व्हीएस न्यूज – दिवाळीच्या तोंडावर शहरात रस्त्यांवर, चौका-चौकात अनधिकृतपणे फटाके स्टॉल लागले आहेत. त्या फटाके स्टॉल महापालिका, अग्निशामक विभागाने परवानगी दिलेली नाही. त्यातून एखादी मोठी दुर्घटना घडल्यास त्याला जबाबदार कोण, असा सवाल करत शहरातील अनधिकृत फटाके स्टॉलवर कारवाई करण्याची मागणी महापालिका सर्वसाधारण सभेत करण्यात आली. त्यावर आयुक्‍त श्रावण हर्डीकर यांनी कारवाईचे आदेश दिले आहेत.

सर्वसाधारण सभेच्या अध्यक्षस्थानी महापौर नितीन काळजे होते. दरवर्षी दिवाळीच्या निमित्ताने फटाक्‍यांच्या माध्यमातून लाखो, करोडो रुपयांची उलाढाल होते. मोठ्या होलसेल व्यापाऱ्यांपासून लहान, लहान विक्रेतेही कुठेही फटाके स्टॉल लावतात. त्यातून अनेक ठिकाणी आगीच्या दुर्घटना घडतात. त्यावरून महापालिका सर्वसाधारण सभेत नगरसेवकांनी चर्चा केली. नगरसेवक दत्ता साने यांनी हा विषय मांडून शहरात ठिकठिकाणी अनधिकृत फटाका स्टॉल थाटल्याचे निदर्शनास आणून दिले.

त्या स्टॉल कोणतीही महापालिकेने, अग्निशामक विभागाने परवानगी दिलेली नाही. अनेकांनी रहदारीच्या ठिकाणी असलेल्या या स्टॉलमुळे धोका पोहोचू शकतो. मात्र,महापालिका कोणतीही कारवाई करीत नाही. त्यामुळे महापालिकेने तातडीने अशा स्टॉलवर कारवाई करावी, अशी मागणी साने यांनी यावेळी केली. त्यानंतर अजित गव्हाणे यांनीही अनधिकृत फटाके स्टॉल चुकीच्या पध्दतीने लावले जातात. पुढील वर्षी पालिकेने धोरण तयार करून ठराविक आरक्षणांच्या मोकळ्या जागेत फटाके विक्रीला परवानगी द्यावी. त्यामुळे फटाके खरेदी, विक्रीची सोय होईल आणि कोणताही धोका उद्‌भविणार नाही, अशी सूचना मांडली. त्यानुसार महापौर काळजे यांनी प्रशासनाला शहरातील अनधिकृत फटाके स्टॉलवर कारवाई करण्याचे आदेश दिले.

व्हीएस न्यूज – “पिंपरी-चिंचवड महापालिकेने नटसम्राट निळू फुले यांच्या नावाने नाटयगृह उभारुन कलाकारांमध्ये उत्साह निर्माण केला आहे. निळू भाऊ श्रेष्ठ दर्जाचे व्यक्ती होते. त्यांनी अनेक कलाकारांना स्फूर्ती दिली तसेच दिशादर्शनही केले. कलेच्या माध्यमातून प्रेक्षकांपर्यंत पोहोचण्याचा व समाजाला वेगळे वळण देण्याचा प्रयत्न येथे झाला तर ती खऱ्या अर्थाने निळू भाऊंना आदरांजली ठरेल, असे मत सिनेदिग्दर्शक राजदत्त यांनी व्यक्त केले.

पिंपरी-चिंचवड महापालिका, अखिल भारतीय मराठी चित्रपट महामंडळ व निळू फुले कला अकादमी यांच्या संयुक्त विद्यमाने आयोजित करण्यात आलेल्या “नटसम्राट निळू फुले कला महोत्सवा’च्या समारोप प्रसंगी राजदत्त बोलत होते. पिंपळे गुरव येथील नटसम्राट निळू फुले नाटयगृहात झालेल्या या कार्यक्रमास ज्येष्ठ अभिनेते डॉ. श्रीराम लागू यांना महापालिकेच्या वतीने गौरवण्यात आले.

