व्हीएस न्यूज - तामिळनाडू मधील सेलम येथे नुकत्याच पार पडलेल्या सहाव्या राष्ट्रीय सिनियर (मेन) चेस बॉक्‍सिंग स्पर्धेत शहरातील राष्ट्रीय खेळाडू राहुल धोत्रे याने ९० किलो वजनगटात सुवर्णपदक पटकाविले. यामुळे त्याची आंतरराष्ट्रीय चेस बॉक्‍सिंग स्पर्धेसाठी भारतीय संघात निवड झाली आहे.

आंतरराष्ट्रीय चेस बॉक्‍सिंग स्पर्धा जुलै २०१८ मध्ये होणार असून या स्पर्धांसाठी निवड होणारा राहुल शहरातील राहुल धोत्रे यांनी पहिला खेळाडू आहे. राहुल हा पिंपरीतील दि.सेवा विकास को ऑप बँक पिंपरीमध्ये काम करतो. बँकेचे अध्यक्ष अँड. अमर मुलचंदानी व सर्व संचालक व कर्मचारी यांनी त्याचे अभिनंदन केले. क्रीडा प्रशिक्षक आंतरराष्ट्रीय चेस बॉक्‍सर कृष्णा सोहनी यांचे वेळोवेळी मार्गदर्शन लाभले आहे. या यशाबद्दल राहुलचे विविध स्तरांमधून कौतुक होत आहे. सुरुवातीपासून खेळाची आवड असल्याने, राहुलने नोकरी करत असताना देखील खेळाकडे दुर्लक्ष होऊ दिले नाही. त्याला बँकेच्या संचालक मंडळाने प्रोत्साहन देत सहकार्य केले.

व्हीएस न्यूज - मावळचे खासदार श्रीरंग बारणे यांच्या वाढदिवसाचे औचित्यसाधुन पनवेल, उरण, खालापुर कर्जत भागातील सामाजिक श्रेत्रातील क्रिडा, वारकरी संप्रदाय क्षेत्रात उल्लेखनीय कार्य केलेल्या व्यक्तींचा जिवन गौरव पुरस्कार देऊन सन्मानित करण्यात आले. राज्याचे सार्वजनिक बांधकाम मंत्री एकनाथ शिंदे यांच्या हस्ते पनवेल येथे आद्यक्रांतीकार वासुदेव बळवंत फडके नाट्यगृहात हा सोहळा संपन्न झाला. या प्रसंगी खासदार श्रीरंग बारणे, डॉ. श्रीकांत शिंदे, आमदार मनोहरशेठ भोईर, किशोरी पेडणेकर, बबन पाटील, रेखा ठाकरे आदी उपस्थित होते.

यावेळी एकनाथ शिंदे यांच्या हस्ते श्रीरंग बारणे यांचा नागरी सत्कार करण्यात आला. त्यानंतर एकनाथ शिंदे म्हणाले मावळ मतदार संघ घाटावर व घाटाखाली असा जोडला आहे. शहरीभागा बरोबरच ग्रामिण आदिवाशी असा असलेला मतदार संघ खासदार बारणे यांनी प्रचंड मेहनतीने संपर्क ठेऊन बांधला आहे. त्यांचा जनसंपर्क दांडगा असुन त्यांनी अनेक विकासाची कामे मार्गी लावली आहे. लोकसभेतही त्यांचे काम चांगले असुन प्रत्येक प्रश्नांची माहिती घेऊन तो सोडवण्याचा प्रयत्न ते करत आले आहे. लोकसभेतील त्यांच्या कामाबद्दल त्यांना पुरस्कार ही देण्यात आला. ही मावळ लोकसभा मतदार संघातील नागरिकांसाठी अभिमानाची बाब आहे. त्यांच्या वाढदिवसाचे औचित्य साधत समाजामध्ये चांगले काम करणाऱ्या व्यक्तींचा त्यांनी सन्मान केला. ह.भ.प. मारुती महाराज राणे, जी.एम.म्हात्रे, प्रदिप साहेबराव ठाकरे, बळवंत नारायण शिरधणकर, निलम कदम राजपुत, अपर्णा द्वारकानाथ पाटील/ठोंबरे, सिद्धेश हेमंत शिंदे, मधुकर काळूराम धोंगडे, अशोक नारायण जंगले, मा.वि.म. कापरेकर तथा तात्यासाहेब कापरेकर यांचे सामाजिक काम अतिशय चांगले असल्याचे उद्गगार त्यांनी काढले. हे सर्व व्यक्ती अतिशय चांगले काम करतात, त्यांची प्रेरणा सर्वांनी घेतली पाहिजे. सामाजिक कामातील आपले योगदान म्हणजे त्या अर्थाने त्यांचा जिवनाचा गौरव आसल्याचे शिंदे यावेळी म्हणाले.

