व्हीएस न्यूज - बॅंकेतून पैसे घेऊन जाणाऱ्या दुचाकीस्वाराला खाली पैसे पडल्याचे सांगून दुचाकीच्या हॅन्डलला अडकवलेली 90 हजार रूपयांची पिशवी भामट्याने पळविली. ही घटना सोमवारी दुपारी सव्वा बाराच्या सुमारास कासारवाडीतील युनियन बॅकेच्या बाहेर घडली.
निलेश लांडे (वय-31, रा. गुळवे वस्ती, भोसरी) यांनी भोसरी पोलीस ठाण्यात फिर्याद दिली आहे.
पोलीसांनी दिलेल्या माहितीनुसार, लांडे यांनी सोमवारी कासारवाडीतील युनियन बॅकेतून 90 हजार 900 रूपये काढले होते. पैसे घेऊन दुचाकीवरून घऱी जात असताना एकाने पैसे खाली पडल्याचे त्यांना सांगितले. लांडे खाली पडलेले पैसे उचलत असताना दुचाकीच्या हॅन्डलला लावलेली पैशांची पिशवी पळवून नेली.
फौजदार पी. आर. कठोरे अधिक तपास करत आहेत.

व्हीएस न्यूज - घराकडे जाण्याच्या रस्त्यावर लावलेला टेम्पो काढण्यास सांगितल्यामुळे आठ जणांनी महिलेला शिवीगाळ करत दोन भावांना जबर मारहाण केली. ही घटना रविवारी रात्री साडेसात वाजता चिखली येथे घडली.
रविंद्र रोकडे (वय-40, रा. चिखली) यांनी निगडी पोलीस ठाण्यात फिर्याद दिली आहे. संजय उत्तम रोकडे याच्यासह आठ जणांवर गुन्हा दाखल करण्यात आला आहे.
पोलीसांनी दिलेल्या माहितीनुसार, फिर्यादी यांच्या घराकडे जाणाऱ्या रस्त्यावर आरोपी संजय रोकडे याने टेम्पो लावला होता. रस्त्यातील टेम्पो काढ, असे फिर्यादीच्या आईने आरोपीला सांगितले. यावरून चिडलेल्या आरोपींने महिलेला शिवीगाळ केली. इतर नातेवाईकांना बोलावून घेत फिर्यादाचा लहान भाऊ शैलेंद्र रोकडे याला लोखंडी गजाने डोक्यात, कपाळावर मारून गंभीर जखमी केले. फिर्यादीलाही लाथा बुक्यांनी मारहाण केली. तसेच फिर्यादीचे वडील संपत रोकडे यांना जीवे मारण्याची धमकी दिली.
फौजदार भोये अधिक तपास करत आहेत.

व्हीएस न्यूज - रस्ता ओलांडणाऱ्या एका ज्येष्ठाला भरवान खासगी बसने धडक दिल्याने ज्येष्ठाचा गंभीर जखमी होऊन मृत्यू झाला. ही घटना सोमवारी दुपारी अडीच वाजता निगडीतील अंकुश चौकात घडली.
मारूती अंबादास गायकवाड (वय-60, रा. नालंदा सोसायटी, निगडी) असे मृत्यू झालेल्या ज्य़ेष्ठाचे नाव आहे. याप्रकरणी बस चालक सुनिल किसन वाघ याच्यावर गुन्हा दाखल करण्यात आला आहे. गायकवाड यांचा जावई पापा पवार (वय-32) यांनी निगडी पोलीस ठाण्यात फिर्याद दिली आहे.
पोलीसांनी दिलेल्या माहितीनुसार, मारूती गायकवाड सोमवारी दुपारी अंकुश चौकातून रस्ता ओलांडत होते. भरधाव आलेल्या खासगी बसने त्यांना जोरदार धडक दिली. गंभीर जखमी होऊन त्यांचा मृत्यू झाला.
फौजदार मोरे अधिक तपास करत आहेत.

