व्हीएस न्यूज - रायगड किल्ल्यावर बुधवारी ३४५वा शिवराज्याभिषेक सोहळा उत्साहात पार पडला. या सोहळ्यासाठी राज्यभरातील १० हजारांहून अधिक शिवप्रेमी गडावर दाखल झाले होते. अखिल भारतीय शिवराज्याभिषेक उत्सव समिती, दुर्गराज रायगड यांच्यावतीने या सोहळ्याचे आयोजन करण्यात आले होते. यावेळी किल्ले रायगड प्राधिकरणाचे अध्यक्ष छत्रपती संभाजी राजे आणि कोल्हापुरचे युवराज शहाजी राजे भोसले उपस्थित होते.

दोन दिवस चाललेल्या या सोहळ्याची सुरवात मंगळवारी दुपारी गडपुजनाने झाली. यावेळी २१ गावातील नागरीकांनी एकत्र येऊन गडपुजन केले. यानंतर किल्ल्यावर उत्खननात सापडलेल्या वस्तूच्या प्रदर्शनाचे उद्घाटन करण्यात आले. यानंतर शिरकाई देवी मंदिरात गोँधळ तर जगदिश्वर मंदिरात किर्तन सोहळा संपन्न झाला. राज्यभरातील विविध भागातून आलेल्या शिवभक्तांनी होळीच्या माळावर मर्दानी खेळ सादर करीत महाराजांना मानवंदना दिली. रात्री उशीरा राजसदरेसमोर ही रात्र शाहिरांची हा शाहीरीचा कार्यक्रम संपन्न झाला.

बुधवारी सकाळी सहा वाजता शिवराज्याभिषेक सोहळ्याच्या मुख्य कार्यक्रमाला सुरवात झाली. पहाटे नगारखाना परिसरात ध्वजारोहण करण्यात आले. यानंतर राजसदरेवर शाहिरांनी महाराजांना मानवंदना दिली. सकाळी साडे नऊच्या सुमारास छत्रपती संभाजी राजे यांचे राजसदरेवर आगमन झाले. यानंतर मेघडंबरीतील शिवाजी महाराजांच्या सिहासनारूढ पुतळ्याला सुवर्ण मुद्रांचा अभिषेक करण्यात आला. त्यानंतर शिवाजी महाराजांच्या पालखीतील मुर्तीला पंचामृत, सप्तगंगा स्नान घालून विधीवत पूजन करण्यात आले. शिवआरतीचे पठण करण्यात आले. त्यानंतर महाराजांच्या पालखीची शाही मिरवणूक काढण्यात आली. या चैतन्यमय सोहळ्याला हजारो शिवभक्त, महिला आणि पुरूषांनी मोठ्या संख्येने उपस्थिती लावली.

शंखनाद आणि तुतारीबरोबरच शिवप्रभूंच्या जयजयकाराने अवघा रायगडचा परिसर दुमदुमून गेला होता. राज्यभरातून आलेल्या शिवप्रेमींनी यावेळी मैदानी खेळांची, शस्त्र कवायतीचे सादरीकरण केले. पालखी सोहळ्यानंतर झालेल्या महाप्रसादाने सोहळ्याचा समोरोप झाला.

सोहळ्यानिमित्ताने गडावर ठिकठिकाणी विद्युत रोषणाई करण्यात आली होती. शिवप्रेमींच्या उत्साहामुळे अवघा आसमंत शिवगर्जनांनी दुमदूमून गेला होता. सोहळ्यानिमित्ताने रायगडावर कडेकोट पोलीस बंदोबस्त तैनात करण्यात आला होता. वाहतूक नियमनही करण्यात आले होते.

व्हीएस न्यूज - कर्नाटकचे मुख्यमंत्री एच डी कुमारस्वामी सोमवारी एका कॉलेज कार्यक्रमात सहभागी झाले असता आपल्या एका कबुलीने उपस्थितांना आश्चर्याचा धक्का दिला. आपण एक कमकुवत विद्यार्थी होतो, त्यामुळे प्रश्न विचारले जातील या भीतीने कधीच पहिल्या बाकावर बसायचो नाही अशी माहिती त्यांनी दिली.

