व्हिएस न्यूज - नैसर्गिक वाळूचा तुटवडा असल्याने आणि बेकायदा वाळू उपसा रोखण्यासाठी सार्वजनिक बांधकाम विभागाने वाळू वापराबाबतचे नवीन धोरण स्वीकारले आहे. त्यानुसार या विभागाकडून करण्यात येणारे रस्ते, पूल आणि सरकारी इमारतींसाठी आता शंभर टक्के कृत्रिम वाळू वापरली जाणार आहे. ही वाळू चांगल्या प्रतीच्या खाणीचा दगड भरडून तयार केलेली असणार असून, प्रत्यक्ष बांधकामाच्या ठिकाणी जाऊन संबंधित क्षेत्रीय अधिकाऱ्यांकडून तपासणी केल्यानंतरच कृत्रिम वाळू वापरण्यात येणार आहे.

कृत्रिम वाळूचा वापर करण्यापूर्वी काही अटी घालण्यात आल्या आहेत. त्यामध्ये संबंधित वाळू ही चांगल्या प्रतीचा खाणीचा दगड भरडून तयार केलेली असावी, ही अट आहे. त्या वाळूचा वापर करण्यापूर्वी क्षेत्रीय अधिकाऱ्यांनी बांधकामाच्या ठिकाणी जाऊन तपासणी केल्यानंतरच कृत्रिम वाळूचा वापर करण्याचे बंधन घालण्यात आले आहे. या वाळूचा वापर करताना आवश्यक त्या चाचण्या सरकारी प्रयोगशाळेतून कराव्या लागणार आहेत. सध्या काम सुरू असलेल्या ठिकाणी कृत्रिम वाळू वापरण्यापूर्वी तांत्रिक अधिकाऱ्यांना याबाबतची माहिती देणे बंधनकारक करण्यात आले आहे. कृत्रिम वाळूच्या वापरामुळे आरसीसी बांधकामात जास्त सिमेंट लागल्यास त्याचा अतिरिक्त मोबदला कंत्राटदाराला देण्यात येणार नसल्याचेही परिपत्रकात स्पष्ट करण्यात आले आहे.

सध्या नैसर्गिक वाळूची वाढती मागणी आणि उपलब्ध वाळू याचे प्रमाण व्यस्त आहे. त्यामुळे बेकायदा वाळू उपसा होऊन नदी आणि नाल्यांच्या प्रवाहात बाधा येते. बेकायदा वाळू उपसा रोखण्यासाठी आणि कृत्रिम वाळूचा वापर वाढण्यासाठी सार्वजनिक बांधकाम विभागाने नवीन धोरण स्वीकारले आहे. त्यानुसार आता या विभागाकडून करण्यात येणाऱ्या विकासकामांसाठी​ शंभर टक्के कृत्रिम वाळूचा वापर केला जाणार आहे. याबाबतचे परिपत्रक या विभागाकडून काढण्यात आले आहे.

व्हीएस न्यूज - सहायक पोलीस आयुक्त नीलेश मोरे यांनी मुजोरपणाने विनाकारण वार्ताहराला मारहाण करून जबरदस्तीने माफीनामा लिहून घेतल्याबाबतच्या प्रकरणाची चौकशी करावी अशी मागणी शिवसेना आमदार डॉ. नीलम गो-हे यांनी केली आहे. याबाबतच्या मागणीचे निवेदन त्यांनी आज पुण्याच्या पोलीस आयुक्त रश्मी शुक्ला यांना दिले आहे.

