व्हिएस न्यूज - पत्नीने दारू पिण्यासाठी पैसे दिले नाहीत म्हणून वाकड येथील एका मद्यप्याने सोमवारी सायंकाळी चारच्या सुमारास आपल्या पत्नीच्या डोक्यात वरवंटा घातला.

या प्रकरणी सुरेखा संतोष सुळके (वय 30, रा. वाकड) यांनी याप्रकरणी फिर्याद दिली असून त्यानुसार संतोष अंकुश कुदळे (वय 35, रा. वाकड) याच्याविरोधात गुन्हा दाखल करण्यात आला आहे.

पोलिसांनी दिलेल्या माहितीनुसार, सुरेख वाकड परिसरात धुण्याभांड्याचे काम करते. नवरा संतोष याला दारूचे व्यसन आहे. उभयतांमध्ये दारूसाठी पैसे देण्याच्या कारणावरून वारंवार भांडणे होतात. सोमवारी देखील अशाच प्रकारे दारूसाठी पैसे देण्याच्या कारणावरून भांडण झाले. सुरेखाने पैसे देण्यास नकार दिला. त्यामुळे चिडलेल्या संतोष याने घरातील वरवंटा सुरेखाच्या डोक्यात घातला. यामध्ये सुरेखा गंभीर जखमी झाली. तिला उपचारासाठी रुग्णालयात दाखल करण्यात आले आहे. वाकड पोलीस अधिक तपास करीत आहेत.

व्हिएस न्यूज - सांगवीतील जगताप डेअरी परिसरातील एका इसमाच्या नोकरानेच घरातील तब्बल 12 लाख 60 हजार रुपयांच्या दागिन्यांवर डल्ला मारून पलायन केले आहे.

हा प्रकार सप्टेंबर 2017 ते फेब्रुवारी 2018 दरम्यान घडला.

या प्रकरणी हरिश्चंद्र किसनराव गायकवाड (वय 66 रा. विशालनगर, जगताप डेअरी, सांगवी) यांनी याप्रकरणी सांगवी पोलीस ठाण्यात फिर्याद दिली असून त्यानुसार बालाजी उर्फ प्रभाकर वाघणे याच्याविरोधात पोलिसांनी गुन्हा दाखल केला आहे.

पोलिसांनी दिलेल्या माहितीनुसार, गायकवाड यांच्या घरी बालाजी हा नोकर म्हणून कामाला होता. बालाजीने गायकवाड यांच्या घरातील थोडे दागिने चोरून काही दिवस सुट्टी घेतली. हा प्रकार सात महिने चालत राहिला. सात महिन्यानंतर गायकवाड यांना बालाजीवर संशय आला. त्यांनी घरातील दागिने तपासले असता, 12 लाख 60 हजार रुपये किमतीचे 41 तोळे सोन्याचांदीचे दागिने गायब झाल्याचे निदर्शनास आले. त्यानुसार गुन्हा दाखल करण्यात आला आहे. बालाजी अद्याप फरार आहे. सांगवी पोलीस तपास करीत आहेत.

व्हिएस न्यूज - राजीनामा नाट्यातून पक्षावर दबाव निर्माण करण्याचे काम सुरू आहे. मागील अनेक वर्षे याच पदाधिकाऱ्यांकडे पक्षाची सूत्र होती. मात्र त्यांना त्यांच्या काळात विशेष काहीच करता आले नाही. त्यामुळे त्या काळात पक्ष संघटना कमकुवत झाली असे प्रतिपादन शिवसेनेचे पुणे जिल्हा संपर्कप्रमुख सुनील उर्फ बाळा कदम यांनी येथे केले.