नॅशनल डिग्री कॉलेजचे विद्यार्थी असलेले कुमारस्वामी १२ वर्षानंतर आपल्या कॉलेजात आले होते. जयानगर येथे हे कॉलेज आहे. यावेळी विद्यार्थ्यांशी संवाद साधतना कुमारस्वामी यांनी सांगितलं की, ‘मी कमी अक्कल असणारा विद्यार्थी होतो. त्यामुळेच तास सुरु असताना प्रश्न विचारले जातील या भीतीने पहिल्या बाकावर बसायचो नाही’.

आपल्या कॉलेज आयुष्यावर बोलताना मुख्यमंत्री कुमारस्वामी यांनी सांगितलं की, ‘मी डॉक्टर राजकुमार यांचा खूप मोठा चाहता होतो. मी त्यांचे चित्रपट पाहत असे. जर मी चांगला आणि हुशार विद्यार्थी असतो तर आयएएस अधिकारी बनायला आवडलं असतं. माझे वडिल (माजी पंतप्रधान एच डी देवेगौडा) मला नेहमीच काहीच कामाचा नसल्याचं म्हणत असतं. आयुष्यात मी कधीच पुढे जाऊ शकणार नाही असंही ते म्हणत’.

‘मी कॉलेजात असताना कशाचीही चिंता करायचो नाही. अत्यंत बेजबाबदारपणे वागायचो. पण आताच्या विद्यार्थ्यांनी जबाबदार झालं पाहिजे. कॉलेजचे विद्यार्थी कधीही विधानसभेत येऊन मला भेटू शकतात. त्यांनी कोणत्याही अपॉइंटमेंटची गरज नाही’,असंही त्यांनी सांगितलं.

व्हीएस न्यूज - भाजपाचे राष्ट्रीय अध्यक्ष अमित शाह यांनी भारतीय संघाचे माजी कर्णधार कपिल देव यांची भेट घेतल्यापासून कपिल देव हे राज्यसभेत जाणार असल्याच्या चर्चांनी जोर धरला आहे. शुक्रवारी अमित शाह यांनी कपिल देव यांच्या घरी जाऊन भेट घेतली. शाह यांनी देव यांची भेट का घेतली ? हे अद्याप समजू शकलेलं नाही. पण भाजपाचे चाणक्य असलेले अमित शाह आता कोणती नवीन रणनीती आखणार याकडे सर्वांचे लक्ष लागले आहे.

२०१४ मध्ये भाजपा आणि शिरोमणी अकाली दलाकडून कपिल देव यांना लोकसभा निवडणूक लढवण्यासाठी संपर्क करण्यात आला होता. पण त्यावेळी राजकारणापासून दूर राहण्याला त्यांनी प्राधान्य दिलं होतं. मात्र, आता राष्ट्रपतींकडून राज्यसभेसाठीचं गैरराजनितीक नामांकन आल्यास कपिल देव ते नाकारणार नाहीत, असा अंदाज भाजपाच्या नेत्यांकडून वर्तवला जात आहे. आपआपल्या क्षेत्रात उल्लेखनीय कामगिरी करणाऱ्यांना राष्ट्रपतींकडून राज्यसभेसाठी नामांकन दिलं जातं. या कोट्यातून १२ जागा असतात, त्यापैकी आता ७ जागा खाली आहेत.

भारतीय संघाचा माजी कर्णधार सौरव गांगुली हा देखील भाजपामध्ये प्रवेश करणार असल्याच्या चर्चा सोशल मीडियावर रंगल्या आहेत. पश्चिम बंगालमध्ये ताकद वाढवण्यासाठी भाजपाने गांगुलीला पक्षामध्ये घेण्याच्या हालचाली सुरू केल्या असल्याचं सांगितलं जात आहे. ‘पश्चिम बंगे बीजेपी चाइ’ म्हणजे ‘बंगालमध्ये आम्हाला भाजपा हवीये’ या नावाच्या एका फेसबुक पेजवर गांगुली भाजपामध्ये प्रवेश करणार असल्याचा दावा करण्यात आला होता, तेव्हापासून गांगुली भाजपात जाणार असल्याची चर्चा येथे रंगली आहे. पण, भाजपाच्या कोणत्याही नेत्याने किंवा गांगुलीने स्वतःही याबाबतच्या वृत्ताला अद्याप दुजोरा दिलेला नाही किंवा नाकारलंही नाहीये.

