VS News

Breaking News

मतभेद असणाऱ्यांना जगूच द्यायचे नाही, अशी आजची परिस्थिती

व्हीएस न्यूज -आज समाजात प्रेम कमी आणि हिंसा मोठ्या प्रमाणात आहे. मतभेद असणाऱ्यांना जगूच द्यायचे नाही, अशा परिस्थितीमुळे सामाजिक सलोखा बिघडत आहे. फुले-शाहू-आंबेडकर, महात्मा गांधी यांचे प्रेम, बंधुता, अहिंसा, शांतता, आर्थिक-सामाजिक समतेवर आधारित विचार आचरणात आणले, तरच समाजात सलोखा निर्माण होईल, असे प्रतिपादन ज्येष्ठ पत्रकार निखील वागळे यांनी केले.

इंद्रायणी महाविद्यालयातर्फे आयोजित मावळ भूषण कृष्णराव भेगडे जाहीर व्याख्यानमालेचे दुसरे पुष्प गुंफताना सामाजिक सलोखा आणि आजचे समाज वास्तव याविषयावर निखील वागळे बोलत होते. महात्मा गांधीजीच्या पुण्यतिथी निमित्त त्यांच्या प्रतिमेला आदरांजली वाहून कार्यक्रमाची सुरुवात करण्यात आली. यावेळी इंद्रायणी विद्यामंदिर संस्थेचे अध्यक्ष माजी आमदार कृष्णराव भेगडे, रामदास काकडे, केशव वाडेकर, उपनगराध्यक्ष सुनील शेळके, जिल्हा बॅंकेच्या उपाध्यक्षा अर्चना घारे, राजश्री म्हस्के, प्राचार्य डॉ. दत्तात्रय बाळसराफ, व्याख्यानमालेचे संयोजक उपप्राचार्य डॉ. एस.के. मलघे आदी उपस्थित होते.
निखील वागळे म्हणाले, सामाजिक सलोख्याची आस मनात असावी लागते. ती अचानक निर्माण होत नाही. आज जातीव्यवस्था बळकट होत चालल्यामुळे समाजात अस्थिरता येऊ लागली आहे. धार्मिक कारणावरून दंगली घडण्याचा शाप 1872 पासून महाराष्ट्राला आहे, तो अद्याप आहे. दंगलीची कारणे माहीत असूनही, अद्याप दंगली होतच आहेत. स्वातंत्र्यानंतर नथुराम गोडसे या माथेफिरुने महात्मा गांधी यांचा खून केला. स्वातंत्र्यानंतर सामाजिक सलोखा बिघडवणारी ही पहिली घटना होती. गांधीजींमुळे फाळणी झाली, असे म्हणणे चुकीचे आहे. कारण गांधीजींचा फाळणीला विरोधच होता. नथुराम ब्राह्मण होता, म्हणून गांधीजींच्या खूनानंतर ब्राह्मणांना लक्ष्य करणेही चुकीचे होते. नथुराम ब्राह्मण नाही, तर माणूसच नव्हता. तो धर्मांध अतिरेकी होता. त्यामुळे त्याने केलेल्या कृतीचे समर्थन करणे चुकीचे आहे. महात्मा गांधीजी स्वत:ला सनातनी हिंदू मानायचे. सनातन हिंदू धर्म ऋग्वेदावर आधारित असून, त्याचा पाया सर्वधर्म समानतेचा आहे. आध्यात्मिक, मानसिक आणि सामाजिक विकास ही सनातनची धर्मकल्पना आहे.
वागळे यांनी पुढे सांगितले, आजच्या तरुणाईने फुले-शाहू-आंबेडकर-महात्मा गांधींचे विचार आत्मसात केले पाहिजेत. त्यांच्याविषयी वाचले पाहिजे. शिवाजी महाराज अभ्यासले पाहिजेत. शिवाजी महाराजांसारखा धर्मनिरपेक्ष राजा नाही. आज शेतकरी मंत्रालयाच्या दारात मरताहेत. तरी सरकारला काही देणे-घेणे नाही. शिवाजी महाराजांच्या राज्यात शेतकरी, गरीब, व्यापारी सर्व मिळून मिसळून राहायचे. ते सर्व जाती-धर्माचे राज्य होते. आज निवडणुका डोळ्यासमोर ठेवून जाती-धर्माचे अवडंबर माजवले जात आहे. धर्मजाती व्यवस्था, आर्थिक विषमता, लिंगभेद विसरून समता निर्माण झाल्याशिवाय सामाजिक सलोखा शक्य नाही, असेही वागळे यांनी सांगितले.
डॉ. एस. के. मलघे यांनी परिचय वाचन केले. सूत्रसंचालन संदीप साकोरे यांनी, तर आभार प्राचार्य डॉ. दत्तात्रय बाळसराफ यांनी मानले.

