व्हिएस न्यूज- देशभरात NEET-UG परीक्षेतील कथित गैरव्यवहार आणि परीक्षा प्रक्रियेतील त्रुटींविरोधात विद्यार्थी संघटना, विविध सामाजिक गट आणि विरोधी पक्षांनी उभारलेल्या आंदोलनाला मोठे यश मिळाल्याची प्रतिक्रिया व्यक्त होत आहे. केंद्रीय शिक्षणमंत्री धर्मेंद्र प्रधान यांनी आपल्या पदाचा राजीनामा दिल्याची घोषणा करत विद्यार्थ्यांना उद्देशून एक खुले पत्र जारी केले आहे.
पत्रात धर्मेंद्र प्रधान यांनी सांगितले की, गेल्या चार दशकांपासून ते शिक्षण क्षेत्राशी संबंधित असून विद्यार्थ्यांच्या आकांक्षा, स्वप्ने आणि अपेक्षांचा त्यांनी नेहमीच आदर केला आहे. NEET-UG परीक्षेतील अनियमिततेची दखल घेत केंद्र सरकारने तातडीने चौकशीचे आदेश दिले, प्रकरण सीबीआयकडे सोपविले आणि विद्यार्थ्यांच्या हितासाठी आवश्यक निर्णय घेतल्याचे त्यांनी नमूद केले.
त्यांनी पत्रात म्हटले आहे की, सुमारे २० लाख विद्यार्थ्यांच्या भवितव्याचा विचार करून परीक्षा सुरळीत पार पाडण्यासाठी केंद्र आणि राज्य सरकारांनी समन्वयाने काम केले. कोणत्याही विद्यार्थ्यावर अन्याय होऊ नये आणि परीक्षा माफियांमुळे विद्यार्थ्यांचे नुकसान होऊ नये, यासाठी सरकार कटिबद्ध राहिल्याचा दावा त्यांनी केला.
धर्मेंद्र प्रधान यांनी पुढे म्हटले की, मागील काही दिवसांत घडलेल्या घटनांमुळे त्यांना वैयक्तिकरीत्या दुःख झाले असून विद्यार्थ्यांचे भविष्य कोणत्याही कायदेशीर किंवा राजकीय संघर्षात अडकू नये, हीच त्यांची भूमिका आहे. देशातील युवकांची शक्ती ही भारताची खरी ताकद असून त्यांना भ्रमित करण्याचा कोणताही प्रयत्न यशस्वी होऊ देणार नाही, असेही त्यांनी स्पष्ट केले.
राजीनामा पत्रात त्यांनी पंतप्रधानांचे मार्गदर्शन, मंत्रिमंडळातील सहकारी, मंत्रालयातील अधिकारी आणि कर्मचाऱ्यांचे आभार मानले आहेत. तसेच भविष्यातही देशसेवा आणि युवकांच्या आकांक्षा पूर्ण करण्यासाठी स्वतःला समर्पित ठेवणार असल्याचे त्यांनी नमूद केले.
दरम्यान, विद्यार्थी आंदोलनाशी संबंधित संघटनांनी या घडामोडीला "विद्यार्थ्यांच्या एकजुटीचा विजय" असे संबोधले असून, परीक्षा व्यवस्थेत पारदर्शकता आणि उत्तरदायित्व वाढविण्याची मागणी कायम ठेवली आहे.