व्हीएस न्युज - औरंगाबादमध्ये जातीय तेढ निर्माण केल्याप्रकरणी एमआयएम नगरसेवकाला अटक करण्यात आली आहे. तर भाजपाच्या पाच नगरसेवकांवरही गुन्हा दाखल करण्यात आला आहे. काल शुक्रवारी औरंगाबाद महानगर पालिकेत माजी पंतप्रधान अटलबिहारी वाजपेयी यांच्या श्रद्धांजली प्रस्तावावरून भाजपा आणि एमआयएम नगरसेकांमाध्ये हाणामारी झाली होती. यामध्ये महापालिकेत भाजपा नगरसेवकांनी एमआय़एमच्या नगरसेवकाला बेदम मारले होते. त्यानंतर बाहेर एमआयएमच्या कार्यकर्त्यांनी भाजपा नेत्यांवर हल्ला केला होता. त्यामुळे काल शहरात तणावाचे वातावरण निर्णाण झाले होते.

भाजपच्या पाच नगरसेवकांविरोधात शुक्रवारी (ता.17) रात्री गुन्हा दाखल करण्यात आला. एमआयएम नगरसेवक सय्यद मतीनने यांच्या जबाबावरून हा गुन्हा नोंद करण्यात आल्याचे क्रांती चौक पोलिस ठाण्याचे पोलिस निरीक्षक दादाराव शिनगारे यांनी सांगितले.

व्हिएस न्युज - औरंगाबाद महानगरपालिकेत माजी पंतप्रधान अटलबिहारी वाजपेयी यांच्या श्रद्धांजली ठरावावरून शुक्रवारी सर्वसाधारण सभेत गदारोळ झाला होता. भाजपाच्या काही नगरसेवकांनी एमआयएमचे नगरसेवक सय्यद मतीन यांना बेदम मारहाण केली होती. त्याचे पडसाद लगेच उमटले आहेत. एमआयएम नगरसेवक समर्थकांनी औरंगाबाद महानगरपालिका परिसरात दगडफेक केली. एमआयएमच्या कार्यकर्त्यांनी महापालिका मुख्यालयासमोर भाजपा संघटन मंत्र्यांच्या गाडीची तोडफोड करून चालकाला मारहाण केल्याची घटना समोर आली आहे.

मिळालेल्या माहितीनुसार, एमआयएम नगरसेवक मतीन यांच्या विरोधात देशद्रोहाचा गुन्हा दाखल करण्याच्या मागणीसाठी भाजप आमदार अतुल सावे, महापौर नंदकुमार घोडेले, उपमहापौर औताडे, प्रमोद राठोड यांनी पोलीस आयुक्त प्रसाद यांची भेट घेतली. हे सर्व जाताना भाजपा संघटनमंत्री भाऊराव देशमुख यांच्या वाहनावर २० ते २५ जणांच्या टोळक्याने काठी, दगडाने हल्ला केला.

व्हीएस न्युज - औरंगाबाद महानगरपालिकेत माजी पंतप्रधान अटलबिहारी वाजपेयी यांची श्रद्धांजली सभा आयोजित केली होती. या सभेला एमआयएमच्या नगरसेवकाने विरोध केल्यानंतर भाजपाच्या नगरसेवकांनी बेदम मारले आहे. शुक्रवारी दुपारी विशेष सभेत ही घटना घडली आहे. एमआयएमचे नगरसेवक सय्यद मतीन यांनी वाजपेयी यांना श्रद्धांजली अर्पण करण्याच्या ठरावाला विरोध दर्शवला. त्यानंतर संतप्त भाजपा नगरसेवकांनी त्यांना बेदम मारहाण केली. भरसभागृहात अक्षरश: चपलेनं मारलं.

त्यानंतर सुरक्षारक्षकांनी कडे करून मतीन यांना सभागृहाबाहेर काढले. समांतर जलवाहिनी प्रकल्पाच्या प्रस्तावावर निर्णय घेण्यासाठी शुक्रवारी सर्वसाधारण सभेचे आयोजन करण्यात आले होते. मात्र माजी पंतप्रधान अटलबिहारी वाजपेयी यांचे निधन झाल्यामुळे त्यांना श्रद्धांजली अर्पण करण्याचा विषय महापौरांनी घेतला. वाजपेयी यांच्या जीवनावर आधारित चित्रफित सभागृह दाखविण्यात आली. त्यानंतर एमआयएमचे नगरसेवक सय्यद मतीन यांनी श्रद्धांजली अर्पण करण्याच्या ठरावाचा विरोध केला. त्यानंतर भाजपा नगरसेवक प्रमोद राठोड, दिलीप थोरात, माधुरी अदवंत, रामेश्वर भादवे, राज वानखेडे यांनी मतीन यांना लाथा-बुक्क्यांनी तुडवत बेदम मारहाण केली. त्यानंतर सय्यद मतीन यांना कायमस्वरूपी निलंबन करावे अशी मागणी भाजपाच्या नगरसेवकांनी केली आहे.