केस व त्वचा विकार विशेष मोफत तपासणी तसेच औषधोपचार शिबीर

व्हीएस न्यूज - डॉ. डी. वाय. पाटील आयुर्वेद महाविद्यालय, रुग्णालय व संशोधन केंद्र, पवना इंडस्ट्रीज जवळ, पिंपरी येथे गुरुवारी सकाळी 9 वाजता संगणक व अत्याधुनिक मशीन द्वारे केसांची व त्वचा विकार विशेष मोफत तपासणी, औषधोपचार तसेच मार्गदर्शन शिबिराचे आयोजन करण्यात आले आहे.

या शिबिरामध्ये केसांची वाढ न होणे, केस गळतीच्या समस्या, चाई येणे, टकल पडणे, इत्यादी तसेच तारुण्यपिटिका, खरूज, नायटा, डाग, सोरियासिस, इसब व विविध त्वचेच्या विकारांची तपासणी, औषधोपचार व मार्गदर्शन करण्यात येणार आहे या एक दिवसीय शिबिरात जास्तीत जास्त रुग्णांनी सहभागी व्हावे असे आवाहन आयुर्वेद रुग्णालयाच्या वतीने करण्यात आले आहे.

पीएमपीएमएलमध्ये प्रवाशाच्या खिशातील पावणे तीन लाखांचा ऐवज लंपास

व्हीएस न्यूज - पीएमपीएमएलमध्ये गर्दी फायदा घेत एका प्रवाशाच्या खिशातील रोख रक्कमेसह सोन्याचे दागिने असा पावणे तीन लाखांचा ऐवज लंपास केला. ही घटना सोमवारी सकाळी डांगे चौक ते शिवाजीनगर या प्रवासादरम्यान घडली. हर्षल साखरे (वय-35, रा. गणेशनगर, थेरगाव) यांनी वाकड पोलीस ठाण्यात फिर्याद दिली आहे.

पोलीसांनी दिलेल्या माहितीनुसार, फिर्यादी यांचे वडील भारत साखरे हे सोमवारी सकाळी साडेदहा वाजता डांगे चौकातून चिंचवडगाव ते कात्रज या पीएमपीएमएलमध्ये बसले. बसमध्ये मोठ्या प्रमाणात गर्दी होती. याच गर्दीचा फायदा घेत चोरट्याने भारत साखरे यांच्या खिशातील रोख 18 हजार 850 रूपये व सोन्याचे दागिने असा दोन लाख 73 हजार 850 रूपयांचा ऐवज चोरून नेला. वाकड पोलीस अधिक तपास करत आहेत.
...Read More

खासदार रेखा कडून कासारवाडीतील शाळेला ३ कोटींचा निधी

व्हीएस न्यूज - पिंपरी चिंचवड महापालिकेच्या वतीने कासारवाडी येथे बांधण्यात येणार्‍या शाळेच्या इमारतीसाठी राज्यसभा खासदार रेखा यांच्या खासदार निधीतून ३ कोटी रुपयांचे आर्थिक सहाय्य जिल्हाधिकारी कार्यालयात जमा झाले आहे. आवश्यक कागदपत्रे सादर करून हा निधी घेण्यासंदर्भातील पत्र महापालिका आयुक्तांना प्राप्त झाले आहे. या निधीसाठी माजी विरोधी पक्षनेते व राष्ट्रवादी काँग्रेसचे नगरसेवक शाम लांडे यांनी पाठपुरावा केला आहे.

कासारवाडी येथील सर्व्हे क्रमांक ४२० येथील छत्रपती शाहू महाराज विद्यामंदिराच्या आवारात पाच मजली प्रशस्त शाळा महापालिका बांधणार आहे. या शाळेच्या इमारतीसाठी १३ कोटी ७१ लाख ३२ हजार १९७ रुपये खर्च असून, त्या खर्चास स्थायी समितीने मंजुरी दिली आहे. दोन वर्षांत इमारत बांधली जाणार आहे. एकूण भूखंडाचे क्षेत्र ८ हजार ९११.३० चौरस मीटर आहे. सद्यःस्थितीत शाळेचे क्षेत्र तीन हजार ७८९.२१ चौरस मीटर आहे. दोन हजार ८६१.८१ चौरस मीटरमध्ये बांधकाम करण्यात येणार आहे.