व्हीएस न्यूज - प्रेमात अडथळा ठरणाऱ्या मित्रानेच दहावीतील मित्राची धारधार चाकूने गळा चिरून निर्घृण हत्या केली. ही धक्कादायक घटना सोमवारी निगडी, पूर्णानगर येथे मध्यरात्री बारा वाजता घडली आहे.
वेदांत जयवंत भोसले (वय 15, रा. स्वामी विहार, बी वींग, पूर्णानगर) असे खून झालेल्या विद्यार्थ्याचे नाव आहे. रोहन प्रदिप महाळगीकर (वय-18, रा. पुर्णानगर,चिंचवड) असे अटक केलेल्या आरोपीचे नाव आहे. वेदांतची आई जान्हवी जयवंत भोसले (वय-40) यांनी निगडी पोलीस ठाण्यात फिर्याद दिली.
वेदांत हा निगडी, यमुनानगर येथील अमृत माता विद्यालयात दहावीत शिकत होता. सध्या दहावीची परीक्षा सुरू आहे. तर आरोपी रोहन पिंपरी, वल्लभनगर येथील डी. वाय. पाटील महाविद्यालयात अभियांत्रिकीच्या प्रथम वर्गात शिकत होता. वेदांत, रोहन यांची तीन वर्षापासून मैत्री होती.
निगडी पोलीस ठाण्याचे वरिष्ठ पोलीस निरीक्षक विजयकुमार पळसुले यांनी दिलेल्या माहितीनुसार, दहावीची परिक्षा सुरू असल्यामुळे वेदांत व त्याची मैत्रिण वेदांतच्या सोमवारी रात्री उशिरापर्यंत घरी अभ्यास करत होते. अभ्यास झाल्यानंतर वेदांत मैत्रिणीला तिच्या घरी सोडविण्यासाठी दुचाकीवरून गेला. वेदांत व त्याच्या मैत्रिणीला घरी जाताना आरोपी रोहनने पाहिले. मैत्रिणीला सोडून वेदांत घरी जात होता. रस्त्यावर थांबलेल्या आरोपी रोहनने मला थोडे पुढे जायचे आहे. दुचाकीवरून मला सोडव, असे सांगितले. मोरया क्लासिक बिल्डींगसमोर आरोपी रोहनने वेदांतचा गळा चाकूने चिरला. दंडावर, कमरेवर चाकूने वार केल्याने वेदांत क्लासिक बिल्डींगच्या पायऱ्यावर निपचीत पडला. घाबरलेल्या आरोपीने घटनास्थळावरून धूम ठोकली. बराच वेळ झाला तरी वेदांत घरी आला नाही म्हणून त्याची आई वेदांतच्या मैत्रिणीच्या घरी निघाली होती. क्लासिक बिल्डींगच्या पायऱ्यावर वेदांत रक्ताच्या थारोळ्यात पडलेला त्यांना दिसला. त्यांनी त्वरीत वेदांतला महापालिकेच्या वायसीएम रूग्णालयात त्याला दाखल केले. मात्र, उपचारापुर्वीच त्याचा मृत्यू झाल्याचे डॉक्टरांनी सांगितले.
पुढील तपास निगडी पोलीस करीत आहेत.

व्हीएस न्यूज - नवीन आरटीओ कार्यालय आवारात पासिंगसाठी आलेल्या एका पीएमपीएमएल बसला शॉर्टसर्किटमुळे आग लागली. ही घटना शुक्रवारी दुपारी एकच्या सुमारास घडली.
स्वारगेट डेपोच्या आठ बस गाड्या आरटीओ पासिंगसाठी चिखली आरटीओ कार्यालयात आल्या होत्या. पाच गाड्यांची पासिंग झाली. (एमएच 14, सीडब्ल्यू 2008) ही बस पासिंगसाठी पुढे जात असताना अचानक इंजिनमध्ये शॉर्टसर्किटमुळे आग लागली. बसच्या इंजिनमध्ये आग लागल्याने बसच्या चालकाने तात्काळ बसमधील अग्निशमन उपकरणाचा वापर केला. मात्र, आग वाढल्याने चालकाने बसमधून उडी मारली. चालू बस मागच्या दिशेने गेली व एका भिंतीला फोडून खड्‌ड्यात घसरली. पिंपरी अग्निशमन विभागाचा एक बंब घटनास्थळी दाखल झाला. अग्निशमन विभागाच्या जवानांनी तात्काळ आगीवर नियंत्रण मिळवले. आगीमध्ये मोठे बसचे नुकसान झाले.

