व्हीएस न्यूज - संजय गांधी विधवा व निराधार अनुदान योजनेअंतर्गत पिंपरी मतदारसंघातील 85 महिलांना पेन्शनपत्राचे वाटप माजी गृहमंत्री सुशिलकुमार शिंदे यांच्या हस्ते करण्यात आले.
संत रविदास विचार समितीच्या वतीने प्राधिकरण येथे आयोजित चर्मकार समाजाच्या सामुदायिक विवाह सोहळयासाठी शिंदे येथे आले होते. याप्रसंगी खासदार श्रीरंग बारणे, आमदार गौतम चाबुकस्वार, संजय गांधी समितीचे अध्यक्ष नितीन घोलप आदी मान्यवर उपस्थित होते.
समाजातील उपेक्षित वर्गाला या योजनेतून मिळणारे आर्थिक सहाय्य त्यांना सक्षम करण्यासाठी महत्त्वाचे पाऊल असल्याचे सुशिलकुमार शिंदे यांनी यावेळी म्हटले.
दरम्यान, संजय गांधी अनुदान प्रकरणे तातडीने मंजूर करण्याचे शासनाचे आदेश असून महिलांनी आपले प्रस्ताव जमा करावेत असे आवाहन घोलप यांनी केले आहे.

व्हीएस न्यूज - महापालिकेच्या क प्रभागाअंतर्गत महात्मा फुले पुतळ्यासमोर ड्रेनेज लाईन टाकण्याचे काम सुरू आहे. या कामाच्या रस्ते खोदाईमुळे बीएसएनएलची केबल तुटल्याने मंगळवारी दुपारी बारापासून सायंकाळी सहा वाजेपर्यंत पीजे चेंबर्ससह गांधीनगर परिसरातील टेलिफोन व इंटरनेट बंद होते. याबाबत बीएसएनएलला कोणतीही पुर्वसुचना देण्यात आली नव्हती. पालिकेच्या अशा निष्काळी अधिकाऱ्यावर कारवाईची मागणी नागरिकांमधून होत आहे.

पिंपरी-चिंचवड महापालिकेच्या क प्रभागाच्या ड्रेनेज विभागाअंतर्गत पिंपरीतील महात्मा फुले पुतळ्यासमोर ड्रेनेज लाईन टाकण्याचे काम सुरू आहे. यासाठी मुख्य रस्ता खोदण्यात येत आहे. परंतू, या खोदाईमध्ये बीएसएनएलसह आदी केबल तुटल्या. यामुळे पीजे चेंबर्स व गांधीनगर परिसरातील बीएसएनएलची केबल तुटून टेलिफोन सेवा व इंटरनेट सेवा बंद झाली होती. पीजे चेंबर्समध्ये विविध वर्तमान पत्रांच्या कार्यालयासह आदी महत्वाची कार्यालये आहेत. या सर्व कार्यालयाची टेलिफोन व इंटरनेट सेवा ठप्पा झाली होती. याची खराळवाडीतील भारत संचार निगम लि कार्यालयास माहिती मिळाल्याने बीएसएनएलच्या अधिकाऱ्यांनी घटनास्थळी धाव घेत त्वरीत दुरूस्तीचे काम हाती घेतले. परंतू, या कामाची बीएसएनएलला कल्पना दिली. त्यामुळे पालिकेच्या ड्रेनेज विभागाच्या संबंधित अभियंत्यावर कारवाई करण्याची मागणी नागरिकांनी केली आहे.

याबाबत बीएसएनएलचे खराळवाडी येथील मंडळ अभियंता आर. आर. कातरकी म्हणाले की, महापालिकेने रस्ते खोदाई करण्यापुर्वी बीएसएनएल किंवा अन्य कोणती केबल लाईन गेली आहे का?याची माहिती घेणे गरजेचे आहे. परंतू, पालिकेचे अधिकारी अशी कधीच माहिती घेत नाहीत, अथवा संबंधितांना पुर्व कल्पनाही देत नाहीत. त्यामुळे पालिकेच्या ड्रेनेज खोदाईमुळे बीएसएनएलचे केबल तुटून मोठे नुकसान झाले. तसेच बीएसएनएल ग्राहकांनाही त्रास झाला. यापुढे तरी रस्ते खोदाई करताना महापालिकेच्या अधिकाऱ्यांनी काळजी घ्यावी.