यावेळी आमदार लक्ष्मण जगताप, महापालिका आयुक्त श्रावण हर्डीकर, पक्षनेते एकनाथ पवार, नगरसदस्या माधवी राजपुरे, अखिल भारतीय चित्रपट महामंडळाचे अध्यक्ष मेघराज राजे भोसले, सिनेदिग्दर्शक राजदत्त, सिनेअभिनेत्री सुषमा शिरोमणी, ज्योती चांदेकर, भारती गोसावी, सिने अभिनेते राहूल सोलापूरकर, सोमनाथ शेलार, यश सिंगलवार,नरेंद्र डोंगरे, श्रीराम रानडे, माजी नगरसदस्य राजेंद्र राजापुरे, सह शहर अभियंता प्रवीण तुपे, प्रशांत पाटील आदी उपस्थित होते.

भारती गोसावी म्हणाल्या, “निळूभाऊ यांच्या बरोबर “राजकारण गेलं चुलीत” तसेच “कथा अकलेच्या कांद्याची” या वगनाटयाचे हजारोंच्यावर प्रयोग केले आहेत. निळूभाऊ खुप छान माणूस होते. तसेच ते सामाजिक कार्यकर्ते व श्रेष्ठ कलावंतही होते. तसेच सुषमा शिरोमणी म्हणाल्या, “फटाकडी’, “मोसंबी नारंगी’ असे अनेक चित्रपट मी डॉ. श्रीराम लागू व निळू फुले यांच्याबरोबर केले. यामुळे मी मोठी झाले आहे. आजच्या युवा पिढीला निळूभाऊंच्या अभिनयाचे आकर्षण आहे.’

ज्योती चांदेकर म्हणाल्या, “निळू फुले आयकॉनिक अभिनेते होते. त्यांनी सुमारे 140 मराठी चित्रपटात काम केले. त्यांनी “सखाराम बाईंडर” नाटक तसेच “सामना”, “कुली”अशा सुप्रसिध्द चित्रपटातून काम केले आहे. त्यांची “डायलॉग डिलेव्हरी’ सुरेख होती. रसिकांनी दिलेली मनमुराद दाद त्यांना आवडत असे. अशा मोठ्या माणासाच्या नावाने पिंपरी-चिंचवड परिसरात नाटयगृह उभारले आहे. नाटक ही संस्कृती आहे तिचे जतन करावे. हे नाटयगृह नाटय प्रयोगांसाठीच राखीव असावे, अशी अपेक्षा त्यांनी व्यक्‍त केली.

यावेळी सोमनाथ शेलार, मेघराज राजे भोसले, नरेंद्र डोंगरे, श्रीराम रानडे यांनीही मनोगत व्यक्त केले. प्रास्ताविक कार्यकारी अभियंता प्रशांत पाटील यांनी केले. सूत्रसंचालन दीपक रेघे यांनी केले. तर आभार सहशहर अभियंता प्रवीण तुपे यांनी मानले. नटसम्राट निळू फुले कला महोत्सवाची सांगता नितीन मोरे व सहकारी प्रस्तुत “महाराष्ट्राची लोकधारा’ या कार्यक्रमाने झाली.

व्हीएस न्यूज – शहरात महापालिकेने राज्य व केंद्र सरकारच्या अभियान विविध प्रकल्प राबविण्यात येणार आहेत. हे प्रकल्प वेळेत पूर्ण होणे, याकरिता राष्ट्रीय व आंतरराष्ट्रीय दर्जाच्या सल्लागार संस्थेची मदत घेण्यात येणार आहे. त्यामुळे सन 2017-18 च्या अर्थसंकल्पात सिटी ट्रान्फॉर्मेशन ऑफीस हे नवीन लेखाशिर्ष निर्माण केला असून 3 वर्षांत 14कोटी 31 लाख रूपये खर्च होणार आहेत. या विषयाला उपसूचनेसह मान्यता देण्यात आली.

