व्हिएस न्युज - सदनिका हस्तांतरणासाठी दोन हजार रुपयांची लाच घेताना पिंपरी-चिंचवड महापालिकेच्या पिंपरीगाव करसंकलन क्षेत्रीय कार्यालयातील कारकुनाला लाचलुचपत प्रतिबंधक विभागाने रंगेहात पकडले. सोमवारी दुपारी तीनच्या सुमारास ही कारवाई करण्यात आली. अमोल चंद्रकांत वाघेरे (वय - 38, रा. धोंडिबा वाघेरे चाळ, पिंपरीगाव, पुणे) असे एसीबीच्या जाळ्यात सापडलेल्या कनिष्ठ कारकुनाचे नाव आहे. याबाबत 45 वर्षीय व्यक्तिने तक्रार दिली आहे. तक्रारदाराने पत्नीच्या नावाने सदनिका घेतली. त्या सदनिकेचे हस्तांतरण करून कर पावती मिळावी, यासाठी अर्ज केला. या कामाच्या मोबदल्यात अमोल वाघेरे याने दोन हजार रुपयांची मागणी केली. याबाबत लाचलुचपत विभागाच्या पुणे विभागाकडे तक्रार करण्यात आली. त्यानुसार एसीबीने सामेवारी सापळा रचला. दोन हजारांची लाच स्वीकारताना अमोल वाघेरे याला रंगेहात पकडण्यात आले. पिंपरी पोलिस ठाण्यात त्याच्याविरोधात गुन्हा दाखल करण्यात आला आहे. पोलिस उपअधीक्षक दत्तात्रय भापकर यांच्या मार्गदर्शनाखाली पोलीस निरीक्षक एस एस घार्गे, पोलीस हवालदार खान, पोलीस नाईक विनोद झगडे यांनी ही कामगिरी केली.

दरम्यान, पिंपरी महापालिकेत 1997 पासून आतापर्यत लाचलुचपत विभागाच्या 22 कारवाया झाल्या आहेत. यातील अनेक जण पुन्हा महापालिका सेवेत कार्यरत झाले आहेत.

व्हीएस न्युज - आयएएसच्या परीक्षेची तयारी करणारा तरुण 100 क्रमांकावर अखेरचा कॉल करुन, पुण्यातून बेपत्ता झाल्याची धक्कादायक घटना समोर आली आहे. या प्रकरणी चतु:श्रुंगी पोलिस ठाण्यात तक्रार नोंदवली असून, पुणे पोलिसांसह मुंबई पोलिस त्याचा शोध घेत आहेत.

रिजॉय जयराजन पन्थोकुलोथू असं तरुणाचं नाव असून, तो गेल्या चार महिन्यांपासून बेपत्ता आहे. मूळचा केरळचा रहिवासी असलेला 27 वर्षीय रिजॉय बीएससी झाला आहे. रिजॉय आयएएस परीक्षेची तयारी करत होता.

लग्नानंतर रिजॉय पुण्यात पत्नीसोबत राहत होता. मात्र,लग्नाच्या सहा महिन्यांतच त्यांनी परस्पर सहमतीने घटस्फोटासाठी अर्ज केला. मात्र तेव्हापासून तो तणावात होता. त्याचा भाऊ झिनॉयही पुण्यात राहतो. तो पुण्याच्या राष्ट्रीय रासायनिक प्रयोगशाळेत नोकरीला आहे.

15 नोव्हेंबर रोजी भावाचा रिजॉयसोबत संपर्क झाला. त्याने त्याला नाश्ता करण्यासाठी घरी बोलावलं. रात्रीचं जेवण सोबत करु, असं सांगून रिजॉयने फोन ठेवला. वडिलांसोबतही त्याचं बोलणं झालं. जेवणासाठी रात्री उशिरापर्यंत रिजॉय घरी न आल्याने, त्याच्या भावाने शोधाशोध केली. अखेर भावाने चतु:श्रुंगी पोलिस ठाण्यात रिजॉय बेपत्ता झाल्याची तक्रार दिली.