व्हीएस न्युज - जामखेड-बिड रस्त्यावर बुधवारी पहाटे अडीच वाजण्याच्या सुमारास जामखेड एसटी बसचा वाहकावर गोळीबार करण्यात आला. या गोळीबारामध्ये वाहक सुग्रीव जायभाय गंभीर जखमी झाला असून त्याच्यावर रुग्णालयात उपचार सुरु आहेत. जामखेड ग्रामीण रुग्णालयात वैद्यकीय अधिकारी डॉ. युवराज खराडे यांनी प्राथमिक उपचार केल्यानंतर जखमीला नगर येथील खाजगी दवाखान्यात उपचारासाठी दाखल करण्यात आले आहे.

मागील सहा महिन्यात जामखेड शहरात झालेला तिसरा गोळीबार आहे.याबाबत पोलीसांनी दिलेली माहिती अशी, तालुक्यातील सुग्रीव गहिनीनाथ जायभाय ( वय -४३, रा. जायभायवाडी सध्या राहणार - गोडाऊन गल्ली, जामखेड ) हे रात्री अडीच वाजता जामखेड ग्रामीण रुग्णालयात चालत आले. त्यावेळी जायभाय यांच्या मांडीतून रक्त येत होते. गोळीबारात जखमी झालेले सुग्रीव जायभाय जामखेड आगारात वाहक म्हणून कार्यरत आहेत. फेब्रुवारी महिन्यात डॉ. पठाण यांच्या मांडीवर दिवसाढवळ्या गोळीबार झाला होता. त्यांच्यासह आणखी एक जण गंभीर जखमी झाले होते. त्यानंतर २९ एप्रिल रोजी योगेश राळेभात व राकेश राळेभात यांच्यावर गोळीबार होऊन दोघे मृत्यू पावले होते. त्यानंतर बुधवार दि. १५ आॅगस्ट रोजी पहाटे अडीच वाजता सुग्रीव जायभाय यांच्यावर गोळीबार होऊन जखमी झाले आहेत. गोळीबाराच्या या घटनेमुळे जामखेड शहरसह तालुक्यात घबराटीचे वातावरण झाले आहे.

व्हीएस न्युज - गोवारी समाज आदिवासीच असल्याचा ऐतिहासिक निर्णय मुंबई उच्च न्यायालयाच्या नागपूर खंडपीठाने दिला आहे. या निर्णयामुळे गोवारी समाजाला आता अनुसूचित जमातींमध्ये आरक्षण मिळणार आहे.

गोवारी समाजाला आदिवासी घोषित करा जेणेकरुन आम्हाला अनुसूचित समातीमध्ये आरक्षण मिळेल, अशी मागणी समाजाची होती. सध्या गोवारी समाजाला विशेष मागास वर्ग (एसबीसी) अंतर्गत दोन टक्के आरक्षण मिळत आहे. या मागणीच्या अनेक याचिका हायकोर्टात प्रलंबित होत्या, ज्याचा एकत्रित निर्णय आज दिला.

न्यायमूर्ती उपाध्ये आणि न्यायमूर्ती देशपांडे यांच्या खंडपीठाने गोंडगोवारी अशी कुठलीही जमात नाही, असं सांगत गोवारी समाजाला अनुसूचित जमातीच्या सुविधांपासून वंचित ठेवता येणार नाही, असा निर्णय दिला आहे. 23 वर्षांपूर्वी 114 जणांचा मृत्यू गोवारी समाजाला अनुसूचित जमातींमध्ये आरक्षण मिळावं या मागणीसाठी 23 वर्षांपूर्वी म्हणजेच 23 नोव्हेंबर 1994 रोजी नागपूरच्या हिवाळी अधिवेशनादरम्यान,

गोवारी समाजाने मोठा मोर्चा काढला होता. यावेळी पोलिसांच्या लाठीमारानंतर चेंगराचेंगरी होऊन 114 जणांचा मृत्यू झाला होता. तेव्हा राज्यात शरद पवार यांच्या नेतृत्त्वात सरकार होतं. या प्रकरणी चौकशी समितीने तत्कालीन मुख्यमंत्री शरद पवार यांना क्लीन चिट दिली. रोष पवारांवर भरपूर होता, पण बळी गेला तो आदिवासी मंत्री मधुकर पिचड यांचा, त्यांनी नैतिक जबाबदारी स्वीकारत राजीनामा दिला अखेर आज हा समाज आदिवासी असल्याचा निर्वाळा उच्च न्यायालयाने दिला आहे. हा निर्णय म्हणजे 114 जणांना खरी श्रद्धांजली असल्याचं म्हटलं जात आहे.

