व्हीएस न्यूज - पिंपरी चिंचवडमधील विजेच्या विविध तक्रारींबाबत तसेच वीजवितरण विभागात असलेल्या विविध समस्यांचे निराकरण करण्याची मागणी भाजप शहराध्यक्ष व आमदार लक्ष्मण जगताप यांनी ऊर्जामंत्री चंद्रशेखर बावनकुळे यांच्याकडे केली.

नागपूर येथे सुरू असलेल्या हिवाळी अधिवेशनादरम्यान ऊर्जामंत्री चंद्रशेखर बावनकुळे आणि आमदार लक्ष्मण जगताप यांची बैठक झाली. या बैठकीत आमदार जगताप यांनी पिंपरी चिंचवडमधील नागरिकांना विजेसंदर्भात येणाऱ्या अडचणी ऊर्जामंत्री बावनकुळे यांच्यासमोर मांडल्या. शहराच्या अनेक भागात वारंवार वीजपुरवठा खंडीत होत असल्याकडे त्यांनी ऊर्जामंत्र्यांचे लक्ष वेधले. त्याचप्रमाणे इन्फ्रा १ व २ (पायाभूत सुविधा) ची उभारणी व कार्यवाही चुकीच्या पद्धतीने झाले असल्याने त्याची चौकशी करण्याची मागणी आमदार जगताप यांनी केली. शहरातील नादुरूस्त असलेले वीजमीटर तक्रारीनंतर तातडीने बदलले जात नसल्याचेही आमदार जगताप यांनी ऊर्जामंत्री बावनकुळे यांच्या निदर्शनास आणून दिले. शहरातील सहा सबस्टेशन पूर्ण क्षमतेने कार्यान्वित करण्याची आग्रही मागणी आमदार जगताप यांनी केली. त्यावर ऊर्जामंत्री बावनकुळे यांनी आमदार जगताप यांनी मांडलेल्या सर्व समस्यांचे येत्या १५ जानेवारीपर्यंत निराकरण करण्याचे आदेश वरिष्ठ अधिकाऱ्यांना दिले.

या बैठकीला महावितरणचे मुख्य व्यवस्थापन संचालक संजीवकुमार, अधीक्षक अभियंता दिवाकरन, कार्यकारी अभियंता शिवाजी वायफळकर, वीजवितरण समितीचे सदस्य रामकृष्ण राणे, गोरक्ष अंबरुळे आदी उपस्थित होते. दरम्यान, ऊर्जामंत्री बावनकुळे यांच्या उपस्थित होणाऱ्या या बैठकीबाबत पूर्वकल्पना देऊनही पुणे विभागाचे मुख्य अभियंता एम. जी. शिंदे बैठकीला गैरहजर होते. त्यामुळे ऊर्जामंत्री बावनकुळे यांनी दूरध्वनीवरून शिंदे यांना चांगलेच फैलावर घेतले. तसेच प्रशासकीय शिस्त पाळण्याची सक्त ताकीद दिली.

व्हीएस न्यूज - पिंपळे सौदागरमध्ये ‘अमृत योजने’अंतर्गत ३५ लाख लिटर पाण्याची टाकी उभारण्यात येणार आहे. नगरसेवक शत्रुघ्न काटे व नगरसेविका निर्मला कुटे यांनी आज पाणीपुरवठा अधिकाऱ्यांसोबत पाहणी करून टाकी उभारण्याची जागा निश्चित केली आली.

शत्रुघ्न काटे म्हणाले की, पिंपळे सौदागर परिसरात दिवसेंदिवस लोकसंख्या वाढत आहे. वाढती लोकसंख्या पाहता भविष्यात पाण्याची कमतरता पडू शकते. त्यामुळेच परिसरात सुरळीत पाणीपुरवठा व्हावा, तसेच पाणीसाठा वाढावा म्हणून येथे पाण्याची टाकी उभारण्यात येत आहे. ‘अमृत योजने’अंतर्गत ही टाकी बांधण्यात येणार असून जमिनीवर २५ लाख लिटर आणि भूमिगत १० लाख लिटर अशी एकूण ३५ लाख लिटर पाण्याची टाकी बांधण्याचे काम सुरु करण्यात येणार असल्याचे ते म्हणाले.

निर्मला कुटे म्हणाल्या की, पाणीपुरवठा विभागाचे कार्यकारी अभियंता रामदास तांबे, उपअभियंता राजेंद्र जावळे, उद्यान स्थापत्य विभाग अधिकारी संजय कांबळे, नगररचना विभागाचे संतोष जगदाळे आदींसोबत आज टाकी बांधण्याच्या जागेची पाहणी केली. येथील आयसीआयसीआय बँके समोरील उद्यानामध्ये टाकीची जागा निश्चित करण्यात आली. या पाण्याच्या टाकीचे भूमिपूजन १५ जानेवारी पर्यंत करण्याचा प्रयत्न असून त्याबाबत संबंधित अधिकार्यांना तशा सुचना दिल्याचे नगरसेवक शत्रुघ्न काटे व निर्मला कुटे यांनी सांगितले.