पिंपरी-चिंचवड महापालिकेचा सन 2017-18 चा अर्थसंकल्प आयुक्त श्रावण हर्डीकर यांनी स्थायी समितीमार्फत महापालिका सभेपुढे सादर केला. त्यास महापालिका सभेने मान्यताही दिली आहे. तथापि, या अर्थसंकल्पात महापालिकेच्या विविध विभागामार्फत केंद्र सरकार व राज्य सरकारच्या अभियानांचाही समावेश आहे. महापालिकेमार्फत स्थापत्य, विद्युत, पाणीपुरवठा, जलनि:सारण आदी विभागांच्या प्रकल्पांचे कामकाज हाती घेण्यात येते.

या व्यतिरिक्त जेएनएनयुआरएम, अमृत अभियान, स्वच्छ हिंदुस्थान अभियान, स्मार्ट सिटी अभियान, पंतप्रधान अवास योजना अशा विविध योजना महापालिका हद्दीत राबविण्यात येत आहेत. हे प्रकल्प कालमर्यादेत व वेळेत पूर्ण करण्यासाठी या कामांकरिता राष्ट्रीय व आंतरराष्ट्रीय दर्जाच्या सल्लागार संस्थेची मदत घेणे आवश्‍यक असते. त्यामुळे सन 2017-18 च्या अर्थसंकल्पात मसिटी ट्‍रान्फॉर्मेशन ऑफीसफ हे नवीन लेखाशिर्ष निर्माण करण्याचा निर्णय घेण्यात आला. त्यानुसार, सन 2017-18 च्या अर्थसंकल्पात महसुली जमा खर्चात माहिती व तंत्रज्ञान विभागाकडे सिटी ट्‍रान्फॉर्मेशन ऑफीस हे नवीन लेखाशिर्ष निर्माण करून त्यावर तीन वर्षे कालावधीसाठी 14 कोटी 31लाख रूपये खर्चास सर्वसाधारण सभेने प्रशासकीय मान्यता दिली आहे.

व्हीएस न्यूज – महापालिकेकडून घरमालक-भाडेकरू “ट्रॅकिंग सिस्टीम’ विकसित करण्यात येणार आहे. हा डेटा महापालिका “सर्व्हर’मध्ये ठेवण्यात येणार आहे. संगणक प्रणाली मे. प्रोबिटी सॉफ्ट यांच्याकडून विकसित करण्यात आली आहे. या विषयाला सर्वसाधारण सभेने मान्यता दिली असून शहरातील घरमालकांना भाडेकरूंची नोंद घरबसल्या करता येणार आहे.

सर्वसाधारण सभेच्या अध्यक्षस्थानी महापौर नितीन काळजे होते. पोलीस आयुक्‍त परिमंडळ-3 आणि पुणे शहर पोलीस आयुक्‍तालयाकडून आलेल्या पत्रानुसार पिंपरी-चिंचवड महापालिकेने विकसित केलेल्या घरमालक भाडेकरू “ट्रॅकिंग सिस्टीम’अंतर्गत ही सुविधा नागरिकांना “ऑनलाईन’ उपलब्ध होणार आहे. या सेवेमुळे घरमालक आणि भाडेकरू यांची माहिती महापालिकेकडे उपलब्ध राहणार असून महापालिकेला उत्पन्न मिळण्याबरोबरच सुरक्षेच्या दृष्टीनेही महत्त्वाची असणार आहे.

महापालिकेने “ऑनलाईन’ सेवेसाठी 10 रूपये शुल्क आकारणी, तर त्यापैकी पाच रूपये सिस्टीम विकसित केलेल्या संस्थेला देण्यात येणार आहेत. घर मालकांना घरबसल्या भाडेकरूंची नोंद करणे शक्‍य व्हावे, याकरिता महापालिकेने घरमालक – भाडेकरू “ट्रॅकिंग सिस्टीम’ विकसित करावी, अशी मागणी तत्कालीन पोलीस उपायुक्त शहाजी उमाप यांनी 2013 मध्ये महापालिका आयुक्तांकडे पत्राद्वारे केली होती. “सिस्टीम’ महापालिकेच्या नागरी सुविधा केंद्रामार्फत उपलब्ध करावी, असेही सुचविले होते. या पत्राची दखल घेऊन महापालिकेने घरमालक – भाडेकरू ट्रॅकिंग सिस्टीम विकसित केली आहे. याबाबतचा “डेटा’ महापालिका “सर्व्हर’वर ठेवण्यात आला आहे. ही संगणक प्रणाली मे. प्रोबिटी सॉफ्ट यांच्यामार्फत विकसित करण्यात आली आहे.

