Breaking News

दिघीत गळफास घेऊन तरूणाची आत्महत्या

व्हीएस न्यूज - राहत्या घरात एका तरूणाने दोरीच्या सहाय्याने गळफास घेऊन आत्महत्या केली. ही घटना शनिवारी रात्री आठ वाजता चऱ्होलीत उघडकीस आली.

अतुल माणिक होणगिरे (वय 29, गणेशनगर, चऱ्होली) असे गळफास घेऊन आत्महत्या केलेल्या तरुणाचे नाव आहे. तरूणाच्या आत्महत्येचे नेमके कारण समजू शकले नाही. दिघी पोलिस अधिक तपास करीत आहेत.

दगड डोक्यात घालून तरुणाचा निर्घृन खून

व्हीएस न्यूज - डोक्‍यात दगड घालून एका तरुणाचा निर्घृन खुन करण्यात आल्याची धक्कादायक घटना घडली आहे. ही घटना शनिवारी सायंकाळी साडेपाचच्या सुमारास चिंचवड, अंजठानगर येथील पत्राशेडमध्ये घडली.

अमित पंडीत कांबळे (वय 25, रा. अजंठानगर, चिंचवड) असे खून झालेल्या तरुणाचे नाव आहे. याप्रकरणी अज्ञातांच्या विरोधात निगडी पोलीस ठाण्यात रात्री उशिरा गुन्हा दाखल करण्यात आला आहे.

पोलिसांनी दिलेल्या माहितीनुसार, अमित हा बेरोजगार होता. शनिवारी सायंकळी साडेपाचच्या सुमारास अज्ञातांनी अंजठानगर येथील पत्राशेडमध्ये डोक्‍यात दगड घालून त्याचा निर्घृण खून केला आहे. घटनेची माहिती मिळताच निगडी पोलिस घटनास्थळी दाखल झाले होते. आरोपींच्या शोधासाठी निगडी पोलिसांची दोन पथके रवाना केली असल्याची माहिती निगडी पोलिसांनी दिली.

पिंपरीत प्रदर्शनात नागरिकांची तोडफोड

व्हीएस न्यूज : मोफत घरांची जाहिरात देऊन भरवलेल्या प्रदर्शनात संतप्त नागरिकांनी तुफान तोडफोड केली. पिंपरीतील महापालिकेच्या ऑटोक्लस्टरमध्ये हे प्रदर्शन भरले होते. प्रदर्शनाला सुरुवात झाल्यानंतर येथे केवळ गृहकर्जाविषयी माहिती मिळत असल्याचे कळताच सकाळपासून रांगा लावून थांबलेल्या नागरिकांचा भ्रमनिरास झाला आणि त्यांचा सहनशीलतेचा बांध फुटला. हातात येईल ते साहित्य घेऊन नागरिकांनी इथल्या टेबल, खुर्च्या फेकून देण्याबरोबरच गृहकर्जाची माहिती देणारी पोस्टर्स फाडली.पोलिसांनी या प्रकरणाची दखल घेतली असून गोंधळ घालणाऱ्या नागरिकांवर गुन्हे दाखल करण्यात येतील तसेच संबंधीत कंपनीची चौकशी करुन पुढील कारवाई करण्यात येईल असे पोलीस उपायुक्त गणेश शिंदे यांनी सांगितले.

टाटा कॅपिटल हाऊसिंग फायनान्स कंपनीने या प्रदर्शनाचे आयोजन केले होते. यासाठी सुमारे २ हजार नागरिक या ठिकाणी आले असल्याचे सुत्रांकडून कळते. प्रधानमंत्री आवास योजनेतून मिळणाऱ्या शासकीय गृहकर्जासंदर्भातही येथे माहिती दिली जाणार होती. यासाठी बांधकाम व्यावसायिकांनाही आमंत्रित करण्यात आले होते. मात्र, काहींनी मोफत घरे देऊ अशा जाहिराती केल्याचा आरोप येथे उपस्थित नागरिकांनी केला आहे.