झिनॉयने ‘एबीपी माझा’ला दिलेल्या माहितीनुसार, पुणे सायबर पोलिसही या प्रकरणाचा तपास करत होते. त्यांच्या तपासात रिजॉयने अंधेरीतून 100 क्रमांकावर अखेरचा कॉल केला. तो कॉल 40 सेकंद सुरु होता. मात्र, त्यानंतर तो नॉट रिचेबल झाला. त्यामुळे रिजॉयला शोधण्याचं आव्हान मुंबई आणि पुणे पोलिसांसमोर आहे.

व्हीएस न्युज - ब्लॅकमेल करून सतत पैशांची मागणी करणाऱ्या वारजे माळवाडी येथील तरुणीचा प्रियकराने गळा आवळून खून केल्याचा धक्कादायक प्रकार समोर आला आहे. खून केल्यानंतर प्रियकराने मृतदेह वाघजाई डोंगरात नेऊन पेट्रोल टाकून जाळला. तरुणी गायब झाल्यामुळे वारजे माळवाडी पोलिसांकडून तपास सुरू असताना तिचा खून झाल्याचे समोर आले.

प्रेरणा शशिकांत कांबळे (वय १९, रा. शिवणे, वारजे माळवाडी) असे खून झालेल्या तरुणीचे नाव आहे. या प्रकरणी प्रियकर विपुल भवरलाल शहा (वय ३२, रा. गंगा भाग्योदय, माणिकबाग, सिंहगड रोड) याला अटक करण्यात आली आहे. त्याचा साथीदार लहू गोणते (रा. पौड रोड) हा पसार झाला आहे. या प्रकरणी पोलिस शिपाई राजेंद्र खामकर यांनी तक्रार दिली आहे.

पोलिसांनी दिलेल्या माहितीनुसार, आरोपी विपुल शहाचा विवाह झालेला आहे. त्याला एक मुलगा आहे. त्याचे वारज्यात किराणा दुकान आहे. लहू गोणते हा दुकानातील कामगार आहे. तरुणी एका फर्ममध्ये नोकरी करत होती. त्यामुळे त्यांची ओळख झाली. ओळखीचे रूपांतर प्रेमात झाले. गेल्या दोन वर्षांपासून त्यांचे प्रेमसंबंध होते. विपुल हा तिला मागणीनुसार पैसेही पुरवत होता. काही महिन्यांपासून विपुल तिला टाळण्याचा प्रयत्न करत होता. तरुणी विपुलकडे अधूनमधून पैशांची मागणी करत होती. १५ मार्चला विपुलने तरुणीला फिरायला जायचे असल्याचे सांगितले. दुपारी तीन वाजण्याच्या सुमारास ती आल्यानंतर कारमधून विपुल, त्याचा कामगार लहू आणि प्रेरणा तिघे गेले. त्यानंतर ते वाघजाई डोंगर भागात आल्यानंतर तेथे काही वेळ थांबले. त्यावेळी प्रेरणाने विपुलला 'तू माझ्यापासून लांब पळतो,' अशी तक्रार केली. त्यावेळी विपुलने तू मला ब्लॅकमेल का करतेस असे म्हणून वाद सुरू केला. या वादातून विपुलने प्रेरणाचा दोरीने गळा आवळून खून केला. त्यानंतर दोघांनी मिळून तिचा मृतदेह झाडीत नेला. त्या ठिकाणी पेट्रोल टाकून तिचा मृतदेह जाळला.

व्हीएस न्युज - कोळी बांधवांच्या पालखी मिरवणुकी दरम्यान तीन वाहतूक पोलीस आणि दोन वार्डनला जमावाने मारहाण केल्याची घटना लोणावळा येथे आज सायंकाळी सहाच्या सुमारास घडली. हा प्रकार लोणावळ्यातील कुमार चौकात घडला. याप्रकरणी लोणावळा शहर पोलिसांनी तिघांना अटक केली आहे.