दोन आठवड्यापूर्वी लोणावळा शहरातील शिवसेनेच्या काही पदाधिकाऱ्यांनी राजीनामा दिला होता. या प्रकरणावर पक्षाची बाजू मांडण्यासाठी घेण्यात आलेल्या पत्रकार परिषदेत बाळा कदम हे बोलत होते. कोणत्या ना कोणत्या कारणाने नाराज असलेल्या कार्यकर्त्यांचे मत पक्षाबाबत कलुषित करण्याचे काम काही जणांनी पडद्याआडून केले जात आहे. काही महिन्यांपूर्वी तालुकाध्यक्ष राजू खांडभोर यांच्या पदाला जी स्थगिती देण्यात आली त्यामागचे सूत्रधार ही हेच लोक होते असे संपर्कप्रमुख कदम यांनी यावेळी सांगितले. या पत्रकार परिषदेला सेनेचे विधानसभा संपर्कप्रमुख गणेश जाधव, तालुकाप्रमुख राजू खांडभोर, माजी पं.स. सदस्या आशा देशमुख, लोणावळा शहरप्रमुख सुनील इंगुळकर, नगपरिषद विरोधी गटनेत्या शादान चौधरी, नगरसेवक माणिक मराठे, शिवदास पिल्ले, नितीन आगरवाल, वाहतूक सेनेचे जिल्हाध्यक्ष महेश केदारी, युवासेनेचे तानाजी सूर्यवंशी यांच्यासह कार्यकर्ते उपस्थित होते.

तालुकाप्रमुख तसेच शहरप्रमुख यांच्या निवडी ह्या परस्पर केल्या गेलेल्या नसून त्यासाठी संपूर्ण निवडप्रक्रिया राबविली गेली असल्याचे सांगत सर्व नाराजांची पक्षाप्रती असणारी निष्ठा लक्षात घेऊन त्या सर्वांना पुन्हा पक्षकार्यात सामावून घेण्यासाठी त्यांच्याशी चर्चा करण्याची तयारी असल्याचे कदम यांनी सांगितले. तसेच सेनेच्या मिशन 150 ची माहिती देत घराघरापर्यंत धनुष्यबाण पोचविण्यासाठी सेनेचे कार्यकर्ते सज्ज झाले असल्याचे कदम यांनी सांगितले.

व्हिएस न्यूज - जेवन करून शतपावली करणाऱ्या एका तरूणाला जुन्या भांडणाच्या रागातून एका शस्त्रधारी टोळक्याने पाठलाग जीवे मारण्याचा प्रयत्न केला. तसेच त्याला व त्याच्या घरातील व्यक्तींना जीवे मारण्याची धमकी देत त्यांच्या मोटारीचीही तोडफोड केली. ही घटना मंगळवारी रात्री साडेनऊ वाजता भुमकर चौकात घडली.
अशिष उबाळे (वय-25, रा. वाकड) याने वाकड पोलीस ठाण्यात फिर्याद दिली आहे. त्यानुसार संजय पवार याच्यासह त्याच्या 5 साथीदारांविरोधात गुन्हा दाखल करण्यात आला आहे.
पोलीसांनी दिलेल्या माहितीनुसार, फिर्यादी अशिष व संजय याची यापुर्वी भांडणे झाली आहे. याचा वादातून मंगळवारी रात्री अशिष भूमकर चौकात शतपावली करत असताना संजय साथीदारांसह हातात कोयता, तलवार घेऊन तेथे आला. अशिषचा पाठलाग करत त्याला मारण्याचा प्रयत्न केला. मात्र, अशिष पळून जाण्यात यशस्वी झाला. अशिषची मोटार व त्याचा मित्र अमित भालेराव याची दुचाकीची आरोपींनी दगडाने, कोयत्याने तोडफोड केली. अशिषच्या घरातील व्यक्तींना धमकी देऊन जीवे मारण्याचा प्रयत्न केला.
वाकड पोलीस अधिक तपास करत आहेत.

व्हीएस न्युज-चालकाचे नियंत्रण सुटल्याने कार ग्रेड सेपरेटरमध्ये अडकून भीषण अपघात झाला. या अपघातात एका तरूणाचा जागीच मृत्यू झाला असून एकजण गंभीर जखमी झाला आहे. हा अपघात आज सकाळी पाचच्या सुमारास पिंपरी ग्रेडसेपरेटर येथे झाला.