व्हीएस न्यूज - पिडीत व्यक्तींची मनोभावे सेवा करुन मानवता जोपासावी. ही साईबाबांची शिकवण आणि त्यांचा श्रध्दा, सबुरी हा मुलमंत्र आजही सर्व भारतीयांना मार्गदर्शक आहे. जाती, धर्म भेदभाव न मानता मानवासह सर्व प्राणीमात्रावर दया करावी. मानवाला माणुस बनण्याची शिकवण साईबाबांनी त्यांच्या आचरणातून दिली. त्यांनी दाखविलेल्या मार्गाने श्री शिर्डी साई ग्लोबल फाऊंडेशन सामाजिक कार्य करीत आहे. हे अभिमानास्पद आहे असे मत उपराष्ट्रपती वेंकैया नायडू यांनी व्यक्त केले.

श्री साईबाबा ग्लोबल फाऊंडेशनच्या वतीने श्री साईबाबा समाधी शताब्दी वर्ष निमित्त रविवारी (15 ऑक्टोबर 17) दिल्लीमधील श्री फोर्ट सभागृह येथे आयोजित केलेल्या कार्यक्रमात उपराष्ट्रपती वेंकैया नायडू मार्गदर्शन करत होते. यावेळी शिर्डीचे खासदार सदाशिव लोखंडे, संस्थेचे अध्यक्ष चंद्रभानु सत्पती, डॉ. महेश शर्मा, केंद्रीय दक्षता आयुक्त के.बी. चौधरी, केंद्रीय मुख्य सुचना आयुक्त श्री दास आदींसह शिकागो, अमेरिका, ऑस्ट्रेलिया, न्युझिलंड, जर्मनी, मलेशिया, नेपाळ, मॅारीशस, कॅनडा, इंग्लड, फिनलंड, श्रीलंका येथील ट्रस्टचे प्रतिनिधी व विविध देशातील साईभक्त उपस्थित होते. यावेळी वेंकैया नायडू यांच्या हस्ते साईबाबांच्या जीवनावर आधारीत स्मरणिकेचे प्रकाशन आणि चंद्रभानु सत्पती यांचा करण्यात आला.

श्री साईबाबा ग्लोबल फाऊंडेशनचे अध्यक्ष चंद्रभानु सत्पती म्हणाले की, 15 ऑक्टोबर 1918 रोजी विजयादशमीच्या दिवशी श्री साईबाबांनी शिर्डी येथे समाधी घेतली. भारतीय संस्कृतीच्या विकासासाठी आणि साईबाबांचा मानवतेचा संदेश जगभर प्रसारित करण्यासाठी श्री साईबाबा ग्लोबल फाऊंडेशनच्या वतीने विविध प्रकल्प राबविण्यात येत आहे. यामध्ये बंगाल सारख्या पूरग्रस्त भागात मदत कार्य करणे, देशभरातील उपेक्षित बालकांसाठी शैक्षणिक सुविधा उपलब्ध करुन देणे, जाती, धर्म भेदभाव न मानता मानवतेच्या दुष्टीकोनातून पिडीत व्यक्तींची सेवा करणे, मानवी जीवनस्तर उंचावण्यासाठी ही संस्था जगातील विविध देशात कार्यरत आहे. अशीही माहिती चंद्रभानु सत्पती यांनी दिली.

व्हीएस न्यूज – अस्सल ग्रामीण मातीचा बाज असलेला रांगडा खेळ म्हणजे कुस्ती. ग्रामीण भागातील पैलवान व राष्ट्रीय पदक विजेता प्रसाद सस्ते याने लढतीत इराणच्या सईद महम्मद याला सहाव्या मिनिटातच निकाल डाव टाकून आस्मान दाखविले. यावर प्रेक्षकांनी अक्षरश: मैदान डोक्‍यावर घेतले. मोशी गावच्या सुपूत्राने मिळविलेल्या या विजयाने आकाशाला गवसणी घातली. दिवाळीच्या सुरुवातीलाच हे यश मिळविल्याने मोशीकरांचा दिवाळीचा आनंद द्विगुणित झाला आहे.

