व्हिएस न्यूज - बॅक ऑफ महाराष्ट्र शाखेचे एटीएम फोडून 9 लाख 76 हजारांची रोकड, एटीएममधील सीपीयु असा दहा लाखांचा ऐवज चोरट्यांनी चोरून नेला. हा प्रकार शुक्रवारी थेरगाव येथे उघडकीस आला.

सचिन काळगे (वय-30, रा. थेरगाव) यांनी वाकड पोलीस ठाण्यात फिर्याद दिली आहे.

पोलीसांनी दिलेल्या माहितीनुसार, काळगे हे इलेक्ट्रानिक्स पेमेन्ट आणि सर्व्हिसेस या कंपनीत तळेगाव, देहूगाव, वाकड, चाकण या विभागाचे मॅनेजर आहेत. दि. 7 ऑक्टोबर ते 22 डिसेंबर या कालावधीत थेरगाव येथील बॅंक ऑफ महाराष्ट्र शाखेचे एटीएम चोरट्यांनी फोडले. एटीएममधील 9 लाख 76 हजार 400 रूपयांची रोकड, 30 हजार रूपये किंमतीचा सीपीयु असा 10 लाख 6 हजार 400 रूपयांचा ऐवज चोरून नेला.

सहायक पोलीस निरीक्षक टी. एस. भोगम अधिक तपास करत आहेत.

व्हिएस न्यूज - तरूणावर गोळीबार करून जीवे मारण्याचा प्रयत्न केल्याप्रकरणी भोसरी पोलीसांनी शुक्रवारी रात्री उशिरा चार जणांना गजाआड केले. गोळीबार करणारा फरार झाला आहे. अटक केलेल्या चार जणांना पिंपरी न्यायालयात हजर केले असता 27 डिसेंबरपर्यंत पोलीस कोठडीत रवानगी करण्यात आली.

प्रितेश उर्फ पप्पू फुगे (वय 29) अनिल सुभाष लांडे (वय 32) अजय युवराज बोत्रे (वय 19) सौरभ नितीन टकले (वय20 , सर्व रा. विठ्ठल-रूक्मिणी मंदीरामागे, भोसरी गावठाण) अशी अटक केलेल्या चार जणांची नावे आहेत. गोळीबार करणारा मुख्य आरोपी बंटी टकले हा पसार असून गोळीबारात जखमी झालेल्या पंकज कांताराम फुगे (वय26) याच्यावर रूग्णालयात उपचार सुरू आहेत. त्याच्या डाव्या खांद्यात गोळी घुसली आहे. पंकज याच्यावरही गुन्हा दाखल करण्यात आला आहे. याप्रकरणी सुरज फुगे (वय 28, रा. भोसरी गावठाण) याने फिर्याद दिली आहे. जखमी पंकज आणि अजिंक्य माने यांची पूर्वी भांडण झाले होते. त्याचा राग पंकजला आहे.

फिर्यादी सुरज आणि अजिंक्य हे मित्रांसमवेत शुक्रवारी दुपारी फुगे-माने आळीत बसले होते. यावेळी बंटी टकले, पंकज आणि इतर आरोपी दोन दुचाकींवर तेथे आले. पंकज अजिंक्यला मारण्यासाठी त्यांच्या अंगावर धावून गेला. त्यामुळे अजिंक्य तेथून पळाला असता पंकजने त्याचा पाठलाग सुरू केला. यावेळी बंटी याने त्याच्याकडील पिस्तुलातून अजिंक्यच्या दिशेने गोळी झाडली. मात्र, त्याचा नेम हुकला. त्यानंतर त्याने पुन्हा गोळी झाडली असता गोळीचा पुन्हा निशाणा चुकला आणि गोळी अजिंक्यऐवजी पंकजच्या डाव्या खांद्यात घुसली. सुरूवातीला अजिंक्यनेच पंकजवर गोळी झाडल्याचा आरोप करण्यात आला होता. मात्र, अजिंक्यने तात्काळ भोसरी पोलीस ठाण्यात धाव घेऊन घडलेला प्रकार सांगितला. त्यानंतर खरा प्रकार उघडकीस आला.