व्हीएस न्यूज - खेळताना पाण्याच्या टाकीत पडल्यामुळे एका सात वर्षीय बालकाचा मृत्यू झाला. ही घटना घरकुल चिखली येथे मंगळवारी (ता.२७) सायंकाळी घडली.

अथर्व नितीन पाटील (वय ७, रा.घरकुल, चिखली) असे मृत्युमुखी पडलेल्या बालकाचे नाव आहे. निगडीचे वरिष्ठ पोलीस निरीक्षक विजयकुमार पळसुले यांनी दिलेल्या माहितीनुसार अथर्व हा आपल्या इमारतीबाहेर खेळत होता. त्यावेळी त्याची आई देखील इमारतीच्या बाहेर बसली होती. खेळताना आपला मुलगा अचानक कुठे दिसेनासा झाल्याने त्याच्या पालकांनी शोध घेण्यास सुरुवात केली. घरकुलमधील इतर नागरिकही अथर्वच्या शोधासाठी धावाधाव करू लागले.

याबाबत पोलिसांना माहिती मिळाल्यावर पोलीस घटनास्थळी दाखल झाले. त्यांनी बेपत्ता मुलाचा शोध घेण्यास सुरुवात केली. त्यानंतर घरकुलच्या बाजूला असलेल्या एका बांधकाम साइटवर पाण्याच्या टाकीत चप्पल तरंगतांना आढळून आली. यामुळे पोलिसांनी पाण्याच्या टाकीत उतरून शोध घेतला असता अथर्व बेशुद्ध अवस्थेत मिळून आला. त्यास त्वरित वायसीएम रुग्णालयात दाखल केले असता उपचारापूर्वीच त्यांचा मृत्यू झाल्याचे डॉक्टरांनी घोषित केले. याबाबत अधिक तपास निगडी पोलिस करीत आहेत.

आमदार महेश लांडगे यांचे आयुक्तांना निवेदन

व्हीएस न्यूज - भगवान महावीर जयंती निमित्त शहरातील सर्व कत्तलखाने बंद ठेवण्यात यावेत. महावीर जयंती अंहिसेच्या मार्गाने साजरी व्‍हावी. सर्व मुक जनावरांची होणारी कत्तल थांबविण्याकरीता शहरातील मटण, चिकन व मांस विक्रेते यांनी आपली दुकाने बंद ठेवावीत, असे आवाहन भाजपचे सहयोगी सदस्य आमदार महेश लांडगे यांनी केले आहे.

याबाबत महापालिका आयुक्त श्रावण हर्डीकर यांना निवेदन दिले आहे. त्यामध्ये म्हटले आहे की, महावीर स्वामी यांनी ‘जिओ और जीने दो’ हा संदेश संपूर्ण जगाला दिला. याच अनुषंगाने या दिवशी शहरातील सर्व कत्तलखाने आणि मांस विक्री दुकाने बंद ठेवण्याची गरज आहे. पिंपरी चिंचवड शहरामध्ये सर्वधर्मीय नागरिकांचे वास्तव्य आहे. जैन बांधवही या शहरात गुण्या गोविंद्याने राहत आहेत. सर्व समाजबांधव आपआपले सण-उत्सव साजरे करतात. त्यामुळे जैन बांधवांचे श्रद्धास्थान असलेल्या महावीर जयंतीनिमित्त सर्व समाजबांधवांनी एकोपा दाखवला पाहिजे.

ब्रिटीश काळापासून महावीर जयंतीला देशातील कत्तलखाने बंद ठेवले जात होते. मात्र मुंबई उच्च न्यायालयाच्या निर्णयानंतर राज्यातले सर्व कत्तलखाने महावीर जयंतीला सुरू ठेवण्याची परवानगी दिली होती. मात्र, तरीही जैन बांधवांच्या भावनांचा विचार करुन सर्व समाज बांधवांनी मांस विक्री आणि कत्तलखाने बंद ठेवावे. त्याबाबत महापालिका प्रशासनाने पुढाकार घेवून संबंधित विक्रेत्यांना आवाहन करावे, अशी मागणी आमदार महेश लांडगे यांनी केली आहे.

