प्रा.मोरे महाविद्यालयामध्ये माजी विद्यार्थी मेळाव्याचे आयोजन

व्हिएस न्यूज - आकुर्डी येथील प्रा. रामकृष्ण मोरे कला, वाणिज़्य व विज्ञान महाविद्यालय आणि माजी विद्यार्थी संघ यांच्या संयुक्त विद्यमानाने दि. 26 डिसेंबर 2017 रोजी माजी विद्यार्थी मेळाव्याचे आयोजन करण्यात आले आहे. प्रा. मोरे महाविद्यालयाच्या रौप्य महोत्सव सांगता समारंभाच्या निमित्ताने आणि माजी विद्यार्थ्यांचा महाविद्यालयाशी संपर्क वाढावा, जुन्या आठवणींना उजाळा देता यावा, आजी विद्यार्थांसमोर एक आदर्श निर्माण व्हावा, होतकरू विद्यार्थ्यांस मदत व्हावी या उद्देशाने हा मेळावा घेण्यात येत असून मेळाव्यास सुमारे 3 ते 4 हजार विद्यार्थी उपस्थित राहणार आहेत.

कार्यक्रमाचे मुख्य आकर्षण म्हणजे तरूणांचे आदर्श प्रमुख पाहुणे स्पेशल आय.जी. कोल्हापूर विभाग विश्वास नांगरे पाटील हे यावेळी विद्यार्थ्यांना मार्गदर्शन करणार आहेत. तर, माजी मुख्यमंत्री अजितदादा पवार कार्यक्रमाच्या अध्यक्षस्थानी राहतील. कार्यक्रमासाठी पुणे जिल्हा शिक्षण मंडळाचे उपध्याक्ष राजेंद्र घाडगे, मानद सचिव संदिप कदम, खजिनदार मोहनराव देशमुख, उपसचिव एल. एम. पवार, सहसचिव ए.एम. जाधव, प्रा रामकृष्ण मोरे महाविद्यालयाचे प्राचार्य डॉ. एम जी चासकर आदि उपस्थित राहणार आहेत. अशी माहिती प्रा. रामकृष्ण मोरे महाविद्यालयाचे प्राचार्य डॉ. एम. जी. चासकर यांनी पत्रकार परिषदेत दिली.

दरम्यान, सुसज्ज अशा स्पर्धा परिक्षा केंद्राचे उद्घाटन करण्यात येणार आहे. ज्यामध्ये उपयुक्त भरपूर पुस्तके, इंटरनेट, ए.सी आदि सुविधा असणार आहेत. विविध क्षेत्रामध्ये उल्लेखनीय कार्य केलेल्या माजी विद्यार्थ्यांचे अनुभव यशोगाथा या पुस्तकाच्या रूपाने प्रसिध्द करण्यात येईल. तसेच विशेष उल्लेखनीय कार्य करणार्या विद्यार्थ्यांचा उपस्थित पाहुण्यांच्या शुभहस्ते सत्कार करण्यात येणार आहे. 1992 साली स्थापन झालेल्या प्रा रामकृष्ण मोरे महाविद्यालयाला 25 वर्षे पूर्ण होत आहेत. गेल्या 25 वर्षामध्ये महाविद्यालयाने स्वतःची ओळख निर्माण केली आहे. परिसरातील विद्यार्थ्यांसाठी उत्तम सोय उपलब्ध करून दिलेली आहे. महाविद्यालय अत्याधुनिक सुविधांनी युक्त असून महाविद्यालयाला व प्राध्यापकांना अनेक पुरस्कार प्राप्त झालेले आहेत. महाविद्यालयातील 14 विद्यार्थी सुवर्णपदक प्राप्त असून विद्यार्थी व प्राध्यापक राष्ट्रीय व आतंरराष्ट्रीय परिषदामध्ये सहभागी होत असतात. यावेळी माजी विद्यार्थी संघ अध्यक्ष शांताराम वायकर, नगरसेवक अमित गावडे, नगरसेवक अँड. मोरेश्वर शेडगे, नाना शिवले, ज्ञानेश्वर कुटे, दत्तात्रय भालेकर, विजय लांडगे, प्रा रामकृष्ण मोरे महाविद्यालयाचे उपसचिव एल. एम. पवार, उपप्राचार्य डॉ. निलेश दांगट, डॉ. अभय खंडागळे, डॉ. तुषार शितोळे, डॉ. सुजाता टापरे आदि उपस्थित होते.