२०१४ मध्ये भाजपाने गांगुलीला लोकसभा निवडणूक लढवण्याची ऑफर दिली होती, पण गांगुलीने त्यावेळी नकार दिला होता. भाजपाने ऑफर दिली होती पण माझी जागा क्रिकेटच्या मैदानात आहे, राजकारणाच्या नाही असं म्हणत गांगुलीने त्यावेळी ती ऑफर नाकारली होती.

व्हीएस न्यूज - जनतेची उपेक्षा करणाऱ्या सरकारी अधिकाऱ्यांपेक्षा वेश्या बऱ्या असे वादग्रस्त वक्तव्य उत्तर प्रदेशातील एका आमदाराने केले आहे. जनतेकडून लाच घेऊन कामाची आश्वासने देण्याच्या वृत्तीवर टीका करताना त्यांची जीभ घसरली. मात्र, यामुळे वाद निर्माण होण्याची शक्यता आहे.

उत्तर प्रदेशातील बलियाचे आमदार सुरेंद्र सिंह यांनी हे वादग्रस्त वक्तव्य केले आहे. आपल्या कार्यकर्त्यांसह चेनता दिवस साजरा करताना त्यांनी हे वक्तव्य केले. ते म्हणाले, भ्रष्ट अधिकाऱी आणि कर्मचाऱ्यांपेक्षा तर वेश्या चांगल्या आहेत ज्या पैसे घेऊन काम तरी करतात. हे लोक तर कामाचे पैसे घेतात आणि ते करीतही नाहीत. त्यामुळे जर कोणत्याही अधिकारी किंवा कर्मचाऱ्याने लाच मागितली तर त्याला एक ठोसा द्या अन्यथा त्याला जोड्याने मारा असे त्यांनी म्हटले आहे.

कार्यकर्त्यांशी संवाद साधताना सिंह म्हणाले, जर कुठला अधिकारी किंवा कर्मचारी लाच मागत असेल तर त्याचा आवाज रेकॉर्ड करा आणि ते रेकॉर्डिंग माझ्याकडे घेऊन या. त्यानंतर संबंधित प्रकरणाची चौकशी करुन दोषी अधिकाऱ्यावर कारवाई केली जाईल. यावेळी बलिया तहसिल कार्यालची अवस्था अत्यंत वाईट झाल्याचे सांगत मी आमदार असलो किंवा नसलो तरी तहसिल कार्यालयातील भ्रष्ट अधिकाऱ्यांना येथे राहू देणार नाही. यावेळी त्यांनी वरिष्ठ अधिकाऱ्यांना इशारा दिला की, जमीनीसंदर्भातील नोंदी आणि शेतीसंदर्भातील कामांसाठी लाच घेणे बंद झाले पाहिजे.

व्हीएस न्यूज - अखेर तब्बल साडे चार वर्षांनी भारतीय रिझर्व्ह बँकेने व्याजदरांमध्ये वाढ केली आहे. आरबीआयचे गव्हर्नर उर्जित पटेल यांच्या अध्यक्षतेखालील सहा सदस्यीय समितीने आरबीआय ज्या दरानं बँकांना वित्तपुरवठा करतं त्या व्याजाचे दर किंवा रेपो रेट पाव टक्क्यांनी वाढवून 6.25 टक्के केला आहे.

बँका ज्या दरानं आपल्याकडे असलेला अतिरिक्त निधी रिझर्व्ह बँकेकडे जमा करतात त्यावर (म्हणजे रिव्हर्स रेपो) त्यांना 6 टक्के व्याज मिळेल. एप्रिल महिन्यामध्येच दोन सदस्यांनी पाव टक्के दरवाढीची शिफारस केली होती. आजच्या बैठकीमध्ये सर्वच्या सर्व सदस्यांनी दरवाढीच्या प्रस्तावाला समर्थन दिलं व एकमतानं ही वाढ करण्यात आली आहे.

या दरवाढीमुळे भविष्यातील सर्व कर्जांचे दर वाढू शकतात. परिणामी गृहकर्ज, वाहन कर्ज, वैयक्तिक कर्जे यांचे दर वाढण्याची शक्यता आहे. साधारणपणे रिझर्व्ह बँकेने व्याजदरांमध्ये वाढ केली की बँका हा वाढीव बोजा ग्राहकांकडे सरकवतात. असा अनुभव आहे की सगळ्यात मोठी सरकारी बँक प्रथम व्याजदरात वाढ करते मग मागोमाग सगळ्या बँकांचे कर्जही महागते. जर का आत्तापर्यंतची ही प्रथा सुरू राहिली तर गृहकर्ज, वाहन कर्ज, वैयक्तिक कर्ज व अन्य प्रकारची कर्जेही महागण्याची शक्यता आहे.