व्हीएस न्युज - शहर आणि औद्योगिक विकास महामंडळ (सिडको) तर्फे ‘सर्वांसाठी घरे’ धोरणाअंतर्गत आर्थिक दुर्बल व अल्प उत्पन्न गटातील नागरिकांसाठी ‘महागृहनिर्माण योजनेत’ साकारण्यात येणाऱ्या १४ हजार ८३८ परवडणाऱ्या घरांच्या ऑनलाईन सोडतीच्या अर्ज भरण्याच्या प्रक्रियेस आज मुख्यमंत्री देवेंद्र फडणवीस यांच्या हस्ते प्रारंभ करण्यात आला. पुढच्या टप्प्यात आणखी २५ हजार घरांची सोडत वर्षाअखेरीस जाहीर करण्यात येणार असून त्याची निविदा प्रक्रिया सुरू असल्याची माहिती देऊन प्रधानमंत्री आवास योजनेअंतर्गत सिडकोने एक लाख घरे बांधण्यांचे उद्दिष्ट ठेवावे, असे यावेळी मुख्यमंत्री फडणवीस यांनी सांगितले.

मुख्यमंत्री फडणवीस म्हणाले, प्रधानमंत्री नरेंद्र मोदी यांनी देशातील प्रत्येकाला घर मिळावे, यासाठी प्रधानमंत्री आवास योजनेची महत्त्वाकांक्षी घोषणा केली. सन २०२२ पर्यंत सर्वांना घरे देण्याच्या या योजनेत महाराष्ट्र राज्याने ६.५० लाख घरे बांधून पहिल्या क्रमांकावर स्थान मिळविले आहे. राज्यात मुंबई व मुंबई महानगर परिसरात सर्वात जास्त घरांची मागणी आहे. ही मागणी पूर्ण करण्यासाठी राज्य शासनाने विविध योजना सुरू केल्या आहेत. म्हाडाला पीपीपी योजनेतून १ लाख घरे मिळणार आहेत. तसेच घरांसाठी संयुक्त भागीदारी मंजूर केली आहे. घरांच्या या योजनेत सिडकोसुद्धा सहभागी झाली असून नवी मुंबई परिसरात त्यांनी आता ही १४ हजार घरांची योजना सुरू केली आहे. यामुळे गरिबांना चांगल्या किंमतीत व चांगल्या ठिकाणी पायाभूत सुविधांसह घरे मिळणार आहेत.

यंदाच्या घरांच्या योजनेत प्रधानमंत्री आवास योजनेतील घरांचा समावेश केला आहे. या लॉटरीतील अर्जांची योग्य प्रकारे छाननी करून गरजू नागरिकांनाच घरे मिळतील, याची दक्षता घ्यावी. सामान्य माणसांना या योजनेत सहभागी करून घ्यावे, असेही फडणवीस यांनी सांगितले.

व्हीएस न्युज - मराठा आरक्षण आंदोलनात राज्यात अनेक ठिकाणी एसटी बसवर दगडफेक झाली. या गाड्यांची तोडफोड झाली. पोलिसांनी काही ठिकाणी कारवाई केली. इतर ठिकाणी अजून गुन्हे नोंदविणे, आरोपी अटक करण्याची प्रक्रिया सुरू झाली आहे.

पंढरपूरमध्ये झालेल्या अशाच गुन्ह्यात एका वकिलाला अटक झाली. त्यानंतर तेथे सोशल मिडियात सध्या चर्चा सुरू झाली आहे. तेथील पोलिस निरीक्षक धनंजय जाधव यांच्याविरुद्ध एका वकिलाने तक्रा केली. या तक्रारीत जधव यांच्यावर आरोप करण्यात आले होते. या आरोपाला जाधव यांनी एक पोस्ट स्वतः लिहिली आणि त्याला उत्तर दिले. पोलिस अधिकारी शक्यतो सोशल मिडियातून आपली बाजू मांडत नाहीत. पण जाधव यांनी या धोका पत्करला.

त्यांची पोस्ट त्यांच्या शब्दांत पुढीलप्रमाणे

एसटी बस तोडफोडीच्या गुन्ह्यामध्ये पोलिस ठाणे पंढरपूर तालुका येथे पाच आरोपींना अटक केली. त्यामध्ये व्यवसायाने वकील असलेल्या एका आरोपीचा समावेश आहे. सदर वकील यांचा गुन्ह्यामध्ये स्पस्टपणे सहभाग दिसुन आला आहे, वकील आरोपीने देखील मान्य केले आहे, त्याचे विडीओ रेकॉर्डींग देखील केले आहे. वकील आरोपीस त्याचे "वकील मित्र, नातेवाईक, परिचीत" भेटण्यास आले होते, परवानगी नंतर त्यांना भेट देखील करू दिली आहे, त्याची सरकार दप्तरी नोंद देखील आहे, त्याचे चित्रण CCTV मध्ये देखील आहे.