व्हीएस न्यूज - पिंपळे निलख येथील कै.पांडुरंग धोंडीबा माकर प्रतिष्ठानच्या वतीने जागतिक महिला दिनानिमित्त पिंपरी-चिंचवड महापालिका प्रभाग क्र. 28 मधील आरोग्य विभागातील महिलांना ऊन व पावसापासुन संरक्षण मिळण्यासाठी प्रतिष्ठानचे अध्यक्ष तसेच आरोग्य सहाय्यक दिपक माकर, आरोग्य निरिक्षक राकेश सौदाई यांच्या हस्ते टोपी व स्कार्पचे वाटप करण्यात आले.
हा कार्यक्रम पिंपळे सौदागर येथील आरोग्य कार्यलयात घेण्यात आला. यावेळी महिलांना कर्मचारी वर्गानी मिठाई वाटुन व केक कापुुन या महिलादिनाचा आनंद व्यक्त केला. सर्व कर्मचारी महिलांना आरोग्य विभागातील अधिकारी व कामगारांनी शुभेच्छा दिल्या.

व्हीएस न्यूज - महिलांनी सर्वच क्षेत्रात धाडसाने पुढे येऊन आपल्या स्पर्धात्मक कामाचा ठसा निर्माण करावा, असे प्रतिपादन राजमाता जिजाऊ महिला मंचच्या संस्थापिका सौ सारिका संजय भेगडे यांनी केले.
तळेगाव दाभाडे नगर परिषदेच्या वतीने महिला बाल कल्याण समितीकडून जागतिक महिला दिनाच्यानिमित्त विविध कार्यकर्माचे अयोजन करण्यात आले होते. यावेळी खेळ पैठणीचा, दुचाकी रॅली, शूर महिलांच्या जीवनावर एकांकिका, आदर्श महिला पुरस्कार आदि कार्यक्रमाचे आयोजन करण्यात आले होते.
या कार्यक्रमाचे अध्यक्षस्थानी नगराध्यक्षा चित्रा जगनाडे होत्या. तर प्रमुख पाहुण्या म्हणून सारिका भेगडे या होत्या. यावेळीं शहरातील 20 महिलांना विविध क्षेत्रात समाजपयोगी कार्य केल्याबद्दल आदर्श गौरव पुरस्काराने सन्मानित करण्यात आले. यावेळी दीनदयाळ अत्योदय योजना राष्ट्रीय नागरी अभियाना अंतर्गत बालाजी महिला गट, श्री स्वामी समर्थ महिला बचत गट, महालक्ष्मी महिला बचत गट यांना प्रत्येकी रुपये 10 हजार फिरता निधीचे वाटप करण्यात आले.
कार्यक्रमाचे प्रस्ताविक महिला बाल कल्याण समिती सभापती संध्या भेगडे यांनी केले. तर सारिका भेगडे, चित्रा जगनाडे, हेमेलता खळदे, वैशाली दाभाडे यांनी मनोगत व्यक्त केले. खेळ पैठणीच्या कार्यक्रमात प्रथम क्रमांक तेजश्री पाटील, व्दितीय प्रियदर्शनी हेंद्रे तर तृतीय क्रमांक जया लाटकर यांनी पटकाविला. कार्यक्रमाचे सूत्रसंचालन सुरेखा जाधव यांनी केले. नियोजन उपसभापती प्राची हेंद्रे, समन्वयक सारिका लामखेडे यांनी केले. आभार नगरसेविका काजल गटे यांनी मानले.

व्हीएस न्यूज - जागतिक महिला दिनाचे औचित्य साधून संत निरंकारी सत्संग भवन भोसरी येथे सत्संग सोहळ्याचे आयोजन करण्यात आले होते.
यावेळी चाकण, खेड, शिक्रापूर येथून 1500 हुन अधिक भक्त उपस्थित होते.

या कार्यक्रमात केंद्रीय प्रचारक निर्मल मनचंदा यांनी नारी शक्ती चे महत्व पटवून दिले. सदगुरूच्या गुरुसिखाची लक्षणे त्यांनी सांगितली. सदगुरुचा शिष्य हा नेहमी त्याचे स्मरण करीत असतो, तो शांत तर असतोच. परंतु जे कोणी त्याच्या जवळ येतात त्यांना हि तो शांत बनवण्याचं कार्य करीत असतो.

या कार्यक्रमाचे सूत्रसंचालन निर्मला गाडेकर यांनी केले. कार्यक्रमाला भोसरी सेक्टर मधील सर्व शाखांचे मुखी, सेवादल अधिकारी, प्रबंधक उपस्थित होते. भोसरी सेक्टर प्रमुख अंगद जाधव यांनी आभार मानले.