अर्थात, गेल्या आठवड्यातच स्टेट बँक, पंजाब नॅशनल व आयसीआयसीआय बँकेने प्रमाण कर्जाचा दर किंवा एमसीएलआर 0.1 टक्क्यांनी वाढवला होता व कर्ज महागत असल्याचे सूतोवाच केले होते. बहुतेक सर्व प्रकारची कर्जे या एमसीएलआरशी जोडलेली असतात, व त्यात होणारे बदल कर्जाच्या व्याजात किंवा हप्त्यात उमटतात. त्यामुळे एमसीएलआर किंवा प्रमाण दर वाढला की ईएमआय वाढतो. बुधवारच्या व्याजदर वाढीनंतर किती बँका हा प्रमाण दर वाढवतात व किती वाढवतात यावर कर्जे महाग होतील का व किती होतील हे ठरणार आहे.

व्हीएस न्यूज - मध्य प्रदेशमध्ये आम्ही सत्तेत आलो तर शेतकऱ्यांना सुरक्षित करणे हे आमचे पहिले काम असेल. मध्य प्रदेशात काँग्रेसचे सरकार आले तर १० दिवसात शेतकऱ्यांचे कर्ज माफ करु अशी घोषणा राहुल यांनी केली. पंतप्रधान मोदी आणि भाजपाला शेतकऱ्यांची चिंता नाही हे सत्य आहे. श्रीमंत बिझनेसमॅन मित्रांना मदत करायला ते प्रथम प्राधान्य देतात. पंतप्रधान नरेंद्र मोदींनी मध्य प्रदेशच्या जनतेची फसवणूक केली. त्यांनी फक्त मध्य प्रदेशच्याच नव्हे तर संपूर्ण देशाची फसवणूक केली. नोकरी देण्याचे त्यांनी खोटे आश्वासन दिले असा आरोप काँग्रेस अध्यक्ष राहुल गांधी यांनी मंदसौर येथील जाहीर सभेत केला. मागच्यावर्षी मध्य प्रदेशात मंदसौर येथे झालेल्या गोळीबारात मरण पावलेल्या शेतकऱ्यांच्या कुटुंबियांची राहुल यांनी भेट घेतली.

काँग्रेस सरकार सत्तेवर आल्यास १० दिवसात न्याय मिळेल. ज्यांनी शेतकऱ्यांवर गोळया चालवल्या आहेत. त्यांच्यावर कारवाई करुन दाखवू असे राहुल म्हणाले. पंतप्रधान मोदींनी पंधरा उद्योगपतींचे १.५ लाख कोटींचे कर्ज माफ केले. पण मी त्यांना शेती कर्ज माफ करायला सांगितले त्यावर ते मौन होते असे राहुल म्हणाले.

मी जेव्हा कॅप्टन अमरींदर सिंग, सिद्धारामय्या यांना सांगितले तेव्हा कर्नाटक आणि पंजाब सरकारने दहा दिवसात शेतकऱ्यांचे कर्ज माफ केले असे राहुल यांनी सांगितले. माझ्यासाठी सर्वात प्रथम या देशाची जनता आहे. त्यानंतर काँग्रेस कार्यकर्ते आणि माझे तिसरे प्राधान्य काँग्रेस नेत्यांना आहे असे राहुल म्हणाले. पाच-सात वर्षानंतर मी जेव्हा पुन्हा इथे येईन तेव्हा माझ्या हातात असलेल्या फोनवर मला ‘मेड इन मंदसौर’ लिहिलेले पाहायचे आहे. नरेंद्र मोदी आणि शिवराज सिंह चौहान हे करु शकणार नाहीत. पण कमल नाथ आणि ज्योतिरादित्य सिंधिया हे स्वप्न प्रत्यक्षात आणू शकतात असे काँग्रेस अध्यक्ष राहुल गांधी म्हणाले.