परंतु एक वकील महोदय कोणाला काही ही न-विचारता लॉक-अपकडे गेले, लॉक-अप मध्ये गंभीर गुन्ह्यातील आरोपी आहेत, त्यांची पूर्ण जबाबदारी पोलिसांवर आहे. पहाऱ्यावरील अंमलदाराने अटकाव केला असता शाब्दिक वादावादी केली. मला आवाज आला म्हणुन मी उठुन कक्षाच्या बाहेर गेलो, मी त्यांना परवानगी शिवाय भेटता येणार नाही असं सांगताच त्यांना खूप राग आला मी त्यांना बसण्याची सुचना केली असता "मी निषेध करतो" असे म्हणुन निघुन गेले. याच ही रेकॉर्डींग पोलिसांकडे आहे.

सदर वकील आरोपीसह या गुन्ह्यातील आरोपींना मे. न्यायालयाने दोन दिवस PCR दिला आहे. त्या नंतर ही दिवस भरामध्ये वकील आरोपीचे नातेवाईक, परिचीत" भेटण्यास आले होते, परवानगी नंतर त्यांना देखील भेट करू दिली आहे, त्याचे ही चित्रण CCTV मध्ये देखील आहे. आज ही कोणी आलं तरी ही नियमांचे अधिन राहुन आम्हीं भेटू देवु.

मी कोणी अमुक आहे म्हणुन मला सरळ जावु द्यावे, आणी विचारले तर आम्ही त्याच भांडवल करू असे जर असेल तर येणारा काळ पंढरपूरसाठी चांगला नसेल, असं माझं मत आहे. पोलिसांना कायदा व नियमाप्रमाणे काम करू द्यावं, असं आम्ही आवाहन करतो.

माझ्यावर मुजोरपणाचा आरोप लावला आहे, मी स्पस्ट करू इच्छितो की, मी जशास तसं वागणारापैकी आहे. पोलिस ठाण्यात दिन, दलित, दुबळा गरीब आला तर आम्ही त्यांच्याशी जास्त सन्मानाने वागतो किंबहुना त्यांची तक्रार प्राधान्याने ऐकण्याची माझी पद्धत आहे. स्वच्छ कपडे घातलेल्याचे लगेच ऐकले जाते. मळकट, जुनी कपडे घातल्याचे सर्वसाधारणपणे लगेच ऐकले जात नाही असा आमच्या समाजाचा अलिखीत नियम आहे. एक वेळ अशी कमी शिकलेली माणसे सरळ लॉक-अपकडे गेली तर आम्ही समजु शकतो. परंतु ज्यांना कायदे, नियम सर्व समजते तर त्यांनी त्याचे पालन केले पाहिजे. खुर्चीची चिंता नाही..... या व्यवस्थेने जेवढ्या दिवस ही खुर्ची बसायली दिली आहे, त्या अधिकाराचा पुरेपुर वापर करू.

मला खुर्चीची अजिबात चिंता नाही.

मी कोणत्याही दबावाला भिणारा घाबरणाऱ्यापैकी नाही. अजिबात कचारणार किंवा मागे हटणारापैकी मी नाही. जेवढ्या दिवस आहे तेवढ्या दिवस ठणकावुन काम करू. व्यवस्था, नैतिकता असलेली चांगली माणसं, समजदार/जबाबदार पंढरपुरकर माझ्या सोबत असतील याची मला खात्री आहे.

येणाऱ्या काळात ही आम्ही याच पद्धतीने सर्व सामान्य लोकांना न्याय कसा मिळेल असा प्रमाणिक प्रयत्न करू. "सदरक्षणाय खलनिग्रहणाय" (सजनांचे रक्षण आणी दुर्जनांचा संहार) या उक्ती प्रमाणेच निष्पक्ष काम करू.

कोणाला आव्हान देण्याचा आमचा उद्देश नाही, आमचा पक्ष आम्ही मांडला आहे, जनतेने दिलेल्या टॅक्सच्या पैशामधुन आम्हाला पगार मिळतो. पोलीस खरच कस काम करतात हे त्यांना समजणे आवश्यक आहे म्हणुन ही पोस्ट लिहिली आहे.

व्हीएस न्युज - मुंबईचे माजी महापौर व ईशान्य मुंबईचे विभागप्रमुख दत्ता दळवी यांचे फोन टॅप केल्या प्रकरणी शिवसेना पक्षप्रमुख उद्धव ठाकरे यांनी मुलुंडचे उपविभाग प्रमुख जगदीश शेट्टी यांना निलंबित केले आहे. तसेच तेथील शाखा प्रमुख दीपक सावंत यांनाही पक्षविरोधी कारवायांसाठी निलंबित करण्यात आले आहे.

