व्हीएस न्युज - पोलीस ठाण्यातील तक्रार मागे घेण्यासाठी चार हजार रुपयांची खंडणी मागणाऱ्या एका घरकाम करणाऱ्या महिलेस पिंपरी पोलिसांनी अटक केली. ही कारवाई शनिवारी (दि.२४) दुपारी चिंचवड स्टेशन येथे करण्यात आली. याप्रकरणी संदीप लक्ष्मण शेडगे (वय ३८, रा. भाऊ पाटील चाळ, बोपोडी) यांनी पिंपरी पोलिस ठाण्यात फिर्याद दिली आहे.त्यानुसार, अनिता संजय भापकर या महिलेस अटक करण्यात आली आहे.

पोलिसांनी दिलेल्या माहितीनुसार, फिर्यादी शेडगे हे मोहननगर, चिंचवड येथील सुमीत प्रा. लि. या कंपनीत फिल्ड ऑफिसर म्हणून कामाला होते. त्यावेळी तिथे साफसफाईचे काम करणाऱ्या अनिता या चोरी करीत असल्याची माहिती कंपनीचे व्यवस्थापक अर्जुन कांबळे यांना शेडगे यांनी दिली होती. यामुळे अनिता यांना कामावरून काढून टाकण्यात आले होते. या गोष्टीचा राग मनात धरुन अनिताने शेडगे यांनी आपल्याला आनंदनगर, चिंचवड येथे मारहाण व शिवीगाळ केल्याची तक्रार चिंचवड पोलिस ठाण्यात केली. तसेच शनिवारी (दि.२४) शेडगे यांना फोन करुन चार हजार रुपये दिल्यास तुझ्या विरोधात दिलेली तक्रार मागे घेते, असे म्हणत खंडणीची मागणी केली. यावर शेडगे यांनी पिंपरी पोलिस ठाण्यात गुन्हा दाखल केला आणि घडलेला घटनाक्रम पोलीसांना सांगितला.

पोलिसांनी शेडगे यांना आरोपी अनिता हिला पैसे नेण्यासाठी चिंचवड स्टेशन येथे बोलवण्यास सांगितले. ती पैसे नेण्यासाठी आली असता पोलिसांनी तिला सापळा रचून अटक केली. सहायक निरीक्षक शेवाळे अधिक तपास करत आहेत.

व्हीएस न्युज - रिक्षाचालकाचा खून करून पुरावा नष्ट करण्यासाठी मृतदेह जाळून तो नदीपात्रात टाकून देण्याचा प्रकार रविवारी मध्यरात्री उघडकीस आला. रिक्षाचालकाची ओळख पटविण्यात पोलिसांना यश आले असून, हल्लेखोर आणि खुनामागचे कारण अद्याप समजले नाही़ सुनील पडवळ (४५, रा. दत्तवाडी) असे खून झालेल्याचे नाव आहे.

याप्रकरणी पोलीस नाईक चेतन चव्हाण यांनी डेक्कन पोलिसांकडे फिर्याद दिली आहे़ याबाबत पोलिसांनी सांगितले की, राजपूत वीटभट्टीजवळ नदीपात्रातील काटवनातील मोकळ्या जागेत एकाचा मृतदेह पडला असल्याची माहिती रविवारी रात्री पोलीस नियंत्रण कक्षाला नागरिकांनी कळविली़ ही माहिती मिळताच डेक्कन पोलीस घटनास्थळी गेले़.

मृतदेहाच्या डोक्यावर कठीण वस्तूने मारून त्यांचा चेहरा विद्रूप करण्यात आला होता़ त्यानंतर मृतदेह जाळण्याचा प्रयत्न केला गेला होता़ पोलिसांनी शवविच्छेदनासाठी मृतदेह ससून रुग्णालयात पाठविला़ मृतदेह सापडला त्या परिसरात पोलिसांनी शोध घेतल्यावर रिक्षा तसेच एक डायरी सापडली़ त्यात रिक्षामालकाचे नाव, पत्ता व मोबाईल क्रमांक दिला होता़ तसेच सुनील पडवळ असे स्वत:चे नावही लिहिले होते.