वरिष्ठ पोलीस निरीक्षक संपत भोसले तपास करत आहेत.

व्हीएस न्यूज - भारतातील स्टिल उद्योगाला उज्ज्वल भविष्य आहे. भारतात दर मानसी स्टिलचा वापर दोन टक्के आहे. तर अमेरिकेसारख्या विकसित राष्ट्रात तीस टक्के दर मानसी स्टिल वापरले जाते. भारतात स्टिल उद्योगाची वार्षिक वाढ आठ टक्के आहे. स्टेनलेस स्टिलचा शंभर टक्के पुर्नवापर करता येतो. या उदयोगाला भारतात विकासाच्या व रोजगारांच्या अनेक संधी असल्याचे मत जिंदाल स्टिलचे महाराष्ट्र व्यवस्थापक मनोज भुतानी यांनी व्यक्त केले.

वसंत ग्रुप आणि जिंदाल स्टिल यांच्या संयुक्त विद्यमाने पिंपरी चिंचवड शहरातील स्टिल व्यापा-यांच्या परिसंवादाचे आयोजन चिंचवड येथे करण्यात आले होते. यावेळी वसंत ग्रुपचे संचालक प्रेमचंदजी मित्तल, अनिल मित्तल, रविंद्र लांबा, राजेंद्र मोकाशी, रविंद्र येवले आदींसह शहरातील स्टिल उद्योग व्यवसायाशी संबंधीत उद्योजक व्यापारी उपस्थित होते.

मनोज भुतानी म्हणाले की, भारताच्या विस्तिर्ण समुद्र किनारी भूप्रदेशात स्टिल मुबलक प्रमाणात उपलब्ध आहे. या उद्योगात गुंतवणूक वाढल्यास लाखो उद्योगांना वाढीसाठी मदत होईल. यातून कोट्यावधी प्रत्यक्ष व अप्रत्यक्ष रोजगार निर्मिती होईल. तसेच सरकारला हजारों कोटींचा महसूल मिळेल. यासाठी गुंतवणूकदारांनी व उद्योजकांनी स्टिल उद्योगात यावे. जिंदाल स्टिल चलणी नाणे निर्मितीसाठी रिझर्व बँकेला स्टिल पुरवठा करते. केंद्र व राज्य सरकारने नियम अनुकूल करुन पोषक वातावरण निर्मिती केल्यास मेक इन इंडियाचे स्वप्न साध्य होण्यास मदत होईल. असेही भुतानी म्हणाले.

स्वागत, प्रास्ताविक करताना अनिल मित्तल यांनी सांगितले की, वसंत ग्रुपची स्थापना 1981 साली प्रेमचंदजी मित्तल यांनी केली. पुण्यात सात आणि धारवाड येथे एक असे आठ प्रकल्प वसंत ग्रुपचे आहेत. नुकताच सोलर उद्योगात वसंत ग्रुपने प्रवेश केला आहे. आयएसओ 9000 प्रमाणीत हा ग्रुप असून यातून हजारों लोकांना रोजगार दिला आहे.

व्हिएस न्यूज - अभिनेता सलमान खान आणि अभिनेत्री शिल्पा शेट्टी यांनी एका चित्रपटाच्या प्रमोशनवेळी वाल्मिकी समाजाबाबत अपशब्द वापरले यामुळे वाल्मिकी समाजाच्या भावना दुखावल्या आहेत. याबाबत त्यांनी समाजाची जाहिर माफी मागावी आणि त्यांच्यावर ॲल्ट्रॉसिटी कायद्याअंतर्गत कारवाई करावी या मागणीसाठी अखिल वाल्मिकी समाज, पिंपरी चिंचवड शाखेच्यावतीने माजी नगरसेवक अरुण टाक यांच्या नेतृत्वाखाली निदर्शने करण्यात आली.