व्हीएस न्यूज - पायी जाणाऱ्या महिलेच्या गळ्यातील दुचाकीवरून आलेल्या चोरट्यांनी एक लाख रूपयांची सोन्याची चैन हिसका मारून तोडून नेली. ही घटना जागतिक महिला दिनी सकाळी साडेआठच्या सुमारास अजमेरा कॉलनी येथे घडली.
याबाबत शैला सतिश शिराळकर (वय-76, रा. अजमेरा, पिंपरी) यांनी पिंपरी पोलीस ठाण्यात फिर्याद दिली आहे.
फिर्यादी या गुरूवारी सकाळी साडेआठच्या सुमारास पिंपरीतील सिनीयर ऑफिसर कॉ. सोसायटीजवळून पायी जात होत्या. दुचाकीवरून आलेल्या एकाने त्यांच्या गळ्यातील 1 लाख 10 हजार रूपयांची सोन्याची चैन जबरदस्तीने हिसका मारून तोडून नेली.
फौजदार विठ्ठल बढे अधिक तपास करत आहेत.

व्हीएस न्यूज - पूर्ववैमनस्यातून एका तरूणाचा नऊ जणांच्या टोळक्याने लोखंडी कोयता, चॉपरने डोक्यात, हातावर, पायावरण वार करून खून केला. ही घटना गुरूवारी रात्री साडेदहा वाजता थेरगाव येथील पाण्याच्या टाकीजवळ घडली. याप्रकरणी वाकड पोलीसांनी तिघांना ताब्यात घेतले आहे.
रुपेश सुखबीर सोराती (वय, 24 रा. गणराज कॉलनी, आदर्शनगर, काळेवाडी) असे खून झालेल्या तरूणाचे नाव आहे.
पोलिसांनी दिलेल्या माहितीनुसार, आरोपी व रूपेश यांच्यात पुर्ववैमनस्य होते. याच पूर्ववैमनस्यातून आरोपींनी रूपेश गुरूवारी रात्री साडेदहा वाजता घऱी जाताना थेरगावातील पाण्याच्या टाकीजवळ त्याला अडविले. आरोपींनी रूपेशवर लोखंडी कोयता, चॉपरने डोक्यात, हातावर, पायावर वार करून गंभीर जखमी केले. रूपेशला तात्काळ चिंचवड येथील एका खासगी रूग्णालयात दाखल करण्यात आले. परंतू, त्याचा उपचारापुर्वीच मृत्यू झाल्याचे डॉक्टरांनी सांगितले.
पोलीस निरीक्षक सतीश माने अधिक तपास करीत आहेत.

व्हीएस न्यूज - जागतिक महिला दिनानिमित्त इनर व्हील क्लब ऑफ निगडी प्राईडच्या वतीने निगडी पोलीस ठाण्यामध्ये सॅनिटरी नॅपकिन व्हेंडिंग मशीन आणि इन्सिनरेटर बसविण्यात आले. या उपक्रमामुळे निगडी पोलीस ठाण्यात काम करणा-या महिला पोलीस कर्मचारी, बंदोबस्तासाठी येणा-या महिला कर्मचारी तसेच तक्रारी व अन्य कामानिमित्त येणा-या सर्व महिलांना याचा लाभ होणार आहे.

महिला दिनानिमित्त हा कार्यक्रम आयोजित करण्यात आला. यावेळी निगडी पोलीस ठाण्याचे वरिष्ठ पोलीस निरीक्षक विजयकुमार पळसुले, इनर व्हील क्लब ऑफ निगडी प्राईडच्या अध्यक्षा सविता राजापूरकर, माजी अध्यक्ष साधना काळभोर, प्रणिता अलुरकर, शकुंतला बन्सल, सभासद सुजाता ढमाले, डॉ. रंजना कदम, माधुरी भुरकुले, नियोजित अध्यक्ष प्रतिभा दलाल, राजश्री , रो. विजय काळभोर, रो. रवी राजापूरकर, निगडी पोलीस ठाण्याचे पोलीस कर्मचारी उपस्थित होते.