शिवम जाधव (वय 20 राहणार - खराळवाडी ) असे अपघातात मृत्यू झालेल्या चालक तरुणाचे नाव आहे. तर हृषीकेश पवार गंभीर जखमी झाला असून त्याला जवळच्या रुग्णालयात उपचारासाठी दाखल करण्यात आले आहे. अग्निशमन विभागाने दिलेल्या माहितीनुसार, आज सकाळी पाचच्या सुमारास मुंबईकडून पुण्याच्या दिशेने एक मारुती एस एक्स 4 (एम एच 04 / ए डी 8461) कार भरधाव वेगात जात होती. कार पिंपरी ग्रेडसेपरेजटजवळ आली असता, चालकाचे कारवरील नियंत्रण सुटले. त्यामुळे कार रस्त्याच्या दुभाजकावरील खांबाला धडकली. कार भरधाव वेगात आसल्याने दुभाजकावरून सुमारे 500 मीटर घसरत गेली. या अपघातामध्ये चालकाचा जागीच मृत्यू झाला. तर त्याच्यासोबत असलेला हृषीकेश पवार गंभीर जखमी झाला.

अग्निशमन विभागाला याबाबत माहिती मिळताच संत तुकाराम नगर अग्निशमन विभागाचे जवान तात्काळ घटनास्थळी दाखल झाले. गाडी कापून कारमध्ये अडकलेल्या दोघांना बाहेर काढण्यात आले. जखमीला जवळच्या रुग्णालयात उपचारासाठी दाखल करण्यात आले आहे.

व्हीएस न्यूज - जागतिक कामगार दिन व महाराष्ट्र दिनाचे औचित्य साधून पाणी फाऊंडेशने “चला गावाकडे” हा उपक्रम हाती घेतला आहे. या दिवशी महाश्रमदान दिन म्हणून साजरा करण्यात आला. या आवाहनाला साथ देत पिंपळे सौदागर येथील उन्नती सोशल फाऊंडेशनच्या सुमारे २०० सदस्यांनी पुरंदर तालुक्यातील पानवडी गावात श्रमदान केले. या स्पर्धेत उन्नती सोशल फाऊंडेशनला प्रथम क्रमांक मिळाला.

राज्यात पाण्याचे संकट मोठ्या प्रमाणात असल्याने राज्यातील शेतकरी आत्महत्या करीत आहे. यावर मात करण्यासाठी पाणी फाऊंडेशने मागील अनेक वर्षांपासून राज्यातील खेड्यापाड्यात श्रमदानातून जमिनीत पाणी जिरविण्यासाठी शेतात, माळावर सोर्स खडे तयार केले जात आहेत. जेणे करून जमिनीतील पाण्याची पातळी वाढण्यास मदत होईल. यासाठी पाणी फाऊंडेशन दिवसरात्र काम करीत आहे. याला नागरिकही चांगला प्रतिसाद देत आहेत. याच उपक्रमाचा एक भाग म्हणून जागतिक कामगार दिनानिमित्त व महाराष्ट्र दिनानिमित्त एका अनोख्या प्रकारचा उपक्रम राबविण्यात आला. “चला गावाकडे”

अशी हाक देताच राज्यातील अनेक गावांत या दिवशी लाखो नागरिकांनी सहभाग नोंदविला. शेतकर्याप्रती आपले योगदान दिले. अनेक गावांत स्पर्धा घेण्यात आल्या ज्या टीमने चांगले व जास्त काम केले, अशा टीमला पुरस्कार देऊन गौरविण्यात आले.