भोसरीत अहिंसा रॅलीचे आयोजन…

दरम्यान, पिंपरी चिंचवड जैन महासंघाने भगवान महावीर जयंतीनिमित्त दि. २३ मार्चपासून २९ मार्चपर्यंत विविध कार्यक्रमांचे आयोजन केले आहे. कासारवाडी येथील पगारिया सभागृहात अहिंसा सप्ताह व नवकार महामंत्र जपाने उत्सवाचा शुभारंभ झाला. दि.२९ रोजी दिगंबर जैन मंदिर निगडी अरिहंत व जैन मंदिर चिंचवड, रामस्मृती लॉन्स भोसरी येथे रक्‍तदान व नेत्रदान शिबीर, मोहननगर येथे जैन वसतीगृह व मोरया मंदिर परिसरातील समरथ संस्था गुरुकुल येथे फळ वाटप होणार आहे. तसेच, दि.२९ मार्चला महावीर जयंतीच्या मुख्य दिवशी दुपारी चार वाजता निगडी येथे जैन मंदिरात अहिंसा रॅली व अंकुशराव लांडगे सभागृह भोसरी येथे सायं.६ वाजता समारोप होणार आहे. यावेळी नागरिकांनी उपस्थित राहण्याचे आवाहन जैन महासंघाचे अध्यश वीरेंद्र जैन यांनी केले आहे.

व्हीएस न्यूज - ह्युंदाईच्या ग्राहकांसाठी २७ मार्च ते ५ एप्रिल दरम्यान कंपनीच्या वतीने ‘फ्री कार केअर क्लिनिक’ (चेकअप) सप्ताहामध्ये कारची मोफत तपासणी करुन दिली जणार आहे. कुंदनच्या चिंचवड़ थरमॅक्स चौक, चाकण, पिंपळे सौदागर आणि बावधन शोरूममध्ये मगंळवारी उद्घाटन करण्यात आले असून या ठिकाणी सेवा मिळणार आहे.

देशातील अग्रगण असणाऱ्या आणि ऑटोमोबाइल क्षेत्रात दुसऱ्या स्थानावर असलेल्या ह्युंदाई मोटर इंडिया लि.चे देशभरात २६ व्या ‘फ्री कार केअर क्लिनिक’ची घोषणा केली आहे. ग्राहकांना याचा चांगला फायदा होणार आहे. हा ग्राहक जोडणी हा उपक्रम २७ मार्च ते ५ एप्रिल २०१८ दरम्यान देशभरातील सर्व सव्हिस सेंटरवर (सेवा आउटलेट) आयोजित केला आहे. २६ व्या FCCC चे उद्घाटन चिंचवड़ थरमॅक्स चौकातील कुंदन कार प्रायव्हेट लिमिटेड या शोरूम मध्ये निगडी पोलिस ठाण्याचे वरिष्ठ निरीक्षक विजय पळसुळे व कुंदन ह्युंदाईचे संचालक हितेश चड्डा, राजकुमार चड्डा यांच्या हस्ते उद्घाटन झाले.

मोफत कार केअर क्लिनिक मध्ये इंजिन, ट्रान्समिशन, इलेक्ट्रिकल सिस्टिम, अंडर-बॉडी, एसीचे चेकिंग केले जाणार आहे. यासोबत ग्राहकाना स्पेयर पार्ट्स, लेबर चार्ज आणि अन्य सेवांवर आकर्षक सवलत दिली जनार आहे. तसेच वॉरंटी आणि रोड साइड असिस्टन्स प्रोग्रॅमसाठीही आकर्षक सवलत देऊ केली आहे. ३ वर्षांपेक्षा जास्त दिवसांची वाहने असलेल्या ग्राहकांना खास सवलत आहे. हितेश चड्डा म्हणाले, उन्हाळा सुरु झाला आहे. त्यामुळे वाहनांची वेळच्या वेळी देखभाल दुरुस्ती करणे गरजेचे आहे. आम्ही कुंदनच्या चिंचवड, पिंपळे सौदागर, चाकण आणि बावधन शोरूम मध्ये ग्राहकांना आकर्षक सवलत देत आहे, त्याचा फायदा सर्वानी घ्यावा.

पळसुळे म्हणाले, ह्युंदाई कंपनीच्या कार चांगल्या आहेत. आपल्याकडील कारची वेळेवर देखभाल केल्यास तिचे आयुष्य वाढते. सध्या सुरु असलेल्या ह्युंदाई ‘फ्री कार केअर क्लिनिक’चा फायदा करुन घ्यावा

व्हीएस न्यूज - तीन दिवसात बेपत्ता मुलीचा शोध घेणाऱ्या वाकड पोलीस ठाण्यातील अधिकाऱ्यांचा शिवसेना रहाटणी काळेवाडी विभागाच्या वतीने सत्कार करण्यात आला.