इमारतीसाठी निधी मागण्यासाठी पत्र पाठविण्याची मागणी नगरसेवक शाम लांडे यांनी आयुक्त श्रावण हर्डीकर यांच्याकडे ८ नोव्हेंबर २०१७ ला केली होती. त्याला खासदार रेखा यांनी प्रतिसाद देत जानेवारी २०१८ ला जिल्हा नियोजन समितीकडे पत्र पाठवून निधी वर्ग करण्याची सूचना केली आहे. त्यानुसार तीन कोटींचा निधी जिल्हाधिकारी कार्यालयाकडे नुकताच वर्ग झाला आहे. सदर निधी महापालिकेने घ्यावा, असे पत्र जिल्हाधिकार्‍यांनी २४ जानेवारीला आयुक्त हर्डीकर यांना पाठविले आहे, अशी माहिती नगरसेवक शाम लांडे यांनी दिली.

महात्मा गांधी पुण्यतिथीनिमीत्त अभिवादन

व्हीएस न्यूज – पिंपरी चिंचवड महानगरपालिकेच्या वतीने महात्मा गांधी पुण्यतिथी निमित्त त्यांच्या प्रतिमेस महापौर नितीन काळजे, स्थायी समिती सभापती सिमा सावळे यांच्या हस्ते पुष्पहार अर्पण करुन अभिवादन करण्यात आले. महापालिकेच्या मुख्य प्रशासकीय इमारतीत झालेल्या या कार्यक्रमास नगरसदस्या अनुराधा गोरखे, सह आयुक्त दिलीप गावडे, सहाय्यक आयुक्त अण्णा बोदडे,कामगार कल्याण अधिकारी विजय साबळे, प्रशासन अधिकारी रामकिसन लटपटे, माहिती व जनसंपर्कचे किशोर केदारी, रमेश भोसले आदी उपस्थित होते. महाराष्ट्र शासनाच्या आदेशानुसार देशाच्या स्वातंञ्यासाठी प्राणार्पण केलेल्या हुतात्म्यांच्या स्मरणार्थ आदर व्यक्त करण्यासाठी यावेळी २ मिनिटे मौन (स्तब्धता) पाळून त्यांना आदरांजली वाहण्यात आली.

पेट्रोल दरवाढ विरोधात कॉंग्रेसची सायकल रॅली

व्हीएस न्यूज - केंद्र व राज्य सरकारच्या चुकीच्या धोरणांमुळे महाराष्ट्रात पेट्रोलचा प्रती लिटर दर 80 रुपयांहून जास्त झाला आहे. याच्या निषेधार्थ पिंपरी चिंचवड शहर जिल्हा कॉंग्रेसच्या वतीने मंगळवारी (दि. 30 जानेवारी) सकाळी 10 वाजता निगडीतील भक्ती शक्ती चौकातून पिंपरीतील डॉ. बाबासाहेब आंबेडकर पुतळा चौकापर्यंत सायकल रॅली काढण्यात आली. कॉंग्रेसचे शहराध्यक्ष सचिन साठे यांनीरॅलीचे नेतृत्व केले. यामध्ये, कॉंग्रेसचे सर्व सेलचे पदाधिकारी, कार्यकर्ते, बंधू, भगिनींनी या रॅलीत सहभागी झाले.

चंद्रकांत बावनकुळेंनी विष प्यावे, वाचवायचे की नाही ते बघू –राजू शेट्टी

व्हीएस न्यूज - धर्मा पाटील यांच्या मृत्यूनंतर सरकारवर चौहूबाजूंनी टीका होत आहे. धर्मा पाटील मृत्यू प्रकरणी बोलताना खासदार राजू शेट्टींनी उर्जामंत्री चंद्रशेखर बावनकुळे यांच्यावर निशाणा साधला आहे. तसेच या प्रकरणी न्यायालयीन चौकशीची मागणी शेट्टींनी केली आहे.