ईशान्य मुंबईत शिवसेनेत अंतर्गत वाद सुरु होते. या वादाला कंटाळून दत्ता दळवी यांनी आपल्या पदाचा राजिनामा दिला होता. ही कुरबूर उद्धव ठाकरे यांच्या कानावर गेल्याने त्यांनी तातडीने कारवाई करत शेट्टी यांना निलंबित केले. तसेच पक्षविरोधी बैठका घेतल्याच्या आरोपाखाली शाखाप्रमुख दीपक सावंत यांनाही निलंबि करण्यात आले आहे.

आगामी लोकसभा निवडणुकीच्या पार्श्वभूमीवर पक्षातले अंतर्गत मतभेद मिटवून पक्षसंघटनेला बळकटी आणण्याचा आणि पक्षाची प्रतिमा सुधारण्याचा प्रयत्न उद्धव ठाकरे यांच्याकडून केला जात आहे. त्याचेच एक पाऊल म्हणून ही कठोर कारवाई करण्याचा निर्णय ठाकरे यांनी घेतल्याचे बोलले जाते.

व्हीएस न्युज-मुंबईतील नालासोपऱ्यात जप्त करण्यात आलेल्या स्फोटक प्रकरणात राज्य दहशतवाद विरोधी पथकाने (एटीएस) पुणे, सातारा, सोलापूर भागांतून बारा जणांना चौकशीसाठी ताब्यात घेतले असून एका पथकाने गोंधळेकर याच्या पुण्यातील घरी छापेमारी केली. यामध्ये तब्बल दहा पिस्तूले, गावठी कट्टा, चाकू आणि चॉपर मिळाल्याचे सूत्रांनी सांगितले. मागील तीन ते चार दिवसांपासून एटीएसची पथके शहरात “सर्च ऑपरेशन’ राबवत आहेत.

राज्य दहशतवाद विरोधी पथकाने गुरूवारी रात्री केलेल्या धडक कारवाईत नालासोपारा भागातील वैभव राऊत, शरद कळसकर, सुधन्वा गोंधळेकर यांना अटक केली. राऊत याच्या घरातून वीस गावठी बॉम्ब, स्फोटके, बॉम्ब तयार करण्याचे साहित्य जप्त करण्यात आले. राऊतच्या संपर्कात असलेल्या सोळा जणांची एटीएसकडून चौकशी करण्यात येत आहे.

दरम्यान, पुणे, सातारा, सोलापूर भागांतून एटीएसच्या पथकाने बारा जणांना चौकशीसाठी ताब्यात घेतले. यातील दोघे जण पुण्यातील कोंढवा व पर्वती परिसरात वास्तव्यास असल्याचे समजते. एटीएसकडून त्यांची कसून चौकशी करण्यात येत आहे. या प्रकरणात अटक करण्यात आलेले आरोपी राऊत आणि त्याचे साथीदार मुंबई, पुणे, सोलापूर भागांत घातपाती कारवाई करण्याच्या तयारीत असल्याचा संशय एटीएसने व्यक्त केला आहे. दरम्यान, हे “ऑपरेशन’ अतिशय गुप्तरित्या राबविण्यात येत असून त्याची कोणतीच माहिती पुणे पोलिसांना देण्यात आलेली नाही. त्यांच्याकडून पुण्यात काही घातपात घडवण्यात येणार होता का? याची माहिती एटीएसकडून घेतली जात आहे.

गोंधळेकरचा पुण्यात ग्राफिक डिझायनिंगचा व्यवसाय...

गोंधळेकर हा मूळचा साताऱ्यातील आहे. त्याचा पुण्यात ग्राफिक डिझायनिंगचा व्यवसाय असल्याची माहिती मिळाली आहे. राऊत, कळसकर, गोंधळेकर हिंदुत्ववादी संघटनेशी संबंधित आहेत. दरम्यान, राऊत, कळसकर, गोंधळेकर यांच्या संपर्कात असलेल्या बारा जणांना मुंबई एटीएसने शनिवारी ताब्यात घेतले. दरम्यान, या प्रकरणात अटक करण्यात आलेले राऊत, कळसकर, गोंधळेकर यांना न्यायालयाने 18 ऑगस्टपर्यंत पोलीस कोठडीत ठेवण्याचे आदेश दिले. अंधश्रद्धा निर्मूलन समितीचे कार्याध्यक्ष डॉ. नरेंद्र दाभोलकर, कामगार चळवळीतील ज्येष्ठ नेते गोविंद पानसरे, बंगळुरुतील पत्रकार गौरी लंकेश यांच्या हत्येच्या अनुषंगाने राऊत, कळसकर, गोंधळेकर यांची चौकशी केली जाणार आहे.