पोलिसांना यातील क्रमांकावर संपर्क साधला. तेव्हा ती रिक्षा संदीप पासलकर यांची असल्याचे समजले. त्यांना याबाबत माहिती देऊन बोलविण्यात आले. त्यांनी सुनील पडवळ हा त्यांची रिक्षा भाड्याने घेऊन चालवत असल्याचे सांगितले़ सुनील हा काही वर्र्षांपूर्वी मुंबईत मिलमध्ये काम करत होता. त्या वेळी त्याच्या उजव्या हाताची बोटे कापली गेली होती. पासलकर यांनी मृतदेह पाहिला. त्या वेळी बोटे कापलेली दिसली. त्यावरून त्यांनी हा सुनील पडवळ याचाच मृतदेह असल्याचे ओळखले. त्याला दारूचे व्यसन होते. तो राहण्यास दत्तवाडी भागात होता. मात्र, अनेक दिवस तो घरीच जात नसल्याचे पोलिसांकडून सांगण्यात आले.

पोलिसांनी सुनील याचा मृतदेह त्याच्या वडिलांच्या ताब्यात दिला़ याप्रकरणी पोलीस निरीक्षक अरुण आव्हाड अधिक तपास करीत आहेत़

व्हीएस न्युज - असंघटित कामगार काँग्रेस पिंपरी चिंचवड शहर वतीने संविधान दिन निमित्त बाबासाहेब आंबेडकर यांच्या प्रतिमेस असंघटित कामगार काँग्रेस पिंपरी चिंचवड शहर चे शहर अध्यक्ष सुंदर कांबळे यांच्या हस्ते पुष्पहार अर्पण करून आदरांजली देण्यात आली या वेळी असंघटित कामगार काँग्रेस पिंपरी चिंचवड शहर चे शहर अध्यक्ष सुंदर कांबळे व महिला शहर अध्यक्षा सायरा बानू शेख यांची प्रमुख उपस्थिती होती.

या वेळी असंघटित कामगार काँग्रेस पिंपरी चिंचवड शहर चे संतोष रणसिंग , बबन शिरसाठ , नवनाथ डेंगळे ,कलिंदर शेख ,शबाना कुरेशी ,सौ शीतल कोतवाल ,सलमान शेख ,रोहन खंडागळे ,सौ. निर्मला कुशलकर व आदी मान्यवर उपस्थित होते.

व्हीएस न्युज - पुणे शहरात नववर्षांपासून (१ जानेवारी २०१९) हेल्मेट सक्ती करण्यात येणार असल्याचे पोलीस आयुक्त डॉ. के. वेंकटेशम यांनी नुकतेच जाहीर केले. वाहतूक पोलिसांचे मनुष्यबळ विचारात घेता हेल्मेट सक्ती झाल्यानंतर प्रत्येक चौक तसेच गल्लीबोळात कारवाई करणे शक्य होणार नाही. त्यामुळे हेल्मेट न परिधान करणाऱ्या दुचाकीस्वारांवर शहरातील प्रमुख चौक तसेच रस्त्यांवर असलेल्या सीसीटीव्ही कॅमेऱ्यांद्वारे कारवाई करण्यात येणार आहे.

पुणे शहरात रस्ते अपघातात मोठय़ा संख्येने दुचाकीस्वार बळी पडत आहेत. या पार्श्वभूमीवर शहरात हेल्मेट सक्ती लागू करण्याचा निर्णय घेण्यात आला आहे. शहरातील वाढते अपघात तसेच त्यात मृत्युमुखी पडणाऱ्या दुचाकीस्वारांचे प्रमाण विचारात घेऊन १ जानेवारी २०१९ पासून शहरात हेल्मेट सक्ती करण्याचा निर्णय घेण्यात आला आहे. हेल्मेट परिधान केल्यास डोक्याला होणारी गंभीर स्वरूपाची दुखापत टाळता येईल, तसेच दुचाकीस्वाराचा जीवदेखील वाचेल, असे मत पोलीस आयुक्त वेंकटेशम यांनी व्यक्त केले आहे.