शुक्रवारी (दि. 22 डिसेंबर 2017) पिंपरीतील डॉ. बाबासाहेब आंबेडकर पुतळा चौकात सलमान खान आणि शिल्पा शेट्टी यांच्या प्रतिमेस जोडो मारो आंदोलन करण्यात आले माजी नगरसेवक अरुण टाक, मारूती भापकर, नगरसेवक संतोष लोंढे, सामाजिक कार्यकर्ते मानव कांबळे, प्रताप गुरव, देवेंद्र तायडे यांनी सलमान खान व शिल्पा शेट्टी यांचा तीव्र शब्दात निषेध केला.

यावेळी वाल्मिकी समाज शहराध्यक्ष राजू परदेशी, सोनाथ बेद, मोहन बिडलान, सचिन माने, धर्मवीर चंडालीया, धम्मराज साळवे, राजू डुलगूज, अनिल पारचा, सुभाष कुडीया, विनोद करोतीया, विजय चावरीया, सचिन सौदाई, राजकुमार परदेशी, शाम मेवाती, सुखवीर मोतीया, मेघराज सौदे, राकेश राजोरीया, ओमपाल बेनवाल, करण ढकोलीया, कृष्णा चटोलीया, कुणाल बेद, अर्जुन ओव्हाळ आदी उपस्थित होते.

व्हिएस न्यूज -भोसरीत झालेल्या गोळीबार प्रकरणाने वेगळीच कलाटणी घेतली आहे. पूर्ववैमनस्यातून अजिंक्य माने या तरूणावर गोळीबार करण्यासाठी आलेल्या टोळक्यातील पंकज फुगे हाच त्याचा साथीदार बंटी टकले याच्याकडून झालेल्या गोळीबारात जखमी झाला. परंतू अजिंक्य माने याने गोळीबार केल्याचा बनाव पंकज याने सुरूवातीला केला होता. तपासात अजिंक्य नव्हे तर पंकजच गोळीबार करण्यासाठी आल्याचे उघड झाले. या प्रकरणी २ जणांना अटक करण्यात आली आहे.

भोसरीतील अंकुशराव लांडगे नाट्यगृहामागे गोळीबार झाल्याची घटना घडली. या गोळाबारात पंकज फुगे हा जखमी झाला होता. त्यानंतर जखमी पंकजने त्याच्यावर अजिंक्य माने यानेच गोळीबार केल्याचे पोलीसांना सांगितले. त्यानुसार पोलीसांनी अजिंक्य माने याला ताब्यात घेतले. पोलीसांनी त्यानंतर तपास सुरू केल्यावर उलटाच प्रकार समोर आला.

पोलीस उपायुक्त गणेश शिंदे यांनी दिलेल्या माहितीनुसार अजिंक्य आणि पंकज यांच्यात वाद झाला होता. तो वाद मिटवण्यासाठी पंकज फुगे पाच जणांसह अजिंक्य माने याला भेटायला आला होता. मात्र त्यावेळी त्याच्यात बाचाबाची झाली. त्यावेळी पंकज सोबत आलेल्या बंटी टकले याने पिस्तुल बाहेर काढले. ते पाहून अजिंक्य तेथून पळाला, त्याच्या मागे पंकज पळाला. दरम्यान बंटी टकले याने अजिंक्यच्या दिशेने गोळीबार केला. मात्र ती गोळी पंकजच्याच पाठीला लागली. त्यानंतर पंकजसह आलेले सर्व साथीदार घटनास्थळावरून फरार झाले. तर पंकज याला काहींनी उपचारासाठी भोसरीतील एका खाजगी रूग्णालयात दाखल केले. त अजिंक्य यानेच आपल्यावर गोळीबार केल्याचा पंकज याने बनाव केला. सुरूवातीला अजिंक्य याने गोळीबार केल्याचे जखमी पंकज याने सांगितले होते. त्यामुळे अजिंक्य यालाच ताब्यात घेऊन चौकशी केल्यावर खरा प्रकार उघड झाला.

दरम्यान अप्पर पोलिस आयुक्त रविंद्र सेनगावकर यांनी घटनास्थळी पाहणी करून, तपासाच्या सूचना दिल्या. सहाय्यक पोलिस आयुक्त सतीश पाटील, संजय निकम (गुन्हेशाखा), वरिष्ठ निरीक्षक संपराव भोसले, आर. एम. तोडकर, ब्रम्हानंद नायकवडी आदींनी दोघांना अटक करून, पथक रवाना केली.