पोलीस हवालदार आनंद देवेंद्र रावण, पोलीस शिपाई सि.एफ. गव्हाणे, जिवन आंकुश गवारी, वार्डन प्रकाश मराठे, दर्शन गुरव यांना मारहाण करण्यात आली. याप्रकरणी आक्षय गावडे (वय- 24, रा. सावरकर नगर, ठाणे), प्रतिक साईनाथ पाटील (वय -28, रा. बालकुंभ, ठाणे) आणि दया माणिक पाटील (वय -23, रा. ठाणे) अशी अटक करण्यात आलेल्या आरोपींची नावे आहेत.

कोळी बांधवांची आज पालखी मिरवणुक निघाली होती. कोणताही अनुचित प्रकार घडू नये यासाठी पोलिसांचा बंदोबस्त ठेवण्यात आला होता. मिरवणुक लोणावळ्यातील कुमार चौकात आली असता या ठिकाणी पोलिसांनी त्यांना यु टर्न घेण्यास मनाई केली. वाहतूकीला आडथळा निर्माण होणार असल्याने पोलिसांनी त्याना यु टर्न घेण्यास मनाई केली. त्यावेळी काही कोळी बांधवांनी पोलिसांशी हुज्जत घालण्यास सुरुवात केली. त्याचवेळी पाठिमागून आलेल्या काही कोळी बांधवांनी पोलिसांच्या अंगावर गाडी घातली. पोलिसांनी त्यांना गाडी बाजूला घेण्यास सांगून कारवाई करणार असल्याच सांगितले. या वरुन चिडलेल्या काही कोळी बांधवांनी दोन पोलिसाना धक्काबुक्की करण्यास सुरुवात केली.

हा सर्व प्रकार कुमार चौकात सुरु असताना त्या ठिकाणी पोलिसांच्या मदतीसाठी असलेले दोन वार्डन मदतीसाठी धाऊन आले. चिडलेल्या काही कोळी तरुणांनी दोन पोलीस आणि दोन वार्डन यांना मारहाण केली. याप्रकरणी लोणावळा शहर पोलीसांनी तिघांना अटक केली आहे. पुढील तपास पोलीस हवालदार युवराज बनसोडे हे करीत आहेत.

व्हिएस न्यूज - महिलेवर लैंगिक अत्याचार करत त्याचे चित्रीकरण करून ते युट्युबवर अपलोड करणाऱ्या पुणे पोलिस दलातीस कर्मचारी असिफ पटेल याच्यासह दोघांवर कोंढवा पोलिस ठाण्यात बलात्कार बलात्कार व अँट्रॉसिटी कायद्यानुसार गुन्हा दाखल करण्यात आला आहे.

याप्रकरणी पीडित युवतीने कोंढवा पोलिस ठाण्यात फिर्याद दिली आहे. त्यानुसार पोलिस कर्मचारी असिफ पटेल, सनी सुरेश डिंबर व चिराग त्रिवेदी अशा तिघांविरोधात गुन्हा दाखल करण्यात आला आहे.

पिडीत युवती व पटेल यांची ओळख होती. त्याने पिडीतेवर 2009 सालापासून वेळोवेळी बलात्कार केला. तसेच अत्याचार करतानाच्या घटनेचे चित्रीकरण करून ते युट्युबवर अपलोड केले होते. त्यानंतर पटेल व त्याच्या दोन साथीदारांनी तिच्यावर अत्याचार करून जातिवाचक शिवीगाळ करण्यात येत होता.

अखेर या सर्व प्रकाराबाबत वरिष्ठांकडे तक्रार केल्यावक असिफ पटेलला निलंबित करण्यात आले होते. त्यानंतर कोंढवा पोलिस ठाण्यात गुन्हा दाखल करण्यात आला आहे.

व्हिएस न्युज - केएसबी पंप कंपनी व्यवस्थापन आणि केएसबी मजदूूर युनियन यांच्यात नुकताच वेतनवाढीचा करार संपन्न झाला. कामगारांना सरासरी दहा हजारांची वाढ दिली असून किमान 66 हजार 910 तर कमाल 79 हजार 772 रूपये कमाल वेतन मिळणार आहे. यामुळे कामगारांनी गुलालाची उधळन करून आंनद साजरा केला.