पुणे शहराचा वाढता विस्तार पाहता हेल्मेट सक्ती झाल्यानंतर शहरातील प्रत्येक चौकात वाहतूक पोलीस नेमणे शक्य होणार नाही. पुणे पोलिसांच्या वाहतूक शाखेकडे सध्या एक हजार पोलीस कर्मचाऱ्यांचे मनुष्यबळ उपलब्ध आहे. दोन वर्षांपूर्वी राज्य शासनाने पुणे आणि पिंपरी शहर परिसरातील प्रमुख चौक तसेच रस्त्यांवर १२४० सीसीटीव्ही कॅमेरे लावले आहेत. सध्या बेशिस्त वाहनचालकांविरोधात पोलिसांकडून सीसीटीव्ही कॅमेऱ्यांद्वारे कारवाई करण्यात येत आहे. हेल्मेट सक्ती झाल्यानंतर हेल्मेट न परिधान करणाऱ्या दुचाकीस्वारांविरोधात सीसीटीव्ही कॅमेऱ्यांद्वारे प्रभावी कारवाई करणे शक्य होईल, अशी माहिती वाहतूक शाखेतील अधिकाऱ्यांनी दिली.

वादाचे प्रसंगदेखील टाळता येतील!

हेल्मेट सक्तीला मोठय़ा प्रमाणावर विरोध होण्याची शक्यता आहे. त्यामुळे नववर्षांपासून शहरात हेल्मेट सक्ती झाल्यानंतर प्रत्येक चौकात हेल्मेट न परिधान करणाऱ्या दुचाकीस्वाराला अडवून कारवाई करण्यापेक्षा सीसीटीव्ही कॅमेऱ्यांद्वारे कारवाई करण्यात येईल. सीसीटीव्ही कॅमेऱ्यांद्वारे कारवाई करून संबंधित वाहनक्रमांकाच्या पाटीवरून त्याचा शोध घेण्यात येईल. त्याच्यावर करण्यात आलेली कारवाई तसेच दंडाच्या रकमेचा संदेश मोबाइल क्रमांकावर पाठवता येईल. सीसीटीव्ही कारवाईमुळे वादावादीचे प्रसंग उद्भवणार नाहीत, अशी माहिती वाहतूक शाखेतील अधिकाऱ्यांनी दिली.

दहा महिन्यांत १ कोटी ९० लाखांचा दंड वसूल

वाहतूक पोलिसांकडून गेल्या दहा महिन्यांत हेल्मेट परिधान न करणाऱ्या ३८ हजार दुचाकीस्वारांवर कारवाई करण्यात आली. त्यांच्याकडून १ कोटी ९० लाखांचा दंड वसूल करण्यात आला आहे.

व्हीएस न्युज - पुण्यातील एकता भाटी यांच्या हत्या प्रकरणातील एका आरोपीला वाहतूक पोलीस राजेश शेळके यांच्या धाडसामुळे अटक करण्यात यश आले. पुणे स्टेशनवर पोलीस निरीक्षकावर गोळीबार करुन पळालेल्या आरोपीला राजेश शेळके यांनी प्रसंगावधान दाखवल्याने अटक करण्यात आली.