खासदार बारणे म्हणाले की, रायगड या भागातील नागरीकांनी मला खूप प्रेम दिले. त्यांच्या पाठबळावरच मी लोकसभेत चांगले काम करू शकलो. मी घाटावर असुनही कधीही या भागाकडे दुर्लक्ष केले नाही आणि करणारही नाही. माझ्या वाढदिवसाचे औचित्य साधुन या सर्व मान्यवरांनी सत्कार स्विकारला. हिच प्रेरणा मला माझ्या राजकीय कारकिर्दिला प्रोत्सान देईल. एकनाथ शिंदे यांनी माझा सन्मान केला असुन तो संपुर्ण मावळ लोकसभेतील जनतेचा सन्मान केला असल्याचे उद्गगार त्यांनी काढले. या प्रसंगी मनोहर भोईर, संजय मोरे, किशोरी पेडणेकर यांनीही आपले मनोगत व्यक्त केले. नरेश रहाळकर यांनी आभार प्रदर्शन केले.

व्हीएस न्यूज - केंद्र आणि राज्यात सत्तेत येण्यापूर्वी भाजपने आश्वासनांची खैरात केली होती. आता त्यांना त्यांचा विसर पडलायं. दिल्लीपासून गल्लीपर्यंत भाजपच्या नेत्यांनी जनतेला केवळ आश्वासनांची ‘गाजरं’ दिली होती. त्याचाच निषेध म्हणून पिंपरी चिंचवड राष्ट्रवादी काँग्रेसच्या वतीने आज ‘गाजर डे’ साजरा केला असल्याचे शहराध्यक्ष संजोग वाघेरे पाटील म्हणाले.

पिंपरीतील डॉ.बाबासाहेब आंबेडकर चौकात आज युवती राष्ट्रवादी काँग्रेसच्यावतीने भाजप सरकारच्या निषेधार्थ ‘गाजर डे’ साजरा करण्यात आला. यावेळी शहराध्यक्ष संजोग वाघेरे पाटील, युवती अध्यक्ष वर्षा जगताप, युवक अध्यक्ष विशाल वाकडकर, महिला अध्यक्षा नगरसेविका वैशाली काळभोर, सुलक्षणा शिलवंत, निकीता कदम, कार्याध्यक्ष प्रशांत शितोळे, नगरसेवक पंकज भालेकर, फजल शेख, प्रदेश सरचिटणीस लाला चिंचवडे, विशाल काळभोर, विद्यार्थी आघाडीचे अध्यक्ष सुनिल गव्हाणे, उपाध्यक्ष हर्षवर्धन भोईर, कुणाल थोपटे, सागर तापकीर तसेच मोठ्या संख्येने पदाधिकारी कार्यकर्ते उपस्थित होते.

संजोग वाघेरे पाटील म्हणाले की, गल्लीपासून दिल्लीपर्यंत भाजपने सत्तेेत येण्यापूर्वी अनेक खोट्या घोषणांची ‘गाजरं’ या जनतेला दाखवली होती. तरूणांना नोकरी असेल, किंवा व्यापार्यांचा रोजगार, शेतकरी, विद्यार्थी या सर्वांनाच खोटी आश्वासन दिली होती. पिंपरी चिंचवडबाबत बोलायचं म्हटलं तर मेट्रो निगडीपर्यंत नेण्याचं या भाजप सरकारनं ‘गाजरचं’ दाखवलयं, रिंगरोडच्या बाबतीतही भाजपवाल्यांनी गरिब जनतेची फसवणूकच केली. अनधिकृत बांधकामांचा प्रशेन तर १०० दिवसांत सोडवू असं ‘गाजरचं’ दाखवलं होतं. शास्तीकराचा तर या सत्तेत मस्त झालेल्या भाजपच्या मंडळींना विसरच पडलायं. पाणी फुकट देणार असं ‘गाजर’ दाखवून तिप्पट पाणीकर महापालिकेतील पदाधिकार्यांनी वाढवण्याचा घाट घातलायं. सत्तेत येऊन या भाजपच्या मंडळींनी केवळ आश्वासनांची ‘गाजरचं’ दिली आहेत. खोट्या घोषणांचा केवळ पाऊस पाडलायं म्हणून आज राष्ट्रवादीने या फसव्या सत्ताधार्यांचा निषेध करण्यासाठी ‘गाजर डे’साजरा केला असल्याचे ते म्हणाले.

व्हीएस न्यूज - राज्यातील निवडणूका कधी होतील हे सांगता येणार नाही. मात्र खासदरकीसाठी शिवसेना पक्षप्रमुखांनी खासदार श्रीरंग बारणे व खासदार शिवाजीराव आढळराव पाटील यांना हिरवा कंदील दिला आहे, असे शिवसेना नेते, केंद्रीय अवजड उद्योगमंत्री अनंत गीते यांनी सांगितले. तसेच त्यांनी खासदार बारणे यांना देशातील कोट्यवधी शिवसैनिक आणि पक्षप्रमुख उद्धव ठाकरे यांच्याकडून वाढदिवसाच्या व पुढील खासदरकीसाठी शुभेच्छा दिल्या.