पुरंदर तालुक्यातील पानवडी गावात ठिकठिकाणच्या १८ गटातून सुमारे ६०० नागरिकांनी सहभाग घेतला होता. यावेळी गावकार्यानी कामाची पाहणी करून स्पर्धेचे बक्षिस जाहीर केले. यावेळी प्रथम, द्वितीय व तृतीय क्रमांक जाहीर करण्यात आले. प्रथम क्रमांक पिंपळे सौदागर येथील उन्नती सोशल फाऊंडेशनला मिळाला. संस्थापक संजय भिसे, अध्यक्षा कुंदा भिसे यांना पानवडीचे सरपंच सुषमा भिसे व पुरंदर पंचायत समिती सदस्य नलिनी लोळे यांच्या हस्ते पारितोषिक देण्यात आले.

यावेळी उपसरपंच संदीप भिसे, ग्रामपंचायत सदस्य अनिता लोळे, मंगल दिवार, निवृत्ती लोळे, सुरेखा लोळे, रामदास भिसे, माजी सरपंच हरिभाऊ लोळे, सामाजिक कार्यकर्ते ज्ञानदेव भिसे, अनिल भिसे, आबा लोळे, अमोल लोळे, रमेश दिवार यांच्यासह ग्रामस्त व महाश्रमदानासाठी आलेले नागरिक, योगा हास्य क्लब पिंपळे सौदागर सदस्य व उन्नतीचे सदस्य मोठ्या प्रमाणात उपस्थित होते.

समाजासाठी बांधिलकी आपण ज्या समाजात रहातो त्या समाजाचे आपण काहीतरी देणे लागतो. ही भावना सध्या अनेकांच्या मनात जागृत होत आहे. पाणी फाऊंडेशने एक दिवस महाश्रमदान अशी हाक देताच अगदी लहानांपासून ते जेष्ठांपर्यंत सर्वांनीच उस्फूर्तपणे सहभाग नोंदविला. प्रत्येकांनी जमेल तेवढे श्रमदान केले, त्यामुळे समाजातील शेतकऱ्याबद्दलच्या भावना जागृत होत आहे. आणि सामाजिक बांधिलकी काय आहे याची जाणीव होत आहे.

व्हीएस न्यूज - स्वर्गीय लोकनेते प्रमोद महाजन यांच्या १२ व्या पुण्यतिथी निमित्त पिंपरी चिंचवड शहर भाजपातर्फे अभिवादन करण्यात आले. शहराध्यक्ष आमदार लक्ष्मण जगताप यांच्या हस्ते प्रमोद महाजन यांच्या प्रतिमेचे पुजन करत पुष्पहार अर्पण करण्यात आले.

यावेळी आमदार जगताप म्हणाले, दिवंगत लोकनेते प्रमोद महाजन हे सर्वसामान्य कार्यकर्त्याला पाठबळ देऊन पक्षाला तळागाळापर्यंत पोहोचवण्याचे काम करणारे जनसेवक होते. राजनिती तज्ञ, डावा हात वर करून भाषण करायची त्यांची लकब वेगळीच होती. नुसती विरोधकांवर टीका करणारी भाषणे न करता, विरोधकांच्या मर्मावर घाला घालणारी आणि लोकांना सोप्या भाषेत स्वतःचे म्हणणे पटवून देणारी भाषणे देणारा नेता म्हणजे प्रमोद महाजन होते. मुरली मनोहर जोशी यांची एकता यात्रा त्याचे प्रमुख प्रमोद महाजन होते. अटल बिहारी वाजपेयी यांनी प्रमोद महाजन यांच्या विषयी सांगितले होते की, “जरी प्रमोद महाजन बीजेपीमध्ये नसते तरीही ते, भारतातील असंख्य सामान्य युवकांना प्रेरणास्थान राहिले असते.” अशा लोकनेत्याच्या पुण्यतिथीनिमित्त विनम्र अभिवादन.