या निवेदनात त्यांनी म्हटले आहे की, मांजरी येथील शासकीय आदिवासी मुलांच्या वसतिगृहातील विद्यार्थ्यांनी सुरू केलेल्या आंदोलनाचे वार्तांकन करण्यासाठी गेलेल्या लोकसत्ताचे वार्ताहर ज्ञानेश भुकेले यांना सहायक पोलीस आयुक्त नीलेश मोरे यांनी शनिवारी मारहाण केली होती. यावेळी शासकीय अधिकारी प्रसाद आयुष यांनी मध्यस्थी करून आंदोलन मागे घेण्याचे आवाहन विद्यार्थ्यांना केले असता आयुष यांनी लेखी खुलासा करावा, अशी मागणी करून विद्यार्थ्यांनी आंदोलन मागे घेण्यास नकार दिला. त्यानंतर आयुष तेथून निघून जात असताना भुकेले यांनी आंदोलनाशी संबंधित काही प्रश्न आयुष यांना विचारले आणि उत्तराचे त्यांनी मोबाइलमध्ये रेकॉर्डिंग करून घेतले.

आंदोलनाच्या ठिकाणी बंदोबस्तासाठी असलेले वानवडी विभागाचे सहायक पोलीस आयुक्त नीलेश मोरे हे भुकेले यांच्याकडे आले. ‘तू मोबाइलवर रेकॉर्डिंग का करतो’ अशी दमबाजी त्यांनी केली. वार्ताहर असल्याचे मोरे यांना ओळखपत्रही दाखविले. भुकेले यांनी मोबाइलवर केलेले रेकॉर्डिंग काढून टाकण्याची मागणी आयुष यांनी केली. भुकेले यांनी त्यास नकार दिला. त्यानंतर मोरे यांचा पारा चढला. त्यांनी आणि त्यांच्यासोबत असलेल्या पोलीस कर्मचाऱ्यांनी भुकेले यांना ओढून नेत थेट पोलीस व्हॅनमध्ये बसविले.

पोलीस व्हॅनमध्येच भुकेले यांना मारहाण केली. त्यानंतर एखाद्या गुन्हेगाराप्रमाणे वागणूक देऊन भुकेले यांना थेट हडपसर पोलीस ठाण्यात आणण्यात आले. भुकेले यांना धमकावून त्यांच्याकडून जबरदस्तीने माफीनामा लिहून घेण्यात आला. ही घटना गंभीर असल्याने याबाबत मोरे यांची चौकशी व कायदेशीर कारवाई करण्याची मागणी डॉ. नीलम गो-हे यांनी निवेदनाद्वारे केली आहे.

पुणे श्रमिक पत्रकार संघाचे अध्यक्ष शैलेश काळे यांनी याबाबत माहिती दिली असून या घटनेचा पत्रकार संघाच्या वतीने निषेध करण्यात आला आहे. पत्रकारांना सौहार्दपूर्ण वागणूक देण्याबाबतच्या सूचना पोलीस यंत्रणेला देण्यात याव्यात असेही या निवेदनात म्हटले आहे.

व्हिएस न्यूज - भारतीय राष्ट्रीय कॉंग्रेसच्या अध्यक्षपदाचा कार्यभार राहुल गांधी यांनी स्विकारल्यामुळे देशभरातील युवकांमध्ये नवचैतन्य निर्माण झाले आहे. राहुल गांधींपुढे जरी अनेक आव्हाने असली तरी ते अहिंसेच्या तत्वाने पुरोगामी विचारांचा वसा पुढे नेत कॉंग्रेसच्या कार्यकर्त्यांच्या पाठ बळावर पुढील आव्हानांवर मात करतील असा विश्वास कॉंग्रेसचे शहराध्यक्ष सचिन साठे यांनी व्यक्त केला.

