी याठिकाणी आत्तापर्यंत आलेली नाही. त्यामुळे सोसायट्यांच्या सभोवती कचऱ्यांचे ढिग लागले आहेत. परिणामी रोगराई पसरत आहे. येथील शौचालयांचे ड्रेनज वारंवार जाम होउन मैला बाहेर येत असतो, त्यामुळे परिसरात दुर्गधी पसरुन लोकांना त्याचा त्रास होत आहे. म्हणून ड्रेनेज लाईन्स नविन टाकण्यात याव्यात, अशी विविध समस्या इंदिरानगर प्रकल्पात असून तात्काळ उपाय योजना करण्याची मागणी बच्छाव यांनी केली आहे.

व्हीएस न्यूज - वर्ग सुरु असताना बाहेरील पॅसेजमधील साफ सफाईचे काम करताना स्लिपरच्या आवाजामुळे शिक्षकांना व विद्यार्थ्यांना त्रास व्हायचा. साबण, ॲसिड, फिनाईल मिश्रीत पाण्यामुळे सफाई कर्मचारी अनेकदा पाय घसरुन पडले. त्यातून छोट्या मोठ्या दुखापती झाल्या. यावर काय तरी उपाय शोधला पाहिजे. या हेतूने प्रा. हरिष तिवारी यांच्या मार्गदर्शनाखाली सफाई कर्मचारी सुनिता कांबळे आणि सहका-यांनी स्लिपर चप्पलवर अनेक प्रयोग करुन बहुउपयोगी स्लिपरचे डिझाईन तयार केले. यासाठी प्रा. राहुल बावणे यांनी सहकार्य केले.

पिंपरी चिंचवड एज्युकेशन ट्रस्टच्या (पीसीईटी) रावेत येथील पिंपरी चिंचवड अभियांत्रिकी महाविद्यालय आणि संशोधन केंद्र (पीसीसीओईआर) मधील सफाई कर्मचारी बाळू थोपटे, सुनिता कांबळे, मिना सांवत, जय्यमा सुका,जयमाला कांबळे, दामन्ना देसाई, शोभा राऊत, सुनंदा पारधे, सुगलाबाई बिराजदार, शुभंम्मा बैरबोईना आणि रेखा गाडे यांनी स्लिपरला वरील बाजूने प्लॅास्टिकच्या कॅप लावून ‘स्लिपर विथ व्हॅक्युम कप इन हिल्स’चे बहुउपयोगी डिझाईन तयार केले. त्याचे स्वामित्व हक्क मिळविण्यासाठी प्रा. डॉ. हरिष तिवारी यांच्या मार्गदर्शनाखाली मुंबईतील भारतीय पेटंट नोंदणी कार्यालयात सीबीआर क्र. 21285 अर्ज क्र. 201721040069 अर्ज दाखल करण्यात आला आहे.

