निगडीतील एकाच कुटूंबातील ५ जण ठार

व्हीएस न्यूज - पुणे सोलापूर राष्ट्रीय महामार्गावर डाळज या ठिकाणी स्कॉर्पिओ गाडीचा अपघात झाल्याने ५ जणांचा जागीच मृत्यू झाला. तर दोघेजण जखमी झाले आहेत. हे सर्वजण पिंपरी चिंचवड शहरातील निगडी येथील एकाच कुटूंबातील रहिवासी आहेत.

सोलापूरहून पिंपरीला येत असलेली स्कॉर्पिओ (क्रमांक एम.एच. २० एजी ०९३९) या गाडीचा टायर फुटला. त्यामुळे ही गाडी उलटून रस्त्याच्या दुसऱ्या बाजूला गेली. रस्त्याच्या दुसऱ्या बाजूने येणाऱ्या गाडीने या स्कॉर्पिओला उडवले. या भीषण अपघातामुळे ५ जण जागीच ठार झाले आहेत. तर २ जण गंभीर जखमी झाले आहेत. जखमी झालेल्या दोघांना भिगवण येथील रुग्णालयात उपचारासाठी दाखल करण्यात आले आहे. संध्याकाळी साडेपाचच्या सुमारास हा अपघात झाला. मृतांमध्ये दोन महिला, दोन पुरुष आणि एका लहान मुलाचा समावेश आहे असेही समजते आहे.

प्रकाश रामचंद्र गायकवाड (वय ६७), सुनिता प्रकाश गायकवाड (वय ५८), संदीप प्रकाश गायकवाड (वय ४०), शितल संदीप गायकवाड (वय ३२), आभिराज संदीप गायकवाड (वय ५) असे मृतांची नावे असून हे सगळे जण नाना-नानी पार्क यमुनानगर निगडी येथील रहिवासी होते.

व्हीएस न्यूज - यंदा चांगले पाऊसमान होणार असल्याच्या हवामान खात्याच्या अंदाजानंतर आता आणखी एक सांगावा आला आहे. मान्सून अंदमानमध्ये २३ मेपर्यंत, तर केरळ किनारपट्टीवर २९ मे रोजी धडकणार आहे. त्यामुळे तो महाराष्ट्रात दोन दिवस आधी ५ जूनपर्यंत दाखल होण्याची चिन्हे आहेत.

काही दिवसांपूर्वीच स्कायमेट संस्थेने मान्सून २८ मे रोजी केरळात दाखल होणार असल्याचा अंदाज व्यक्त केला होता. त्यानंतर, शुक्रवारी हवामान विभागाने २९ मे रोजी मान्सून दाखल होत असल्याचे जाहीर केले. मान्सून दरवर्षी १ जून रोजी केरळमध्ये दाखल होतो. अंदमानमध्ये मान्सूनचे २० मे रोजी होते. या वर्षी २३ मेपर्यंत मात्र अंदमान व दक्षिणपूर्व बंगालच्या उपसागर या भागांत मान्सून

दाखल होईल. त्यानंतर, अपेक्षित स्थिती कायम राहिल्यास पुढील सहा दिवसांमध्ये केरळच्या किनारपट्टीवर सरी बरसतील. त्यानंतर, महाराष्ट्रात सुखसरींचा वर्षाव सुरू होईल, असा हवामान खात्याचा अंदाज आहे.

केरळात साधारणपणे १ जून आणि महाराष्ट्रात ७ जून रोजी मान्सून दाखल होतो. यंदा केरळात २९ मे रोजी दाखल होणार असल्याने महाराष्ट्रातही दोन दिवस आधी येऊ शकतो,असे हवामान विभागातील अधिकाऱ्यांनी सांगितले.

सामाजिक सुरक्षा विभागाची कारवाई

व्हिएस न्यूज - स्पा मसाज सेंटरच्या नावाखाली वेश्या व्यवसाय करणाऱ्या चिंचवडगावातील 'स्पा ग्लो' या सेंटरवर सामाजिक सुरक्षा विभाग व गुन्हे शाखेने छापा टाकून तीन मुलींची सुटका केली. स्पा मालकाला गजाआड केले.

अविनाश देवीदास जोगदंड असे अटक केलेल्या मसाज चालकाचे नाव आहे.