व्हीएस न्यूज - लष्कर-ए-तोयबा या दहशतवादी संघटनेकडून उत्तर प्रदेशातील कृष्ण जन्मस्थळ, वाराणसीतील काशी विश्वनाथ मंदिर, हापूड आणि सहारनपूर रेल्वे स्टेशन बॉम्बने उडवून देण्याची धमकी देण्यात आली आहे. उत्तर प्रदेश पोलिसांना याबाबतचे एक पत्र मिळाले आहे. त्यामुळे राज्यात हाय अॅलर्ट जारी करण्यात आला आहे. या पत्रानुसार, ८ आणि १० जून रोजी या प्रमुख ठिकाणांवर बॉम्बस्फोट करण्याची धमकी देण्यात आली आहे. या पत्राची सत्यता सध्या पडताळण्यात येत आहे.

गुप्तचर यंत्रणेकडून (आयबी) हे पत्र मिळाल्यानंतर अॅलर्ट जारी करण्यात आला असून युपी पोलिसांना सतर्कतेचे आदेश देण्यात आले आहेत. अतिरिक्त पोलिस महानिरिक्षक आनंदकुमार यांनी सांगितले की, महत्वपूर्ण धार्मिक, पर्यटन आणि सार्वजनिक ठिकाणांच्या सुरक्षा व्यवस्थेत वाढ करण्यात आली आहे. एनडीटीव्हीने याबाबत वृत्त दिले आहे.

या पत्रावर जम्मू-काश्मीरच्या लष्करचा क्षेत्रीय कमांडर मौलाना अबू शेख याची सही आहे. याच दहशतवादी संघटनेने मंगळवारी बांदीपुरातील हाजिन सैन्यशिबिरावर हल्ला केल्याची जबाबदारी स्विकारली आहे. लष्करच्या एका प्रवक्त्याने अब्दुल्ला गजनवी याने श्रीनगरमधील एका वृत्त संस्थेशी फोनवरुन संपर्क करीत यामागे आपल्या संघटनेचा हात असल्याचा दावा केला आहे.

दरम्यान, अमरनाथ यात्रेदरम्यान दहशतवादी हल्ल्यामागे देखील लष्कर-ए-तोयबाचा हात होता. ही दहशतादी संघटना दक्षिण आशियातील सर्वात मोठ्या दहशतवादी संघटनांपैकी एक आहे. हाफिज सईदने याची स्थापना अफगाणिस्तानातील कुनार प्रांतात केली होती. सध्या तो पाकिस्तानातील लाहोरमधून आपल्या चालवतो. तसेच पाकव्याप्त काश्मीरमध्ये अनेक दहशतवादी प्रशिक्षण शिबिरे चालवतो. या संघटनेने भारतात अनेकदा दहशतवादी हल्ले घडवून आणले आहेत.

व्हीएस न्यूज - जन्माला मुलगा आला अन हातात मुलगी दिली या गंभीर प्रकरणाने बीड जिल्हाभरात संताप व्यक्त होत आहे. मुलगा बदलण्याचे काम आणि कारस्थान याच ठिकाणी झाल्याने बीड जिल्हा रुग्णालयाचा गलथान कारभार चव्हाट्यावर आला या प्रकरणाने जिल्हारुग्णालय आणि प्रशासन आरोपीच्या पिंजऱ्यात उभे आहे

जिल्हा रूग्णालयात ११ मे रोजी छाया राजू खिटे यांची प्रसूती झाली. छाया यांना मुलगा झाला होता परंतु त्यानंतर त्यांच्या हातात मुलगी ठेवण्यात आल्याने त्यांना प्रचंड धक्का बसला. दरम्यान, ‘मी स्वत: त्या महिलेची प्रसूती केलेली असून ‘तो’ मुलगाच होता, असे छाया यांची प्रसूती करणाऱ्या डॉ. दिपाली मोराळे यांनी सांगितले. यामुळे प्रकरणातील गुंता वाढत आहे. जिल्हा रूग्णालयाच्या प्रशासनाने सर्व अंतर्गत चौकशी सुरू केलेली आहे. संबंधीत महिला जिल्हा रूग्णालयात प्रसूतीसाठी दाखल झाल्यापासून ते ‘डिस्चार्ज’ होईपर्यंतचे रेकॉर्ड तपासण्याची मोहीम सुरू केली आहे.