याबाबत माहिती देताना प्रा. बावणे यांनी सांगितले की, प्राचार्य डॉ. हरिष तिवारी यांच्या मार्गदर्शनाखाली या महाविद्यालयातून चालू शैक्षणिक वर्षांत आतापर्यंत 70 पेटंटची नोंदणी करण्यात आली आहे. महाविद्यालयातील सर्व प्राध्यापक वर्ग, विद्यार्थी, कर्मचारी नेहमीच नवीन नवीन तंत्रज्ञानाचा शोध लावण्याच्या प्रयत्नात असतात. सफाई कर्मचारी बाळू थोपटे, सुनिता कांबळे यांनी या बहुउपयोगी स्लिपर बाजारात मिळतात का? याचा शोध घेतला. अशा स्लिपर कोणीही बनवत नाहीत. त्यामुळे आपल्या सारख्या इतर सर्व सफाई कर्मचा-यांना अशा स्लिपर मिळाव्यात या हेतूने प्रयत्न केले. या बहुउपयोगी स्लिपर वापरल्यामुळे अनेकवेळ काम करुन देखील पायाच्या टाचा दुखणार नाहीत तर अॅक्युप्रेशरमुळे पायाला आराम मिळेल. अशा स्लिपरचा उपयोग औद्योगिक कारखान्यातील, रुग्णालय, शाळा, मोठे हॉल, सभागृह अशा सर्व ठिकाणी साफ सफाईच्यावेळी करता येईल. यातील कॅपमुळे स्लिपर टाचेला पकडून राहते. त्यामुळे पाय घसरणार नाही. पावसाळ्यात ही स्लिपर वापरुन चालताना चिखल पाणी उडणार नाही. ज्येष्ठ नागरीक, महिला व्यायाम करताना बुट वापरत नाहीत. त्यांना या स्लिपरचा खूप उपयोग होईल. रुग्णालयात काम करणारे कर्मचारी, परिचारीका, डॉक्टर यांना देखील याचा उपयोग होऊ शकतो. अशी माहिती प्रा. बावणे यांनी दिली. सफाई कर्मचा-यांच्या या संशोधक व चिकित्सक वृत्तीची दखल घेऊन पीसीईटीचे अध्यक्ष ज्ञानेश्वर लांडगे,उपाध्यक्षा पद्माताई भोसले, सचिव विठ्ठल काळभोर, कोषाध्यक्ष एस.डी.गराडे, विश्वस्त हर्षवर्धन पाटील, विश्वस्त भाईजान काझी, कार्यकारी संचालक डॉ. गिरीष देसाई व महाविद्यालयाचे प्राचार्य डॉ. हरिष तिवारी, ट्रेनिंग ॲण्ड प्लेसमेंट अधिष्ठाता प्रा. शितलकुमार रवंदळे यांनी अभिनंदन केले व पुढील वाटचालीस शुभेच्छा दिल्या.

ग्रामीण भागातील विद्यार्थी व शिक्षकांना मिळणार मोफत प्रशिक्षण व प्रमाणपत्र

व्हीएस न्यूज - पिंपरी चिंचवड एज्युकेशन ट्रस्टच्या (पीसीईटी) रावेत येथील पिंपरी चिंचवड अभियांत्रिकी व संशोधन महाविद्यालयाच्या (पीसीसीओईआर) संगणक आणि ई अँड टीसी विभागात फ्री ओपन सोर्स सेंटर (फॉस) केंद्राचे उद्घाटन इन्फोसिस एज्युकेशन अँड रिसर्चचे दिनेश अनंतवार यांच्या हस्ते करण्यात आले. यावेळी बोलताना अनंतवार यांनी या सेंटरचा अभियांत्रिकीतील विद्यार्थ्यांनी व प्राध्यापकांनी पुरेपूर उपयोग करून घ्यावा असे आवाहन केले आणि हे अभ्यासक्रम पूर्ण केल्यानंतर माहिती तंत्रज्ञान क्षेत्रात मिळणार्‍या विविध संधींबाबत त्यांनी मार्गदर्शन केले.