पोलीसांनी दिलेल्या माहितीनुसार, चिंचडगावातील स. नं. 799/6 येथील गावडे बिल्डींगमध्ये आरोपी जोगदंड हा 'स्पा ग्लो' नावाने मसाज सेंटर चालवत होता. या पार्लरमध्ये ठेवलेल्या थेरपीस्ट मुलींकडून आरोपी जोगदंड वेश्या व्यवसाय करून घेत असल्याची माहिती सामाजिक सुरक्षा विभागाला मिळाली होती. याची खात्री करून पोलीसांनी शुक्रवारी मसाज सेंटरवर छापा टाकला. छाप्यात एक नेपाळी व दोन पुणे शहरातील अशा तीन मुलींची सुटका केली. तसेच मसाज सेंटरमधून 5500 रूपयांची रोकड, 2 मोबाईल, लिव्ह ऍड लायसन्स करारनामा, बॅकेचे धनादेश आदी साहित्य जप्त केले.

ही कारवाई वरिष्ठ पोलीस निरीक्षक संजय पाटील, सहाय्यक पोलीस निरीक्षक चंद्रकांत जाधव, प्रमोद म्हेत्रे, नितीन तरटे, रमेश लोहकरे, राजेश उंबरे, नितीन लोंढे, कविता नलावडे, ननिता येळे, सुप्रिया शेवाळे, रूपाली चांदगुडे, चिंचवड पोलीस ठाण्याचे वरिष्ठ पोलीस निरीक्षक विठ्ठल कुबडे आदींच्या पथकाने केली.

व्हिएस न्यूज - निकृष्ठ दर्जाचे खाद्यपदार्थ, प्रचंड घाणिचे साम्राज्य अशा इतर अनेक कारणास्तव खडकी येथिल सागर बेकरीस खडकी कॅंन्टोन्मेंट बोर्डाच्या वतिने बुधवारी नोटीस बजावण्यात आली.
वैद्यकीय अधिकारी कर्नल कुशवाह व कॅंन्टोन्मेंट बोर्डाचे आरोग्य निरिक्षक कलावंत पवार, मुकादम नासिर व त्यांच्या पथकाने बुधवारी महात्मा गांधी रोड येथिल सागर बेकरीची पुनश्च पाहणी केली असता बेकरीमध्ये मोठ्या प्रमाणात चिखल व घाणीचे साम्राज्य आढळुण आले. या व्यतिरीक्त उंदीर घुशींचा वावर ही निदर्शनास आला. कामगार ही अस्वच्छ स्वरुपात कामे करताना आढळुण आले. बेकरीतील माल व वस्तुंवर माल बनविलेली तारीखेचा उल्लेख ही निदर्शनास आले नाही. अशा प्रकारे बेकरी मालकाकडुन आवश्यक त्यासर्व नियमांकडे जाणुन बुजुन दुर्लक्ष केले जात असल्याने कॅंन्टोन्मेंटच्या वतिने बेकरीचे मालक अब्दुल सलाम अन्सारी यांना अंतिम नोटीस बजावण्यात आली.

यावेळी निकृष्ठ दर्ज्याच्या खाद्य पदार्थांची विल्हेवाट लावण्यात आली. सात दिवसात बेकरीत आढळुण आलेल्या अस्वच्छता घाण तसेच इतर त्रुटीबाबत कायदे व नियमांचे पालन न केल्यास बोर्ड प्रशासनाच्या कठोर कारवाई केली जाईल, असा इशारा बोर्ड प्रशासनाने या नोटीसी अंतर्गत बेकरी मालक अन्सारी यांना देण्यात आला आहे. बेकरी मालक अन्सारी यांना यापुर्वी ऑक्टोबर 2016 व दि. 28 नोव्हेंबर 2017 रोजी याप्रकरणी दोनदा नोटीस बजावण्यात आली होती.

व्हिएस न्यूज - एका आठ वर्षाच्या चिमुकलीवर 30 वर्षीय युवकाने भर दिवसा बलात्कार केल्याची घटना घडली आहे. हा प्रकार सोमवारी दुपारी एकच्या सुमारास पिंपरी येथे घडला. याप्रकरणी आरोपीला पोलीसांनी अटक केली आहे.