करारावर कंपनीच्या वतीने व्यवस्थापकीय संचालक राजीव जैन, संचालक गिरीष कुलकर्णी, फारूख भतैना, मिलिंद खाडिलकर, महाव्यवस्थापक नितीन पाटील, रवींद्र सवदीकर यांनी तर कामगारांतर्फे युनियनचे श्याम चक्रनारायण, महासचिव संजय कदम, सतिश सगळगिके, अविनाश कवडे, दत्तात्रेय कारभारी यांनी स्वाक्षरी केल्या.

सोळा महिन्यांच्या प्रदीर्घ चर्चेनंतर व्यवस्थापनाने ही वाढ केली आहे. तीन वर्षांसाठी ही वेनतनाढ असून नोव्हेंबर 2016 ते 2019 पर्यंत लागू असणार आहे. त्याचबरोबर वैद्यकीय खर्च, जेवण, कामगारांच्या मुला-मुलींना शैक्षणिक शिष्यवृत्ती आदी सोई-सुविण्या देण्यात येणार आहेत

व्हिएस न्यूज - पतीच्या उपचाराची कागदपत्रे घेवून जाण्यासाठी आलेल्या पत्नी व मुलाने रूग्णालयात आरडा-ओरड करून एका महिलेचा मोबाईल हिसकावून नेला. याप्रकरणी माय लेकांवर पिंपरी पोलीस ठाण्यात गुन्हा दाखल करण्यात आला आहे. हा प्रकार शुक्रवारी दुपारी दीडच्या सुमारास चिंचवड येथील निरायम रूग्णालयात घडला.

निरायम रूग्णालयातील महिला कर्मचाऱ्याने पिंपरी पोलीस ठाण्यात फिर्याद दिली. अनुज कनवलराज डॅंग (वय-27) व त्याची आई या दोघांवर गुन्हा दाखल केला आहे.

आरोपी महिलेच्या पतीने निरामय रूग्णालयात उपचार घेतले होते. त्या उपचाराची कागदपत्रे घेवून जाण्यासाठी महिला व तिचा मुलगा अनुज शुक्रवारी दुपारी दीडच्या सुमारास रूग्णालयात आले होते. उपचाराची कागदपत्रे उपचार करणाऱ्या डॉक्टरांना मागितली. डॉक्टरांनी कागदपत्रे संबंधित टेबलवरून घेवून जाण्यास सांगितले. टेबलवरील महिलेशी कागदपत्रे घेताना आरोपी महिलेचा व तिच्या मुलाचा वाद झाल्याने दोघांनी फिर्यादी महिलेला शिवीगाळ करत आरडा-ओरड केली. फिर्यादी महिलेच्या हातातील मोबाईल घेवून पसार झाले.

सहाय्यक पोलीस निरीक्षक दिगंबर सुर्यवंशी अधिक तपास करत आहेत.

व्हिएस न्यूज - मित्रासोबत हॉटेलमध्ये जेवणासाठी दुचाकीवरून जाताना भरधाव वेगातील मोटारीने दुचाकीला धडक दिली. दुचाकीवरील दोन मित्रांचा जागीच मृत्यू झाला तर दोघे गंभीर जखमी झाले आहेत. ही घटना पौड रस्त्यावरील वुड्‌स हॉटेलसमोर शनिवारी पहाटे घडली.

मानस उपाध्याय (वय-18, रा. न्याती एम्पायर खराडी) आणि कुणाल शर्मा (वय-18, रा. विमाननगर, पुणे) अशी मृत्यू झालेल्या तरूणाची नावे आहेत. मोटार चालक दर्शन विजय जमदाडे (वय-25, रा. बावधन) याला हिंजवडी पोलीसांनी अटक केली आहे. याप्रकरणी अमरनाथ सिंग राजेशसिंग (वय-18, रा. खराडी) याने हिंजवडी पोलीस ठाण्यात फिर्याद दिली आहे.