यावेळी प्राचार्य डॉ. हरीष तिवारी, ट्रेनिंग ॲण्ड प्लेसमेंटचे अधिष्ठाता प्रा. शितलकुमार रवंदळे, प्रा. महेंद्र साळुंके, प्रा. चंद्रशेखर भावसार, प्रा. शाम मानकर, प्रा. मयुरा येवले, प्रा. सोनाली कणसे आदी उपस्थित होते. प्राचार्य डॉ. हरीष तिवारी यांनी यावेळी बोलताना सांगितले की केंद्रीय मनुष्यबळ विकास मंत्रालयाचे आय सी टी धोरणानुसार आणि मुंबई आयआयटीच्या सहयोगाने स्पोकन ट्युटोरियल अंतर्गत फॉस सेंटर उभारले आहे. या ‘फॉस’ (FOSS - FREE OPEN SOURCE CENTER) सेंटरमध्ये पिंपरी चिंचवड शहरात शिकणा-या अभियांत्रिकीच्या सर्व विद्यार्थ्यांना आणि शिक्षकांना मोफत सर्व सुविधा मिळणार आहेत. त्याचा लाभ घेणा-या यशस्वी विद्यार्थ्यांना आणि शिक्षकांना प्रमाणपत्र देखिल देण्यात येईल. यामध्ये ओपन सोर्स सॉफ्टवेअरच्या सहाय्याने कॉम्प्युटरच्या सी, सी++, जावा, पायथॉन, पीचपी, लिनकम, लायब्ररी ऑफीस, स्कायलॅब यासारख्या अनेक सेल्फ लर्निंग प्रोग्रॅमींगचा अभ्यास करता येईल. अशीही माहिती प्राचार्य डॉ. हरीष तिवारी यांनी दिली. विभागप्रमुख प्रा. महेंद्र साळुंके व प्रा. चंद्रशेखर भावसार यांनी फॉसच्या अंतर्गत होणार्‍या माहिती तंत्रज्ञान साक्षरता अभियानाची माहिती दिली. हे केंद्र उभारण्यासाठी पीसीईटीचे अध्यक्ष ज्ञानेश्वर लांडगे, उपाध्यक्षा पद्माताई भोसले, सचिव विठ्ठल काळभोर, कोषाध्यक्ष शांताराम गराडे, विश्वस्त हर्षवार्धन पाटील, भाईजान काझी, संचालक डॉ. गिरीश देसाई आणि आयआयटी मुंबईच्या विद्या कदम यांनी मार्गदर्शन केले. प्रा. त्रिवेणी ढमाले यांनी सूत्रसंचालन, प्रा. स्मिता लांडगे यांनी आभार मानले.

व्हीएस न्यूज - भारतीय संविधानामुळे भारतासारख्या खंडप्राय, बहुसंस्कृती संपन्न देशात जात, वर्ण, वंश, पंथ, धर्म, लिंग या घटकांवर आधारीत कोणताही भेदभाव न मानता सर्व नागरिकांना समान आर्थिक, सामाजिक, राजकीय न्याय व संधी मिळत आहे. भारतीय संविधान हे विसाव्या शतकातील सर्वांत मोठा आदर्श ग्रंथ आहे. यामुळे प्रजासत्ताक व्यवस्थेत सर्व अधिकार नागरिकांना आहेत. न्याय, स्वातंत्र्य, समानता आणि बंधूता या सार्वभौम राष्ट्रात वृध्दीगंत होण्यासाठी सर्वांनी या आदर्श संविधानाचे पालन केले पाहिजे. असे प्रतिपादन डॉ. यशोधरा नितनवरे यांनी केले.

भारतरत्न प.पु. डॉ. बाबासाहेब आंबेडकर शतकोत्तर रौप्य महोत्सव, संयुक्त जयंती समितीच्या वतीने संविधान दिनानिमित्त रविवारी (दि. 26 नोव्हेंबर 17) संस्थेचे अध्यक्ष अमरसिंग आदियाल आणि माजी नगरसेविका शोभाताई आदियाल यांच्या नेतृत्वाखाली पिंपळे गुरव येथील सृष्टी हॉटेल चौकात नागरिकांनी संविधानाचे वाचन केले. यावेळी माजी नगरसेविका शोभाताई आदियाल यांनी दहशतवाद विरोधी तसेच देशात न्याय, स्वातंत्र्य, समानता आणि बंधुता वाढीस लागावी यासाठी प्रयत्नशील रहाण्याची उपस्थितांना सामुहिक शपथ दिली. यावेळी माजी नगरसेवक राजेंद्र जगताप, एनसीपीचे युवा नेते शाम जगताप, तानाजी जवळकर, राहुल काकडे, हरीष गायकवाड, हुसेन मुलाणी, संजय साळवे, संदिप नितनवरे, चंद्रकांत वाखोडे, रवी कांबळे, लता शार्दुल, उषा शिंदे, अर्चना सिंग, शितल पाथाडे, प्रदिप पवार, निलचंद्र निकम आदी उपस्थित होते.

