व्हीएस न्यूज - रस्त्याने पायी जात असलेल्या एका पादचा-याला भरधाव वेगात आलेल्या दुचाकीस्वाराने उडवले. गंभीर जखमी झालेल्या पादचा-याचा उपचारादरम्यान मृत्यू झाला. ही घटना बजाज स्कूल समोर, संभाजी नगर चिंचवड येथे मंगळवारी घडली.

इंदर बळीराम कवडे (वय 55, रा. श्रीराम सोसायटी, म्हेत्रे वस्ती, चिखली) असे मृत्यू झालेल्या पादचा-याचे नाव आहे. याबाबत राजू भोर (वय 50, रा. आदिनाथ नगर, भोसरी) यांनी दिनेश कुलकर्णी (रा. मोरेवस्ती, चिखली) या दुचाकीस्वाराच्या विरोधात निगडी पोलीस ठाण्यात फिर्याद दिली आहे.

पोलिसांनी दिलेल्या माहितीनुसार, राजू भोर व इंदर कवडे मंगळवारी सकाळी नऊच्या सुमारास भोसरी सार्वजनिक रस्त्यावरून घराच्या दिशेने पायी जात होते. अचानक दिनेश कुलकर्णी हा दुचाकीवरून भरधाव वेगात आला. दुचाकीने इंदर कवडे यांना जबर ठोकर बसली. यामध्ये ते गंभीर जखमी झाले. त्यांना तात्काळ उपचारासाठी रुग्णालयात हलविण्यात आले. मात्र उपचार सुरु असताना गुरुवारी सकाळी आठच्या सुमारास त्यांचा मृत्यू झाला. निगडी पोलीस ठाण्याचे फौजदार नाना मोरे अधिक तपास करीत आहेत.

व्हीएस न्यूज - ढेकूण मारण्याचे औषध पिऊन एका ज्येष्ठ नागरिकाने आत्महत्या केली आहे. हा प्रकार मोहननगर चिंचवड येथे गुरुवारी दुपारी घडला. आत्महत्येचे नेमके कारण समजू शकले नाही. कैलास बाबुराव लोणकर (वय 56, रा. शिवदर्शन वसाहत मोहननगर, चिंचवड), असे आत्महत्या केलेल्या ज्येष्ठाचे नाव आहे.

पोलिसांनी दिलेल्या माहितीनुसार, कैलास लोणकर व त्यांची मुलगी गुरुवारी मुलगी घरी होती. लोणकर यांनी ढेकणाचे विषारी औषध घेतले. ही बाब मुलगीच्या लक्षात येताच त्यांना तातडीने यशवंतराव स्मृती रुग्णालयात दाखल करण्यात आले. मात्र, उपचारादरम्यान गुरुवारी रात्री त्यांचा मृत्यू झाला. आत्महत्येचे कारण अद्याप समजू शकले नाही. पिंपरी पोलीस पुढील तपास करीत आहेत.

व्हीएस न्यूज - फेसबुकवर फोटो अपलोड केल्याच्या कारणावरून तिघांनी एकावर कोयत्याने वार केल्याची धक्कादायक घटना चिंचवड येथे गुरुवारी रात्री घडली.

खंडू मधुकर गायकवाड (वय 18, रा. दत्तनगर, चिंचवड) असे जखमी झालेल्या तरुणाचे नाव आहे. याप्रकरणी राजा मरिबा कांबळे, विशाल मरिबा कांबळे (वय 25) जिलब्या उर्फ अक्षय गायकवाड (वय २०, तिघे रा. महात्मा फुले नगर चिंचवड) यांच्यावर गुन्हा दाखल करण्यात आला आहे. राजा कांबळे याला पोलिसांनी अटक केली असून दोघे फरार आहेत. विशाल कांबळे हा सराईत गुन्हेगार असून त्याला यापूर्वी एका गुन्ह्यात तडीपार करण्यात आले होते.

पोलिसांनी दिलेल्या माहितीनुसार, खंडू गायकवाड गुरुवारी रात्री साडेनऊच्या दरम्यान त्याच्या घरासमोर उभा होता. तिन्ही आरोपी त्याच्याजवळ येऊन फेसबुकवर फोटो अपलोड केल्याच्या कारणावरून त्याला शिवीगाळ करू लागले. तसेच त्यांनी खंडूच्या छातीवर कोयत्याने सपासप वार केले. यामध्ये खंडू गायकवाड गंभीर जखमी झाला असून त्याला यशवंतराव चव्हाण स्मृती रुग्णालयात उपचारासाठी दाखल करण्यात आले आहे. पिंपरी पोलीस अधिक तपास करत आहेत.