शेतकरी धर्मा पाटील यांच्या मृत्यूनंतर ऊर्जामंत्री चंद्रशेखर बावनकुळे यांनी त्यांच्या जमिनीचे पुनर्मूल्यांकन करण्यात येईल आणि पाटील कुटुंबावर अन्याय होणार नाही, असे आश्वासन दिले. यामुळे येवढे होऊनही अजून आश्वासन देत असल्याने शेट्टींनी बावनकुळेंना धारेवर धरले.

मुख्यमंत्र्यांना धर्मा पाटील भेटले होते. मात्र मुख्यमंत्र्यांनी त्यांची दखल घेतली नाही. या प्रकरणी न्यायालयीन चौकशी व्हावी आणि जे कोणी दोषी असतील त्यांच्यावर सदोष मनुष्यवधाचा गुन्हा दाखल करावा, अशी मागणी राजू शेट्टींनी केली. तसेच शेतकरी संघटना पाटील कुटुंबाच्या पाठीशी खंबीरपणे उभी असल्याचे शेट्टी यावेळी म्हणाले.

राज्यात जमीन अधिग्रहणात दलालांचा सुळसुळाट पाहायला मिळतो. दलाल आणि अधिकाऱ्यांचे संगनमत असते. संबंधितांवर कारवाई करायला हवी, असेही शेट्टी म्हणाले. पाटलांच्या मृत्यूसाठी जमीन अधिग्रहण घोटाळा जबाबदार असल्याचा दावा खासदारांनी यावेळी केला.

ट्रकच्या चाकाखाली येऊन ज्येष्ठ महिला ठार

व्हीएस न्यूज - ट्रक पाठीमागे घेत असताना कंपनीत खाली बसून काम करणाऱ्या महिलेच्या अंगावरून ट्रकच्या चाकाखाली आली. त्यामुळे महिलेचा जागीच मृत्यू झाला. ही घटना रविवारी सकाळी साडेनऊ वाजता तळवडे येथील ज्योतीबानगर मधील मधुबन ट्रेड स्टिल येथे घडली.
मंगल जालींदर सुर्यवंशी (वय-59, रा. नवनिर्माण हौसिंग सोसायटी, रूपीनगर, तळवडे) असे मृत्यू झालेल्या महिलेचे नाव आहे. त्यांचा मुलगा सुनिल सुर्यवंशी याने निगडी पोलीस ठाण्यात फिर्याद दिली आहे. त्यानुसार, ट्रक चालक योगेश मधुकर आगाव (वय-21, रा. बालघरे वस्ती, कुदळवाडी) याच्यावर गुन्हा दाखल झाला आहे.
पोलीसांना दिलेल्या माहितीनुसार, सुर्यवंशी या तळवडे येथील मधुबन स्टिल प्रा.लि कंपनीत कामाला होत्या. रविवारी सकाळी साडेनऊ वाजता त्या कंपनीत खाली बसून काम करत होत्या. ट्रक चालक योगेशने ट्रक पाठीमागे घेत असताना पाहिले नाही. खाली बसलेल्या मंगल सुर्यवंशी यांच्या अंगावरून चाक गेल्याने त्यांचा जागीच मृत्यू झाला.
फौजदार एस. वाय होळकर अधिक तपास करत आहेत.

रिसॉर्ट मॅनेजरने मालकाला लावला 16 लाखांचा चुना

व्हीएस न्यूज - रिसॉर्ट मॅनेजरने रिसॉर्ट रूम्स व पार्टी लॉन्सच्या बुकिंगच्या पैशांची आफरातफर करत 16 लाख रूपये स्वतःच्या फायद्यासाठी वापरले. हा प्रकार सुसगाव येथील सन्नीज वर्ल्ड रिसॉर्ट येथे नुकताच उघडकीस आला आहे.
अनिल नारायण बुचडे (वय-45, रा. भास्कर आनंद अपार्टमेंट, फ्लॅट नं. 401, साकोरे नगर, विमाननगर) असे गुन्हा दाखल झालेल्या मॅनेजरचे नाव आहे. याप्रकरणी चंद्रशेखर निम्हण (वय-33, रा. पाषाण) यांनी हिंजवडी पोलीस ठाण्यात फिर्याद दिली आहे.
पोलीसांनी दिलेल्या माहितीनुसार, बुचडे हा सुसगाव येथील सन्नीज वर्ल्ड रिसॉर्टमध्ये मॅनेजर म्हणून कामाला होता. त्याने 21 ते 25 जानेवारी या कालावधीत हॉटेल रिसॉर्ट व पार्टी लॉन्ससाठी बुकींग झालेल्या 16 लाख रूपये मालकांना न देता स्वतःच्या फायद्यासाठी वापरले. बुडचे याने पैशांचा केलेली अफरातफर फिर्यादी यांच्या लक्षात येताच त्यांनी हिंजवडी पोलीस ठाण्यात फिर्याद दाखल केली. हिंजवडी पोलीस अधिक तपास करत आहेत.