डॉ. नितनवरे म्हणाल्या की, भारतीय घटनेचे शिल्पकार भारतरत्न डॉ. बाबासाहेब आंबेडकर यांनी म्हटले आहे की, लोकशाही संपली की, सामान्य लोकांचे जीवन उध्वस्त होईल. हे व्हायला नको असेल तर भारताच्या संविधानाचे पालन आपण सर्वांनी केले पाहिजे. देशातील सव्वाशे कोटींहून जास्त नागरिकांचे सर्वांगीण हित या संविधानाचे पालन करण्यामुळे होईल.

व्हीएस न्यूज - पिंपरी- चिंचवड काँग्रेस पर्यावरण विभागाच्या वतीने नेहरूनगर येथील आंबेडकर नगरात "संविधान गौरव दिवस" मोठ्या उत्साहात साजरा करण्यात आला. त्या निमित्ताने भारताच्या संविधानाचे जनक डॉ. भीमराव आंबेडकर यांना स्मरण करून संविधान प्रास्ताविकाचे वाचन करण्यात आले. कार्यक्रमाचे आयोजन आणि संयोजन शहराध्यक्ष उमेश बनसोडे यांनी केले.

प्रदेश काँग्रेस पर्यावरण विभाग अध्यक्ष अशोक राव मोरे यांनी आपल्या मनोगतातून बाबासाहेबांचा गौरव करीत जातीवादी संघटन पासून सावध राहण्याचे आवाहन केले. यावेळी, शहर काँग्रेस पर्यावरण विभागाचे उपाध्यक्ष अर्जुन शिवाजी गायकवाड, मास्टर शाहिद बारस्कर, साहिब राव निंबर्गीकर, सन्मुख आयगोळे, कल्याणी साखरे, परशुराम आयगोळे, चंद्रशहा आयगोळे, रुक्मिणी आयगोळे, शारदा आयगोळे, सुधारानी आयगोळे, रमाबाई आयगोळे, शिवाजी आयगोळे, सिद्धाराम आयगोळे, महादेव कांकरी, शिवलिंग बनसोडे, तुकाराम चंदनशिवे, मौला नदाफ, फातिमा नदाफ, जयश्री निसर्गिकर, पार्वती बनसोडे, शिक्षिका अरूणा चव्हाण, नजीर शेख, रुक्मादीं शेख,सुरेखा बनसोडे, नामदेव मलंगणाकार, शोभा गवई, कल्पना बाई चंदनशिवे, रेखा कामदारी, राजश्री कांकारे, पुतनाबाई गायकवाड, भारतबाई, वैशाली बनसोडे, दत्ता बनसोडे, मिलिंद बनसोडे, दुर्गाबाई बजे आदी उपस्थित होते.

व्हीएस न्यूज – स्वच्छता हे परमेश्‍वरी तत्त्व असल्याने त्याचा सर्व अन्न व्यावसायिकांनी अवलंब करत आपला व्यवसाय वाढवा, असे आवाहन अन्न व औषध मंत्री गिरीष बापट यांनी केले.

अन्न व औषध प्रशासनाच्या वतीने पिंपरी-चिंचवड महापालिका कार्यक्षेत्रातील अन्न व्यावसायिकांची एक दिवसाची अन्न सुरक्षा प्रशिक्षण कार्यशाळा आयोजित करण्यात आली होती. यावेळी प्रमुख पाहुणे म्हणून ते बोलत होते.

चिंचवड येथील प्रा. रामकृष्ण मोरे प्रेक्षागृहात आयोजित केलेल्या या कार्यशाळेला महपालिका आयुक्त श्रावण हर्डीकर, अन्न व औषध प्रशासन आयुक्त डॉ. पल्लवी दराडे, अन्न प्रक्रीया समिती सदस्य आनंद चोरडीया, पिंपरी चिंचवड हॉटेल रेस्टॉरण्ट असोसिएशनचे अध्यक्ष पद्मनाभ शेट्टी, कार्याध्यक्ष गोविंद पानसरे सहाय्यक आयुक्त सं. भा. नारागुडे, अ. गो. भुजबळ, सं. पां. शिंदे व शहरातील व्यवसायिक मोठ्या संख्येने उपस्थित होते.