एकीकडे पोलिस या प्रकरणाचा तपास करत आहेत तर दुसरीकडे जिल्हा रूग्णालय प्रशासन देखील अंतर्गत रेकॉर्ड तपासणी करत असून लवकरच या प्रकरणाचा छडा लागण्याची शक्यत आहे एकीकडे प्रसूती करणाऱ्या डॉक्टर मुलगा जन्माला आला होता असे सांगतात दुसरीकडे खाजगी रुग्णालयात दाखल करताना ती मुलगी होती असे सांगितले जाते म्हणजेच बीडच्या जिल्हा रूग्णालयात मुलगा एक्सचेंज झाला हे निश्चित आहे. बीडचं जिल्हा रूग्णालय दालालानी घेरलं आहे, रुग्णालयात रुग्ण सेवा सोडून बाकीचे उद्योग मात्र बिनधास्त केले जात आहेत. मागच्या काही दिवसात डॉ. अशोक थोरात यांनी पदभार घेतल्या पासून कारभार गतिमान करण्याचा प्रयन्त केला आहे आणि काही प्रमाणात त्यांना यात यशही मिळाले आहे.

व्हीएस न्यूज - देशात सध्या भयंकर वातावरण निर्माण झाले असून धर्मनिरपेक्षतता संकटात सापडल्याचं सांगत ही परिस्थिती बदलण्यासाठी सगळ्या ख्रिस्ती बांधवांनी उपवास करावा असं आवाहन दिल्लीचे आर्चबिशप आनिल जोसेफ थॉमस काउटो यांनी ख्रिस्ती बांधवांना केले आहे. थॉमस यांच्या या आवाहना नंतर राजकीय वातावरण तापले असून दिल्लीतील भाजप सरकारने यावर नाराजी व्यक्त केली आहे.

आर्चबिशप आनिल यांनी दिल्लीतील सर्व चर्चं व पादरींना पत्र पाठवले आहेत. आपण सध्या एका विचित्र राजकीय अस्थिरतेमधून जात आहोत. ज्यामुळे आपल्या लोकशाहीच्या मूल्यांवरच गदा आली आहे. तसेच देशाची धर्मनिरपेक्ष छवीही धोक्यात आली आहे. असे या पत्रात नमूद करण्यात आले आहे. तसेच २०१९ साली होणाऱ्या निवडणूकां डोळ्यासमोर ठेवून नेत्यांसाठी व्रत करण्याचे आवाहनही अनिल यांनी केले आहे.

दरम्यान, दिल्ली आर्चबिशपचे सचिव फादर रॉबिन्सन यांनी आर्चबिशपचे पत्र राजकीय किंवा पंतप्रधानांविरोधात नसल्याचे स्पष्ट केले आहे. तसेच ते एक प्रार्थनेचे निमंत्रण असून अशी अनेक पत्रं यापूर्वीही लिहण्यात आल्याचे त्यांनी सांगितले आहे.

अल्पसंख्याक मंत्री मुख्तार अब्बास नकवी यांनी या पत्रावर नाराजी व्यक्त केली आहे. पंतप्रधान जाती व धर्माची बंधने तोडून भेदभाव न करता सगळ्यांच्या विकासासाठी काम करत आहेत. यामुळे आर्चबिशप यांनी प्रगतिशील मानसिकतेवर विचार करावा असे त्यांना सांगावेसे वाटते. असे नकवी यांनी म्हटले आहे.

व्हीएस न्यूज - आधुनिक विचाराचे जनक, भारताचे महान समाज सुधारक राजा राम मोहन रॉय यांच्या २४६ व्या जयंतीनिमित्त गुगलकडून डूडल बनवून त्यांना श्रद्धांजली वाहिली आहे. भारतीय प्रबोधनाचे जनक राजा राम मोहन रॉय यांनी १९ व्‍या शतकामध्ये सामाजिक चळवळींना सुरूवात केली. त्यामध्ये त्यांनी सतिप्रथा, बालविवाह अशा जाचक प्रथेतून त्यांनी भारतीय महिलांना त्यांनी मुक्‍त केले.