या कार्यक्रमाचे नियोजन महाविद्यालयाचे उपप्राचार्य डॉ. निलेश दांगट, डॉ. अभय खंडागळे, डॉ. तुषार शितोळे, रजिस्ट्रर अनिल शिंदे तसेच माजी विद्यार्थी संघाच्या समन्वयक डॉ. सुजाता टापरे करणार आहेत.

नाव नोंदणीसाठी मोबाईल अँप तयार करण्यात आले असून विद्यार्थांनी त्यावरून आपली नोंदणी करावी, तसेच अधिक माहितीसाठी डॉ. सुजाता टापरे (9970925914) यांच्याशी संपर्क साधावा, असे आवाहन संयोजकांनी केले आहे.

व्हिएस न्यूज – ठेवीदारांची फसवणूक केल्याप्रकरणी बांधकाम व्यावसायिक डी. एस. कुलकर्णी यांच्यावर गुन्हा दाखल झाल्यानंतर ठेवीदारांचे ५० कोटी रुपये भरण्यासाठी उच्च न्यायालयात दिलेली पहिली तारखी उलटून गेल्यानंतर अटकेची टांगती तलवार असणारे कुलकर्णी यांच्या माध्यमातून एक निवेदन प्रसिद्ध कऱण्यात आले आहे.

या निवेदनामध्ये आम्हाला १९ जानेवारीपर्यंत ५० कोटी भरण्याची मुदत सर्वोच्च न्यायालयाने वाढवून दिल्याचे कुलकर्णी यांनी सांगितले आहे. त्याचबरोबर सर्व रक्कम सर्वोच्च न्यायलयाने दिलेल्या मुदतीमध्ये जमा करण्यात येईल. कोणत्याही गुंतवणुकदारांचा एक रुपयाही आम्ही ठेवणार नसून कोणाचीही फसवणूक केली जाणार नाही असे आश्वासनही कुलकर्णी यांनी दिले आहे. त्याचप्रमाणे कुलकर्णी यांनी सर्वोच्च न्यायालयाने दाखवलेल्या विश्वासाबद्दल समाधान व्यक्त केले आहे. आमचे म्हणणे सर्वोच्च न्यायलयाने ऐकून घेत आमच्यावर विश्वास दाखवल्यामुळेच आता सर्व गोष्टी व्यवस्थित होतील आणि व्यवसाय नक्कीच पूर्वपदावर येईल अशी आशा त्यांनी व्यक्त केली आहे

व्हिएस न्यूज - दागिन्यांना पॉलिश करुन देतो असे सांगून हातचलाखीने एका महिलेचे दोन भामट्यांनी नऊ हजार रूपयांचे दागिने लांबविले. ही घटना गुरुवारी दुपारी अडीचच्या सुमारास रहाटणी येथे घडली.

रिजवाना शेख (वय 45 रा, रहाटणी) यांनी वाकड पोलीस ठाण्यात फिर्याद दिली आहे.

पोलिसांनी दिलेल्या माहितीनुसार, दागिने पॉलिश करुन देतो असे म्हणून दोन भामट्यांनी हातचलाखीने नऊ हजार रुपये किंमतीचे दागिने लांबविले. वाकड पोलीस अधिक तपास करत आहेत.

व्हिएस न्यूज - तूप विकायला आलेल्या चोरट्याने एका ज्येष्ठ नागरिकाला दहा हजार रूपयांचे बंदे देतो, असे सांगून दहा हजार रूपये घेवून पोबारा केला. हा प्रकार ताथवडे येथील जीवननगर नरहरी सोसायटी येथ बुधवारी सकाळी साडेनऊ वाजता घडला.