शनिवारी भारतीय राष्ट्रीय कॉंग्रेसच्या अध्यक्षपदाचा कार्यभार राहुल गांधी यांनी स्विकारला. त्यानिमित्त शहर जिल्हा कॉंग्रेस कमिटीच्या वतीने पिंपरीतील डॉ. बाबासाहेब आंबेडकर पुतळा चौकात पेढे वाटून, फटाके फोडून आनंदोत्सव साजरा करण्यात आला. यावेळी प्रदेश महिला कॉंग्रेस कमिटीच्या माजी अध्यक्षा शामला सोनवणे, प्रदेश सचिव बिंदू तिवारी, महिला शहराध्यक्षा गिरीजा कुदळे, शहर सेवादलाचे अध्यक्ष संग्राम तावडे, राजेंद्रसिंह वालिया, नरेंद्र बनसोडे, विशाल कसबे, मयूर जैयस्वाल, शहाबुद्दीन शेख, सज्जी वर्की, तुकाराम भोंडवे, राजन नायर, संदेश नवले, आबा खराडे, गौरव चौधरी, कुंदन कसबे, चंद्रशेखर जाधव, शोभा कोराटे, मलीना दास, मेहताब इनामदार, दिलीप पांढारकर, पांडूरंग जगताप, किशोर कळसकर, आण्णा कसबे, भास्कर नारखेडे, हिरा जाधव आदी उपस्थित होते.

साठे म्हणाले की, पंतप्रधान नरेंद्र मोदी व त्यांचे मंत्रीमंडळाचे सदस्य जन मानसात संभ्रम निर्माण होईल अशी वक्तव्य करुन जाती, धर्मात तेढ निर्माण करीत आहे. राहुल गांधी यांच्या नेतृत्वाखाली कॉंग्रेसचे कार्यकर्ते महात्मा गांधींच्या अहिंसेच्या तत्वांचा देशभर प्रचार प्रसार करतील. देशात पुन्हा पुरोगामी विचार वाढवून 2019 ला सत्ता बदल करतील, असा विश्वासही त्यांनी व्यक्त केला.

व्हिएस न्यूज- पहिल्याच टप्प्यात मेट्रो निगडीपर्यंत नेणे, आंद्रा-भामा आसखेड धरणातून पाणी आणणे, पवना बंदिस्त जलवहिणी प्रकल्प मार्गी लावणे, शास्तीकर, रिंगरोड आदी शहरातील प्रश्नासंबंधी पुणे जिल्ह्याचे पालकमंत्री गिरीष बापट नागपुर येथे पिंपरीतील पदाधिकाऱ्यांसमवेत येत्या दोन दिवसांत बैठक घेणार असल्याची माहिती अधिकृत सुत्रांनी दिली.

पिंपरी-चिंचवड शहरातील विविध प्रश्न मार्गी लावण्याचे आश्वासन देऊन पिंपरी महापालिकेत भाजपाने सत्ता काबिज केली. मात्र, दहा महिने झाल्यानंतर एकही महत्वाचा प्रश्न मार्गी लागला नाही. त्यामुळे शहरवासियांमध्ये प्रचंड नाराजी आहे. पहिल्याच टप्प्यात मेट्रो निगडीपर्यंत नेण्य़ाची शहरवासियांकडून जोरदार मागणी होत आहे. यासह आंद्रा-भामा आसखेड धरणातून पाणी आणणे, पवना बंदिस्त जलवहिणी प्रकल्प मार्गी लावणे, शास्तीकर, रिंगरोड आदी शहरातील महत्वाच्या प्रश्नासंबंधी पालकमंत्री गिरीष बापट यांच्या समवेत य़ेत्या दोन दिवसात भाजपच्या पदाधिकाऱ्यांसमवेत बैठक घेवून चर्चा करणार आहेत. त्यानंतर पालकमंत्री बापट यांच्या नेतृत्वाखाली महापौर नितीन काळजे, पक्षनेते एकनाथ पवार यांच्यासह आदी पदाधिकाऱ्यांचे एक शिष्टमंडळ मुख्यमंत्री देवेंद्र फडणवीस यांची भेट घेणार आहे. हिवाळी अधिवेशनात शहरातील महत्वाचे प्रश्न मार्गी लावण्यासाठी पदाधिकारी मुख्यमंत्र्यांना साकडे घालणार आहेत.