पिंपरी-चिंचवड महापालिकेच्या वतीने आयोजित केलेल्या महापौर चषक आंतरराष्ट्रीय कुस्ती स्पर्धेत इराणचे मल्ल सहभागी होणार असल्याने कुस्तीप्रेमींना अटीतटीच्या लढती पाहण्याची संधी मिळणार होती. त्यामुळे राज्याच्या कानाकोपऱ्यातून हिंद केसरी, भारत केसरी व कुस्तीप्रेमी मोशीत दाखल झाले होते. रविवारी सकाळी स्थानिक मल्लांच्या कुस्त्या झाल्या. त्यानंतर रात्री आठनंतर सुरु झालेल्या मुख्य लढतींकडे सर्वांचे लक्ष लागले होते. त्यातल्यात्यात इराणी मल्लांचे आकर्षण होते. आखाड्यात उतरण्यापुर्वी त्यांनी मैदानाला फेरी मारत प्रेक्षकांना अभिवादन केले. त्यांच्या या कृतीला प्रेक्षकांचा उत्स्फूर्त प्रतिसाद मिळाला.

त्यानंतर या लढतींपैकी मोशीगावचा सुपूत्र असलेल्या प्रसाद सस्ते आणि इराणच्या सईद महम्मद यांच्यातील लढतीकडे लागले होते. ही लढत सुरु होताच मैदानात शांतता पसरली. सर्वांचे लक्ष या लढतीमधील दोन्ही मल्लांच्या डावांच्या हालचाली टिपण्यावर होते. पहिली पाच मिनिटे या दोन्ही मल्लांनी एकमेकांच्या ताकदीचा अंदाज घेतला. सहाव्या मिनिटाला प्रसादने निकाल डाव टाकत सईदला अस्मान दाखवले. त्याचक्षणी मोशीकरांबरोबर उपस्थित कुस्ती शौकीनांनी मैदानात धाव घेत, प्रसादला उचलुन घेतले. मैदानाला फेरी मारत त्याने प्रेक्षकांच्या अभिनंदनाचा स्विकार केला.

कुस्ती मैदान मारल्यानंतर प्रसादला घरी पोचण्यास साडे नउ दहा वाजले. त्यावेळी कुटुंबियांनी त्याला औक्षण करुन ओवाळले. होमग्राऊंवर आंतरराष्ट्रीय मल्लाला चितपट केल्याचा आनंद प्रसादच्या चेहऱ्यावर स्पष्टपणे झळकत होता. यापेक्षाही चांगली कामगिरी करण्यासाठी प्रयत्न करणार असल्याचेढ़ी प्रतिक्रिया त्याने यावेळी दिली.

व्हीएस न्यूज - पावसामुळे फुलांची तोड होऊ न शकल्याने फुल बाजारात आवक कमी झाली. भाव मात्र गडगडले आहेत. मात्र, तरी देखील दिवाळीच्या पार्श्‍वभूमीवर राजा शेवंती व झेंडूला मागणी वाढली आहे.

येत्या दोन दिवसांत फुलांचे भाव वधारण्याची शक्‍यता वर्तविली जात आहे. फुलांचे दर प्रतिकिलो व बंडलनुसार पुढील प्रमाणे – झेंडू (साधा, पिवळा व कोलकत्ता) – 30 ते 40रुपये किलो, कापरी 40 ते 50 रुपये, गुलछडी – 80 ते 100 रुपये किलो, लिली बंडल – 8 ते 10 रुपये, जरबेरा बंडल – 50 ते 60 रुपये, गुलाब गड्डी (साधा) – 15 ते 20 रुपये,गुलाब गड्डी (डच) – 60 ते 80 रुपये, अष्टर गड्डी (चार नग) – 10 रुपये, किरकोळ बाजारात कागडा गजऱ्याचा भाव प्रति नग 10 रुपये असून, डझनचा भाव 100 रुपये आहे, अशी माहिती सप्तश्रुंगी पुष्प भांडारचे गणेश आहेर यांनी दिली.