रमाकांत रेपाळ (वय़-70, रा. जीवननगर नरहरी सोसायटी, ताथवडे) यांनी वाकड पोलीस ठाण्यात फिर्याद दिली आहे.

पोलीसांनी दिलेल्या माहितीनुसार, रेपाळ यांच्या घऱी बुधवारी सकाळी साडेनऊ वाजता एक जण तुप विकण्याच्या बहाण्याने आला. रेपाळ यांना 10 हजार रूपयांचे बंदे करून देतो, असे सांगून त्यांच्याकडून दहा हजार रूपये घेवून पोबारा केला.

फौजदार मोहन जाधव अधिक तपास करत आहेत.

व्हिएस न्यूज - महापालिकेच्या यशवंतराव चव्हाण स्मृती रूग्णालयात शुक्रवारी ड्युटीवर असणाऱ्या दोन डॉक्टरांमध्ये हाणामारीचा प्रकार घडला आहे. हजेरी पुस्तकावर सही करण्यासाठी गेलेल्या एका डॉक्टरला दुसऱ्या डॉक्टरने शिवीगाळ करत हाणामारी केली. यामध्ये दोघांचे शर्ट फाटले. हा प्रकार वायसीएम रुग्णालयातील वैद्यकीय अधीक्षकांच्या कार्यालयासमोर घडला.

मिळालेल्या माहितीनुसार, सकाळी नऊ वाजता संबंधित डॉक्टर हजेरी पुस्तकावर सही करण्यासाठी आले होते. त्यावेळी दुसऱ्या डॉक्टरने त्यांना शिवीगाळ केली. यामुळे दोघांत शाब्दीक बाचाबाची झाली. याचे रुपांतर भांडणात झाले. यामध्ये दोन्ही डॉक्टरांनी एकमेकांचे कपडे फाडण्यापर्यंत प्रकरण वाढले होते. याप्रकरणी अद्याप पोलिसांकडे अथवा रुग्णालय प्रशासनाकडे कोणाचीही तक्रार आली नसल्याचे सांगण्यात येत आहे.

व्हिएस न्यूज - बायोमॅट्रीक मशीन दुरुस्तीचे एक लाख 64 हजार रुपयांचे बिल काढून देण्यासाठी लेखा विभागाच्या कनिष्ठ लिपिकाला चार हजारांची लाच घेताना लाचलुचपत प्रतिबंध विभागाने शुक्रवारी रंगेहाथ पकडले. ही कारवाई पिंपरी पालिकेतील लेखा विभागात दुपारी एकच्या सुमारास करण्यात आली.

प्रकाश जयसिंग रोहकले (वय-39, रा. पिंपळे गुरव) असे अटक करण्यात आलेल्या लिपिकाचे नाव आहे. याप्रकरणी 30 वर्षीय कंत्राटदाराने लाच लाचलुचपत विभागाकडे तक्रार केली होती.

पोलिसांनी दिलेल्या माहितीनुसार, तक्रारदाराकडे पिंपरी-चिंचवड महापालिकेच्या शाळेत बायोमॅट्रीक मशीन दुरुस्तीचे कंत्राट होते. याच कंत्राटाचे एक लाख 64 हजार रुपयांच्या बिलाच्या फाईलवर वरिष्ठांची सही घेऊन धनादेश देतो असे सांगून तक्रारदाराकडे चार हजार रुपयांची मागणी केली. तक्रारदाराने याची तक्रार लाचलुचपत प्रतिबंध विभागाकडे केली होती. लाचलुचपत विभागाने महापालिकेतील लेखा विभागात सापळा लावून रोहकले याला लाच घेताना रंगेहाथ पकडले.

ही कारवाई पोलीस निरीक्षक अरुण घोडके, सुरेखा घार्गे यांनी केली. पिंपरी-चिंचवड महापालिकेत एका वर्षात लाचलुचपत विभागाची ही पाचवी कारवाई आहे.