यावेळी सत्तारूढ पक्षनेते एकनाथ पवार, शहर प्रवक्ते अमोल थोरात, नगरसेवक शत्रुघ्न काटे, नामदेव ढाके, शितल शिंदे, प्रियांका बारसे, प्रमोद निसळ, चेतन घुले, राजू सावंत, विजय लांडे, कैलास कुंजीर, प्रदिप बेंद्रे, नंदू भोगले, संजीवनी पांडे, सुरेश वाडकर, रामकृष्ण राणे यांच्यासह अनेक पदाधिकारी व कार्यकर्ते उपस्थितीत होते.

व्हीएस न्यूज - पाण्याची टाकी साफ करत असताना विजेचा धक्का बसल्याने एका कामगाराचा मृत्यू झाला असून एक जण जखमी झाला आहे. ही घटना आज (शुक्रवारी) सकाळी दहाच्या सुमारास चिखली घरकुल प्रकल्पाजवळ घडली.

अमर खिलारे (वय २५. रा. थेरगाव) असे मृत्यू झालेल्या तरुणाचे नाव आहे. तर, सिद्धार्थ काळे (वय – ३०) हा जखमी झाला असून त्याला उपचारासाठी रुग्णालयात दाखल करण्यात आले आहे.

मिळालेल्या प्राथमिक माहितीनुसार, चिखलीतील घरकुल प्रकल्पाच्या मागे आशीर्वाद या नावाने सोसायटी आहे. अमर आणि सिद्धार्थ शुक्रवारी सकाळी सोसायटीतील पाण्याची टाकी मशिनच्या सहाय्याने साफ करत होते. त्यावेळी अचानक विजेचा धक्का अमर आणि सिद्धार्थ या दोघांना बसला. तसेच वीज प्रवाह पाण्यात उतरला. दोघेही टाकीत पडले. त्यात अमर याचा जागीच मृत्यू झाला आहे. तर, सिद्धार्थ गंभीर जखमी झाला असून त्याला उपचारासाठी पिंपरीतील यशवंतराव चव्हाण स्मृती (वायसीएम) रुग्णालयात दाखल करण्यात आले. निगडी पोलीस घटनास्थळी दाखल झाले असून तपास सुरु आहे.

व्हीएस न्यूज - फेसबुक किंवा व्हॉट्‌सऍपवरील पोस्टला लाईक, शेअरिंग करताना अथवा त्यावर कमेंट करताना घटनेचे गांभीर्य बाळगणे आवश्‍यक असते. त्यावर विचारपूर्वक प्रतिक्रिया देणे अपेक्षित असते. मात्र, अलीकडच्या काळात नेमके याच बाबीकडे दुर्लक्ष होत असल्याचे दिसून येत आहे. या माध्यमांचे चांगले-वाईट असे दोन्ही परिणाम दिसत असले तरीही सकारात्मक उपयोग अधिक होत आहे, असे मत प्रसार माध्यमातील जाणकार शेफाली वैद्य यांनी प्राधिकरण येथे व्यक्त केले .

निगडीतील स्वातंत्र्यवीर सावरकर मंडळाच्या वतीने दरवर्षीप्रमाणे १ ते ५ मे या कालावधीत ३४ व्या छत्रपती शिवाजी व्याख्यानमालेचे आयोजन करण्यात आले आहे. या व्याख्यानमालेचे तिसरे पुष्प “सोशल मीडिया-संधी व आव्हाने” या विषयावर त्या बोलत होत्या. यावेळी पिंपरी चिंचवड महापालिकेच्या उपमहापौर शैलजा मोरे, इंद्रायणी बँकेच्या संचालिका सुवर्णा झोळ, विनीता श्रीखंडे, अॅड. पद्मजा शिंदे, विनिता पाचरने, मिलिंद देशपांडे, सावरकर मंडळाचे अध्यक्ष एस.बी.पाटील, उपाध्यक्ष सदाशिव रिकामे, कार्याध्यक्ष विनोद बंन्सल, सचिव भास्कर रिकामे आदी उपस्थित होते.