दुचाकीच्या धडकेत महिलेचा मृत्यू

व्हीएस न्यूज - भरधाव वेगातील दुचाकी चालकाने पायी जाणाऱ्या महिलेला पाठीमागून धडक दिल्याने 30 वर्षीय महिलेचा जागीच मृत्यू झाला. ही घटना सोमवारी सकाळी साडेदहा वाजता घडली.

मंगल मल्लीनाथ तुपे (वय 30 रा. संभाजीनगर, थेरगाव) असे मृत्यू झालेल्या महिलेचे नाव आहे. याप्रकरणी वाकड पोलिसांनी अल्पवयीन दुचाकी चालकाला ताब्यात घेतले आहे.
पोलीसांनी दिलेल्या माहितीनुसार, मंगल या सोमवारी सकाळी साडे दहाच्या सुमारास काळेवाडी फाट्याच्या दिशेने पायी जात होत्या. पाठीमागून आलेल्या अल्पवयीन दुचाकीस्वाराने त्यांना पाठीमागून धडक दिली. यामध्ये त्यांचा गंभीर जखमी होऊन मृत्यू झाला. वाकड पोलीस पुढील तपास करत आहेत.

ओला चालकाला टोळक्याने मारहाण करत लुबाडले

व्हीएस न्यूज - झोप लागल्याने रस्त्याच्या कडेला ओला कॅंब उभी करून आराम करणाऱ्या चालकाना चार जणांच्या टोळक्याने मारहाण करत त्यांच्याकडील साडेअकरा हजारांचा ऐवज लुबाडला. ही घटना रविवारी रात्री सव्वा बाराच्या सुमारास वाकड पुलाजवळ घडली.

यशवंत माने (वय-24, रा. थेरगाव) यांनी वाकड पोलीस ठाण्यात फिर्याद दिली आहे. त्यानुसार एमएच.14, व्ही 6714 या रिक्षातून आलेल्या आरोपीविरोधात गुन्हा दाखल करण्यात आला आहे. याबाबत सहाय्यक पोलीस निरीक्षक डी. आर. लोंढे यांनी माहिती दिली. माने हे ओला कॅंब चालक आहेत. रविवारी रात्री सव्वा बाराच्या सुमारास वाकड पुलाजवळ रस्त्यावर त्यांनी कॅब उभी केली. कॅंबमध्येच झोपून गेले. एमएच.14, व्ही 6714 या रिक्षातून आलेल्या चार आरोपींनी माने यांना मारहाण करत त्यांच्याकडील दोन मोबाईल, रोख रक्कम, कागदपत्रे असा अकरा हजार पाचशे रूपयांचा ऐवज लुबाडून नेला. वाकड पोलीस अधिक तपास करत आहेत.

निगडीत ११ फेब्रुवारीला ‘रनेथॉन ऑफ होप २०१८’ अर्ध मॅरेथॉन स्पर्धा

व्हीएस न्यूज - रोटरी क्लब ऑफ निगडी-पुणे तर्फे ११ फेब्रुवारीला (रविवारी) निगडी प्राधिकरण येथे आठव्या ‘रनेथॉन ऑफ होप २०१८’ या अर्ध मॅरेथॉन स्पर्धेचे आयोजन करण्यात आले असल्याची माहिती रोटरी क्लब ऑफ निगडी-पुणे चे अध्यक्ष रो. हेमंत कुलकर्णी यांनी पत्रकार परिषदेत दिली. यावेळी उपाध्यक्ष रो. विजय काळभोर, हॉटेल हिलटनचे व्यवस्थापक आदित्य समशेर मल्ला, रो. डॉ. संजय देवधर, रो. रवी राजापूरकर, रो. अरविंद खांडकर, रो. सुनिल जेजुरीकर, रो. सुधीर मित्रा आदी उपस्थित होते.