सुधन्वाच्या घरातून मिळालेला शस्त्रसाठा.

१० पिस्तुले, १० पिस्टल बॅरल, ६ अर्धवट तयार पिस्टल बॉडी, ६ पिस्टल मॅगझीन, तीन अर्धवट तयार मॅग्झीन, ७ अर्धवट तयार पिस्टल स्लाईड, १६ रिले स्विच, ६ वाहनांच्या नंबर प्लेटस, १ ट्रिगर मॅकॅनिझम, १ गावठी कट्टा, १ एअर गण, १ चाकू आणि १ चॉपर अशी घातक हत्यारे मिळाली. याबरोबरच पेनड्राइव्ह, हार्डडिस्क, मेमरी कार्डहि जप्त करण्यात आले आहे.

व्हीएस न्युज - मराठा आरक्षणाचा मुद्दा आज संसदेच्या दोन्ही सभागृहात गाजला. लोकसभेत शिवसेना खासदार विनायक राऊत आणि राष्ट्रवादी काँग्रेसचे खासदार धनंजय महाडिक यांनी यासंदर्भात प्रश्न उपस्थित केला. तर राज्यसभेत खासदार संभाजीराजे छत्रपती यांनी निवेदन दिलं. संभाजीराजेंनी मराठीत आपलं म्हणणं मांडलं.

संभाजीराजे काय म्हणाले?

"राजर्षी शाहू महाराजांनी देशात पहिल्यांदा 1902 साली आरक्षण दिलं होतं. बहुजन समाजाला जे आरक्षण दिलं होतं. त्यामध्ये एससी, एसटी, ओबीसीसह सर्व जातींचा समावेश होता. त्यामध्ये प्रामुख्याने मराठा समाजाचाही समावेश होता. आज स्वातंत्र्यानंतर मराठा समाजाला आरक्षण न मिळाल्याने भावना तीव्र झाल्या आहेत.

अनेक मोर्चे मागील वर्षी निघाले. त्याची दखल देशानेच नव्हे तर जगाने घेतली. पण आता भावना तीव्र झाल्या आहेत. त्यामुळे प्रशासनाला माझ्या दोन सूचना आहेत.

पहिली सूचना म्हणजे मुख्यमंत्र्यांनी मराठा समाजातील सर्व घटकांना बोलवावं आणि त्यांच्या मागण्या मान्य करावं.

दुसरी सूचना - राजकारण करण्यापेक्षा सर्व पक्षांना एकत्र बोलवून, मराठा आरक्षणाचा मुद्दा मार्गी लावावा"

राज्यसभा सभापतींची टीपणी

संभाजीराजेंच्या या निवेदनानंतर उपराष्ट्रपती आणि राज्यसभा सभापती व्यंकय्या नायडून यांनी, आरक्षणाची मागणी योग्य आहे, पण मुख्यमंत्र्यांना मंदिरात जाऊ न देणं कितपत योग्य, असा सवाल उपस्थित केला.

महाराष्ट्र बंद

मराठा आरक्षण मागणीसाठीच्या आंदोलनादरम्यान औरंगाबादमध्ये आंदोलक काकासाहेब शिंदे या तरुणाचा गोदावरी नदीत पडून मृत्यू झाला. या घटनेच्या निषेधासाठी मराठा क्रांती मोर्चाने आज 24 जुलैला ‘महाराष्ट्र बंद’ची हाक दिली आहे.

आज सकाळी 11 च्या सुमारास काकासाहेब शिंदे यांच्यावर गंगापूर तालुक्यातील कायगावात अंत्यसंस्कार झाले. लहान भाऊ अविनाश शिंदेने काकासाहेबांच्या पार्थिवाला अग्नी दिला.

सकल मराठा मोर्चाच्या महाराष्ट्र बंदच्या पार्श्वभूमीवर मराठवाड्यात खबरदारी म्हणून शाळा आणि कॉलेजेस बंद ठेवण्यात आली आहेत. बीडमधल्या मराठा क्रांती मोर्चाच्या बंदमुळे शहरातून एकही बस शहराबाहेर पडू शकलेली नाही. दररोज बीडमधून ये-जा करणाऱ्या 431 बस फेऱ्या आज बंद आहेत. काही ठिकाणी टायर जाळण्यात आल्यानं एसटी महामंडळानं वाहतूक बंद ठेवण्याचा निर्णय घेतला आहे.