गोविंद भगवान अडसूळ (वय-30, रा. मिलिंदनगर, पिंपरी) असे अटक करण्यात आलेल्या आरोपीचे नाव आहे. याप्रकरणी पीडित मुलीच्या आईने पिंपरी पोलीस ठाण्यात फिर्याद दिली.

पोलिसांनी दिलेल्या माहितीनुसार, अडसूळ याने सोमवारी 8 वर्षीय पीडित मुलीला धमकी देऊन बोलावले. तिच्यावर बलात्कार केला. ही बाब मुलीच्या घरच्यांना समजली तेंव्हा घरच्यांनी तात्काळ पिंपरी पोलिसात धाव घेतली. पोलिसांनी आरोपीला अटक केली आहे.

महिला फौजदार रत्ना सावंत अधिक तपास करीत आहेत.

व्हीएस न्यूज - कॅन्सरच्या आजाराने त्रस्त असलेल्या रुक्सानाला वाईट अनुभव आला आहे. तिच्यावर पिंपरीतील वायसीएम रुग्णालयात उपचार सुरु असताना पत्नी व दोन मुलांना एकटे सोडून पतीने पळ काढला आहे. सध्या रुक्साना वायसीएम रुग्णालयात मृत्यूशी झुंज देत असून मुलगा अरमान आणि मुलगी अंजूमला शिवाजीनगरच्या अनाथ आश्रमात जाण्याची वेळ आली आहे.

वैजापुर (औरंगाबाद) मधील रुक्सानाची सिध्दार्थनगरच्या (उत्तरप्रदेश) चा असलेला सलीम शेख यांच्याशी ओळख झाली. त्या ओळखीचे रुपातंर प्रेमात झाले. त्या दोघांनी लग्नही केले. दोन वेळच्या पोटाची खळगी भरण्यासाठी गावोगावी भटकून सलीम व रुक्साना मदारीच्या करमणुकीचे खेळ करीत होते. त्यावरच तब्बल दहा ते बारा वर्षे संसाराचा गाडा दोघेही हाकत होते. त्या दोघांच्या सुखी संसारात अरमान, अंजूम अशी एक मुलगा व मुलगीही त्यांना झाली. त्या मुलांना घेवून गावोगावी भटकत ते उदरनिर्वाह करीत होते.

मदारीच्या करमणुकीचे खेळ करीत ते दोघे पुण्यात आले. गेल्या दोन महिन्यापासून पिंपरी चिंचवडमधील कासारवाडीत वास्तव्य करु लागले. दररोज सकाळी लवकर उठून शहरातील चौकाचौकात मदारीच्या करमणुकीचे खेळ करुन नागरिकांकडून मिळणा-या तुंटपुज्या पैशावर चैाघांच्या पोटांची भूक भागवित होते. चौघे अगदी आनंदात राहत होते. मात्र, त्यांच्या सुखी संसारात अचानक विरजन पडले होते. रुक्साना सतत आजारी पडू लागली. सलीमकडे तिच्यावर उपचार करण्याइतपत पैसे उपलब्ध नव्हते.

त्यामुळे पिंपरीतील यशवंतराव चव्हाण स्मती रुग्णालय (वायसीएम) सलीमने रुक्सानाला उपचारासाठी २८ एप्रिलला दाखल केले. तेव्हा तिला कॅन्सर झाल्याचे सलीमला समजताच, त्याने रुक्सानासह दोन्ही मुलांना सोडून पळ काढला आहे. तो अद्याप रुग्णालयाकडे फिरकला देखील नाही. सध्या रुक्साना वायसीएमच्या आयसीयू दोनमध्ये मरण यातना भोगत आहे. तर रिअल लाईफ रिअल पिपल संस्थेकडून रुक्सानाची काळजी घेतली जात आहे.

दरम्यान, रुक्साना व सलीम या दांपत्यला अरमान (वय ७) तर अंजुम (वय ५) एक मुलगा व एक मुलगी आहे. त्या दोघांनाही पुण्याच्या महिला व बालकल्याण समितीकडे अर्ज करुन अनाथ आश्रमात ठेवण्यात येणार आहे.

व्हीएस न्यूज - प्रेयसी बोलत नाही म्हणून नाराज झालेल्या प्रियकराने प्रेयसीच्या घरात जाऊन तिच्यावर धारदार शस्त्राने वार केले. पिंपरी चिंचवडच्या भोसरी मध्ये ही धक्कादायक घटना घडली. याप्रकरणी भोसरी पोलिसांनी आरोपीला अटक केली आहे.