व्हीएस न्यूज - पिंपरी-चिंचवड महापालिकेच्या प्रशासकीय सेवेतील कर्मचाऱ्यांची मुजोरी दिवसेंदिवस वाढत चालली आहे. पालिका सेवेते कार्यरत असताना काही कर्मचारी कार्यालयात सकाळी हजेरी लावल्यानंतर आपले खासगी उद्योग चालविण्यासाठी निघून जात असल्याचे निदर्शनास येऊनही प्रशासनाकडून कोणत्याच प्रकारची कारवाई होत नाही. अशा नियमबाह्य पध्दतीने नोकरी करून गलेलठ्ठ पगार लाटणाऱ्या कर्मचाऱ्यांना पाठिशी घालण्याचा उद्योग प्रशासन करत आहे. त्यामुळे प्रशासनाच्या कार्यपध्दतीवरच प्रश्‍नचिन्ह निर्माण झाले आहे.

पिंपरी-चिंचवड महापालिकेच्या प्रशासकीय सेवेत कार्यरत असलेल्या एका वरीष्ठ लिपिकाची पोलीस चौकशी सुरू आहे. त्यांच्या बेकायदेशीर धंद्यांची माहिती गोळा करण्यासाठी लाच लुचपत प्रतिबंधक विभागाने पिंपरी-चिंचवड महापालिका प्रशासनाकडे त्यांच्या मालमत्तेची माहिती मागितली आहे. पालिकेने दिलेले मासिक वेतन, भत्ते,बोनस, शासकीय कर्ज व त्याची परतफेड, जीपीएफ कर्ज व त्याची परतफेड याबाबतची माहिती मागितली आहे. परंतु, ही माहिती देण्यास पालिका प्रशासनाकडून विलंब लावत आहे. ही माहिती दडवून पालिका प्रशासन संबंधित लिपिकाला यांना पाठिशी घालत आहे काय? असा प्रश्‍न उपस्थित होत आहे.

चिखली येथील कर संकलन विभागात वरीष्ठ लिपीक पदावर कार्यरत असलेला हे कर्मचारी दररोज कार्यालयीन वेळेत हजेरी लावण्यासाठी कार्यालयात येतात. हजेरी लावल्यानंतर ते त्यांचे खासगी उद्योग पाहण्यासाठी निघून जातात. त्यांची दैनंदिनी अशीच निघून जात असल्याच्या तक्रारी वाढल्या आहेत. हे प्रशासनाला माहिती असताना देखील वरीष्ठ अधिकारी त्यांना पाठिशी घालत आहेत. अशा कर्मचाऱ्यांना काम न करता मासिक वेतन, भत्ते, शासकीय कर्ज आदी तत्सम फायदे दिले जातात. पालिकेच्या पैशावर मस्तवालपणा करणारे कर्मचारी नियमबाह्य पध्दतीचे कामकाज रेटत असल्याच्या तक्रारी आहेत. त्यामुळे अशा कर्मचाऱ्यांवर वेळीच कारवाई होण्याची गरज असताना प्रशासन त्यांना पाठिशी का घालत आहे. त्यामुळे प्रशासनाच्या कामकाजावर संशय निर्माण झाला आहे.

व्हीएस न्यूज– भारताचे दिवंगत राष्ट्रपती डॉ. अब्दुल कलाम यांच्या जयंतीनिमित्त चिंचवड येथील गोदावरी हिंदी विद्यालयात वाचन प्रेरणा दिन विविध उपक्रमांनी साजरा करण्यात आला.

यामध्ये संवाद वाचन, नाट्यीकरण, अभिनय व परिच्छेदाचे प्रात्यक्षिक वाचन करुन दाखवण्यात आले. ग्रंथालयाव्दारे पुस्तके देवून सुमारे एक हजार विद्यार्थ्यांनी सलग एक तास वाचन केले. विद्यार्थ्यांनी आपले अनुभव मांडले. संस्थेचे अध्यक्ष एस. एस. तिवारी यांच्या हस्ते या उपक्रमाचे उद्‌घाटन झाले. प्राचार्य आर. आर. मिश्रा यांनी विद्यार्थ्यांना मार्गदर्शन केले. वाचनाचे महत्त्व त्यांनी भाषणातून विषद केले. तसेच डॉ. अब्दुल कलाम यांच्याविषयी माहिती देत त्यांचा आदर्श घेण्याचे आवाहन केले.