शिवलाल राव असे या आरोपीचे नाव आहे. पुण्यातील चंदननगर भागातील इंद्रमणी गृहरचना सोसायटीत राहणाऱ्या एकता ब्रिजेश भाटी (वय ३८) यांची बुधवारी सकाळी राहत्या घरात गोळ्या झाडून हत्या करण्यात आली होती. या प्रकरणातील आरोपी शिवलाल राव (वय ३२) आणि मुकेश राव हे दोघे झेलम एक्स्प्रेसने पळ काढणार असल्याची माहिती पोलिसांना मिळाली होती. त्यांना पकडण्यासाठी गेलेले पोलीस निरीक्षक गजानन पवार यांच्यावर आरोपींनी गोळी झाडली होती. यानंतर पोलिसांनी मुकेश रावला रेल्वे स्टेशन परिसरातून अटक केली होती. तर दुसरा आरोपी शिवलाल हा तिथून पळाला होता. त्यामुळे शिवलालचा शोध घेणे हे पोलिसांसाठी आव्हानच ठरले असते. मात्र, वाहतूक पोलीस दलात कार्यरत असलेले राजेश शेळके यांच्या प्रसंगावधानामुळे शिवलाल तुरुंगात पोहोचला.

शिवलालला कसे पकडले हे राजेश शेळके यांनी सांगितले. ते म्हणाले, संध्याकाळी साडे पाचच्या सुमारास मालधक्का चौकात एक आरोपी पळताना दिसला. त्याच्यामागे पोलीस देखील होते. त्या आरोपीने पोलिसांच्या दिशेने एकदा गोळीबार देखील केला. ते पाहून मी देखील आरोपीच्या मागे धावत गेलो. आरोपी पुन्हा चौकात गोळीबार करणार त्याच दरम्यान आम्ही एका भिंतींच्या बाजूला थांबलो. तेवढ्यात त्याने गोळीबार केला. त्यावेळी चौकात असलेले नागरिक त्या ठिकाणी आले. आरोपी शिवलाल राव हा चौकातील एका इमारतीमध्ये घुसला. आम्ही त्याच्या मागावर असल्याचे पाहताच शिवलालने पुन्हा आमच्यावर गोळी झाडली. आम्ही पुन्हा भिंतीच्या बाजूला थांबलो. प्रतिकार करण्यासाठी आमच्याकडे काहीच नव्हते. शेवटी आम्ही धाडस दाखवत आत गेलो. त्याला बाहेर पडणे काही शक्य नव्हते, असे त्यांनी सांगितले.

'आरोपी आणि माझ्यात फक्त १५ फुटाचे अंतर होते. नागरिक इमारतीच्या परिसरात जमले होते. संतप्त नागरिक शिवलालच्या दिशेने दगड फेकत होते. तरी देखील त्याने आमच्यावर पिस्तूल रोखून धरून ठेवली होती. पिस्तूलमधील गोळ्या संपल्या होत्या. शेवटी माझ्या डोक्यात नवा प्लॅन आला', असे ते सांगतात. 'मी त्याला सांगितले की पिस्तूल फेकून दे नाही तर तुला लोक दगड मारत राहतील. शेवटी त्याने काही वेळाने पिस्तूल खाली टाकली आणि मी लगेचच त्याला पकडले', असे त्यांनी सांगितले.

व्हीएस न्युज - चिंचवड एम्पायर इस्टेट जवळील ब्रिज खालील रेल्वे लाईनच्या कडेला एका लाल रंगाचा कापडी पिशवीमध्ये ४३ जिवंत काडतुसे कचरा वेचक महिलेला सापडली आहेत. पिंपरी पोलिसांनी सर्व जिवंत काडतुसे ताब्यात घेतली आहेत. शहरात एवढ्या मोठ्या प्रमाणावर जिवंत काडतुसे सापडल्यामुळे शहरात खळबळ उडाली आहे.