लग्नाची तारीख जवळ येत असल्याचे पाहुन आर्थिक परिस्थितीमुळे हतबल झालेली इयत्ता बारावीची परीक्षा दिलेली विद्यार्थिनी राहत्या घरातून न सांगता निघुन गेली होती. ही गोष्ट आई-वडिलांना समजल्यानंतर त्यांना मोठा धक्का बसला. मात्र, वाकड पोलिसांनी तपासाची चक्रे फिरवून तीन दिवसात मुलीला सुखरुप आई-वडिलांच्या स्वाधीन केले.

यानिमित्त शिवसेना प्रभाग प्रमुख युवराज दाखले यांच्या हस्ते पोलीस अधिकाऱ्यांचा सत्कार करण्यात आला. यावेळी शिव व्यापारी सेना उपशहर प्रमुख गणेश आहेर, गणेश पाडुळे, भरत महानवर,नरसिंग माने, रविकिरण घटकार, भालचंद्र फंडतळे आदी शिवसैनिक उपस्थित होते.

महाराष्ट्र संघाला सांघिक विजेतेपद

व्हीएस न्यूज - पिंपरी चिंचवड महानगरपालिकेने आयोजित केलेल्या 'महापौर भारत श्री 2018' या राष्ट्रीय शरीरसौष्ठव स्पर्धेमध्ये ‘पिंपरी चिंचवड महापौर चषक भारत श्री 2018’चा किताब आयबीबीएफएफच्या मुरलीकुमार याने चॅंपियन ऑफ चॅंपियनचा किताब पटकाविला. पुरुष गटात जम्मू - कश्मिरचा राजकुमार सर्वसाधारण विजेता ठरला. महाराष्ट्राला सांघिक विजेतेपद मिळाले.

माजी महापौर संजोग वाघेरे पाटील महापौर चषक राष्ट्रीय शरीरसौष्ठव भारत श्री 2018 या स्पर्धेचा बक्षिस वितरण समारंभ चिखली जाधववाडी येथे शनिवारी (दि. 24 मार्च) महाराष्ट्र बॉडी बिल्‍डर्स असोसिएशनचे अध्यक्ष आमदार महेश लांडगे यांच्या उपस्थितीत संपन्न झाला.

इंडियन बॉडी बिल्‍डिंग ॲण्ड फिटनेस फेडरेशन यांच्या मान्यतेने पिंपरी चिंचवड महापालिका क्रीडा विभाग, महाराष्ट्र बॉडी बिल्‍डर्स असोसिएशन यांच्या व पिंपरी चिंचवड अॅमेच्युअर बॉडी बिल्‍डिंग असोसिएशन यांच्या सहकार्याने करण्यात आले होते. या स्पर्धेचे आयोजन महाराष्ट्र बॉडी बिल्‍डर्स असोसिएशनचे अध्यक्ष आमदार महेश लांडगे यांच्या मार्गदर्शनाखाली करण्यात आले होते. बक्षिस वितरण समारंभात क्रीडा समितीचे सभापती लक्ष्मण सस्ते, आयबीबीएफएफचे सचिव डॉ. संजय मोरे, अभिनेता सिध्दांत मोरे, महाराष्ट्र बॉडी बिल्डिंग असोसिएशनचे सचिव राजेंद्र सातपुरकर, खजिनदार राजेश सावंत, पिंपरी चिंचवड अध्यक्ष राजेंद्रसिंग वालिया, नगरसेविका अश्विनी जाधव, राहुल जाधव, वसंत बोराटे, नितीन बो-हाडे, उद्योजक कार्तिक लांडगे, सुभाष जाधव, संयोजक संतोष जाधव, सागर हिंगणे, सहाय्यक आयुक्त मनोज लोणकर आदी उपस्थित होते. स्पर्धेत ‘आयबीबीएफएफ’च्या आवाश खान याला बेस्ट पोझर तर महाराष्ट्राच्या दिनेश कांबळे याला मोस्ट इम्प्रूव्हड किताबाने गौरविण्यात आले. सांघिक गटात दिल्लीचा संघ उपविजेता ठरला.

स्पर्धेचे प्रथम, व्दितीय, तृतीय क्रमांकाचे निकाल पुढीलप्रमाणे.