व्हीएस न्यूज - महापालिका व अखिल भारतीय मराठी चित्रपट महामंडळ आणि निळू फुले कला अकादमीच्या संयुक्त विद्यमाने पिंपळे गुरव येथील निळू फुले रंगमंदिर येथे नटसम्राट निळू फुले कला महोत्सवाच्या दुसऱ्या दिवशी “आठवणी निळूभाऊंच्या’ कार्यक्रमाचे आयोजन करण्यात आले. निळू फुले यांच्यासोबत काम केलेल्या कलाकारांनी त्यांच्या विविध आठवणी जाग्या केल्या.

कार्यक्रमात ज्येष्ठ अभिनेते भालचंद्र कुलकर्णी, चेतन दळवी, ज्योती सुभाष, शांता तांबे, विलास रकटे, सिंधू काटे, लीला पवार, वसंत इंगळे, तसेच निळू फुलेंचे बंधू अशोक फुले यांनी देखील सहभाग घेतला. या सर्व कलाकारांनी अष्टपैलू निळूभाऊ उलगडून सांगितले. कार्यक्रमासाठी अखिल भारतीय मराठी चित्रपट महामंडळाचे अध्यक्ष मेघराज राजे भोसले, प्रवीण तुपे, राजेंद्र राजापुरे आदी उपस्थित होते.

भालचंद्र कुलकर्णी म्हणाले की, “निळू फुलेंचा ध्यास, श्वास आणि विश्वास हा अभिनय होता. त्यांनी आकाशाला गवसणी घातली तरी देखील ते मातीला कधी विसरले नाहीत. कोल्हापूर शहरातील निळू फुलेंचा पहिला मित्र मी होतो असे म्हणत भालचंद्र कुलकर्णी यांनी जगदीश खेबुडकरांनी एक शिक्षक एक विदूषकसाठी लिहिलेला मुक्तछंद सादर केला.

आठवणी निळूभाऊंच्या या कार्यक्रमात निळू भाऊंचे वाचन प्रेम सर्वांनी उजागरीत केले. त्यांनी आपल्या अगाध वाचनातून माणसे ओळखली. इस्लामपूरमध्ये एका नाटकाच्या प्रयोगावेळी झालेला प्रेक्षकांचा दंगा पन्नास पोलिसांना आवरता आला नाही, तो दंगा निळू फुले यांनी केवळ एका शब्दात शांत केला. आटपाडीसारख्या दुष्काळी तालुक्‍यात त्यांनी यशस्वी पाणी चळवळ सुरू केली.

कोणत्याही चित्रपटात काम केल्यानंतर पैशांसाठी कधीही त्यांनी तगादा लावला नाही, अशी आठवण वसंत इंगळे यांनी सांगितली. कुठल्याही स्तरात फिट होणारा माणूस म्हणजे निळू फुले. सहकलाकारांसाठी तळमळ वाटणारा माणूस. समाजासाठी समर्पणभाव त्यांच्याकडे होता. ै”मी’पणा त्यांनी कधीच दाखविला नाही, अशा आठवणी अभिनेता चेतन दळवी यांनी सांगितल्या. कार्यक्रमाचे सूत्रसंचालन राज काझी यांनी केले. कार्यक्रमानंतर नेरुळ, कुडाळ येथील श्री देव कालेश्वर दशावतार नाट्य मंडळाने दशावतार नाटक सादर केले. संपूर्ण दिवसभर प्रेक्षक नाट्यगृहात खिळून राहिला.