व्हिएस न्यूज - भारतीय जनता पक्षाचे नेते, नगरसेवक यांच्या वरदहस्ताने सांगवी, पिंपळे-गुरव परिसरात बांधकाम व्यावसायिक नदी पात्र, शेती झोनमध्ये राजरोसपणे अनधिकृत बांधकामे करत असल्याचा गंभीर आरोप राष्ट्रवादी कॉंग्रेसचे माजी नगरसेवक राजेंद्र जगताप यांनी केला आहे. याबाबत माजी नगरसेवक राजेंद्र जगताप यांनी महापालिका आयुक्त श्रावण हर्डीकर यांना निवेदन दिले आहे. त्यात म्हटले आहे की, राज्य सरकारने 2015 पुर्वीची अनधिकृत बांधकामे नियमित करण्याचे धोरण जाहीर केले आहे. त्यासाठी नागरिकांकडून अर्जही स्विकारले जात आहेत. परंतु, सांगवी, पिंपळे-गुरव परिसरात भाजपचे नेते, नगरसेवक व त्यांच्या सहकाऱ्यांचा वरदहस्तामुळे सद्यस्थितीत बांधकाम व्यावसायिकांकडून नदी पात्र, शेती झोनसह वाढीव अनधिकृत बांधकामे जोरात सुरू आहेत. या सर्व अनधिकृत बांधकामाची आकारणी सांगवी करसंकलन विभागात कार्यालयीन वेळेआधी, कार्यालयीन वेळेनंतर व शासकीय सुट्टीच्या दिवशीही सुरू आहे.

बांधकाम आकारणी, हस्तांतर करणे, मिळकत उतारा देणे, 600 चौरस फुटाच्या आत बांधकामाची आकारणी करण्यासाठी वरिष्ठांना पैसे द्यावे लागतात. दिले नाही तर तुमचे बांधकाम जमीनदोस्त करू, अशी धमकी देत वरिष्ठ लिपिक, लिपिक तसेच शिपाई सुध्दा पैशांची मागणी करत असल्याचा आरोप जगताप यांनी आयुक्तांना दिलेल्या निवेदनात केला आहे. तसेच सांगवी करसंकलन विभागातील करआकारणी लिपिकांची चौकशी करण्याचे आदेश देण्याची मागणी जगताप यांनी केली आहे.

व्हिएस न्यूज- महापालिकेच्या महिला व बालकल्याण योजने अंतर्गत महापालिका हद्दीतील महिला बचत गट यांनी तयार केलेल्या वस्तू उत्पादनाला बाजारपेठ उपलब्ध व्हावी, या उद्देशाने आयोजित करण्यात येणाऱ्या पवनाथडी जत्रेतील 400 स्टॉलसाठी तब्बल 984 अर्ज पालिकेकडे आले आहेत.

सांगवी येथील पी. डब्लु. डी. मैदानानवर दि. 4 ते 8 जानेवारी या दरम्यान भरविण्यात येणाऱ्या पवनाथडी जत्रेचे आयोजन करण्यात य़ेणार आहे. या जत्रेतील स्टॉलसाठी पालिकेच्या वतीने शहरातील महिला बचत गटांकडून अर्ज मागविले होते. यामध्ये तब्बल 984 अर्ज आले आहेत. या अर्जाची येत्या तीन-चार दिवसात छाननी करण्यात येणार आहेत. त्यानंतर महिला व बालकल्याण समितीच्या सभापती सुनिता तापकीर व सदस्यांच्या उपस्थितीत लकी ड्रा काढून स्टॉलचे वाटप करण्यात येणार असल्याची माहिती नागरवस्ती विभागाचे समाज विकास अधिकारी संभाजी ऐवले यांनी दिली.

व्हिएस न्यूज - पायी जाणाऱ्या दोन महिलांच्या गळ्यातील दुचाकीवरून आलेल्या चोरट्यांनी दिड लाख रूपये किंमतीचे मंगळसुत्र हिसका मारून तोडून नेले. दोन्ही घटना शनिवारी सकाळी वाकड परिसरात घडल्या.