पिंपरी पोलीस स्टेशन चे वरिष्ठ पोलीस निरीक्षक कल्याण पवार यांनी दिलेल्या माहितीनुसार, गुरुवारी रात्री सात च्या सुमारास एका ५८ वर्षीय कचरा वेचक महिलेला कचरा गोळा करत असताना एम्पायर इस्टेट चिंचवड जवळील ब्रिजखालील रेल्वे लाईनच्या कडेला लाल रंगाच्या कापडी पिशवीमध्ये तब्बल ४३ जिवंत काडतुसे सापडली. यामुळे महिला घाबरली होती. यासंबंधी महिलेने पिंपरी पोलिसांना याची माहिती दिली. पोलिसांनी तातडीने घटनास्थळी धाव घेत पिशवी मधील एकुण ४३ जिवंत काडतुसे ताब्यात घेतली आहे.शहरात एवढ्या मोठ्या प्रमाणावर जिवंत काडतुसे सापडल्यामळे यामुळे शहरात खळबळ उडाली आहे. ही सर्व काडतुसे कोणाची आहेत, या ठिकाणी कोणी आणून टाकली याचा शोध पिंपरी पोलीस करीत आहेत.

व्हीएस न्युज - शहराची प्रमुख सार्वजनिक सेवा असलेल्या पीएमपीचा तोटा गतवर्षीच्या तुलनेत दिवसाला चौदा लाखांपर्यंत वाढून तो ७० लाखांवर गेल्याची धक्कादायक माहिती पुढे आली आहे. एकीकडे तोटा होत असतानाच उत्पन्नही दहा लाखांनी कमी झाले आहे. नव्या गाडय़ांच्या खरेदीला झालेला विलंब, जुन्या आणि आयुर्मान संपलेल्या गाडय़ांवरील देखभाल दुरुस्तीचा वाढलेला खर्च, नादुरुस्त गाडय़ांमुळे संचलनात येत असलेले अडथळे, इंधन दरवाढ आणि आस्थापनेवरील खर्च यामुळे तोटा होत असल्याचा दावा पीएमपी प्रशासनाकडून करण्यात आला आहे.

पुणे आणि पिंपरी-चिंचवडमधील जवळपास दहा लाख प्रवाशांना पीएमपीकडून सेवा दिली जाते. मात्र पीएमपीच्या निष्क्रिय कारभारामुळे उत्पन्न कमी आणि तोटा जास्त असेच चित्र अलीकडच्या काही वर्षांत पुढे आले आहे. यासंदर्भात पीएमपीला मिळणारे उत्पन्न, खर्च आणि होत असलेला तोटा यासंदर्भात नगरसेवक आबा बागुल यांनी महापालिकेच्या मुख्य सभेच्या प्रश्नोत्तराद्वारे लेखी विचारणा केली होती. त्यावर पीएमपीने दिलेल्या उत्तरातून ही बाब स्पष्ट झाली आहे.

पीएमपीची संचलनातील तूट भरून काढण्यासाठी पुणे आणि पिंपरी-चिंचवड महापालिकांनी अर्थसाहाय्य करावे, असा आदेश राज्य शासनाने दिला आहे. त्यानुसार पीएमपी कंपनीची स्थापना झाल्यापासून या दोन्ही महापालिकांनी मिळून आत्तापर्यंत ९५३ कोटी ९३ लाख रुपये संचलनातील तूट भरून काढण्यासाठी दिले आहेत. यामध्ये पुणे महापालिकेचा वाटा हा ५५० कोटी ८२ लाख रुपयांचा असून पिंपरी-चिंचवड महापालिकेने ४०३ कोटी १० लाख रुपये दिले आहेत. दोन्ही महापालिकांकडून तूट भरून काढण्यासाठी अर्थसाहाय्य होत असले तरी उत्पन्न कमी आणि खर्च जास्त होत असल्यामुळे पीएमपीला तोटय़ाला सामोरे जावे लागत आहे. नव्या गाडय़ांच्या खरेदीची रखडलेली प्रक्रिया, घटती प्रवासी संख्या, आयुर्मान संपुष्टात आलेल्या पण मार्गावर धावणाऱ्या गाडय़ा, त्यांच्या देखभाल दुरुस्तीसाठी करावा लागणारा मोठा खर्च, इंधनदरवाढ या कारणांचा फटका पीएमपीला बसला असल्याचा दावा करण्यात आला आहे.

