व्हीएस न्यूज - हातगाडीवर चहा पिऊन पायी जाणाऱ्या एका इसमाच्या गळ्यातील दुचाकीवरून आलेल्या तीन चोरट्यांनी अडीच लाख रूपये किंमतीची सोन्याची चैन हिसकावून नेली. ही घटना बुधवारी सकाळी सव्वाआठच्या सुमारास चिंचवड येथे घडली.
अनिल नवघने (वय-40, रा. इंद्रायणीनगर, भोसरी) यांनी पिंपरी पोलीस ठाण्यात फिर्याद दिली आहे.
पोलीसांनी दिलेल्या माहितीनुसार, नवघने बुधवारी सकाळी सव्वाआठच्या सुमारास चिंचवड येथील युनाइटेड एजन्सीच्या पाठीमागील एका चहाच्या हातगाडीवर चहा पिण्यासाठी थांबले होते. चहा पिवून पायी जाताना पाठीमागून दुचाकीवरून आलेल्या तीन चोरट्यांपैकी एकाने नवघने यांच्या गळ्यातील दोन लाख 50 हजार 940 रूपयांची सोन्याची चैन जबरदस्तीने हिसकावून नेली.
सहाय्यक पोलीस निरीक्षक सुर्यवंशी अधिक तपास करत आहेत.

व्हीएस न्यूज - पति व मुलीसह होळी पाहण्यासाठी पायी जात असलेल्या महिलेच्या गळ्यातील 40 हजार रूपये किमतीचे सोन्याची चैन मोटर सायकलवरुन आलेल्या चोरट्याने हिसका मारुन पळवुन नेले. ही घटना गुरुवारी रात्री सव्वा आठ वाजता औंध रोड बोपोडी येथे घडली. रोहित नायर (वय रा. खडकी) यांनी खडकी पोलीस ठाण्यात फिर्याद दिली आहे. नायर हे गुरुवारी रात्री सव्वा आठ वाजता पत्नी निता व मुलीसह होळी पाहण्याकरिता औंधरोड एम. एम. रेस्टारंट शेजारील व्होडाफोन स्टोअर्स बस स्टॉंप जवळुन पायी चालले होते. पाठीमागून मोटर सायकलवरुन आलेल्या चोरट्याने निता यांच्या गळ्यातील 40 हजार रु. किमतीचे सोन्याची चैन हिसका मारुन पळवुन नेली. सोनसाखळी चोरीची खडकीतील महिनाभरातील दुसरी घटना आहे. खडकी पोलीस अधिक तपास करत आहेत.

व्हीएस न्यूज - होलसेल मेडिकलमध्ये काम करणाऱ्या दोन कामगारांनी सात लाख रूपये किंमतीच्या 107 औषधांच्या बाटल्या चोरून नेल्या. ही घटना 24 मे 2017 ते 14 जानेवारी 2018 या कालावधीत नेहरूनगर येथे घडली.
कामगार अजय निसरगंध (वय-22, रा. मोशी), लखन कांबळे (वय-21, रा. विठ्ठलनगर) यांच्या विरोधात गुन्हा दाखल करण्यात आला आहे. याप्रकरणी युवराज मोरे (वय-30, रा. गुजरनगर, थेरगाव) यांनी पिंपरी पोलीस ठाण्यात फिर्याद दिली आहे.
याबाबत फौजदार घुगे यांनी माहिती दिली. फिर्यादी यांचे नेहरूनगर येथे औषधाचे होलसेल दुकान आहे. या दुकानात आरोपी दोघेही कामाला आहेत. त्यांनी 24 मे 2017 ते 14 जानेवारी 2018 या कालावधीत सात लाख 33 हजार रूपये किंमतीच्या लाईफ सेव्हिंग या औषधांच्या 107 बाटल्यांची चोरी केली.
पिंपरी पोलीस अधिक तपास करत आहेत.

व्हीएस न्यूज - महाराष्ट्र कामगार कल्याण मंडळाच्या राज्यस्तरीय कामगार केसरी व कुमार केसरी कुस्ती स्पर्धेत कॅम्प एज्युकेशन सोसायटीच्या डॉ. अरविंद ब. तेलंग महाविद्यालयाच्या कुमार साईराम चौगले याने कुमार केसरी किताब पटकाविला.
त्याला क्रीडा प्रमुख डॉ.सविता फलके यांनी मार्गदर्शन केले.