डॉ. पल्लवी दराडे यांनी ग्राहकांच्या आरोग्याच्या दृष्टीने हॉटेल व रेस्टॉरण्टमध्ये व्यावसायिकांनी कोणकोणत्या प्रकारची काळजी घेतली पाहिजे याविषयी मार्गदर्शन केले. महापालिका आयुक्त श्रावण हर्डीकर यांनी स्ट्रीट व्हेंडर व हॉटेल, रेस्टॉरण्ट अशा अन्न पदार्थ विक्री करणाऱ्या व्यावसायिकांनी अन्न पदार्थाच्या दर्जासोबतच स्वच्छतेस प्राधान्य देण्याची सूचना करत, पिंपरी चिंचवड महानगरपालिकेकडून अशा प्रकारच्या उपक्रमांना नेहमीच सहकार्य करण्याची ग्वाही दिली. अन्न व औषध प्रशासन सहाय्यक आयुक्त संपत देशमुख यांनी अन्न सुरक्षेविषयी मार्गदर्शन केले. या कार्यशाळेदरम्यान गिरीष बापट यांच्यासह उपस्थित सर्व अधिकारी, कर्मचारी, व्यावसायिक यांनी संविधान प्रास्ताविकेचे सामूहिक वाचन केले. सहआयुक्त शिवाजी देसाई यांनी प्रस्ताविक केले. संतोष सावंत यांनी सुत्रसंचालन केले.

आयुक्‍त हर्डीकर यांची माहिती, स्वीडनचे शिष्टमंडळ पुढील महिन्यात पालिकेला भेट देणार

व्हीएस न्यूज – प्रदुषणविरहीत सार्वजनिक प्रवासी वाहतूक व्यवस्था आणि दैनंदिन घनकचरा संकलन व त्याचे विघटन व्यवस्थापन करण्यासाठी स्वीडनची राजधानी स्टॉकहोल्ममध्ये राबवलेली संकल्पना पिंपरी-चिंचवडमध्ये राबवता येऊ शकते. त्यासाठी नेमके काय करता येईल, हे जाणून घेण्यासाठी स्वीडन येथील शिष्ठमंडळ पुढील महिन्यात पिंपरी-चिंचवडला भेट देणार आहे. या भेटीदरम्यान स्वीडन आणि पिंपरी-चिंचवड महापालिका यांच्यातील करार करण्याबाबत चर्चा होईल, अशी माहिती आयुक्‍त श्रावण हर्डीकर यांनी दिली.

आयुक्त हर्डीकर मागील आठवड्यात स्वीडन देशातील स्टॉकहोल्म शहरात स्मार्ट सिटीविषयक परिषदेसाठी केले होते. या दौऱ्यावरून पतल्यानंतर त्यांनी सोमवारी (दि. 27) पत्रकारांशी संवाद साधला. दरम्यान, आयुक्‍त हर्डीकर म्हणाले की, स्वीडन येथील स्टॉकहोल्ममध्ये एकंदरीत ग्रीन सिटी तयार करण्यावर भर दिला आहे. पर्यटन स्थळे विकसित करण्यात आली आहेत. 4 हजार 500 हेक्‍टर भूखंडावर गार्डन वजा फॉरेस्ट तयार केले आहे. स्मार्ट सिटी साकारण्यासाठी स्वीडन सरकारचा इंधनविरहित मोटारींचे उत्पन्न करण्यावर संशोधन सुरू आहे. प्रदुषण रोखण्यासाठी सायकल चालविणे हा उपक्रम राबविण्यात येत आहे. त्याचबरोबर सार्वजनिक वाहतूक व्यवस्थेवर संशोधन चालू आहे. इलेक्‍ट्रीक बसेस सुरू केल्या आहेत. त्याला चांगला प्रतिसादही मिळत आहे. प्रत्येक गोष्टीतून वीज वाचविण्याचे आव्हान त्यांनी स्वीकारले आहे, असे आयुक्त हर्डीकर यांनी सांगितले.