सन २०१७-१८ या वर्षांत दिवसाला १ कोटी ७८ लाख रुपयांचे उत्पन्न पीएमपीच्या तिजोरीत जमा होत होते. तर दिवसाचा खर्च हा २ कोटी ३४ लाख रुपये होत होता. दिवसा तोटय़ाचे प्रमाण हे ५६ लाख रुपये असे होते. सन २०१८-१९ या वर्षांतील एप्रिल ते सप्टेंबर या महिन्यात पीएमपीचे दिवसाचे उत्पन्न १ कोटी ६८ लाख रुपये असून दिवसाचा खर्च २ कोटी ३८ लाख आहे. तर दिवसाला होणारा तोटा ७० लाख रुपये असल्याची माहिती पीएमपी प्रशासनाकडून देण्यात आली आहे. गेल्यावर्षी दिवसाला होणारा तोटा ५६ लाख रुपये होता तो चौदा लाखांनी वाढून ७० लाखांवर पोहोचला असल्याचेही यानिमित्ताने स्पष्ट झाले आहे. तसेच गतवर्षीपेक्षा उत्पन्न दहा लाखांनी कमी झाले असून खर्चामध्ये दिवसाला चार लाखांची वाढ झाली आहे.

व्हिएस न्युज - पिंपरी-चिंचवड नजीकच्या पुनावळे येथे इमारतीचे रंगकाम करत असताना तोल जाऊन खाली पडल्याने एका कामगाराचा मृत्यू झाला आहे. राधेशाम रामबच्चन वर्मा (वय ३३) असे मृत्यू झालेल्या कामगाराचे नाव आहे. याप्रकरणी हिंजवडी पोलीस ठाण्यात गुन्हा दाखल झाला आहे.

पोलिसांनी दिलेल्या माहितीनुसार, राकेश वर्मा यांनी हिंजवडी पोलिसांकडे फिर्याद दाखल केली आहे. ठेकेदाराने कामगारांना सुरक्षा साधने पुरवली नाहीत. याप्रकरणी ठेकेदार तुषार पाटील, विजय बालवाडकर यांच्याविरुद्ध कामगारांच्या सुरक्षिततेबद्दल निष्काळजीपणा दाखविल्यामुळे गुन्हा दाखल करण्यात आला आहे. हिंजवडी पोलीस अधिक तपास करीत आहेत.

व्हीएस न्युज - पुणे शहरातील नागरिकाची आजच्या दिवसाची सुरुवात चंदननगर येथील गोळीबाराच्या घटनेने झाली. चंदननगर परिसरातील आनंद गृहरचना सोसायटीत सकाळी साडेआठ वाजण्याच्या सुमारास घडली. खानवळ चालविणार्‍या एकता ब्रिजेश भाटी (वय.३८) यांच्या वर अनोळखी दोन व्यक्तीनी पिस्तूल मधून गोळ्या झाडल्या. त्यामध्ये त्यांचा मृत्यू झाला. या घटनेची माहिती चंदननगर पोलिसांना मिळताच त्यांनी घटनास्थळी धाव घेऊन परिसरातील सीसीटीव्हीच्या माध्यमातून मारेकऱ्यांचा शोध घेण्यास सुरुवात केली. या घटनेतील आरोपीच्या शोधासाठी शहरातील अनेक भागात पोलिसाची पथके रवाना करण्यात आली. या घटनेतील आरोपीचा शोध सुरू असताना. येवलेवाडी येथील गणेश ज्वलर्सवर दुपारी पावणे दोनच्या सुमारास दरोडा टाकण्यासाठी आलेल्या चार व्यक्तीनी केलेल्या गोळीबारात दुकानातील कामगार जखमी झाल्याची घटना घडली. या घटनेची माहिती कोंढवा पोलिसाना मिळताच त्यांनी घटनास्थळी धाव घेऊन सीसीटीव्हीच्या माध्यमातून आरोपीचा शोध घेण्यास सुरुवात केली. या घटनेमुळे पुणे शहरातील नागरिकांमध्ये एकच खळबळ उडाली. या दोन्ही घटनांमुळे शहरातील नागरिक सुरक्षित आहेत का यावर सोशल मीडिया प्रतिक्रिया उमटण्यास सुरुवात झाली.