व्हीएस न्यूज - रस्त्यावर पार्क केलेल्या टेम्पोतून चोरट्यांनी अडीच लाख रूपये किंमतीची साखरेची 50 पोती चोरून नेली. ही घटना बुधवारी पहाटे पावणेतीनच्या सुमारास ताथवडे येथे घडली.
इंद्रकुमार गुप्ता (वय-62, रा. गंगाधाम मार्कटयार्ड, पुणे) यांनी वाकड पोलीस ठाण्यात फिर्याद दिली आहे.
पोलीसांनी दिलेल्या माहितीनुसार, गुप्ता यांनी द्रारूंबे, कासारसाई येथील श्री संत तुकाराम सहकारी साखर कारखान्यातून 50 किलो वजनाची 50 पोती साखर ( एमएच 14 बीजी 0730) या टेम्पोतून साखर आणली होती. बुधवारी पहाटे टेम्पो ताथवडे येथील बालाजी महाविद्यालयाजवळ पार्क केला होता. चोरट्यांनी टेम्पोतील अडीच लाख रूपये किंमतीची 50 पोती साखर चोरून नेली. वाकड पोलीस अधिक तपास करत आहेत.

व्गीएस न्यूज - 'रेल्वे लाईन ओलाडू नको' असे सांगणाऱ्या एका रेल्वे रूळ गॅगमनला एकाने शिवीगाळ करत हाताने मारहाण केली. ही घटना बुधवारी सकाळी साडेदहा वाजता आकुर्डी रेल्वे स्थानकाजवळ घडली.
सुनिल देविलाल चनाल (वय-34, रा. दळवीनगर, चिंचवड) याच्याविरोधात निगडी पोलीस ठाण्यात गुन्हा दाखल करण्यात आला आहे. रेल्वे रूळ गॅगमन ठकसेन शेळके (वय-35, रा. बिजलीनगर, चिंचवड) यांनी फिर्याद दिली आहे.
पोलीसांनी दिलेल्या माहितीनुसार, शेळके हे रेल्वेमध्ये गॅगमन म्हणून कार्यरत आहेत. बुधवारी सकाळी आकुर्डी स्थानकाजवळ ते काम करत होते. चनाल हे रेल्वे रूळ ओलांडण्याचा प्रयत्न करत होते. फिर्यादी शेळके यांनी आरोपीला रेल्वे रूळ ओलांडू नका असे सांगितले. यावरून चिडलेल्या आरोपीने फिर्यादीला अरेरावीची भाषा करत मारहाण केली. सरकारी कामात अडथळा आणल्याप्रकरणी चनाल यांच्यावर गुन्हा दाखल करण्यात आला आहे. निगडी पोलीस अधिक तपास करत आहेत.

व्हीएस न्यूज - होळी खेळताना एकमेकांना रंगांचे फुगे मारताना स्कूलबसमधून तोल जाऊन एका शाळकरी मुलाचा मृत्यू झाला. ही घटना गुरुवारी दुपारी तीनच्या सुमारास वडमुखवाडी येथे घडली. बस चालकाने हलगर्जीपणा केल्यामुळे त्याला दिघी पोलीसांनी अटक केली आहे.
राज सतीश कांबळे (वय 14, रा. साई निकेतन, लक्ष्मीनारायण नगर, वडमुखवाडी, चऱ्होली) असे बसमधून पडून मृत्यू झालेल्या विद्यार्थ्याचे नाव आहे. बबन जालींदर विटेकर (वय-41, रा. काटेवस्ती, चोवीसावाड) असे अटक केलेल्या स्कूल बस चालकाचे नाव आहे.
पोलीसांनी दिलेल्या माहितीनुसार, गुरूवारी दुपारी सव्वादोनच्या सुमारास शाळा सुटल्यानंतर स्कूलबस चालक विटेकर मुलांना घरी सोडविण्यास जात होता. मुले बसमध्येच होळी खेळण्यात मग्न होते. मित्रांना रंग लावण्याच्या नादात राजचा तोल गेल्याने तो बसमधून खाली पडला. बसचे पाठीमागील चाक त्याच्या अंगावरून गेल्याने त्याचा जागीच मृत्यू झाला. बस चालकाने हलगर्जीपणा केल्यामुळेच ही घटना घडल्याची शक्यता व्यक्त करून दिघी पोलीसांनी बस चालकाला अटक केली आहे. दिघी पोलीस अधिक तपास करत आहेत.