ही मॅरेथॉन महाराष्ट्र अॅथलेटिक असोसिएशनचा महत्वपूर्ण उपक्रम आहे. निगडी प्राधिकरण येथे संत तुकाराम उद्यानाशेजारील मैदानावरून (सिटी प्राईड स्कूलजवळ) सकाळी पावणेसहा वाजता स्पर्धेला सुरुवात होईन. ही स्पर्धा चॅरिटी आणि स्पर्धा या दोघांचा संगम असून त्यात एकाच दिवशी १२ वेगवेगळ्या प्रकारच्या शर्यती होणार आहेत. मुले- मुली तसेच स्त्री-पुरूष अशा चार वेगवेगळ्या वयोगटात स्पर्धा पार पडेल.

निगडी रोटरी क्लबचे अध्यक्ष हेमंत कुलकर्णी म्हणाले की अशा प्रकारच्या लोकप्रिय आणि सहभागाच्या दृष्टीने महत्वाच्या स्पर्धेचे आयोजन करताना अतिशय अभिमान वाटत आहे.खेळाला प्रोत्साहन देऊन फिटनेस बाबत जागृती करणे यासह वेगवेगळ्या संस्थांमार्फत चालविण्यात येणा-या सोशल सर्व्हिस प्रोजेक्ट्साठी मदत निधी उभारणे हा आमचा उद्देश आहे. गरजू व्यक्तींपर्यंत पोहचून त्यांच्या चेह-यावर हास्य फुलविणे हे यंदाच्या रनेथॉन फॉर होपचे घोषवाक्य आहे.

माजी अध्यक्ष डॉ. संजय देवधर म्हणाले की, सहभागी स्पर्धकांसाठी रनेथॉन नेहमीच जीवनाच्या वेगवेगळ्या प्रवासातून जात असते. केवळ मदत निधी उभारणे एवढाच या स्पर्धेमागचा उद्देश नसून वेगवेगळ्या क्षेत्रात कार्यरत असणाऱ्या मात्र एकच छंद आणि आवड असणाऱ्या लोकांना एकत्र आणून त्यांना एक व्यासपीठ उपलब्ध करून देणे, हा रोटरी क्लबचा या उपक्रमामागील हेतू आहे. सर्वांगीण समाज सुधारणा सामाजिक एकता हा रोटरी इंटरनॅशनलचा उद्देश असून वेगळेपण (मेकिंग अ डिफ्रन्स) ही या वर्षीची संकल्पना आहे.

१८ वर्ष व त्यापेक्षा जास्त वयोगटांसाठी २१ किमी आणि १० किमी आणि ५ किमी पेक्षा जास्त तर १४ ते १६ वयोगटासाठी ३ किमी अंतराची स्पर्धा होणार आहेत. याशिवाय अन्य स्पर्धाही होणार आहेत. यामध्ये ५ किमीची स्पर्धा खुल्या वयोगटासाठी असणार आहे. तसेच २ किमीची धर्मादाय स्पर्धा उद्योग क्षेत्रासाठी असणार आहे. या वर्षी एकूण ४ लाख १५ हजार रुपयांपर्यंतची पारितोषिके असून प्रत्येक सहभागी स्पर्धकाला पदक देण्यात येणार आहे. तसेच २१ आणि १० किमीच्या शर्यतीत सहभागी होणाऱ्या ४५ वर्षांपेक्षा जास्त वर्षांचे असणाऱ्यांसाठी या वर्षी विशेष पारितोषिके देण्यात येणार आहेत.या स्पर्धेचे प्रायोजक हे हॉटेल डबल ट्री, सिसका एलईडी, सँडवीक एशिया, टाटा मोटर्स, एसकेएफ इंडिया, एमरसन, एनप्रो आणि टिजेएसबी हे आहोत. या स्पर्धेत सहभागी होण्यासाठी इच्छुक स्पर्धक www.runathon.org या संकेत स्थळावर भेट देऊन आपली नोंदणी करु शकतात किंवा सविता राजापूरकर -9850588864, विजय काळभोर 9881371893 , डॉ.प्रवीण घाणेगावकर – 9823882251 या क्रमांकावर संपर्क साधावा असे आवाहन रोटरी क्लब ऑफ निगडीच्या वतीने करण्यात आले आहे.

PIMPRI-CHINCHWAD WEATHER

.

ADDRESS
VS News, Khararwadi,
Pimpri-Chinchwad

CONTACTS
Email: vsnews24x7@gmail.com
Phone: +91 91724 53002