व्हिएस न्यूज - पतंग उडविण्यासाठी शहरात चायनीज मांजाचा सर्रास वापर केला जात आहे. त्यामुळे पुण्यात एका महिलेचा जीव गेला आहे तर काळेवाडीत एक ज्येष्ठ नागरिक व एक दोन वर्षाच्या मुलाचा गंभीर जखम झाली होती. नागरिकांच्या जीवीताशी खेळून चायनीज मांजावर त्वरीत बंदी घालावी. व शहरातील चायनीज मांजा विक्री करणाऱ्यांवर कठोर कारवाई करावी, अशी मागणी परिमंडळ तीनचे पोलीस उपायुक्त गणेश शिंदे यांच्याकडे शिवसेना ग्राहक संरक्षण कक्षाचे शहरप्रमुख गणेश जाधव, विद्यासागर गायकवाड, देवेन यादव, रूपेश कदम, कैलास कुदळे, ऍड. दत्ताराम साळवी, सुनिल निकम, चंद्रशेखर कणसे, रविराज मांडवे आदींनी केली आहे.

व्हीएस न्यूज - पुणे मनपा ते देहूगाव व पुणे स्टेशन ते देहूगाव या मार्गावरील बस सेवा गेल्या काही दिवसांपासून बंद करण्यात आली आहे. यामुळे विद्यार्थी, कामगार, नोकरदार वर्ग, वारकरी भाविकांची मोठी गैरसोय होत आहे. या दोन्ही मार्गावरील बस सेवा पुर्ववत करण्याची मागणी देहूगाव ग्रामस्थांनी केली आहे.

याबाबत प्रसिध्दीस दिलेल्या निवेदनात म्हटले आहे की, देहूगाव तीर्थक्षेत्र असल्यामुळे राज्याच्या कानाकोपऱ्यातून भाविक श्री संत तुकाराम महाराजांच्या दर्शनासाठी येतात. तसेच देहूगावाची लोकसंख्या दिवसेंदिवस वाढत आहे. येथील विद्यार्थी शिक्षणासाठी तर अनेक नोकरदार, कामगार दररोज कामानिमित्त पुणे, पिंपरी-चिंचवडला येतात. त्यांना देहूगावातून निगडीपर्यंत बससेवा आहे. निगडीतून दुसऱ्या पीएमपीएमएल बसने इच्छितस्थळी जावे लागते. यामुळे विद्यार्थ्यांचा, नोकरदारांचा बहुमोल असा वेळ वाया जातो. त्याचबरोबर तिकीटासाठीही जास्त पैसे लागतात. या मार्गावर प्रवाशांची मोठी गर्दी असते. त्यामुळे पीएमपीएमएलच्या नवनियुक्त व्यवस्थापकीय संचालक नयना गुंडे यांनी प्रवाशांच्या हिताला प्राधान्य द्यावे. गेल्या काही दिवसांपासून बंद केलेली पुणे मनपा ते देहूगाव व पुणे स्टेशन ते देहूगाव ही पीएमपीएमएल बस सेवा पुर्ववत करावी. त्याचबरोबर पुणे मनपातून देहूगावसाठी तळवडे आयटी पार्क या मार्गावरून नव्याने बस सेवा सुरू करण्याची मागणी नागरिकांनी केली आहे.

व्हीएस न्यूज - भरधाव वेगाने कंटेनर चालवून एका वाहनाला धडक दिल्याने गंभीर जखमी झालेल्या चालकाचा मृत्यू झाला. ही घटना बुधवारी मध्यरात्री पुणे-मुंबई महामार्गावर घडली. लोकमान खान (वय-21, रा. रावेत) असे मृत्यू झालेल्या कंटेनर चालकाचे नाव आहे.

हिंजवडी पोलीस अधिक तपास करत आहेत.

व्हीएस न्यूज - प्रात्यक्षिक परिक्षा अवघड गेल्याने बारावीमध्ये शिकणाऱ्या एका विद्यार्थिनीने गळफास घेऊन आत्महत्या केली आहे. हा धक्कादायक प्रकार बोपखेल येथे बुधवारी दुपारी दीड वाजण्याच्या सुमारास घडला.