व्हीएस न्यूज – पिंपरी-चिंचवड महापालिका स्थायी समिती सभापती निवडीमध्ये समर्थकांना संधी देण्यात अपयश आल्यामुळे भाजपचे सहयोगी आमदार महेश लांडगे यांचा ताणतणाव वाढला आहे. परिणामी, प्रकृती अस्वस्थ वाटू लागल्याने आमदार लांडगे यांना चिंचवड येथील खासगी रुग्णालयात दाखल करण्यात आले, अशी माहिती भाजपच्या सूत्रांनी दिली. स्थायी समिती निवडणुकीत नाट्यमय घडामोडी घडल्या आहेत. स्थायी समिती सभापतीपदी आमदार लांडगे समर्थक राहुल जाधव यांना संधी मिळावी म्हणून लांडगे गट आग्रही होता. मात्र, भाजप पक्षश्रेष्ठींनी चिंचवड विधानसभा मतदार संघातील आमदार लक्ष्मण जगताप यांचे निकटवर्तीय विनायक गायकवाड यांच्या पत्नी ममता गायकवाड यांना सभापतीपदाची संधी दिली आहे.

दरम्यान, स्थायीसाठी तीव्र इच्छुक असलेल्या नगरसेवक राहुल जाधव यांनी आपल्या सदस्यत्वाचा राजीनामा दिला. तसेच, आपल्या गटातील नगरसेवकाला डावलले याचा संताप व्यक्त करीत आमदार लांडगे समर्थक महापौर नितीन काळजे यांनीही राजीनामा दिला. विशेष म्हणजे, महापालिका क्रीडा समिती सभापती लक्ष्मण सस्ते, शहर सुधारणा समिती सभापती सागर गवळी यांनीही आपल्या पदाचा राजीनामा दिल्याचे समजते.

गेल्या तीन-चार दिवसांपासून सुरू असलेल्या राजकीय घडामोडींमुळे आमदार लांडगे यांचे प्रकृतीकडे दुर्लक्ष झाले होते. परिणामी, अस्वस्थ वाटू लागल्यामुळे त्यांना खासगी रुग्णालयात दाखल केले आहे, अशी माहिती सूत्रांकडून मिळाली. याबाबत आमदार लांडगे यांच्या प्रमुख कार्यकर्त्यांशी संपर्क साधला मात्र त्यांनी प्रतिसाद दिला नाही.

व्हीएस न्यूज - पिंपरी चिंचवड महापालिकेच्या स्थायी समिती अध्यक्षपदाच्या निवडीवरून बरेच महाभारत घडले आहे. आमदार महेश लांडगे गटाला अध्यक्षपदावरून डावलल्याने मोठा राजकीय भूकंप झाला आहे. नितीन काळजे यांनी महापौर पदाचा राजीनामा दिला. तर लांडगे समर्थक राहुल जाधव यांच्यासह जुने निष्ठावंत शितल शिंदे यांनी स्थायीच्या सदस्यपदाचा राजीनामा पक्षनेते तसेच शहराध्यक्षांकडे देऊन आपली नाराजी जाहिर केली आहे.

स्थायी अध्यक्षपदी भोसरीचे आमदार लांडगे समर्थक राहुल जाधव तसेच जुने निष्ठावंत शितल शिंदे यांना डावलून आमदार जगताप समर्थक ममता गायकवाड यांचा अर्ज दाखल झाला आहे. त्यामुळेच सर्व नाराजांनी राजीनामे दिले आहेत.

राजीनाम्याबाबत बोलताना महापौर काळजे म्हणाले की, शहराच्या स्थायी समिती सभापती पदी राहुल जाधव यांना संधी देण्यात माझ्या पदाची भौगोलिक अडचण झाली असेल म्हणून आमदार महेश दादा लांडगे यांच्या कार्यकर्त्यांना न्याय देण्याच्या वृत्तीचा आदर करुन मनापासून महापौर या पदाचा राजीनामा दिला आहे.

तर भाजप आमदार लक्ष्मण जगताप म्हणाले की, सर्वच प्रमुख पदाधिकार्यांचे राजीनामे पक्षानामे घेतले असून अजून कोणताही स्विकारलेला नाही. लवकरच पक्षाची भूमिका स्पष्ट करू.

व्हीएस न्यूज - रस्त्याने जाणाऱ्या नागरिकांना विनाकारण शिवीगाळ करणाऱ्या टोळक्याला जाब विचारण्यासाठी गेलेल्या दोघांना या टोळक्याने कोयता व लाकडी दांडक्याने मारहाण केली. दोन वाहनांचीही तोडफोड केली. ही घटना चिखली येथे शुक्रवारी सायंकाळी सहाच्या दरम्यान घडली. विक्की काळे, संतोष कळमकर, सचिन तेली (सर्व रा. विद्यानगर, पिंपरी) यांच्यासह आणखी तिघांविरोधात निगडी ठाण्यात गुन्हा दाखल करण्यात आला आहे. याप्रकरणी समाधान नवनाथ खरात (वय 27, रा. हरगुडेवस्ती, चिखली) यांनी निगडी पोलिस ठाण्यात फिर्याद दिली आहे. हरगुडे वस्ती येथील एका गॅरेजजवळ शुक्रवारी सायंकाळी हे टोळके येणाऱ्या-जाणाऱ्या नागरिकांना विनाकारण शिवीगाळ करीत होते. याबाबत समाधान खरात यांनी जाब विचारला असता चिडलेल्या टोळक्याने समाधान यांना कोयत्याने मारहाण केली. तसेच समाधान यांच्या मित्राला देखील मारहाण करून जखमी केले. निगडी पोलीस तपास करत आहेत.