प्रा.मोरे महाविद्यालयामध्ये माजी विद्यार्थी मेळाव्याचे आयोजन

व्हिएस न्यूज - आकुर्डी येथील प्रा. रामकृष्ण मोरे कला, वाणिज़्य व विज्ञान महाविद्यालय आणि माजी विद्यार्थी संघ यांच्या संयुक्त विद्यमानाने दि. 26 डिसेंबर 2017 रोजी माजी विद्यार्थी मेळाव्याचे आयोजन करण्यात आले आहे. प्रा. मोरे महाविद्यालयाच्या रौप्य महोत्सव सांगता समारंभाच्या निमित्ताने आणि माजी विद्यार्थ्यांचा महाविद्यालयाशी संपर्क वाढावा, जुन्या आठवणींना उजाळा देता यावा, आजी विद्यार्थांसमोर एक आदर्श निर्माण व्हावा, होतकरू विद्यार्थ्यांस मदत व्हावी या उद्देशाने हा मेळावा घेण्यात येत असून मेळाव्यास सुमारे 3 ते 4 हजार विद्यार्थी उपस्थित राहणार आहेत.

कार्यक्रमाचे मुख्य आकर्षण म्हणजे तरूणांचे आदर्श प्रमुख पाहुणे स्पेशल आय.जी. कोल्हापूर विभाग विश्वास नांगरे पाटील हे यावेळी विद्यार्थ्यांना मार्गदर्शन करणार आहेत. तर, माजी मुख्यमंत्री अजितदादा पवार कार्यक्रमाच्या अध्यक्षस्थानी राहतील. कार्यक्रमासाठी पुणे जिल्हा शिक्षण मंडळाचे उपध्याक्ष राजेंद्र घाडगे, मानद सचिव संदिप कदम, खजिनदार मोहनराव देशमुख, उपसचिव एल. एम. पवार, सहसचिव ए.एम. जाधव, प्रा रामकृष्ण मोरे महाविद्यालयाचे प्राचार्य डॉ. एम जी चासकर आदि उपस्थित राहणार आहेत. अशी माहिती प्रा. रामकृष्ण मोरे महाविद्यालयाचे प्राचार्य डॉ. एम. जी. चासकर यांनी पत्रकार परिषदेत दिली.

दरम्यान, सुसज्ज अशा स्पर्धा परिक्षा केंद्राचे उद्घाटन करण्यात येणार आहे. ज्यामध्ये उपयुक्त भरपूर पुस्तके, इंटरनेट, ए.सी आदि सुविधा असणार आहेत. विविध क्षेत्रामध्ये उल्लेखनीय कार्य केलेल्या माजी विद्यार्थ्यांचे अनुभव यशोगाथा या पुस्तकाच्या रूपाने प्रसिध्द करण्यात येईल. तसेच विशेष उल्लेखनीय कार्य करणार्या विद्यार्थ्यांचा उपस्थित पाहुण्यांच्या शुभहस्ते सत्कार करण्यात येणार आहे. 1992 साली स्थापन झालेल्या प्रा रामकृष्ण मोरे महाविद्यालयाला 25 वर्षे पूर्ण होत आहेत. गेल्या 25 वर्षामध्ये महाविद्यालयाने स्वतःची ओळख निर्माण केली आहे. परिसरातील विद्यार्थ्यांसाठी उत्तम सोय उपलब्ध करून दिलेली आहे. महाविद्यालय अत्याधुनिक सुविधांनी युक्त असून महाविद्यालयाला व प्राध्यापकांना अनेक पुरस्कार प्राप्त झालेले आहेत. महाविद्यालयातील 14 विद्यार्थी सुवर्णपदक प्राप्त असून विद्यार्थी व प्राध्यापक राष्ट्रीय व आतंरराष्ट्रीय परिषदामध्ये सहभागी होत असतात. यावेळी माजी विद्यार्थी संघ अध्यक्ष शांताराम वायकर, नगरसेवक अमित गावडे, नगरसेवक अँड. मोरेश्वर शेडगे, नाना शिवले, ज्ञानेश्वर कुटे, दत्तात्रय भालेकर, विजय लांडगे, प्रा रामकृष्ण मोरे महाविद्यालयाचे उपसचिव एल. एम. पवार, उपप्राचार्य डॉ. निलेश दांगट, डॉ. अभय खंडागळे, डॉ. तुषार शितोळे, डॉ. सुजाता टापरे आदि उपस्थित होते.