तर या दोन्ही घटना थांबत नाही तोवर चंदननगर येथील महिलेची हत्या करणारे आरोपी हे पुणे स्टेशन येथून झेलम एक्क्सप्रेसने जाणार असल्याची माहिती पोलिसांना मिळाली. त्यानुसार पोलीस पुणे स्टेशन येथे पाच च्या दरम्यान फ्लॅट फर्म क्रमांक 3 वर पोहचले. त्यावेळी दोन आरोपी रेल्वेमध्ये बसल्याचे त्यांना कळताच त्याना पकडताना दोन आरोपीं पैकी एकाने क्राइम ब्रँच चे पोलिस निरीक्षक गजानन पवार यांच्यावर तीन गोळ्या झाडण्यात आल्या. त्यातील दोन गोळ्या पोटात मध्ये लागल्या. यामुळे पवार खाली कोसळले. त्याच्या बरोबर असलेल्या पोलिसानी त्यातील एका आरोपीला जागेवर पकडले. तर दुसर्‍या आरोपी तेथून पळून गेला. तेथून काही अंतरावर त्याला देखील पकडले.

पोलिसांवर आरोपीनी गोळीबार केल्याची माहिती मिळताच पोलिसानी घटनास्थळी धाव घेतली आणि गजानन पवार यांना ससून रुग्णालयात दाखल करण्यात आले आहे. पवार यांची प्रकृती चिंताजनक असल्याचे सांगितले जात आहे. तसेच रेल्वे स्थानकात ही घटना घडल्याने एकच खळबळ उडाली आहे. तसेच शहरातील दिवसभरातील तिसरी गोळीबाराची घटना असल्याने सर्व सामान्य नागरिकांपासून आता पोलिसांच्या सुरक्षेचा प्रश्न देखील निर्माण झाला आहे.

व्हिएस न्युज - बुधवारी दिवसभरात गोळीबाराच्या तीन घटनांनी पुणे शहर हादरले असून संध्याकाळी रेल्वे स्टेशनवर एका आरोपीने थेट पोलीस निरीक्षकावरच गोळीबार केल्याची घटना घडली आहे. या गोळीबारात पोलीस निरीक्षक गजानन पवार हे गंभीर जखमी झाले असून त्यांच्या पोटात दोन गोळ्या लागल्या आहेत. त्यांच्यावर रुग्णालयात उपचार सुरु आहेत.

पुण्यातील चंदननगरमधील आनंद पार्क परिसरात राहणाऱ्या एकता भाटी यांच्यावर बुधवारी सकाळी राहत्या घरी हल्लेखोरांनी गोळीबार केला होता. या गोळीबारात एकता भाटी यांचा मृत्यू झाला होता. एकता यांच्यावर गोळीबार करणारा आरोपी हा झेलम एक्स्प्रेसने फरार होणार असल्याची माहिती पोलिसांना मिळाली होती. यानुसार पोलीस त्यांना पकडण्यासाठी रेल्वे स्टेशनवर पोहोचले. पोलिसांना पाहताच आरोपीने पोलीस निरीक्षक गजानन पवार यांच्यावर तीन गोळ्या झाडल्या. यातील दोन गोळ्या त्यांच्या पोटात लागल्या आहे. संध्याकाळी सव्वा पाचच्या सुमारास ही घटना घडली आहे. पोलिसांनी या प्रकरणी एका आरोपीला ताब्यात घेतले आहे. तर पवार यांना पुण्यातील खासगी रुग्णालयात दाखल करण्यात अले असून त्यांची प्रकृती गंभीर आहे. घटना स्थळी वरिष्ठ पोलीस अधिकाऱ्यांनी भेट दिली

व्हिएस न्युज - रस्ता ओलांडत असताना स्ट्रीट लाईटचे झाकण उघडे असल्याने शॉक लागून पादचाऱ्या तरुणाचा पत्नीसमोरच मृत्यू झाला. ही घटना मंगळवार (दि.२ ऑक्टोबर) रात्री आठच्या सुमारास भोसरी येथील नाशिक हायवेवर रोशन गार्डनसमोर घडली.