शाहरुख शेख (२२) असे अटक केलेल्या आरोपीचे नाव आहे. याबाबत सतरा वर्षीय अल्पवयीन मुलीने भोसरी पोलीस ठाण्यात फिर्याद नोंदवली आहे. पोलिसांनी दिलेल्या माहितीनुसार गेल्या एक वर्षापासून अल्पवयीन मुलगी आणि शाहरुख शेख यांच्यात प्रेम संबंध होते. शाहरुख त्याच्या १७ वर्षीय अल्पवयीन प्रेयसीला जबरदस्तीने लॉजवर घेऊन गेला व तिथे जाऊन त्याने तिच्यावर अत्याचार केला. पुन्हा तो तसाच प्रकार करण्याचा प्रयत्न करत होता.

परंतु अल्पवयीन मुलीला हे मान्य नव्हते म्हणून तिने प्रियकराचा फोन उचलला नाही, त्याच्याशी बोलणे टाळले. शाहरुख तिला बोलण्यासाठी भाग पाडण्याचा प्रयत्न करत होता. तो तिला भेटायला बोलवत होता. पण ती मुलगी शाहरुखबरोबर बोलायला टाळाटाळ करत होती. याचा राग मनात धरून शाहरुख मंगळवारी रात्री तिच्या घरी गेला आणि तिच्या गळ्यावर वार केले. यावेळी घरात आई-वडील होते परंतु शाहरुखच्या हातात धारदार शस्त्र असल्याने कोणीही त्याला थांबवण्याचा प्रयत्न केला नाही. याप्रकरणी आरोपी शाहरुखला भोसरी पोलिसांनी अटक केली आहे.

व्हीएस न्यूज - लग्नाचे आमिष दाखवून गेल्या दहा वर्षांपासून बंगाली युवती सोबत एकाच खोलीत एकत्र राहून वेळोवेळी शारीरिक संबंध ठेवून लग्न न करता फसवणूक करून शिवीगाळ व दमदाटी करून पीडित महिलेस एकटी सोडून फरार झालेल्या आरोपीला चाकण पोलिसांनी बारामतीहून अटक केली असून न्यायालयाने आरोपीला १८ मे पर्यंत पोलीस कोठडी देण्यात अली असल्याची माहिती पोलीस उपनिरीक्षक श्रीधर जगताप यांनी दिली.

पोलिसांनी दिलेल्या माहितीनुसार हा प्रकार महाळुंगे इंगळे ( ता.खेड ) येथे घडला आहे. याप्रकरणी चाकण पोलीस ठाण्यात गुरुवार दि. १ मार्च २०१८ रोजी बलात्काराचा गुन्हा दाखल करण्यात आला आहे, अशी माहिती ठाणे अंमलदार सुभाष पवार यांनी दिली. सन २००७ ते दि. ४ डिसेंबर २०१७ या कालावधीत हा प्रकार महाळुंगे इंगळे ( ता.खेड ) येथे घडला आहे. याप्रकरणी आरोपी अमोल सिद्दप्पा परिट ( वय ३२, रा. महाळुंगे इंगळे, मूळ रा. निंबर्गी, ता.दक्षिण सोलापूर, जि. सोलापूर ) हा १ मार्चला गुन्हा दाखल झाल्यापासून मुळगावाहूनही फरार झाला होता. पोलीस निरीक्षक मनोजकुमार यादव यांच्या मार्गदर्शनाखाली तपासी अधिकारी उपनिरीक्षक श्रीधर जगताप व पोलीस नाईक वीरसेन गायकवाड यांच्या पथकाने तांत्रिक माहितीच्या आधारे आरोपीला बारामतीहून ताब्यात घेतले व अटक केली.