या कार्यक्रमाचे नियोजन महाविद्यालयाचे उपप्राचार्य डॉ. निलेश दांगट, डॉ. अभय खंडागळे, डॉ. तुषार शितोळे, रजिस्ट्रर अनिल शिंदे तसेच माजी विद्यार्थी संघाच्या समन्वयक डॉ. सुजाता टापरे करणार आहेत.

नाव नोंदणीसाठी मोबाईल अँप तयार करण्यात आले असून विद्यार्थांनी त्यावरून आपली नोंदणी करावी, तसेच अधिक माहितीसाठी डॉ. सुजाता टापरे (9970925914) यांच्याशी संपर्क साधावा, असे आवाहन संयोजकांनी केले आहे.

व्हिएस न्यूज – ठेवीदारांची फसवणूक केल्याप्रकरणी बांधकाम व्यावसायिक डी. एस. कुलकर्णी यांच्यावर गुन्हा दाखल झाल्यानंतर ठेवीदारांचे ५० कोटी रुपये भरण्यासाठी उच्च न्यायालयात दिलेली पहिली तारखी उलटून गेल्यानंतर अटकेची टांगती तलवार असणारे कुलकर्णी यांच्या माध्यमातून एक निवेदन प्रसिद्ध कऱण्यात आले आहे.

या निवेदनामध्ये आम्हाला १९ जानेवारीपर्यंत ५० कोटी भरण्याची मुदत सर्वोच्च न्यायालयाने वाढवून दिल्याचे कुलकर्णी यांनी सांगितले आहे. त्याचबरोबर सर्व रक्कम सर्वोच्च न्यायलयाने दिलेल्या मुदतीमध्ये जमा करण्यात येईल. कोणत्याही गुंतवणुकदारांचा एक रुपयाही आम्ही ठेवणार नसून कोणाचीही फसवणूक केली जाणार नाही असे आश्वासनही कुलकर्णी यांनी दिले आहे. त्याचप्रमाणे कुलकर्णी यांनी सर्वोच्च न्यायालयाने दाखवलेल्या विश्वासाबद्दल समाधान व्यक्त केले आहे. आमचे म्हणणे सर्वोच्च न्यायलयाने ऐकून घेत आमच्यावर विश्वास दाखवल्यामुळेच आता सर्व गोष्टी व्यवस्थित होतील आणि व्यवसाय नक्कीच पूर्वपदावर येईल अशी आशा त्यांनी व्यक्त केली आहे

व्हिएस न्यूज - दागिन्यांना पॉलिश करुन देतो असे सांगून हातचलाखीने एका महिलेचे दोन भामट्यांनी नऊ हजार रूपयांचे दागिने लांबविले. ही घटना गुरुवारी दुपारी अडीचच्या सुमारास रहाटणी येथे घडली.

रिजवाना शेख (वय 45 रा, रहाटणी) यांनी वाकड पोलीस ठाण्यात फिर्याद दिली आहे.

पोलिसांनी दिलेल्या माहितीनुसार, दागिने पॉलिश करुन देतो असे म्हणून दोन भामट्यांनी हातचलाखीने नऊ हजार रुपये किंमतीचे दागिने लांबविले. वाकड पोलीस अधिक तपास करत आहेत.

व्हिएस न्यूज - तूप विकायला आलेल्या चोरट्याने एका ज्येष्ठ नागरिकाला दहा हजार रूपयांचे बंदे देतो, असे सांगून दहा हजार रूपये घेवून पोबारा केला. हा प्रकार ताथवडे येथील जीवननगर नरहरी सोसायटी येथ बुधवारी सकाळी साडेनऊ वाजता घडला.