घनकचरा सुका, ओला आणि मिक्‍स अशा तीन वेगवेगळ्या स्वरुपात संकलीत केला जातो. दैनंदीन संकलीत कचरा मोठ्या कंटेनरमध्ये भरला जातो. कंटेनरची रचना अत्याधुनिक पध्दतीची आहे. त्यामधून कचऱ्याची दुर्गंधी बाहेर येत नाही. कचरा डेपोमध्ये वेगवेगळ्या कचऱ्यातील टाकाऊ परंतु वापरण्यायोग्य वस्तुंचा संचय करून त्यापासून कचरा डेपोची रचना केली आहे. ग्रीन बॉण्ड सरोवर केले आहेत. नदी पात्रालगत हिरवळ विकसित केली आहे. मॅक्‍स स्केपींग तयार केले आहे. याचा प्रयोग आपण स्मार्ट सिटीअंतर्गत पिंपरी-चिंचवडमध्ये करू शकतो, कारण आपल्याकडे रस्ते मोठे आहेत, आणि पुरेशी जागाही उपलब्ध आहे. यासंदर्भात पाहणी करण्यासाठी स्वीडनचे शिष्टमंडळ पुढील महिन्यात शहराला भेट देणार आहे. दरम्यान, पिंपरी-चिंचवड महापालिका आणि स्वीडन यांच्यात काही विकासकामे करण्यासाठी करार होईल, अशी माहिती हर्डीकर यांनी दिली.

नागरिकांचे सहकार्य महत्त्वाचे- आयुक्‍त

स्वीडन सरकार ग्रीन सिटीअंतर्गत विकास प्रकल्प राबविताना जनमताला प्राधान्य देते. नागरिकांच्या सूचनांचा अंतर्भाव केल्याशिवाय कोणताही प्रकल्प मार्गी लागत नाही. तेथील नागरिकांचेही स्वीडन सरकारला मोठ्या प्रमाणात सहकार्य मिळते. त्यामुळे चांगले प्रकल्प साकारले जातात. आपल्याकडे उलट परिस्थिती आहे. एखादा प्रकल्प राबविताना विरोधही केला जातो. तर, काही ठिकाणी सहकार्याची भूमिका घेतली जाते. ज्या ठिकाणी नागरिकांचे सहकार्य मिळते, त्याठिकाणी चांगले प्रकल्प राबविताना अडचण निर्माण होते. याकरिता शहराच्या विकासाचे व्हीजन ठरविताना या गोष्टींचा विचार व्हायला हवा, असेही आयुक्‍त हर्डीकर सांगितले.

माजी आमदार दिलीप मोहिते यांचा सल्ला

व्हीएस न्यूज – आमदार महेश लांडगे यांनी शिरुर लोकसभा मतदार संघातून खासदार होण्यापेक्षा राज्यात मंत्रीपद घेवून भोसरीसह राज्यातील लोकांची सेवा करावी, असा सल्ला खेडचे माजी आमदार आणि राष्ट्रवादीचे नेते दिलीप मोहिते-पाटील यांनी दिला आहे. त्यामुळे आगामी लोकसभा निवडणुकीच्या पार्श्‍वभूमीवर आमदार लांडगे कोणती भूमिका घेणार? याकडे शहरवासीयांचे लक्ष लागले आहे.

भोसरी विधानसभा मतदार संघाचे आमदार आणि राज्यातील सत्ताधारी भारतीय जनता पक्षाचे सहयोगी सदस्य आमदार लांडगे यांनी वाढदिवसानिमित्त भोसरीतील गावजत्रा मैदानावर जोरदार शक्‍तीपदर्शन केले. यावेळी सुमारे 25हजार चाहत्यांनी कार्यक्रमाला हजेरी लावली. राजकीय, सामाजिक, शैक्षणिक आणि सांस्कृतिक क्षेत्रातील मान्यवरांनी आमदार लांडगे यांना शुभेच्छा दिल्या. या कार्यक्रमाला खेडचे माजी आमदार आणि राष्ट्रवादीचे नेते दिलीप मोहिते-पाटील यांनीही आवर्जुन उपस्थिती दर्शवली. यावेळी मोहिते-पाटील बोलत होते.