याबाबतची अधिक माहिती अशी कि, सन २००६ मध्ये आरोपी अमोल परीट व फिर्यादी महिलेची ओळख झाली. ओळखीचे रूपांतर प्रेमात झाले. त्यानंतर सन २००७ मध्ये आरोपीने पीडित युवतीस ‘आपण दोघे लग्न करून चाकण येथे कंपनीत काम करून एकत्र राहू’ असे म्हणून लग्न करण्याचे अमिष दाखवून महाळुंगे येथे खोली भाड्याने घेऊन एकत्र राहू लागले. सदर कालावधीत आरोपीने पीडित युवतीवर शरीर संबंध ठेवले व पीडितेस लग्न करतो, असे सांगून युवतीची फसवणूक केली. दहा वर्षे एकत्र राहूनही पीडितेने त्यास लग्नाबाबत विचारल्यावर आरोपीने पीडितेस वेळोवेळी शिवीगाळ व दमदाटी केली. व दि. ४ डिसेंबर २०१७ रोजी पीडितेस सोडून त्याचे मूळगावी निघून गेला. पीडितेने वेळोवेळी फोन केले असता त्याने मोबाईल बंद करून ठेवला. पीडितेने दिलेल्या फिर्यादीवरून आरोपीवर चाकण पोलीस ठाण्यात गुन्हा रजिस्टर क्रमांक २०८/२०१८ भादंवि कलम ३७६, ४१६, ५०४ व ५०६ अन्वये गुन्हा दाखल करण्यात आला होता. पोलीस निरीक्षक मनोजकुमार यादव यांच्या मार्गदर्शनाखाली उपनिरीक्षक श्रीधर जगताप हे पुढील तपास करीत आहेत.

व्हीएस न्यूज - गुंतवणूकदारांचे पैसे देण्यात अपयशी ठरलेले बांधकाम व्यावसायिक डी. एस. कुलकर्णी यांच्या विरोधात आर्थिक गुन्हे शाखेने ३६ हजार ८७५ पानांचे दोषारोपपत्र दाखल केले आहे. डी. एस. कुलकर्णी यांच्या विरोधात दाखल केलेल्‍या दोषारोपपत्रात त्‍यांनी २ हजार ४३ कोटींचा घोटाळा केला असल्याचा उल्लेख करण्यात आला आहे.

पोलिसांनी हे दोषारोपपत्र चार गाड्यांमधून आणले असून, ते अपर सत्र न्यायाधीश जे. टी. उत्पात यांच्या न्यायालयात दाखल करण्यात आले. याबाबत सायंकाळी ५ वाजता पत्रकार परिषद घेऊन सविस्तर माहिती देणार असल्‍याचे पोलिसांनी सांगितले.

दरम्‍यान, या घोटाळ्या प्रकरणी फायनान्स विभाग प्रमुख विनयकुमार बडगंडी यांनाही पोलिसांनी अटक केली आहे. गेले काही दिवस आर्थिक गुन्हे शाखेकडून डी. एस. कुलकर्णी यांच्यावरील आरोपपत्राची तयारी सुरु होती. अखेर पूर्ण छाननी केल्यावर आज(दि. १७ मे) त्यांच्यावर आरोपपत्र दाखल करण्यात आले.

व्हीएस न्यूज – शाळा प्रवेशासाठी दोघा पालकांनी एकाच्या मध्यस्थीने थेट पंतप्रधान कार्यालयातील सहसचिव यांच्या नावाचे राजमुद्रा असलेले बनावट शिफारस पत्र शाळेत दाखल केल्याचे उघड झाले आहे़.

याप्रकरणी येरवडा पोलिसांनी प्रणव विजय चौधरी (वय २१, रा़ सावित्री अपार्टमेंट, सोमवार पेठ) याला अटक केली आहे तसेच दोघा मुलांच्या पालकावर गुन्हा दाखल केला आहे़.

याबाबत बिशप्स कोएड स्कुलच्या वतीने शेन मेकफरसन ऊर्फ रसल फिलीप (वय ३९, रा़ कल्याणीनगर) यांनी फिर्याद दिली आहे़. बिशप्स कोएड या शाळेमध्ये इयत्ता तिसरीच्या वर्गासाठी व दुसरा विद्यार्थी ज्युनिअर के़ जी़ चे प्रवेशासाठी त्यांच्या पालकांनी प्रणव चौधरी यांच्याशी संगनमत करुन बिशप्स स्कुलमध्ये २३ मार्च पूर्वी भिकू इदाते अध्यक्ष मिनिस्टर स्टेटस हायकोर्ट पॉवर ज्युरिसडिक्शन मेंबर ऑफ डिफेन्स अँड हायर प्लॅनिंग कमिटी गव्हरमेंट ऑफ इंडिया, न्यू दिल्ली यांच्या नावाचे राजमुद्रा असलेले पत्र तसेच देवर्षी मुखर्जी सहसचिव प्रधानमंत्री कार्यालय, न्यू दिल्ली यांचे नावाचे राजमुद्रा असलेले पत्र असे दोन्ही बनावट लेटरहेड तयार करुन ते खरे असल्याचे भासवले़ प्रणव चौधरी याने ते पालकांना दिले़. त्यांनी ते बिशप्स शाळेत दाखल करुन शाळेची फसवणूक केली़. याप्रकरणी पोलीस उपनिरीक्षक रवींद्र गवारी अधिक तपास करत आहेत़.