पोलीसांनी दिलेल्या माहितीनुसार, फिर्यादी अमरनाथसिंग, धु्रव बिष्णोई, शुभम मदार, कुणाल शर्मा आणि मानस उपाध्याय हे शनिवारी पहाटे दुचाकीवरून भुगांव येथील कॅफ सीओ-2 या हॉटेलमध्ये जेवनासाठी जात होते. हॉटेल वुड्‌स समोर भरधाव वेगाने आलेल्या मोटारीने धु्रव, मानस आणि शुभम व कुणाल यांच्या दोन्ही दुचाकीला जोरदार धडक दिली. यामध्ये कुणाल आणि मानस यांचा गंभीर जखमी होऊन मृत्यू झाला. तर धु्रव व शुभम हेही गंभीर जखमी झाले आहेत. त्यांच्यावर खासगी रूग्णालयात उपचार सुरू आहेत.

मानस, कुणाल, शुभम आणि ध्रुव हे चौघे खराडी परिसरातील एका महाविद्यालयात बीबीएच्या प्रथम वर्षात शिक्षण घेत होते . आरोपी दर्शन जमदाडे हा भांडारकर रोड येथील एका कंपनीत मार्केटींग हेड म्हणून काम करतो. शुक्रवारी रात्री तो जेवन करून होंडा एकॉर्ड कारने बावधन येथील आपल्या घरी निघाला होता. भरधाव वेगात असलेल्या त्याच्या कारने तीन दुचाकींना धडक दिली. ही धडक इतकी भीषण होती की तीनही दुचाकींचा चक्काचुर झाला.

याप्रकरणाचा अधिक तपास हिंजवडी पोलीस ठाण्याचे सहाय्यक पोलीस निरीक्षक आनंद पगारे करीत आहेत.

व्हिएस न्यूज - पायी घरी जाणाऱ्या एका महिलेच्या गळ्यातील दुचाकीवरून आलेल्या चोरट्यांनी 87 हजार रूपये किंमतीचे मंगळसुत्र हिसकावले. महिलेने प्रतिकार केल्याने अर्धे मंगळसुत्र घेवून चोरटे पसार झाले. ही घटना शुक्रवारी सायंकाळी सव्वा पाचच्या सुमारास वाकड पोस्ट कार्यालयाजवळ घडली.

60 वर्षीय महिलेने वाकड पोलीस ठाण्यात फिर्याद दिली आहे. फिर्यादी महिला पती, भावजय व भाऊ यांच्यासह मुंबई येथे जाणाऱ्या गाड्यांचा थांबा बघून पायी घरी जात होती. समोरून आलेल्या दुचाकीस्वार चोरट्यांनी त्यांच्या गळ्यातील मंगळसुत्र जबरदस्तीने हिसकावण्याचा प्रयत्न केला. परंतू, महिलेने प्रतिकार करत मंगळसुत्र पकडून ठेवल्याने अर्धे मंगळसुत्र हिसकावून चोरटे पसार झाले.

सहाय्यक पोलीस निरीक्षक डी. आर. लोंढे अधिक तपास करत आहेत.

व्हिएस न्युज - दुध पिशवी टाकणाऱ्या तरूण दुचाकीस्वाराने ट्रकला धडक दिली. यामध्ये गंभीर जखमी होऊन तरूणाचा जागीच मृत्यू झाला. ही घटना शुक्रवारी सकाळी सात वाजता आकुर्डीतील खंडोबा माळ चौकात घडली.

अनिकेत अण्णासाहेब जकाते (वय-18, रा. दळवीनगर, चिंचवड) असे मृत्यू झालेल्या तरूणाचे नाव आहे. प्रतिक गायकवाड (वय-19) याने निगडी पोलीस ठाण्यात फिर्याद दिली आहे.