सतिप्रथा बंद व्‍हावी यासाठी त्यांनी मोठी चळवळ उभा केली. या समाज कार्यामुळे त्यांच्यावर जोरदार टीका झली. स्‍त्रियांवर अन्याय करणारी सतिप्रथा असल्याने त्यांनी सतिप्रथेविरूध्द कायदा करण्यात यावा यासाठी लॉर्ड विल्‍यम बेंटिक यांच्याकडे अर्जाद्वारे मागणी केली. त्यांच्या पाठपुराव्‍यानंतर ४ डिसेंबर १८२९ रोजी त्यांनी सतिप्रथा बंद करण्याचा कायदा केला. ही प्रथा बंद ठेवण्याचे धोरण कायम ठेवावे यासाठी ते ब्रिटीश सरकारला अर्ज करण्यासाठी ते इंग्लंडला रवाना झाले. या प्रथेविरूध्द राजा राम मोहन रॉय यांनी आवाज उठवल्यानंतर दिल्‍लीच्या बादशहाने त्यांना राजा किताब बहाल केला.

राजा राम मोहन रॉय यांचा जन्‍म बंगालमधील हुगळी येथे ब्राह्मण कुटुंबात २२ मे १७७२ रोजी झाला होता. राजा ही पदवी त्यांना मुगल सम्राट अकबर यांनी बहाल केली होती. भारतातून इंग्लडला जाणारे ते पहिले भारतीय होते. मुगल सम्राटचे राजदूत म्‍हणून ते इंग्लडला गेले होते. त्यांनी १८३० साली ब्राह्मो समाजाची स्थापना केली. ४ डिसेंबर १८२१ रोजी संवाद कैमुदी हे बंगाली भाषेतील तर १२ एप्रिल १८२२ रोजी मिरात उल अखबार हे पर्शियन व्रतपत्र त्‍यांनी सुरु केले.

व्हीएस न्यूज - आम्हाला महाराष्ट्रात रहायचे नाही, तुमच्या राज्यात आमच्या गावांचा समावेश करून घ्या, अशी विनंती करणारे पत्र सीमा भागातील काही गावकऱ्यांनी तेलंगणाच्या मुख्यमंत्र्यांना लिहले आहे. वाचताना थोडा धक्का बसेल पण हे खरे आहे.

नांदेड जिल्ह्यातील सीमा भागात राहणाऱ्या धर्माबाद तालुक्यातील ग्रामस्थांनी येथील गावांचा समावेश तेलंगणा राज्यात करण्याची मागणी केली आहे. सीमा भागातील या गावातील शेतकऱ्यांसाठी महाराष्ट्र सरकार काहीच प्रयत्न करत नसल्याचे गावकऱ्यांचे म्हणणे आहे.

महाराष्ट्राच्या तुलनेत तेलंगणा राज्यात शेतकऱ्यांसाठी अनेक चांगल्या योजना आहेत. जर या गावांचा समावेश तेलंगणा राज्यात झाला तर त्या योजनांचा फायदा आम्हाला देखील घेता येईल, असे येथील लोकांना वाटते. तेलंगणामधील के.चंद्रशेखर राव सरकारने शेतकऱ्यांसाठी अनेक चांगल्या योजना तयार केल्या आहेत. या योजनेतून शेतकऱ्याला प्रत्येक हेक्टरसाठी वर्षाला 8 हजार रुपये दिले जातात.

केसीआर सरकारने शेतकऱ्यांचे कर्ज देखील माफ केले आहे. त्याचबरोबर राज्यातील प्रत्येक शेतकऱ्याला 24 तास मोफत वीज दिली जाते आणि प्रत्येक शेतकऱ्याचा 5 लाख रुपयांचा विमा सरकारने उतरवला आहे.

धनाबाद तालुक्यातील सरपंच असोशिएशनचे अध्यक्ष बाबूराव पाटील कदम यांनी देखील येथील गावांचा समावेश तेलंगणामध्ये करावा अशी मागणी केली आहे. तर तालुक्यातील बबली गावाच्या सरपंचांनी टीआरएसच्या खासदार कविता यांची भेट घेऊन या गावांचा समावेश तेलंगणा राज्यात करण्याची मागणी केली. विशेष म्हणजे खासदार कविता जेव्हा निझामाबाद येथे शेतकऱ्यांना तेलंगणा सरकारकडून देण्यात येणाऱ्या आर्थिक मदतीचे वाटप कर होत्या तेव्हा महाराष्ट्रातील शेतकऱ्यांनी आमचा समावेश तेलंगणा राज्यात करा अशी मागणी केली.