चेतन जाधव (वय २४, रा. बि.१३/२२, अपर इंदिरानगर, बिबवेवाडी, पुणे) असे मयत तरुणाचे नाव आहे. याप्रकरणी त्यांची पत्नी किरण यांनी भोसरी पोलिस ठाण्यात शनिवारी (दि.१७ नोव्हेंबर) तक्रार दाखल केली आहे.त्यानुसार, निष्काळजीपणा करुन स्ट्रीट लाईटचे झाकण उघडे ठेवणाऱ्या पिंपरी-चिंचवड महापालिकेचे विद्युत विभागाचे अधिकारी आणि कर्मचाऱ्यांविरोधात गुन्हा दाखल करण्यात आला आहे.

पोलिसांनी दिलेल्या माहितीनुसार, मंगळवारी (दि.२ ऑक्टोबर) रात्री आठच्या सुमारास मयत चेतन आणि त्यांची २१ वर्षीय पत्नी किरण हे दोघेही भोसरी येथील नाशिक हायवेवरील रोशन गार्डनसमोरील रस्ता ओलांडत होते. यावेळी तेथील स्ट्रीट लाईटचे झाकण उघडे असल्याने त्यांचा जोरदार शॉक चेतन यांना लागला आणि ते जागीच बेशुध्द पडले. किरण यांनी लोकांच्या मदतीने चेतन यांना तातडीने एका खाजगी रुग्णालयात दाखल केले. मात्र उपचारापूर्वीच त्यांचा मृत्यू झाला होता. या घटनेमुळे किरण या धक्क्यात होत्या यामुळे त्यांनी शनिवारी उशीरा निष्काळजीपणा करुन स्ट्रीट लाईटचे झाकण उघडे ठेवणाऱ्या पिंपरी-चिंचवड महापालिकेचे विद्युत विभागाचे अधिकारी आणि कर्मचाऱ्यांविरोधात गुन्हा दाखल केला आहे.

सहायक पोलीस निरीक्षक देशमुख तपास करत आहेत.

व्हिएस न्युज - ‘वायसीएम’ रूग्णालयातील एका डॉक्टराने महिलेला दूरध्वनी करून शरीरसुखाची मागणी करत जीवे ठार मारण्याची धमकी दिली. हा प्रकार शुक्रवारी (दि.१६) निगडी येथून समोर आला आहे. या प्रकरणी डॉक्टरवर विनयभंगाचा गुन्हा दाखल करण्यात आला आहे.

या प्रकरणी एका ३६ वर्षीय महिलेने निगडी पोलीस ठाण्यात तक्रार दाखल केली आहे. डॉ. विनायक पाटील (रा.संत तुकारामनगर, पिंपरी) असे गुन्हा दाखल झालेल्या डॉक्टरचे नांव आहे.

याबाबत अधिक माहिती अशी की, आरोपी डॉ. विनायक पाटील हे वायसीएम रूग्णालयात वैद्यकीय अधिकारी पदावर कार्यरत आहेत. तर फिर्यादी महिला या घरकाम करत आहेत. शुक्रवारी रात्री पावनेनऊच्या सुमारास डॉ. पाटील यांनी महिलेला फोन करून शरीरसुखाची मागणी केली. तसेच माझ्या फ्लॅटवर नाही आल्यास तुझी बदनामी करून तुला जीवे ठार मारीन, अशी धमकी दिली. अधिक तपास निगडी पोलीस करत आहेत.