चिंचवड येथील प्रा. रामकृष्ण मोरे नाट्यगृहात शुक्रवारी खासदार श्रीरंग बारणे यांच्या वाढदिवसाचे औचित्य साधुन खासदार श्रीरंग आप्पा बारणे सोशल फाउंडेशनच्या वतीने पिंपरी चिंचवड शहरातील सामाजिक क्षेत्रातील उल्लेखनीय कार्य केलेले माजी महापौर हनुमंत भोसले यांना जीवनगौरव पुरस्कार, मुरलीकांत पेटकर यांना जीवनगौरव पुरस्कार, शकुंतला माटे – जीवनगौरव पुरस्कार, डॉ. दिलीप कामत – वैद्यकीय भूषण, इकबाल खान – शिक्षण गौरव, अमित भिंगुर्डे – उद्योग रत्न, लक्ष्मण म्हेत्रे – उद्योग रत्न, एस. आर. शिंदे – मैत्री भूषण, सुरेंद्र शेळके – गिर्यारोहण गौरव, तेजश्री अडिंगे – कला भूषण, श्रीचंद्र आसवाणी – उद्योग भूषण, बब्रुवान नथुजी वाघ महाराज – अध्यात्मिक गौरव, बाळासाहेब मरळ – अध्यात्मिक गौरव, प्रदीप वाल्हेकर – स्वच्छता दूत हनुमंत माळी – गुणवंत कामगार पुरस्काराने गौरविण्यात आले. तसेच गोखले वृंदावन सोसायटी चिंचवड या सोसायटीला आदर्श सोसायटी पुरस्कार देण्यात आला. खासदार श्रीरंग बारणे यांना संसदेतील उल्लेखनीय कार्याबद्दल सलग तीनवेळा संसदरत्न पुरस्कार मिळाला आहे. याबद्दल बारणे यांचा विशेष सत्कार केंद्रीय अवजड उद्योगमंत्री अनंत गीते यांच्या हस्ते करण्यात आला. यावेळी गीते बोलत होते.

यावेळी खासदार शिवाजीराव आढळराव पाटील, आमदार अॅड. गौतम चाबुकस्वार, शहरप्रमुख योगेश बाबर, शिवसेना गटनेते राहुल कलाटे, शहरसंघटिका सुलभा उबाळे, चापेकर स्मारक समितीचे अध्यक्ष गिरीश प्रभुणे, भगवान वाल्हेकर, नगरसेविका अश्विनी चिंचवडे, गजानन चिंचवडे, नारायण बहिरवडे, नगरेसवक राहुल भोसले, शशिकीरण गवळी, मधुकर बाबर, भगवान वाल्हेकर, सचिन चिखले, सचिन भोसले, मारुती भापकर, शिवसेना पुणे जिल्हा महिला अध्यक्षा सुशीला पवार, रवी नामदे, शिवसेना जिल्हाध्यक्ष राम गावडे, उमेश गोलांडे, धनाजी बारणे, माजी महापौर डॉ. वैशाली घोडेकर आदी उपस्थित होते.

अनंत गीते म्हणाले, मी ६ वेळा संसदेत गेलो. सध्या शिवसेनेचे १८ खासदार संसदेत आहेत. त्यातील मंत्रिपद मिळालेला मी एक भाग्यवान आहे. पुढच्यावेळी हे भाग्य कुणाला लाभणार हे सांगता येणार नाही. पण बारणे आणि आढळराव पाटील एकमेकांना समजून घेतील असा विश्वास आहे. प्रत्येक लोकप्रतिनिधीला वर्षाच्या शेवटी आपण वर्षभरात केलेल्या कामाचा लेखाजोखा मांडण्याचा दंडक शिवसेना प्रमुखांनी घालून दिला होता, तो दंडक आजही सुरू आहे. शिवसेना एक कुटुंब आहे. आपण त्या कुटुंबाचा एक घटक आहोत. एखादा कार्यकर्ता समाजासाठी झोकून देतो तेंव्हा समाजाने सुद्धा त्या कार्यकर्त्याला संधी द्यायला हवी, असेही ते म्हणाले.