व्हिएस न्यूज - वादातून एका तरूणावर गोळीबार करण्यात आल्याची घटना भोसरीतील अंकुशराव लांडगे नाट्यगृहाच्या पाठीमागे दुपारी चारच्या सुमारास घडली आहे.

पंकज फुगे (वय-23, रा. भोसरी) असे गोळीबारीत जखमी झालेल्या तरूणाचे नाव आहे. याप्रकरणी काही जणांना ताब्यात घेतल्याचेही पोलीसांनी सांगितले आहे. घटनास्थळी परिमंडळ तीनचे पोलीस उपायुक्त गणेश शिंदे, भोसरी पोलीस ठाण्याचे पोलीस निरीक्षकांनी भेट दिली आहे.

व्हिएस न्यूज – प्रसिद्ध बांधकाम व्यावसायिक डी. एस. कुलकर्णी सपत्नीक मुंबई उच्च न्यायालयाने अटकपूर्व जामीन नाकारल्यानंतर फरार झाले आहेत. गुरुवारी पुण्यात डी. एस. कें.च्या कंपनीत गुंतवणूक करणाऱ्या कर्जरोखे धारकांची बैठक आयोजित करण्यात आली होती. अर्थात डी. एस. के. आणि त्यांच्या पत्नी हेमंती या बैठकीला गैरहजर होते.

१ एप्रिल २०१८ पर्यंत मुदत कंपनीच्या इतर संचालकांनी पैसे परत करण्यासाठी वाढवून देण्याची मागणी गुंतवणुकदारांना केली आहे. पण आता डी. एस. कें.च्या शब्दावर विश्वास राहीला नसल्याने गुंतवणुकदारांनी ही मुदत देण्यास नकार देत तात्काळ पैसे देण्याची मागणी केली. ही बैठक डीएसकेंच्या कंपनीचे संचालक आणि कर्मचारी समाधानकारक उत्तरे देऊ न शकल्यानेआटोपती घ्यावी लागली. पैसे परत मिळत नसल्याने अनेक गुंतवणुकदार अक्षरश रडकुंडीला आल्याच यावेळी दिसून आले.

मुदत ठेवीखाली कर्जरोखे धारकांनी सहाशे कोटी ठेवले आहेत. ज्या जागा विकल्या जातील त्यापैकी चाळीस कोटी रक्कम राहणार आहे. मुदत ठेवधारकांनी पोलिसांशी संवाद सुरु ठेवावा, जेणेकरुन ती रक्कम वेळेवर मिळेल, असे रिअल इस्टेटचे अभ्यासक रवी करंदीकर यांनी सांगितले.

व्हिएस न्यूज - पिंपरी चिंचवड महापालिकेतील शिवसेना कार्यालयातील जप्त करण्यात आलेला संगणक मनसेने परत मिळवून दिला आहे. मनसे शहराध्यक्ष नगरसेवक सचिन चिखले यांनी हा संगणक परत करावा यासाठी महापौरांकडे मागणी केली होती.

पिंपरी महापालिकेतील शिवसेना कार्यालयातील संगणक प्रशासनाने जप्त केला होता. गटनेते राहुल कलाटे यांच्या अनुपस्थितीत येथे संगणकाचा गैरवापर केला जात असल्याचे कारण आयुक्तांनी दिले होते. वास्तविक पाहता सामाजिक कार्यकर्ते मारूती भापकर हे या संगणकावरून सत्ताधारी भाजप विरोधात पत्रकबाजी करत होते. विरोधात होत असलेली प्रसिध्दी सहन न झाल्यामुळेच सत्ताधारी पदाधिकार्यांनी हा संगणकच जप्त करण्यास आयुक्तांना सांगितले होते.

प्रशासनाने केल्या या कारवाईची सर्वच स्तरातून नाराजी व्यक्त होत होती. दरम्यान सेना गटनेते राहुल कलाटे यांची प्रकृती ठिक नसल्याने ते विरोध करू शकले नाहीत. मात्र शिवसेनेचे इतर नगरसेवक मुग गिळून गप्प राहिले. त्यामुळे सेनेची आक्रमकता गेली कुठे असा प्रश्न उपस्थित झाला होता. दरम्यान मनसेचे एकमेव नगरसेवक सचिन चिखले सेनेवर झालेल्या अन्यायाविरूध्द धावून आले. चिखले यांनी सत्ताधार्यांनी केलेल्या या कारवाईचा निषेध करत महापौरांना सेनेचा संगणक परत करा अशी मागणी केली.