पहिल्या घटना विशालनगर येथे घडली. 55 वर्षीय महिलेने फिर्याद दिली आहे. महिला दुध आणण्यासाठी दुकाना पायी जात होती. दुचाकीवरून आलेल्या चोरट्यांनी महिलेच्या गळ्यातील 39 हजार रूपये किंमतीचे मंगळसुत्र हिसका मारून तोडून नेले. दुसरी घटनेमध्ये 65 वर्षीय ज्येष्ठ महिलेने फिर्याद दिली आहे. महिला पती समवेत डांगे चौक येथून पायी जात होत्या. दुचाकीवरून आलेल्या चोरट्यांनी महिलेच्या गळ्यातील 1 लाख 5 हजार रूपये किंमतीचे मंगळसुत्र हिसका मारून तोडून नेले. दोन्ही घटनेत 1 लाख 44 हजारांचा ऐवज चोरट्यांनी चोरून नेला.

वाकड पोलीस अधिक तपास करत आहेत

व्हिएस न्यूज - किसान कृषी प्रदर्शनातील गर्दीचा फायदा घेवून चोरट्याने स्टॉलधारकाची ऑफिस बॅग, टॅब, डेबीट कार्ड व रोख रक्कम असा 55 हजार रूपयांचा ऐवज चोरून नेला. ही घटना गुरूवारी दुपारी तीन वाजता घडली.

केयुल जोशी (वय-39, रा. तिळकनगर, मुंबई) यांनी भोसरी, एमआयडीसी पोलीस ठाण्यात फिर्याद दिली आहे.

पोलीसांनी दिलेल्या माहितीनुसार, जोशी यांनी मोशी येथे सुरू असलेल्या किसान कृषी प्रदर्शनात त्यांच्या कंपनीचा स्टॉल लावला आहे. स्टॉलवरून गर्दीचा फायदा घेवून चोरट्याने त्यांची ऑफिस बॅगसह त्यामध्ये ठेवलेला टॅब, डेबीट कार्ड, रोख रक्कम असा 55 हजार 100 रूपयांचा ऐवज चोरून नेला.

एमआयडीसी पोलीस अधिक तपास करत आहेत.

व्हिएस न्यूज- एसटी बसला मोटार अडवी लावून मोटार चालकाने एसटी बस चालकाला खाली ओढत शिवीगाळ करत हाताने मारहाण केली. तसेच वाहक महिलेला व प्रवाशांनाही शिवीगाळ केली. ही घटना शुक्रवारी दुपारी तीनच्या सुमारास कासारवाडी येथील सॅंडविक कंपनीसमोर घडली.

हनुमान पवळ (वय-34, रा. चऱ्होली) यांनी भोसरी पोलीस ठाण्यात फिर्याद दिली आहे. पोलीसांनी अज्ञात मोटार चालकावर गुन्हा दाखल केला आहे.

पोलीसांनी दिलेल्या माहितीनुसार, पवळ हे आळेफाटा ते शिवाजीनगर या मार्गाची एसटी बस घेवून शिवाजीनगरकडे जात होते. बसला एका मोटार चालकाने मोटार अडवी लावली. एसटी चालक पवळ यांना बसमधून खाली ओढत शिवीगाळ करत मारहाण केली. तसेच महिला वाहक मीरा चव्हाण व प्रवाशांनाही शिवीगाळ केली.

भोसरी पोलीस अधिक तपास करत आहेत.

व्हिएस न्यूज - पुर्ववैमनस्यातून चार जणांच्या टोळक्याने तरूणाला लाथा बुक्यांनी मारहाण करत कोयत्याने वार केले. ही घटना गुरूवारी रात्री साडेआठ वाजता पिंपळे-गुरव येथील शिव साई सोसायटी येथे घडली.

शत्रुघ्न पालमपल्ले (वय-21, रा. पिंपळे सौदागर) असे जखमी झालेल्या तरूणाचे नाव आहे. शुभम कवटे, सुमित सोमवंशी, दिपक धोत्रे, आनंद संगमे (सर्व रा. रहाटणी) असे गुन्हा दाखल झालेल्या आरोपींची नावे आहेत.