व्हीएस न्यूज - चिंचवड वृत्तपत्र विक्रेत्या मंडळीचा कौटुंबिक दिवाळी स्नेह मेळावा मोठ्या उत्साहात पार पडला. वाचन संस्कृती वाढीस लागावी, या हेतूने या कार्यक्रमात उपस्थितांना पुस्तकांचे वाटप करण्यात आले. या माध्यमातून या विक्रेत्यांनी समाजासमोर एक आदर्श ठेवला आहे.

मोहननगर येथील महादेव मंदिर सभागृहात शनिवारी (दि. 14) सायंकाळी हा कार्यक्रम पार पडला. ज्येष्ठ विक्रेते सदाशिव जंगम, भालचंद्र देशपांडे, प्रशांत काळे, भानुदास हिवराळे, मनोज काकडे, सीमा टेपाळे यांच्या हस्ते दीपप्रज्ज्वलन करून कार्यक्रमाला सुरुवात झाली. अभिमान वीटकर, श्रुती दळवी, संस्कृती सस्ते, विलास जंगम, कुणाल भराटे यांनी सांस्कृतिक कार्यक्रम सादर केले.

या कार्यक्रमाला वृत्तपत्र विक्रेत्यांच्या मातांकडून वृत्तपत्र विक्रेत्यांचा सत्कार करण्यात आला. सरोजकुमार ढमाले, महावीर भराटे यांनी मनोगत व्यक्त केले. या कार्यक्रमाला कामगार नेते इरफान सय्यद, प्रवीण जाधव, राहुल कोल्हटकर, पुणे वृत्तपत्र विक्रेता संघाचे अध्यक्ष विजय पारगे, दत्ता पिसे, अरूण निवंगुणे, यतीन चौधरी, प्रवीण माने, कृष्णकांत कांबळी, शंकर हारपुडे, विनय भावसार, नंदकुमार नंदगावे, अशोक झांजले हे पदाधिकारी तसेच सर्व वृत्तपत्रांचे व्यवस्थापक उपस्थित होते.

कार्यक्रम यशस्वी करण्यासाठी सूर्यकांत शिनकर, गणेश जाधव, शंकर नामदे, किरण नामदे, अनिल नामदे, प्रकाश कासट, नितीन ठाकूर, अजित रोहकले, मनोज काकडे,बाळू गोरे, शब्बीर आत्तार यांच्यासह चिंचवड विभागातील सर्व वृत्तपत्र विक्रेत्यांनी सहकार्य केले. कार्यक्रमाचे सूत्रसंचालन अनिल दळवी यांनी केले. तर मनोज काकडे यांनी आभार मानले.

व्हीएस न्यूज – गेली पिंपरी-चिंचवड शहराच्या विविध भागातील कचरा काही दिवसांपासून नियमितपणे उचलला जात नसल्याच्च्या निषेधार्थ मनसेने पालिका मुख्यालयासमोर“कचरा फेको’ आंदोलन केले.

याप्रकरणी महापालिका कर्मचारी विलास बाबासाहेब वाबळे (वय 55, रा चऱ्होली) यांनी फिर्याद दिली असून, मनसेचे नगरसेवक व शहराध्यक्ष सचिन चिखले यांच्यावर गुन्हा दाखल करण्यात आला आहे.

शहरातील कचरा वेळेवर उचलला जात नसल्याच्या निषेधार्थ मनसेचे शहराध्यक्ष सचिन चिखले यांच्या नेतृत्वाखाली शुक्रवारी (दि. 13) महापालिका मुख्यालयाच्या प्रवेशद्वारासमोर कचरा टाकण्यात आला. या आंदोलनात रुपेश पटेकर, राजु भालेराव, अश्‍विनी बांगर, सीमा बेलापुरकर, मयूर चिंचवडे व इतर 25 कार्यकर्ते सहभागी झाले होते. सार्वजनिक रस्ता अडवून, मोठमोठ्याने घोषणा देत कचरा टाकून सार्वजनिक ठिकाणी संसर्ग निर्माण होईल, या हेतूने दोन पोती कचरा आणून टाकत सुरक्षा कर्मचाऱ्यांच्या दैनंदिन कामकाजात अडथळा निर्माण केल्याप्रकरणी गुन्हा दाखल केला आहे. पिंपरी पोलीस तपास करत आहेत.