सॅनिटरी नॅपकिन व्हेंडिंग मशीन मधून नवीन सॅनिटरी नॅपकिन मिळणार आहे. तर इन्सिनरेटर या मशीनमध्ये वापरलेले नॅपकिन जमा करता येणार आहेत. यामुळे सॅनिटरी नॅपकिन रस्त्यावर,कचराकुंड्यांमध्ये उघड्यावर टाकल्याने उद्भवणा-या विविध त्रासांपासून सुटका मिळणार आहे. इन्सिनरेटरद्वारे वापरलेल्या सॅनिटरी नॅपकिनची विल्हेवाट लावण्यात येते. या उपक्रमामुळे महिला पोलीस कर्मचारी व उपस्थित महिलांच्या चेह-यावर भावनिक आनंद ओसंडून वाहत होता.

याबाबत बोलताना इनर व्हील क्लब ऑफ निगडी प्राईड च्या अध्यक्षा सविता राजापूरकर म्हणाल्या की, “महिलांना सॅनिटरी नॅपकिन मिळणे ही काळाची गरज आहे. शहर शांत राहण्यासाठी पोलीस कर्मचा-यांना सतत कर्तव्यावर रहावे लागते. महिला पोलीस कर्मचारी देखील यामध्ये मागे नाहीत. मात्र सॅनिटरी नॅपकिन सारख्या काही गोष्टींमुळे त्यांची वाताहत होऊ नये यासाठी हा उपक्रम राबविण्यात आला आहे. याचा महिला पोलीस कर्मचारी व अन्य महिला लाभ घेतील, असा विश्वास त्यांनी व्यक्त केला.

निगडी पोलीस ठाण्याचे वरिष्ठ पोलीस निरीक्षक विजयकुमार पळसुले म्हणाले की, “अशा प्रकारचा उपक्रम परिसरात प्रथमच सुरु करण्यात आला आहे. सॅनिटरी नॅपकिनची सर्वत्र उपलब्धता ही काळाची गरज आहे. ही गरज सर्वांनी ओळखून अशा स्तुत्य उपक्रमांना चालना द्यायला हवी. पोलीस ठाण्यात सतत महिलांचा वावर असतो. हा उपक्रम पोलीस ठाण्यात सुरु केल्याने गरजू महिलांना याचा नक्कीच फायदा होणार आहे.”

व्हीएस न्यूज - थेरगाव, गणेशनगर भागातील पाणीपुरवठा गेल्या अनेक दिवसांपासून विस्कळीत झाला. अत्यंत कमी दाबाने पाणी येत आहे. याच्या निषेधार्थ शिवसेनेच्या वतीने आज गणेशनगर ते डांगे चौक या दरम्यान ‘हंडा’ मोर्चा काढण्यात आला. यामध्ये महिला मोठ्या संख्येने सहभागी झाल्या होत्या.

या मोर्चात शिवसेनेचे नगरसेवक निलेश बारणे, अॅड. सचिन भोसले, ह्युमन राईट्सचे पदाधिकारी डॉ. सतिश नगरकर, रामराव नवघन, मदन जोशी, अॅड. वर्षा भोसले, दिपाली गुजर, साधना आठवले,रेखा ठांणाबीर, मिना शेळके, लक्ष्मी मंडलिक, अनिता भालेराव, कमल जाधव यांच्यासोबत मंगलनगर, गणेशनगर, शिव कॉलनी, लोकमान्य कॉलनी परिसरातील रहिवाशी महिला मोठ्या संख्येने आंदोलनात सहभागी झाल्या होत्या. पाणीपुरवठा सुरळीत करण्याबाबत अधिका-यांना निवेदन देण्यात आले.

थेरगाव, गणेशनगर भागातील पाणीपुरवठा गेल्या अनेक दिवसांपासून विस्कळीत झाला. अत्यंत कमी दाबाने पाणी येत आहे. अपुर पाणीपुरवठा होत असून पुरेसे वेळ देखील पाणी येत नाही. उन्हाळा सुरु होण्यापुर्वी ही परस्थिती असेल तर उन्हाळ्यात काय परस्थिती निर्माण होईल. विस्कळीत पाणी पुरवठ्यामुळे नागरिक हैराण झाले आहेत. महिला संताप व्यक्त करत आहेत. महापालिकेने वेळेत आणि सुरळीत पाणीपुरवठा करावा, अशी मागणी नगरसेवक निलेश बारणे आणि अॅड. सचिन भोसले यांनी केली.