वैद्य पुढे म्हणाल्या की, ट्‌विटरच्या माध्यमातूनही आपल्या भावनांना वाट करून देण्याचा मार्ग सोशल मीडियात उपलब्ध झालेला आहे. देश-विदेशातील सेलिब्रिटी, पंतप्रधान,मुख्यमंत्री आणि विविध खात्यांचे मंत्री किंवा उच्चपदस्थ व्यक्ती ट्‌विट करून आपल्या भूमिका स्पष्ट करतात. ट्‌विटरवर आलेल्या ट्टिटला रिट्विट करून त्याचे उत्तर अथवा प्रतिक्रियाही देण्याची व्यवस्था यात आहे. ट्‌विटरच्या माध्यमाने आलेल्या प्रतिक्रियेला अलीकडच्या काळात अधिक महत्व निर्माण झालेले आहे. त्यामुळे अनेक वेळा तात्काळ मदत उपलब्ध होऊन पुढील दुर्घटना टाळण्यास मदत होते. हे अलीकडच्या काळात दिसून येत आहे. ट्‌विटरवर फोटो, व्हीडीओ क्‍लिप टाकण्याचीही व्यवस्था असल्याने फेसबुक,व्हॉट्‌सऍपप्रमाणे हेही अत्यंत लोकप्रिय माध्यम झालेले आहे.

हल्ली जगात कुठेही घडलेले अपघात, घातपात, हल्ले, बॉम्बस्फोट अशा कोणत्याही दुर्घटनांचं वृत्त त्या घडल्याच्या काही क्षणांमध्ये सोशल मीडियावर येतं. ही बातमी कोण्या वार्ताहरानं केलेली आणि संपादकानं तपासून जबाबदारीनं दिलेली असतेच असं नाही. बहुसंख्य वेळा त्या घटनेमध्ये असलेल्या किंवा प्रत्यक्ष पाहणाऱ्यांनी सोशल मीडियावर पोस्ट केल्यामुळे ही बातमी पसरते. घटना अनुभवणारे किंवा प्रत्यक्ष पहाणारे त्यांना दिसणाऱ्या गोष्टी किंवा घटना पोस्ट करत राहतात. नेमकं काय घडत आहे आणि ते का घडत आहे याचा सर्वंकष विचार ते त्या क्षणी करू शकत असतातच असं नाही. त्यामुळे कुठेतरी काहीतरी भीषण घडलं आहे, घडत आहे हे सोशल मीडियावर लगेच पसरतं. परंतू त्यामुळे देशाची प्रतिमा मलीन होते. पण नेमकं काय घडलं आणि ते का हे समजण्यासाठी मात्र अनेक तुकड्यांमधली माहिती एकत्र जोडून पाहावी लागते किंवा दुसऱ्या दिवशीपर्यंत वाट पाहून एखाद्या जबाबदार वर्तमानपत्रात आलेलं वृत्तांकन वाचावं लागतं.

तंत्रज्ञान हे चांगलेच असते पण त्याचा वापर चांगल्या गोष्टीसाठी केला. तर चांगले ठरते आणि त्याचा चुकीचा वापर केला. तर ते घातक ठरते. प्रत्येक चांगल्या गोष्टींसोबत वाईटही येत असते. त्यामुळे सोशल मीडियाचा नीट वापर न करता कधी कधी लोकांच्या भावना भडकावण्यासाठीही केला जातो. याची अनेक उदाहरणे आपण नेहमी पाहत असतो. या अप्रत्यक्ष जगात वावरताना लांबची माणसे जवळ करण्याच्या प्रयत्नात आपण आपली जवळची माणसे लांब करत चाललो आहोत. हेही तितकेच खरे आहे. मात्र असे असले तरीही,सोशल मीडियाचा खरा अर्थ आहे, तो विधायक घटनांच्या बाबतीत शेअरिंग करणे होय.

अनुजा वनपाळ यांनी प्रास्ताविक केले. शिल्पा बिबीकर यांनी सूत्रसंचालन केले. शैलजा सांगळे यांनी आभार मानले.