पोलीसांनी दिलेल्या माहितीनुसार, फिर्यादी प्रतिक व अनिकेत दुध पिशवी टाकण्याचे काम करतात. शुक्रवारी सकाळी सात वाजता निगडीत दुध पिशवी टाकून खंडोबा माळ चौकातून भरधाव वेगाने जाताना अनिकेतचे दुचाकीवरील नियंत्रण सुटले. दुचाकीने निगडीच्या दिशेने जाणाऱ्या एका ट्रकला धडक दिल्याने अनिकेतचा गंभीर जखमी होऊन मृत्यू झाला. तर पाठीमागे बसलेला प्रतिकही किरकोळ जखमी झाला आहे.

सहाय्यक पोलीस निरीक्षक जी. बी. खारगे अधिक तपास करत आहेत.

व्हीएस न्युज-दारू पिऊन रस्त्याच्या मध्ये बुलेट आडवी लावून थांबलेल्या दोघांना बुलेट काढण्यास सांगितली. यावरून झालेल्या भांडणातून दोघांनी मोटार चालकाला मारहाण केली. चालकाने आपल्या साथीदारांना येऊन आल्यानंतर झालेल्या भांडणातून एका सराईत गुन्हेगारावर 20 मार्च रोजी गोळीबार झाल्याचे पोलीस तपासात निष्पन्न झाले आहे. आरोपीकडून एक पिस्तुल जप्त करण्यात आले आहे. दौला जबार नदाफ (वय-27, रा. पिंपळे-गुरव), अजमत शेख (वय-28, रा. वेताळनगर, चिंचवड), सद्दाम शौकत अली नदाफ (वय-27, रा. बिजलीनगर,चिंचवड) शिवाजी तानाजी सोलनकर (वय-21, रा. मोरयानगर, चिंचवड) अशी अटक केलेल्या आरोपींची नावे आहेत. सराईत गुन्हेगार जयवंत चितळकर याच्यावर गोळीबार झाला होता. त्याचा साथीदार निलेश कोळपे हा मारहाणीत जखमी झाला होता. पोलीसांनी दिलेल्या माहितीनुसार, 20 मार्च रोजी सराईत गुन्हेगार चितळकर व त्याचे साथीदार मकरंद वाल्हेकर, निलेश कोळपे शिवाजी चौकात दारू पिऊन बसले होते. त्यांची बुटेल भरस्त्यात आडवी लावली होती. यावेळी आरोपी दौला नदाफ याचा मामा अजमर शेख मोटारीने जात होते. त्यांनी हॉर्न देऊन बुलेट रस्त्यामधून काढण्यास सांगितली. यावरून चितळकर व कोळपे यांनी शेख यांना शिवीगाळ करत मारहाण केली. त्यामुळे शेख यांनी आरोपी दौला नदाफ, सद्दाम नदाफ, शिवाजी सोलनकर यांना बोलवून घेत चितळकर व कोळपे यांना मारहाण केली. या वादावादीमध्ये चितळकर याने दौला नदाफ याच्यावर पिस्तुल रोखले. त्याचवेळी सद्दामने पिस्तुल हिसकावून घेवून गोळीबार केल्याने चितळकरच्या दंडाला गोळी लागली. दरम्यान, जखमी चितळकर व कोळपे यांनी याबाबत फिर्याद देण्यास नकार दिल्यामुळे पोलिसांना संशय आला. पोलीसांनी स्वतःहून गुन्हा दाखल केला. त्याच अंनुुषगाने पोलीसांनी तपास करत चारही आरोपींना अटक केली. निलेश कोळपे याला अटक करत त्याच्याकडून एक पिस्तुल व चार जिवंत काडतुसे जप्त करण्यात आली आहेत. ही कामगिरी चिंचवड पोलीस ठाण्याचे वरिष्ठ पोलीस निरीक्षक विठ्ठल कुबडे यांच्या मार्गदर्शनाखाली सहाय्यक पोलीस निरीक्षक सतिश कांबळे, फौजदार रघुनाथ सोडनवर, पोलीस नाईक सुधाकर आवताडे, ऋषिकेश पाटील आदींच्या पथकाने केली.