खासदार श्रीरंग बारणे पुन्हा एकदा निवडून येणार असा विश्वास व्यक्त करत खासदार शिवाजीराव आढळराव म्हणाले की, बारणे म्हणजे कर्तव्यदक्ष खासदार अशी दिल्लीत ओळख निर्माण झाली आहे. लोकसभेत सर्वाधिक वेळा भाग घेणारे खासदार म्हणून बारणे ओळखले जातात. खासदार बारणे लोकांच्या गराड्यात राहणारा खासदार आहेत. आम्ही सतत विचारांचे आदान प्रदान करतो. लोकसभेत सर्वात अधिक चर्चेत भाग घेणारे खासदार शिवसेनेचेच आहेत. दिल्लीत गेल्यावर करायचं काय हा प्रश्न इतर खासदारांपुढे असतो तर शिवसेना खासदारांपुढे जनतेचे प्रश्न असतात. निवडणुकीची भीती शिवसेनेला नाही. शिवसेनेला केवळ लढायचे आणि जिंकायचे एवढेच माहिती आहे. राजकारणात जागरूक आणि दक्ष राहणे गरजेचे आहे, असेही आढळराव म्हणाले.

चापेकर स्मारक समितीचे अध्यक्ष गिरीश प्रभुणे म्हणाले, कित्येक वर्षांपासून चापेकर बंधूंचे पोस्टाचे तिकीट काढण्याचा आम्ही प्रयत्न करत होतो. त्यामध्ये खासदार श्रीरंग बारणे यांनी लक्ष घातले आणि काहीच दिवसात हा प्रश्न सुटला. काम हाती घेतल्यास ते तडीस न्यायचे हे त्यांचे वैशिष्ट्य आहे. त्यांनी आपल्या कामात प्रत्येक वेळी प्रामाणिकपणा दाखवला आहे. बारणे पुन्हा निवडून येणार यात काही शंकाच नाही, असेही ते म्हणाले. सत्काराला उत्तर देताना खासदार श्रीरंग बारणे म्हणाले, माझ्यासारख्या सर्वसामान्य कार्यकर्त्याला संसदेत जाऊन जनसेवा करण्याची संधी शिवसेनाप्रमुख उद्धव ठाकरे यांनी दिली. त्याबद्दल त्यांचा मी मनापासून आभारी आहे. आजवर मी काम करत असताना केवळ माणसे जोडत गेलो. माणसे तोडण्याच काम कधीच केल नाही. मला आव्हाने पेलायला आवडतात. सत्कार केल्याबद्दल मी सर्वांचा आभारी आहे. केंद्रीय अवजड उद्योगमंत्री अनंत गीते यांनी कार्यकर्त्यांना बळ देत जनसेवा केली, असेही ते म्हणाले. कार्यक्रमाचे संयोजन खासदार श्रीरंग आप्पा बारणे सोशल फाउंडेशनचे रवी नामदे, गजानन चिंचवडे, बशीर सुतार, धनाजी बारणे, मारुती बहिरवाडे यांनी संयोजन केले.

व्हीएस न्यूज - पुण्यातील एका व्यावसायिकाने आपल्या कुटुंबासह आत्महत्या केल्याची घटना शिवणे परिसरात घडली आहे. निलेश चौधरी असे या व्यावसायिकाचे नाव असून पुण्यातील शिवणे या ठिकाणी असलेल्या पोकळेनगरमध्ये ते वास्तव्यास होते. कर्जबाजारीपणा, नैराश्य या सगळ्याला कंटाळून त्यांनी दोन मुलींना आणि पत्नीला विष दिले. तसेच स्वतः आत्महत्या केली. नैराश्यातून आत्महत्या करत असल्याची सुसाईड नोट निलेश चौधरींच्या खिशात मिळाल्याची माहिती पोलिसांनी दिली आहे. निलेश चौधरी यांचा प्लास्टिक मोल्डिंगचा व्यवसाय होता. ते शिवणे या ठिकाणी राहात होते. मात्र कर्जाचा डोंगर सहन न झाल्याने आणि नैराश्य आल्याने या व्यावसायिकाने आपल्या कुटुंबासह स्वतःचे आयुष्यही संपवले. पोलिसांना आज सकाळच्या सुमारास ही माहिती मिळाली. निलेश चौधरी ३९ वर्षांचे होते. त्यांनी त्यांची पत्नी नीलम, मुलगी श्रिया आणि दुसरी मुलगी श्रावणी या तिघींना विष दिले. त्यानंतर पंख्याला दोरीने गळफास घेऊन स्वतःचेही आयुष्य संपवले.

निलेश चौधरी यांचा मृतदेह पोलिसांना पंख्याला लटकलेल्या अवस्थेत आढळला. तर त्यांच्या पत्नी आणि दोन मुलींचे मृतदेह बेडरुममध्ये आढळले. या सगळ्यांच्या तोंडातून फेस बाहेर आला होता. चारही मृतदेह शवविच्छेदन करण्यासाठी ससून रूग्णालयात पाठवण्यात आले आहेत. कर्जाला कंटाळून निलेश चौधरी यांनी हे टोकाचे पाऊल उचलले अशी माहिती समोर आली आहे.