परभणी रेल्वे स्थानकावर मराठा आंदोलकांनी रास्तारोको केला. यामुळे काही काळ सचखंड , परळी पॅसेंजर आणि हैद्राबाद पॅसेंजर ट्रेन रोखण्यात आली होती. रुळावर बसून आंदोलकांनी आंदोलन करत सरकारविरोधात घोषणा दिल्या. उस्मानाबादमध्येही आज कडकडीत बंद पाळण्यात आला आहे. उस्मानाबाद येथील जिल्हा विधीज्ञ मंडळाने एकमतानं मराठा मोर्चाला पाठिंबा दिला. यासोबत नांदेडसह अनेक तालुक्यांमध्ये बंद पाळला जातोय.

व्हीएस न्युज - पुण्यातील राष्ट्रवादी काँग्रेसचे नगरसेवक दीपक मानकर यांचा अटकपूर्व जामीन सर्वोच्च न्यायालयानेही फेटाळला आहे. तसंच दहा दिवसांच्या आत पोलिसांसमोर हजर राहण्याचे आदेशही कोर्टाने दिले आहेत. पुण्यातील सामाजिक कार्यकर्ते जितेंद्र जगताप यांना आत्महत्येस प्रवृत्त केल्याप्रकरणी दीपक मानकरांवर गुन्हा दाखल करण्यात आला आहे. याप्रकरणात हायकोर्टानेही मानकर यांचा अटकपूर्व जामीन अर्ज फेटाळला होता. त्यामुळे मानकरांनी सुप्रीम कोर्टात धाव घेतली होती.

जितेंद्र जगताप हे अनेक वर्ष दीपक मानकर यांच्याकडे काम करत होते. त्यांनी 2 जून रोजी आत्महत्या केली होती. जितेंद्र जगताप यांच्या आत्महत्येच्या प्रकरणात दीपक मानकर यांचं नाव चर्चेत आलं होतं. जितेंद्र जगताप यांनी आत्महत्येपूर्वी लिहिलेल्या चिठ्ठीत पाच जणांच्या नावाचा उल्लेख करत त्यांना आपल्या मृत्यूसाठी जबाबदार धरलं होतं. या पाच जणांत दीपक मानकर यांच्याही नावाचा समावेश आहे. या प्रकरणात पोलिसांनी अटकसत्र सुरू करताच मानकर यांनी हायकोर्टात अटकपूर्व जामिनासाठी धाव घेतली. कर्मचाऱ्याची आत्महत्या, सुसाईड नोटमध्ये मानकरचं नाव मानकर यांच्याकडे गेली अनेक वर्षे काम करणाऱ्या जितेंद्र जगताप नावाच्या व्यक्तीने 2 जूनला घोरपडी भागात रेल्वेखाली उडी घेऊन आत्महत्या केली होती. आत्महत्येपूर्वी जितेंद्र जगताप यांनी लिहलेल्या सुसाईड नोटमध्ये दिपक मानकर, बिल्डर सुधीर कर्नाटकी, विनोद भोळे यांच्या त्रासाला कंटाळून आत्महत्या करत असल्याचं म्हटलं आहे.

रास्ता पेठेतील एका जागेच्या वादातून हा प्रकार घडला. जितेंद्र जगताप हा गेली अनेक वर्ष दीपक मानकरांचे जमिनीचे व्यवहार पाहात होता. मात्र गेल्या काही महिन्यांपासून समर्थ पोलिस स्टेशनसमोर असलेल्या जागेवरुन दोघांमध्ये वाद सुरु होता. त्यासाठी मानकर, कर्नाटकी, भोळे यांच्या अनेकवेळा बैठकाही झाल्या होत्या. जागेचा ताबा सोडण्यासाठी मानकर जितेंद्र जगतापवर दबाव टाकत होते.

दरम्यान जितेंद्र जगताप हा खंडणी उकळण्यासाठी आत्महत्येची धमकी देत होता आणि त्याबद्दलचा अर्ज आपण 1 जूनलाच पोलिस आयुक्तालयात दिल्याचं म्हटलं आहे.

दीपक मानकर यांची कारकीर्द सुरुवातीपासूनच वादग्रस्त राहिली आहे. काँग्रेसमध्ये असताना नातू वाड्यातील जमीन बळकावण्याचा प्रयत्न केल्याबद्दल त्यांना अटक झाली होती. अनेक दिवस येरवडा कारागृहात जावं लागलं होतं.

- पिंपरी चिंचवड महापालिकेने बस रॅपिड ट्रान्झिट सिस्टिम अर्थात बीआरटीएस प्रकल्प हाती
घेतला. सुरुवातीला मोठा गाजावाजा झाला. परंतु, मागील अडीच वर्षात बीआरटीएस प्रकल्पांकडे
महानगरपालिका प्रशासनाने पुर्णत: दुर्लक्ष झाले आहे. काळेवाडी फाटा ते देहू-आळंदी रस्ता हा बीआरटीएस
मार्ग सुरू करण्यामधील प्रमुख अडथळा चिंचवड येथील एम्पायर इस्टेट उड्डाणपुलाचा होता. हा उड्डाणपूल
सुरू झाल्याने महापालिकेने हा रखडलेला काळेवाडी फाटा ते देहू-आळंदी बीआरटीएस मार्ग तातडीने सुरू
करावा, अशी मागणी भाजपा प्रदेश कार्यकारिणी सदस्य अमित गोरखे यांनी महापालिका आयुक्त श्रावण
हर्डीकर यांच्याकडे केली आहे.