व्हीएस न्यूज - मांजरी येथील शासकीय आदिवासी मुलांच्या वसतिगृहातील विद्यार्थ्यांनी सुरू केलेल्या आंदोलनाचे वार्तांकन करण्यासाठी गेलेल्या वार्ताहराला सहायक पोलीस आयुक्त नीलेश मोरे यांनी शनिवारी मारहाण केल्याची घटना घडली. याप्रकरणी, अधिकाऱ्यांची चौकशी करून कारवाई करावी, या मागणीसाठी महाराष्ट्र राज्य मराठी पत्रकार संघाच्या पदाधिकाऱ्यांनी पोलीस आयुक्तांची भेट घेऊन निवेदन दिले. यासंदर्भात योग्य कारवाई करण्याचे आश्वासन पोलिस आयुक्तांनी दिले.

वार्तांकन करीत असताना पत्रकार ज्ञानेश भुकेले यांना वानवडीचे सहायक पोलिस आयुक्त निलेश मोरे यांनी शासकीय कर्तव्य बजावण्याचा आव आणत थेट गाडीत डांबून नेले. त्यांनी वार्ताहराला शासकीय कामात अडथळा आणल्याचा गुन्हा दाखल करण्याची धमकी दिली. तसेच, ‘विद्यार्थी आंदोलनाबाबत चुकीच्या पद्धतीने प्रश्न विचारून मोबाइलवर रेकॉर्डिंग केले’, असा माफीनामाही लिहून घेतला. शासकीय आदिवासी मुलांच्या वसतिगृहातील विद्यार्थ्यांनी गेल्या दोन दिवसांपासून विविध मागण्यांबाबत बेमुदत उपोषण सुरू केले आहे. ‘लोकसत्ता’चे वार्ताहर ज्ञानेश भुकेले या घटनेचे वार्तांकन करण्यासाठी वसतिगृहाच्या आवारात आले होते. आंदोलनाच्या ठिकाणी बंदोबस्तासाठी पोलीस अधिकारी व त्यांच्यासोबत असलेल्या पोलीस कर्मचाऱ्यांनी भुकेले यांना ओढून नेत थेट पोलीस व्हॉनमध्ये बसविले. त्यानंतर एखाद्या गुन्हेगाराप्रमाणे वागणूक देऊन भुकेले यांना थेट हडपसर पोलीस ठाण्यात आणण्यात आले. भुकेले यांना धमकावून त्यांच्याकडून जबरदस्तीने माफीनामा लिहून घेतला. हा सर्व प्रकार पुण्याच्या पोलीस आयुक्त रश्मी शुक्ला यांच्या निदर्शनास आणून दिला. यावेळी महाराष्ट्र राज्य मराठी पत्रकार संघाचे अनिल मोरे, सीताराम लांडगे, धनराज माने, सागर बोदगिरे, तुकाराम गोडसे, दिगंबर माने, अमित कुचेकर, दीपक पाटील, तुषार पायगुडे, विशाल भालेराव, दीपक बल्हाडे आदी उपस्थित होते. याबाबत योग्य कारवाई करण्याचे आश्वासन पोलीस आयुक्त रश्मी शुक्ला यांनी दिले.

व्हीएस न्यूज - समस्त ग्रामस्थ भूगांव, पुणे जिल्हा कुस्तीगीर संघ, मुळशी तालुका कुस्तीगीर संघ व मल्लसम्राट प्रतिष्ठान यांच्यावतीने आणि महाराष्ट्र राज्य कुस्तीगीर परिषदेच्या मान्यतेने ६१ वी वरिष्ठ गट राज्य अजिंक्यपद कुस्ती स्पर्धा व महाराष्ट्र केसरी कुस्ती स्पर्धेचे आयोजन करण्यात आले आहे. मुळशी तालुक्यातील भूगाव येथे ही स्पर्धा होणार आहे. तत्पूर्वी मंगळवारी मानाच्या चांदीच्या गदेचे पूजन करण्यात आले.

कार्यक्रमाचे आयोजन राष्ट्रीय कुस्ती पंच चंद्रकांत मोहोळ आणि संग्राम मोहोळ यांनी केले होते. यावेळी शांताराम इंगवले, शिवाजी तांगडे, अनिल पवार, कैलास मोहोळ, सुरेश हरपुडे, अनिल मोहोळ, विजय मोहोळ, सुरेश मोहोळ गणेश मोहोळ, रमाकांत साळुंके, निवृत्ती चोंधे, अजिंक्य मोहोळ, विजय जाधव, संजय भामरे उपस्थित होते.