व्हीएस न्यूज - टोळक्यासह एकास मारहाण केल्याप्रकरणी महापालिकेच्या माजी नगरसेवकाच्या विरोधात त्याच्या तीन साथीदारांसह चिंचवड ठाण्यात शनिवारी गुन्हा दाखल करण्यात आला आहे.
अनंत कोऱ्हाळे असे गुन्हा दाखल झालेल्या माजी नगरसेवकाचे नाव आहे. कोऱ्हाळे यांच्यासह चंद्या, प्रसाद जाधव आणखीन एकावर गुन्हा दाखल करण्यात आला आहे. याप्रकरणी सागर रमेश कोंडे (वय 42, रा. दत्तवाडी, पुणे) यांनी चिंचवड पोलिस ठाण्यात फिर्याद दिली आहे. कोऱ्हाळे हे मागील पंचवार्षिकमध्ये मनसेच्या तिकिटावर नगरसेवक म्हणून निवडून आले होते. गेल्या वर्षी निवडणुकीपूर्वी त्याने त्यांनी शिवसेनेमध्ये प्रवेश केला होता. 2017 च्या पालिका निवडणुकीत त्यांच्या पराभव झाला होता.
फिर्यादी कोंडे हे गुरुवारी रात्री आठच्या सुमारास काही कामानिमित्त चिंचवडगाव बस थांब्याजवळ थांबले होते. त्यावेळी आरोपी प्रसाद जाधव तिथे आले. त्याने तुम्ही येथे कशाला परत आलात, परत येथे आलात तर तुमचे हातपाय तोडून टाकेन अशी धमकी दिली. तसेच दुसऱ्या एकाने कोंडे यांच्या डोक्यात मारहाण केली. तर कोऱ्हाळे यांनी लाथा-बुक्क्यांनी मारहाण केली, असे कोंडे यांनी फिर्यादीत म्हटले आहे.
चिंचवड पोलीस अधिक तपास करत आहेत.

व्हीएस न्यूज - ईशान्य भारतातील त्रिपुरा आणि नागालॅंड या दोन राज्यांच्या विधानसभा निवडणुकीत भाजपचा विजय झाल्यामुळे देशातील एकूण 20 राज्यांमध्ये भाजपची सत्ता निर्माण झाली आहे. त्यामुळे पिंपरी-चिंचवड शहर भाजपच्या वतीने शनिवारी पिंपरीतील आंबेडकर चौकात जल्लोष साजरा करून पेढे वाटण्यात आले. तसेच यावेळी गुलाल उधळून फटाके फोडून आनंदोत्सव साजरा करण्यात आला.
त्रिपुरा, नागालॅंड, मेघालय या तीन राज्यांमध्ये झालेल्या विधानसभा निवडणुकांचा शनिवारी निकाल लागला. त्यामध्ये त्रिपुरा आणि नागालॅंड या दोन राज्यांत भाजपने विजय मिळविला आहे. त्रिपुरा आणि नागालॅंड या दोन राज्यांच्या विधानसभा निवडणुकीत विजय झाल्यामुळे भाजपची देशातील एकूण 20 राज्यांत आजमितीला सत्ता निर्माण झाली आहे.
यावेळी शहराध्यक्ष, आमदार लक्ष्मण जगताप, उपमहापौर शैलजा मोरे, भाजप शहर सरचिटणीस प्रमोद निसळ, अमोल थोरात, सारंग कामतेकर, संजय मंगोडेकर, प्रदेश सचिव उमा खापरे, प्रदेश पदाधिकारी राजेश पिल्ले, सदाशिव खाडे, अमर मुलचंदानी, महेश कुलकर्णी, स्थायीच्या माजी अध्यक्षा सीमा सावळे, नगरसेविका ममता गायकवाड, आशा शेंडगे, रवि लांडगे, कैलास बारणे, शैला मोळक, विजय लांडे, रामकृष्ण राणे आदी उपस्थित होते.