पोलीसांनी दिलेल्या माहितीनुसार, फिर्यादी व आरोपी यांच्यामध्ये पुर्ववैमनस्य आहे. शत्रुघ्न हा गुरूवारी रात्री साडेआठ वाजता शिव साई सोसायटी येथे थांबला होता. आरोपी शुभम कवटे साथीदारासह तेथे आला. आरोपींनी शत्रुघ्नला लाथा बुक्यांनी मारहाण केली तर शुभम कवटे याने त्याच्यावर कोयत्याने वार केले.

फौजदार एम. के. आहेर अधिक तपास करत आहेत.

व्हिएस न्यूज - घराच्या अंगणात खेळणाऱ्या 14 महिन्याच्या चिमुरडीच्या अंगावरून इनोव्हा गाडी गेल्याने तिचा जागीच मृत्यू झाला. ही

घटना शनिवारी सकाळी अकराच्या सुमारास दत्त मंदिरा शेजारी वाकड रस्त्यावर घडली.

खुशी सुरेश चौधरी (14 महिने, रा. वाकड) असे मृत्यू झालेल्या चिमुरडीचे नाव आहे. याप्रकरणी मोटार चालक अरविंद कलाटे याला पोलिसांनी ताब्यात घेतले आहे.

वाकड येथील दत्त मंदिरा शेजारी छोट्या गल्ली आहेत. चौधरी कुंटुंबिय येथेच कलाटे यांच्या चाळीत भाड्याने राहत आहे. खुशीचे वडील सुरेश एका हॉटेलमध्ये कुकचे काम करतात. शनिवारी सकाळी खुशी अंगणात खेळत होती. त्यावेळी अरविंद इनोव्हा मोटार पाठीमागे घेता असताना अंगणात खेळणारी खुशी खेळता-खेळता घरासमोर असलेल्या अंतर्गत रस्त्यावर आली आणि मोटारीच्या मागच्या चाकाखाली सापडल्याने तीचा दुर्दैवी अंत झाला.

वाकड पोलीस तपास करत आहेत.

व्हिएस न्यूज - पीएमपीएमएल बसमध्ये गर्दीचा फायदा घेत प्रवाशांची पर्स, पाकीट, बॅग लांबविणाऱ्या सराई त चोर महिलेला वाकड पोलिसांनी जेरबंद केले. ही कारवाई शुक्रवारी सकाळी अकराच्या सुमारास डांगे चौकात करण्यात आली.

वनिता राख साखरे (वय 40, रा. हडपसर) असे सराईत चोर महिलेचे नाव आहे.

पोलिसांनी दिलेल्या माहितीनुसार, वनिता साखरे पीएमपीएमल बसमधील गर्दीचा फायदा घेत प्रवाशांची पर्स पाकिट लांबवित आहे. बसमधील महिलेच्या पाकिट मारल्याप्रकरणी तिच्यावर स्वारगेट आणि खडकी पोलीस ठाण्यात गुन्हे दाखल आहेत. 12 डिसेंबरला प्रवासादरम्यान एका महिलेची दीड तोळ्याची चैन असलेली पर्स तीने पळविली होती. तो गुन्हा वाकड ठाण्यात दाखल आहे. तिचे छायाचित्र वाकड पोलिसांकडे असल्याने तपास पथक अनेक महिने तिच्या मागावर होते.

वाकड पोलीस शुक्रवारी साध्या वेशात पीएमपीएमएल बसमधून प्रवास करत होते. दुपारी बाराच्या सुमारात ती डांगे चौकातील बीआरटी बस थांब्यावर बसच्या प्रतीक्षेत थांबली होती. पोलिसांनी छायाचित्रे पाहिले आणि ती पाकिट मारणारी महिला असल्याचे लक्षात येताच तिला ताब्यात घेतले. तिने वाकड हद्दीत केलेला गुन्हा कबूल केला आहे, असे वाकड पोलिसांनी सांगितले.