अपेक्षा अनिल ठुबे (वय 18, रा. गणेशनगर, बोपखेल, पुणे) असे गळफास घेऊन आत्महत्या केलेल्या विद्यार्थिनीचे नाव आहे. ती पुण्यातील फर्ग्युसन महाविद्यालयात बारावी विज्ञान शाखेत शिकत होती. तर तिचे वडील जबलपूर येथे सैन्य दलात कार्यरत आहेत.

पोलीसांनी दिलेल्या माहितीनुसार, अपेक्षा ही आपल्या आई व लहान भावासोबत बोपखेल येेथे भाड्याच्या घरामध्ये राहतात. अपेक्षाची बारावी बोर्डाच्या प्रात्यक्षिक परीक्षा सुरु आहेत. अपेक्षाला एक प्रात्यक्षिक परीक्षा अवघड गेली, त्यामुळे तिला नैराश्य आले. याबाबत तिने वडीलांना सांगितले होते. बुधवारी घरातील सदस्य बाहेर गेल्यानंतर दुपारी दीडच्या सुमारास तिने घरातील पंख्याला ओढणीच्या साहाय्याने गळफास घेऊन आत्महत्या केली. दिघी पोलीस अधिक तपास करत आहेत.

व्हीएस न्यूज - तोंडाला रुमाल बांधून दुचाकीवरून आलेल्या पाच तरुणांनी हॉकी स्टिकने रस्त्यावर उभी केलेली पाच वाहने आणि चार ते पाच दुकानांच्या काचाची मंगळवारी रात्री तोडफोड केली होती. याप्रकरणी तीन आरोपींनी अटक केली असून त्याचे दोन साथीदार पसार आहेत.

ऋषी प्रमोद कांबळे (वय-19, रा. महात्मा फुलेनगर, चिंचवड), विशाल अंबादास मंजुळकर (वय-19), सागर अशोक वाघमारे (वय-19, दोघेही रा. दत्तनगर, चिंचवड) अशी अटक केलेल्या आरोपींची नाव आहेत. चेतन नंदकुमार वरकड (वय-21, रा. महात्मा फुलेनगर), अजय कांबळे (वय-20, रा. रूपीनगर, निगडी) हे दोघे फरार आहेत. याप्रकरणी नितीन चिलेकर (वय-41, रा. चिंचवड) यांनी पिंपरी पोलीस ठाण्यात फिर्याद दिली आहे.

पोलीसांनी दिलेल्या माहितीनुसार, मंगळवारी रात्री पावणे नऊ वाजता दुचाकीवरून पाच आरोपी मोहनगरमध्ये आले. त्यांनी चिलेकर यांच्या श्री गणराज सुपर मार्केट दुकानात येऊन त्यांना धमकी दिली. गल्ल्यातील 4 हजार 300 रूपये जबरदस्तीने काढून घेतले. शो-केशची व दुकानासमोर पार्क केलेल्या वाहनांची तोडफोड केली. जीवे मारण्याची धमकी देत विनायक येवले यांच्या ऑफिसच्या काचेची तोडफोड करून 60 हजार रूपयांचे नुकसान केले. फौजदार सागर पाटील अधिक तपास करत आहेत.

व्हीएस न्यूज - पिंपरी चिंचवड महापालिकेच्या २०१८-१९ या आर्थिक वर्षाचा ५ हजार २३५ कोटी २३ लाख रुपयांचा केंद्र सरकारच्या निधीसह अर्थसंकल्प स्थायी समिती सभेपुढे सादर केला. महापालिकेचे मुख्य लेखाधिकारी राजेश लांडे यांनी हा अर्थसंकल्प स्थायी सभापती सीमा सावळे यांच्याकडे सादर केला. यावेळी महापालिका आयुक्त श्रावण हर्डीकर, स्थायी समिती सदस्य उपस्थित होते.

पिंपरी चिंचवड महापालिकेचे हे ३६ वे अंदाजपत्रक आहे. २०१७-१८ या आर्थिक वर्षात ५८५ कोेटी ७२ लाख (शिलकेसह) रक्कम जमा होईल. तसेच २०१८-१९ या वर्षात ३५०६ कोटी ६२ लाख उत्पन्न अपेक्षित आहे. त्याचप्रमाणे केंद्र शासनाच्या पुरस्कृत योजनांच्या निधीसह ५ हजार २३५ कोटी २३ लाखांचा अर्थसंकल्प सादर करण्यात आला.