55 किलो : अरुण दास (आयबीबीएफएफ), माहेश्वर साहू (ओडिसा), जहीर अहमद (महाराष्ट्र);

60 किलो : पी. संतोष कुमार (कर्नाटक), अंकीत सैनी (दिल्ली), जगेश दाईत (महाराष्ट्र);

65 किलो : स्वप्नील नरवारकर (आयबीबीएफएफ), कमल गोस्वामी (दिल्ली), किरण शिंदे (महाराष्ट्र);

70 किलो : दिनेश कांबळे (महाराष्ट्र), महेश नेगी (दिल्ली), आशिष माने (महाराष्ट्र);

75 किलो : एस. पद्मनाथम (आयबीबीएफएफ), सुमन दास (प. बंगाल), मनजित सोखी (दिल्ली);

80 किलो : राजेश अरले (महाराष्ट्र), संजय सैनी (हरियाना), अर्जिक्य रेडेकर (महाराष्ट्र);

85 किलो : विघ्नेश डी (आयबीबीएफएफ), प्रमोद सिंग (महाराष्ट्र), शाबिद व्ही.पी. (केरळ);

90 किलो : अवास खान (आयबीबीएफएफ), किरत पाल सिंग (पंजाब), हरमीत सिंग (महाराष्ट्र);

100 किलो : मुरली कुमार (आयबीबीएफएफ), प्रवीण कुमार (उत्तर प्रदेश), अभिजित दास (आसाम);

100 किलो पुढील : विनय कुमार (दिल्ली), अनीश, हरिप्रसाद (दोघेही आयबीबीएफएफ);

पुरुष फिजिक (170 सीएम) : रावेश प्रधान (गोरखालँड), वरुण मल्होत्रा (दिल्ली), निखिल मकवाना (हरियाना);

पुरुष फिजिक (170 सीएम): राज कुमार (जम्मू - काश्मीर), अर्जुन सिंग (दिल्ली), प्रवीण कुमार (हरियाना);

वुमेन्स फिजिक (खुला गट) : डॉ. मृदूला (दिल्ली), करिश्मा अरोरा (दिल्ली), करुणा वाघमारे (महाराष्ट्र);

वुमेन्स फिजिक (खुला गट) : निशा भोयर (छत्तीसगड), करिश्मा पारिख (गोवा), अनन्या रॉय (पश्मिच बंगाल);

पुरुष क्लासिक (खुला गट): किसन तिवारी (विदर्भ), संगीत नाथ (पं. बंगाल), महम्मद (उत्तर प्रदेश);

यांना प्रमाणपत्र, स्मृतिचिन्ह देऊन गौरविण्यात आले. तसेच यावेळी गुणवंत खेळाडू गिरीजा लांडगे, विराज लांडगे, योगेश जाधव, प्रसाद सस्ते, बापू शिंदे, पुजा शेलार, विकी बनकर, तेजस बटवाल,शुभदा लोखंडे, पृथ्वीराज इंगळे, विक्रांत लांडगे, युवराज आल्हाट, प्रणव लोंढे, अमिश्री राजपूत आदींचा सत्कार करण्यात आला.

व्हीएस न्युज - कात्रज देहूरोड बायपास रोडने दुचाकीवरून जात असलेल्या महिलेला एका दुचाकीस्वाराने लोखंडी रॉडने मारहाण केली. यामध्ये महिला गंभीर जखमी झाली आहे. हा प्रकार शुक्रवारी सायंकाळी सहाच्या सुमारास घडला. सुरुवातीला या प्रकरणी देहूरोड पोलीस ठाण्यात गुन्हा नोंदवण्यात आला. त्यानंतर तो झिरो क्रमांकाने हिंजवडी पोलिसांकडे वर्ग करण्यात आला.
याबाबत संगीता महेश झेंडे (वय 32, रा. झेंडे मळा, देहूगाव) यांनी अज्ञात दुचाकीस्वाराविरोधात फिर्याद दिली आहे.
पोलिसांनी दिलेल्या माहितीनुसार, फिर्यादी संगीता झेंडे शुक्रवारी सायंकाळी सहाच्या सुमारास देहूगावकडून कात्रजच्या दिशेने बायपास रोडने जात होत्या. व्ही ऍण्ड पी नर्सरी जवळ एका अज्ञात दुचाकीस्वाराने (एम एच 12, 6639) संगीता यांच्या दंडावर लोखंडी रॉड मारला. यामध्ये संगीता गंभीर जखमी झाल्या. दुचाकीस्वाराने डोक्यावर हेल्मेट घातले होते. त्याच्याकडे काळ्या रंगाची स्पोर्ट बाईक होती. अंगावर हिरवा टी-शर्ट होता. जखमी संगीता झेंडे यांना देहूरोड येथील एका रुग्णालयात दाखल करण्यात आले असून त्याच्यावर उपचार सुरु आहेत. याबाबत सुरुवातीला देहूरोड पोलीस ठाण्यात अज्ञात दुचाकीस्वाराविरोधात गुन्हा नोंदवण्यात आला. त्यानंतर हा गुन्हा हिंजवडी पोलिसांकडे झिरो क्रमांकाने वर्ग करण्यात आला. हिंजवडी पोलीस पुढील तपास करीत आहेत.