महाराष्ट्र राज्य कुस्तीगीर परिषद मान्यतेने होणारी ही स्पर्धा भूगाव येथील कुस्तीमहर्षी मामासाहेब मोहोळ क्रीडानगरीत २४ डिसेंबरपर्यंत चालणार आहे. या स्पर्धेच्या निमित्ताने नामवंत मल्लांच्या माती व गादीवरील कुस्त्या चाहत्यांना अनुभवायला मिळणार आहेत.

सर्वाधिक उत्कंठा असलेली महाराष्ट्र केसरीची लढत शनिवार दिनांक २४ डिसेंबर रोजी होईल. स्पर्धेत महाराष्ट्रातील ४५ जिल्हा व शहर तालीम संघातील तब्बल ९०० मल्ल सहभागी होणार आहेत. त्याचबरोबर ९० मार्गदर्शक आणि संघव्यवस्थापक, १२५ तांत्रिक अधिकारी व ८० पदाधिकाऱ्यांचे स्पर्धेसाठी सहकार्य मिळणार आहे. मंगळवार खेळाडूंची वजने आणि वैद्यकीय तपासणी झाली. शिवाय, अनेक संघ पुण्यात दाखल झाले. तसेच दुपारी पंच उजळणी वर्ग घेण्यात आला. यात आंतरराष्ट्रीय पंच आणि कुस्तीगीर परिषदेचे तांत्रिक अधिकारी दिनेश गुंड यांनी सर्व तांत्रिक अधिकाऱ्यांना मार्गदर्शन केले.

दुपारच्या सत्रात गादी व माती विभागातील अ गटात ५७, ७४, ७९ किलो वजनी गटातील मल्लांचे वजन आणि वैद्यकीय तपासणी झाली. स्पर्धेचे उद्घाटन क्रीडा मंत्री विनोद तावडे यांच्या हस्ते होणार आहे. या वेळी पालकमंत्री गिरीष बापट, महाराष्ट्र राज्य कुस्तीगीर संघटनेचे सरचिटणीस बाळासाहेब लांडगे, जिल्हा परिषदेचे अध्यक्ष विश्वास देवकात, पुणे जिल्हा कुस्तीगीर संघाचे अध्यक्ष संदीप भोंडवे आदी मान्यवर उपस्थित राहणार आहेत. तर रविवार, दिनांक २४ डिसेंबर रोजी स्पर्धेच्या समारोपाला महाराष्ट्र राज्य कुस्तीगीर परिषदेचे अध्यक्ष शरद पवार, मुख्यमंत्री देवेंद्र फडणवीस, नितीन गडकरी आदी उपस्थित राहणार आहेत.

२१ डिसेंबर रोजी दुपारी ४ वाजता स्पर्धेत सहभागी पैलवानांची वाजतगाजत मिरवणूक काढण्यात येणार आहे. यामध्ये प्रत्येक जिल्हा व शहर तालीम संघाचे कुस्तीपटू आपल्या जिल्हयाचे प्रतिनिधीत्व करतील. तसेच महाराष्ट्र केसरी किताबासाठी लढणारे मल्ल एकाच जीपमधून मिरवणूकीत सहभागी होणार आहेत.

महाराष्ट्र केसरीमध्ये प्रथमच महिला कुस्तीपटूंची लढत –
यंदा महाराष्ट्र केसरीमध्ये प्रथमच महिलांच्या कुस्तीला प्रोत्साहन देण्यासाठी महिलांच्या प्रातिनिधीक कुस्तीचे आयोजन करण्यात आले आहे. शनिवार दिनांक २३ डिसेंबर २०१७ रोजी महाराष्ट्राची महिला कुस्तीपटू अंकीता गुंड आणि हरीयाणाची कुस्तीपटू ममता यांच्यात लढत रंगणार आहे.

– अशी आहे गदा –
गदेची उंची साधारण २७ ते ३० इंच असून, व्यास ९ ते १० इंच इतका असतो. तिचे वजन ८ ते १० किलो असते. गदा संपूर्ण लाकडी असून, त्यावर चांदीचे नक्षीकाम केले जाते. २८ गेज चांदीचा पत्रा यासाठी वापरला जातो. या गदेवर कुस्ती महर्षी मामासाहेब मोहोळ यांचे छायाचित्र असते व कुस्तीचे दैवत असणाऱ्या हनुमानाचेही छायाचित्र असते. मागील ३४ वर्षांपासून पानगरी कुटुंबीय गदा बनविण्याचे काम करते.