व्हिएस न्यूज - स्वस्तात परदेश दौरा घडवून आणण्याचे आमिष दाखवून 10 जणांना 9 लाख रुपयांना गंडविण्यात आले आहे.

या प्रकरणी महेश बळीराम हळंदे (वय 36, रा. चिखली) यांनी याप्रकरणी वाकड पोलीस ठाण्यात फिर्याद दिली. त्यानुसार संकेत शेखर गोपाळे, विजय शिवाजी कांबळे या कंपनी चालकांविरोधात गुन्हा दाखल करण्यात आला आहे. हा प्रकार नोव्हेंबर 2017 ते फेब्रुवारी 2018 दरम्यान रहाटणी येथे घडला.

पोलिसांनी दिलेल्या माहितीनुसार, आरोपी प्रिस्टीजा सर्व्हिसेस प्रा. लि. ही कंपनी चालवितात. रहाटणीतील कोकणे चौकात कंपनीचे कार्यालय आहे. या कंपनीकडून फसवणूक झालेल्या दहाजणांना पन्नास टक्के सवलतीत देशविदेशात पर्यटनासाठी पाठविण्याचे तसेच तिकडे थ्री व फोर स्टार हॉटेलमध्ये राहण्याची व्यवस्था करण्याचे आमिष दाखविण्यात आले.

त्यासाठी कंपनीत सुरुवातीला पैसे गुंतवणे आवश्यक असल्याचे सांगितल्यामुळे पिंपरी चिंचवड परिसरात दहा नागरिकांनी आठ लाख 60 हजार 500 रुपयांची गुंतवणूक केली. ठरलेल्या कालावधीत सभासदांना कोणत्याही प्रकारे देशविदेशात पर्यटनासाठी पाठविण्यात आले नाही. फसवणूक झाल्याचे लक्षात येताच कंपनी चालकांविरोधात गुन्हा दाखल करण्यात आला. पोलीस उपनिरीक्षक हरीश माने अधिक तपास करीत आहेत.

व्हिएस न्यूज - पिंपरी मार्केटमध्ये एका दुकानदाराने उसने पैसे देण्यास नकार दिल्याने एका टोळक्याने रविवारी सायंकाळी सव्वासातच्या सुमारास दुकानदार आणि त्याच्या मुलाला लोखंडी रॉडने बेदम मारहाण केली.

अनिल हसाकराम मोहनदासानी (वय 59 रा. ओमसाई कॉम्प्लेक्स, पिंपरी) यांनी याप्रकरणी फिर्याद दिली. त्यानुसार राजेश रामगोपाल यादव (वय 19 रा. मिलींदनगर, पिंपरी) याच्यासह अन्य पाच जणांवर गुन्हा दाखल केला आहे.

पोलिसांनी दिलेल्या माहितीनुसार, अनिल यांचे पिंपरी मार्केटमध्ये सुनील होजिअरी हे दुकान आहे. रविवारी अनिल आणि त्यांचा मुलगा प्रतिक दोघेजण काम करत होते. रात्री सव्वासातच्या सुमारास राजेश दुकानात आला. राजेश आणि अनिल हे एकमेकांच्या ओळखीचे आहेत. राजेशने अनिल यांना अडीच हजार रुपयांची मागणी केली. अनिल यांनी पैसे देण्यास नकार दिला. यावरून राजेश याने आपल्या अन्य पाच साथीदारांना बोलावून अनिल आणि त्यांचा मुलगा प्रतिक यांना हातोडी, लोखंडी रॉड, आणि लाकडी दांडक्याने मारहाण केली. दुकानातील सामानाची तोडफोड केली. यावरून गुन्हा दाखल करण्यात आला आहे. पिंपरी पोलीस अधिक तपास करीत आहेत.