रमाकांत रेपाळ (वय़-70, रा. जीवननगर नरहरी सोसायटी, ताथवडे) यांनी वाकड पोलीस ठाण्यात फिर्याद दिली आहे.

पोलीसांनी दिलेल्या माहितीनुसार, रेपाळ यांच्या घऱी बुधवारी सकाळी साडेनऊ वाजता एक जण तुप विकण्याच्या बहाण्याने आला. रेपाळ यांना 10 हजार रूपयांचे बंदे करून देतो, असे सांगून त्यांच्याकडून दहा हजार रूपये घेवून पोबारा केला.

फौजदार मोहन जाधव अधिक तपास करत आहेत.

व्हिएस न्यूज - महापालिकेच्या यशवंतराव चव्हाण स्मृती रूग्णालयात शुक्रवारी ड्युटीवर असणाऱ्या दोन डॉक्टरांमध्ये हाणामारीचा प्रकार घडला आहे. हजेरी पुस्तकावर सही करण्यासाठी गेलेल्या एका डॉक्टरला दुसऱ्या डॉक्टरने शिवीगाळ करत हाणामारी केली. यामध्ये दोघांचे शर्ट फाटले. हा प्रकार वायसीएम रुग्णालयातील वैद्यकीय अधीक्षकांच्या कार्यालयासमोर घडला.

मिळालेल्या माहितीनुसार, सकाळी नऊ वाजता संबंधित डॉक्टर हजेरी पुस्तकावर सही करण्यासाठी आले होते. त्यावेळी दुसऱ्या डॉक्टरने त्यांना शिवीगाळ केली. यामुळे दोघांत शाब्दीक बाचाबाची झाली. याचे रुपांतर भांडणात झाले. यामध्ये दोन्ही डॉक्टरांनी एकमेकांचे कपडे फाडण्यापर्यंत प्रकरण वाढले होते. याप्रकरणी अद्याप पोलिसांकडे अथवा रुग्णालय प्रशासनाकडे कोणाचीही तक्रार आली नसल्याचे सांगण्यात येत आहे.

व्हिएस न्यूज - बायोमॅट्रीक मशीन दुरुस्तीचे एक लाख 64 हजार रुपयांचे बिल काढून देण्यासाठी लेखा विभागाच्या कनिष्ठ लिपिकाला चार हजारांची लाच घेताना लाचलुचपत प्रतिबंध विभागाने शुक्रवारी रंगेहाथ पकडले. ही कारवाई पिंपरी पालिकेतील लेखा विभागात दुपारी एकच्या सुमारास करण्यात आली.

प्रकाश जयसिंग रोहकले (वय-39, रा. पिंपळे गुरव) असे अटक करण्यात आलेल्या लिपिकाचे नाव आहे. याप्रकरणी 30 वर्षीय कंत्राटदाराने लाच लाचलुचपत विभागाकडे तक्रार केली होती.

पोलिसांनी दिलेल्या माहितीनुसार, तक्रारदाराकडे पिंपरी-चिंचवड महापालिकेच्या शाळेत बायोमॅट्रीक मशीन दुरुस्तीचे कंत्राट होते. याच कंत्राटाचे एक लाख 64 हजार रुपयांच्या बिलाच्या फाईलवर वरिष्ठांची सही घेऊन धनादेश देतो असे सांगून तक्रारदाराकडे चार हजार रुपयांची मागणी केली. तक्रारदाराने याची तक्रार लाचलुचपत प्रतिबंध विभागाकडे केली होती. लाचलुचपत विभागाने महापालिकेतील लेखा विभागात सापळा लावून रोहकले याला लाच घेताना रंगेहाथ पकडले.

ही कारवाई पोलीस निरीक्षक अरुण घोडके, सुरेखा घार्गे यांनी केली. पिंपरी-चिंचवड महापालिकेत एका वर्षात लाचलुचपत विभागाची ही पाचवी कारवाई आहे.