सचिन चिखले यांनी महापौरांकडे केलेल्या या मागणीनंतर शिवसेनेचा तो जप्त करण्यात आलेला संगणक कार्यालयात परत बसविण्यात आला. एवढंच नाही तर सचिन चिखले यांच्यासाठी ही प्रशासनाने स्वतंत्र संगणक उपलब्ध करून दिला आहे.

व्हीएस न्यूज - एका 16 वर्षाच्या मुलीवर 17 वर्षाच्या अल्पवयीन मुलाने लग्नाच्या आमिषाने बलात्कार केल्याची घटना उघडकीस आली आहे. ही घटना 12 डिसेंबर रोजी दुपारी दोनच्या सुमारास घडली. पोलिसांनी अल्पवयीन मुलाला ताब्यात घेतले असून पीडित मुलीच्या आईने वाकड पोलीस ठाण्यात तक्रार दिली आहे.पोलिसांनी दिलेल्या माहितीनुसार, 12 डिसेंबर रोजी दुपारी घरामध्ये कोणी नसताना संबंधित मुलाने पीडित मुलीला लग्नाचे अमिष दाखवून अत्याचार केले. तसेच या घटनेची माहिती बाहेर देऊ नको असे धमकावले. पीडित मुलीने ही माहिती आईला सांगितल्यानंतर मंगळवारी वाकड पोलीस ठाण्यात गुन्हा दाखल करुन अल्पवयीन मुलाला पोलिसांनी ताब्यात घेतल. पुढील तपास वाकड पोलीस करत आहेत.

व्हीएस न्यूज - पीडब्ल्युडीच्या कॉलनीत निवासस्थान बळकावून राहणाऱ्या कर्मचाऱ्यांच्या मुलाचे घर सील करण्यासाठी गेलेल्या मुकादमाला शिवीगाळ करत धक्काबुक्की केली. तसेच 'तु काम करतो ते मी बघतो, तुला कोणास काय सांगायचे ते सांग' अशी धमकी दिली. हा प्रकार मंगळवारी सकाळी 11 वाजता सांगवीतील पीडब्ल्युडी कॉलनीत घडला.

पीडब्ल्युडीचे मुकादम विश्वनाथ साठे (वय-58, रा. आनंद पार्क, पिंपळे-गुरव) यांनी सांगवी पोलीस ठाण्यात फिर्याद दिली आहे. योगेश विजय गायकवाड (रा. पीडब्ल्युडी कॉलनी, डी 1/14 नवी सांगवी) असे गुन्हा दाखल झालेल्याचे नाव आहे.
याबाबत फौजदार एस. जी. पाटील यांनी माहिती दिली. योगेश गायकवाड याचे वडील पीडब्ल्युडीमध्ये कर्मचारी आहेत. त्यामुळे त्यांना नवी सांगवीतील पीडब्ल्युडी कॉलनीत घर मिळाले आहे. योगेश याने त्यांच्या घराशेजारील मोकळे असलेले घर बळकावून त्यात राहू लागला. याची माहिती मुकादम साठे यांनी वरिष्ठांना दिली. त्यानंतर त्याच्या वडीलांच्या पगारातून घराचे पैसे जमा करण्यात येऊ लागले. योगेशचे घर सील करण्यासाठी मुकादम साठे मंगळवारी पीडब्ल्युडी कॉलनीत कारवाईसाठी गेले होते. त्यावेळी योगेशने साठे यांना शिवीगाळ करत धक्का-बुक्की केली. 'तु काम करतो ते मी बघतो, तुला कोणास काय सांगायचे ते सांग' अशी धमकी दिली. सांगवी पोलीस अधिक तपास करत आहेत.