दिलीप मोहिते-पाटील म्हणाले की, भोसरीकरांनी आमदार लांडगे यांचे बालपण पाहिले आहे. आता भोसरीकर दादांचे मोठपणही पाहत आहेत. कार्यकर्त्यांचे प्रेम आणि लोकांचा हा अफाट पाठिंबा कायम ठेवण्याची जबाबदारी माझ्यासह सर्व कार्यकर्त्यांची आहे. आमदार लांडगे खेडचे जावई आणि भाचेही आहेत. त्यामुळे केवळ भोसरीच नाही, तर लांडगे खेडचेही आमदार आहेत. त्यामुळेच आळंदी आणि खेड परिसरात भोसरीपेक्षा जास्त “फ्लेक्‍स’आमदार लांडगे यांचे लागले आहेत.

दरम्यान, दिलीप मोहिते-पाटील आणि आमदार लांडगे यांच्यामध्ये “गुुरु-शिष्य’ असे नाते आहे. त्यामुळे मोहिते-पाटील यांनी दिलेल्या गुरूमंत्राचा आमदार लांडगे गांभीर्याने विचार करणार यात तिळमात्र शंका नाही. त्यातच या कार्यक्रात मंगलदास बांदल यांच्याह अनेक सर्वपक्षीय नेत्यांनी उपस्थिती दर्शवली आहे. त्यामुळे आगामी लोकसभा निवडणुकीत आमदार लांडगे नेमकी कोणती भूमिका घेणार? याकडे पिंपरी-चिंचवडसह शिरुर लोकसभा मतदार संघातील नागरिकांचे लक्ष लागले आहे.

महाराष्ट्रातील नेता दिल्लीत मोठा होत नाही…

गेल्या काही दिवसांपासून पिंपरी-चिंचवडसह शिरुर परिसरात आमदार लांडगे लोकसभा निवडणूक लढवणार, अशी चर्चा आहे. पण, माझे अनेक मित्र खासदार होवून दिल्लीत गेले आहेत. ते नेहमी सांगतात, तुम्ही विधानसभा लढवा…मंत्री व्हा, पण खासदार होवून दिल्लीत येण्याचा प्रयत्न करु नका. कारण, महाराष्ट्रातील नेत्यांना दिल्लीत मोठे होवू दिले जात नाही, अशी खंतही दिलीप मोहिते यांनी व्यक्‍त केली. तसेच, आमदार लांडगे यांनी खासदारकी न लढवता, राज्यात मंत्रीपदाची संधी मिळाली तर त्याला पहिली पसंती द्यावी. पक्षीय भेद न ठेवता आम्ही कायम त्यांच्या सोबत खंबीरपणे राहणार आहोत, असा विश्‍वासही मोहिते-पाटील यांनी यावेळी दिला आहे.

व्हीएस न्यूज - आई घरात नसताना पाणी पिण्याच्या बहाण्याने घरात घुसलेल्या एका नराधमाने 14 वर्षीय मुलीची छेड काढत तिचा विनयभंग केला. हा प्रकारवाकड येथे घडला. अण्णा कांबळे (रा. वाकड), असे आरोपीचे नाव असून सध्या तो फरार आहे.

पीडितेची आई परिसरात धुणी भांडी करण्याचे काम करते. काही दिवसांपूर्वी आई कामावर गेल्यानंतर अण्णा कांबळे पाणी पिण्याच्या बहाण्याने घरातआला व त्याने पीडितेची छेड काढली. या घटनेची पीडितेने आईला माहिती दिली. माहिती मिळताच आईने वाकड पोलीस ठाण्यात आरोपी विरोधात तक्रारदाखल केली आहे. पोलीस फरार आरोपीचा शोध घेत आहेत.