या संदर्भात अमित गोरखे यांनी महापालिका आयुक्त श्रावण हर्डीकर यांना निवेदन दिले आहे. त्यात
अमित गोरखे यांनी म्हटले आहे की, अहमदाबादच्या धर्तीवर पिंपरी चिंचवड शहरात बीआरटीएस प्रकल्प
केंद्र सरकारच्या जवाहरलाल नेहरु राष्ट्रीय नागरी पुननिर्माण (जेएनएनयुआरएम) योजनेअंतर्गंत राबवण्यात
आला. त्यावर महापालिकेच्या बीआरटीएस विभागाने आतापर्यंत कोट्यवधी रुपये खर्च केले आहेत. शहरात
प्रमुख पाच मार्गावर बीआरटीएस बससेवा सुरू करण्याचा महापालिकेचा मानस होता. मात्र्, सप्टेंबर २०१५
मध्ये औध-रावेत आणि नोव्हेंबर २०१५ मध्ये नाशिका फाटा ते वाकड या मार्गावर महापालिकेने
बीआरटीएस बससेवा सुरू केली. परंतु, त्यानंतर अडीच वर्षात बीआरटीएसचे काम संथ गतीने सुरू केला
आहे. अडीच वर्षात एकही नवीन बीआरटी मार्ग महानगरपालिकेला सुरू करता आलेला नाही.
सांगवी-किवळे बीआरटी मार्ग व देहू-आळंदी रस्ता या दोन रस्त्यांना जोडणारा काळेवाडी फाटा ते देहू-
आळंदी रस्ता हा बीआरटीएस मार्ग शहरवासीयांच्या दृष्टीने महत्त्वाचा आहे. एकूण १०.७० कि.मी. लांबीचा
हा बीआरटी मार्ग आहे. काळेवाडी फाट्यापासून स्पाईन रस्त्यापर्यंत एकूण ११ बसथांबे आहेत. या मार्गाचे
२०१० पासून वेगवेगळ्या पाच टप्प्यात काम सुरू असून हे काम जवळपास पूर्ण झालेले आहे. बसथांबे
कॅरिडॉर महानगरपालिकेने तयार केलेले आहेत. मात्र, या बीआरटीएस मार्गावरील एम्पायर इस्टेट

उड्डाणपूल हा प्रमुख अडथळा होता. हा उड्डाणपूल महानगरपालिकेने नुकताच खुला केला आहे. त्यामुळे
काळेवाडी, पिंपरी, चिंचवड, चिखली, मोशी, हिंजवडी, वाकड, देहू आणि आळंदी या भागातील नागरिकांना
या रस्त्याचा फायदा होत आहे. या मार्गावरील बीआरटीएस रस्ता सुरू झाल्यानंतर या मार्गाचा फायदा
सर्वसामान्य नागरिकांना होणार आहे. मात्र, बीआरटीएस विभागाच्या नियोजनाअभावी हा मार्ग सुरू
करण्यास विलंब होत आहे.
बीआरटीएस मार्गात मोरवाडी येथे आयुक्त बंगल्याजवळील एका कंपनीचा न्यायालयीन वाद सुरू आहे.
त्यामुळे बीआरटीएस मार्ग सुरू करण्यास विलंब होत असल्याने तोडगा काढून महानगरपालिकेने तुर्तास
मोरवाडी न्यायालयाजवळील रस्त्याचा वापर करावा. बीआरटीएस बससेवा सुरू झाल्यानंतर हिंजवडी,
वाकडकडे जाणे सोयीचे होणार आहे. तसेच, काळेवाडी, चिंचवडमधील मोहनगर, विद्यानगर, रामनगर,
मोरवाडी, शाहूनगर, संभाजीनगर, पुढे चिखली या भागात राहाणा-या सर्वसामान्य नागरिकांना या बससेवेचा
लाभ घेता येईल. तसेच, पिंपरी चिंचवड शहरात एकूण ४५ कि. मी. अंतरावर बीआरटीएस बससेवा पूर्ण
होणार आहे. तरी, तातडीने हा बीआरटीएस मार्ग सुरू करण्यासाठी महानगरपालिका बीआरटीएस विभागाला
सूचना द्याव्यात, असे अमित गोरखे यांनी निवेदनात म्हटले आहे.