अदांजपत्रकातील खास वैशिष्ट्ये

* महापालिकेच्या स्थापत्य विभागाच्या विकासकामांसाठी ७३७ कोटी ५४ लाखांची भरीव तरतूद करण्यात आलीय.

* शहरी गरिबांसाठी ९२८ कोटी ८९ लाखांची तरतूद

* जेंडर बजेट-महिलांच्या विविध योजनांसाठी ३३ कोटींची भरीव तरतूद

* महापौर विकास निधीसाठी ५ कोटींची तरतूद

* अपंग कल्याणकारी योजना २० कोटी

* मेट्रो विकास आराखड्यासाठी ५० कोटी तरतूद

* पाणी पुरवठा विशेषनिधी २३ कोटी

* पीएमपीएमएल करीता १६४ कोटी ५६ लाख तरतूद

* स्मार्ट सिटीसाठी १०० कोटी तरतूद

* अमृत योजनेसाठी ५९ कोटी ६३ लाख तरतूद

* पंतप्रधान आवास योजना ९२ कोटी ४५ लाख तरतूद

* स्वच्छ भारत मिशनसाठी २८ कोटी तरतूद

* नगररचना भू-संपादनाकरिता १४० कोटी तरतूद

व्हीएस न्यूज - येथील भक्ती शक्ती उद्यानात भारताचा सर्वोच्च राष्ट्रध्वज दुरस्तीसाठी पाठविण्यात येणार असल्याची माहिती महापालिकेच्या वतीने देण्यात आली आहे.

देशातील सर्वोच्च राष्ट्रध्वज 26 जानेवारी रोजी निगडीत उभारण्यात आला आहे. या ध्वजाची देखरेख मनपाच्या सुरक्षा विभागामार्फत करण्यात येते. बुधवारी राष्ट्रध्वजाची देखरेखीच्या दृष्टीने खाली उतरवुन तपासणी केली. त्याचे धागे ओडले गेल्याचे व शिलाई उसवल्याचे लक्षात आले आहे. त्यामुळे ध्वज बदलण्यात येणार आहे, व सध्या वापरात असलेला ध्वज दुरुस्तीसाठी पाठविण्यात येणार आहे.
या दरम्यान राष्ट्रध्वज स्तंभातील तारा (वायर रोपची) व
इतर यंत्रणेची तपासणी करण्यात येणार असल्याने पुढील 2 दिवसामध्ये ध्वजारोहण करण्यात येणार आहे. ही प्रक्रिया अशा प्रकारच्या ध्वजांच्या बाबतीत वेळोवेळी करावी लागत असते. देशातील सर्व दिवस-रात्र फडकणाऱ्या ध्वजाबाबतीत अशाप्रकारे कार्यवाही करण्यात येत असते.

व्हीएस न्यूज - महाराष्ट्र शासनाच्या बहुउद्देशीय प्रकल्प इ-चावडी अंतर्गत येणारा इ फेरफार प्रकल्पासाठी हस्तलिखित सात बाऱ्यानुसार तळेगाव हद्दीतील आँनलाईन करण्याचे काम अंतिम टप्यात आले आहे. त्यामधील चुका दुरुस्त करण्याची वेळ वाढून देण्यात आल्याची माहिती तलाठी एस. बी.जाधव यांनी सांगितली.
राज्यशासनाच्या या प्रकल्प अंतर्गत 7/12 उतारे आँनलाईन करण्याचे काम शासनाने हाती घेतले होते. परंतु आँनलाईन करताना काही 7/12 वर भोगवटादाराची नावे, भोगावट्यांमधील क्षेत्र, 7/12 उतारे नावआले पण आँनलाईन नाही, भोगवटादार वर्ग झाला, पिक पाहणी व अन्य काही त्रुटी आढळल्यास त्यादुरुस्त करून घेण्याची मुदत शासनाने दि. 21 फेब्रुवारी पर्यंत वाढविली आहे.
याबाबत सात बाऱ्यावर दुरुस्ती करण्यासाठी संबधितांनी तलाठी कार्यालयास संपर्क करून दुरुस्तीसाठी अर्ज दाखल करावा, असे आवाहन एस.बी.जाधव यांनी केले आहे.