व्हीएस न्युज - पूर्वी झालेल्या भांडणाच्या कारणावरून सराईत गुन्हेगाराने एकाच्या अंगावर मोटार घालून जीवे मारण्याचा प्रयत्न केला. ही घटना नेरे येथे रविवारी पहाटे साडेतीन वाजता घडली. याप्रकरणी सराईत गुन्हेगारासह दोनांना हिंजवडी पोलीसांनी अटक केली आहे.
रूपेश दत्तात्रय तावरे (वय-24) आणि राहुल एकनाथ पाटील (वय-25 दोघेही रा. नेरे ता. मुळशी) अशी अटक केलेल्या आरोपींची नावे आहेत. अजित भालचंद्र पाटील असे जखमी व्यक्तीचे नाव आहे. याबाबत त्यांचा भाऊ विशाल भालचंद्र पाटील (वय 27) यांनी हिंजवडी पोलीस ठाण्यात फिर्याद दिली आहे.
पोलीसांनी दिलेल्या माहितीनुसार, आरोपी तावरे हा सराईत गुन्हेगार आहे. अजित पाटील यांची काही दिवसांपूर्वी आरोपी तावरे आणि राहुल पाटील या दोघांशी भांडणे झाली होती. या भांडणाचा राग मनात धरून आरोपींनी आपापसात संगनमत केले. रविवारी पहाटे साडेतीन वाजताच्या सुमारास फिर्यादी विशाल पाटील व सोसायटीचे सदस्य गप्पा मारत थांबले होते. त्यावेळी त्यांचा भाऊ अजितही तेथे आला. आरोपी तावरे याने त्यांच्या अंगावर मोटार घालून त्यांना जिवे मारण्याचा प्रयत्न केला. याप्रकरणी दोन्ही आरोपींना पोलीसांनी अटक केली आहे.
सहाय्यक पोलीस निरीक्षक एस. पी. सोनवणे अधिक तपास करीत आहेत.

व्हीएस न्युज - भरधाव पिकअपने रस्त्यावर थांबलेल्या सफारी मोटारीला जोरदार धडक दिली. यामध्ये पिकअप चालकाचा गंभीर जखमी होऊन उपचारादरम्यान मृत्यू झाला. हा अपघात 8 मार्च रोजी वाकड येथील भुजबळ चौकाजवळ झाला होता.
शंकर धोंडू हाके (वय-59, रा. पंचवटी आरटीओ ऑफिस जवळ, नाशिक) असे मृत्यू झालेल्या पिकअप चालकाचे नाव आहे. याप्रकरणी मनिषकुमार आर्या (वय-33, रा. नेऱ्हे) यांनी वाकड पोलीस ठाण्यात फिर्याद दिली आहे.
पोलीसांनी दिलेल्या माहितीनुसार, फिर्यादी आर्या व त्यांचे मित्र अमोल राऊत 8 मार्च रोजी वाकड येथील भुजबळ चौकाजवळ त्यांची सफारी मोटार रस्त्यावर लावून बोलत थांबले होते. पाठीमागून आलेल्या भरधाव पिकअपने त्यांच्या मोटारीला जोरदार धडक दिली. पिकअप व सफारी मोटारीचेही मोठे नुकसान झाले होते. पिकअप चालक शंकर हाके गंभीर जखमी झाले होते. त्यांचा उपचारादरम्यान मृत्यू झाला.
सहाय्यक पोलीस निरीक्षक व्ही. जी. बिरादार अधिक तपास करत आहेत.