मोफत घरांच्या आशेने नागरिकांनी ऑनलाइन फॉर्म भरले होते. त्यांनी २५० रुपयेही खर्च केले होते. त्यासाठी नागरिकांनी या प्रदर्शनाला मोठी गर्दीही केली होती. परंतू, प्रदर्शनात केवळ गृहकर्जाविषयी आणि बांधकाम व्यवसायकांबाबत माहिती मिळत असल्याने नागरिकांचा भ्रमनिरास झाला आणि येथे जमलेल्या ५०० ते ६०० नागरिकांनी धिंगाणा घालत तुफान तोडफोड केली.

पिंपरीत ८० वर्षांच्या वृद्ध महिलेवर बलात्कार, देहूरोड पोलिसांनी गुन्हा दाखल

व्हीएस न्यूज - पिंपरी-चिंचवड येथील रूपीनगर परिसरात एका ८० वर्षांच्या वृद्ध महिलेवर बलात्कार झाल्याची धक्कादायक घटना उघडकीस आली आहे. महिलेच्या तक्रारीवरून देहूरोड पोलिसांनी अज्ञात व्यक्तीविरोधात गुन्हा दाखल केला आहे.

पोलिसांनी दिलेल्या माहितीनुसार, पीडित वृद्ध महिला आणि तिचा ४९ वर्षीय मुलगा हे दोघे रुपीनगर भागात राहतात. १३ जानेवारीला या महिलेचा मुलगा कामासाठी बाहेर गेला होता. पीडित वृद्ध महिलेने घराचा दरवाजा आतून लावला होता. मात्र, अज्ञात इसमाने घराचा पत्रा उचकटून आत प्रवेश केला आणि या वृद्ध महिलेवर बलात्कार केला. मुलगा घरी आल्यानंतर पीडित महिलेने त्याला सर्व प्रकार सांगितला. त्यानंतर शुक्रवारी देहूरोड पोलिसांनी अज्ञात व्यक्तीविरोधात गुन्हा दाखल केला.

पोलीस ठाण्यात बलात्काराची तक्रार दाखल होताच पीडित महिलेची वैद्यकीय तपासणी केली यात महिलेवर अतिप्रसंग झाल्याचे निष्पन्न झाले आहे, अशी माहिती पोलिसांनी दिली. मात्र, आरोपी अजूनही फरार आहे. पोलीस उपनिरीक्षक बोरकर हे याप्रकरणाचा तपास करत आहेत. पीडित महिलेच्या ४९ वर्षीय मुलाचे लग्न झालेले असून त्याची पत्नी त्याच्यासोबत राहत नाही. त्यामुळे आई आणि मुलगा दोघेचजण घरात राहात होते, अशी माहिती देहूरोड पोलिसांनी दिली.

पोलिसांच्या नजरेतून भाजपचे फरार नगरसेवक तुषार हिंगे यांची महापालिका सभेत हजेरी

व्हीएस न्यूज - पिंपरी चिंचवड महापालिकेचे भाजप नगरसेवक तुषार हिंगे यांच्याविरुध्द फौजदारी गुन्हा दाखल आहे. या गुन्ह्यात ते फरार असून अद्याप पोलिसांना सापडलेले नाहीत. मात्र, त्यांनी आज महापालिका सभागृहात दाखल होऊन हजेरी लावली आहे. फरार हिंगे महापालिकेच्या सभागृहापर्यंत पोहचतात पण पोलीस त्यांच्यापर्यंत पोहचू शकत नसल्याने आश्‍चर्य व्यक्त होत आहे.

भाजप नगरसेवक हिंगे यांच्या विरुध्द पोलिसांत खुनाचा प्रयत्न केल्याप्रकरणी गुन्हा दाखल झालेला आहे. या प्रकरणी त्यांना पोलिसांकडून अजूनही अटक झालेली नाही. ते अद्याप फरार आहेत. मात्र, फरार असलेल्या हिंगे यांनी आज २० जानेवारी २०१८ रोजी दुपारी १ वाजता झालेल्या महापालिका सभेत उपस्थित राहून हजेरी लावली आहे.

दरम्यान, निगडी पोलीस निरीक्षक (गुन्हे) शंकर अवताडे म्हणाले की, तुषार हिंगे यांच्यावर गुन्हा दाखल आहे. तीन महिन्यांपासून पोलीस त्यांचा शोध घेत आहेत. पोलीसांनी त्यांच्यावर आरोपपत्र दाखल केले असून ते सध्या फरार आहेत.

तुषार हिंगे फरार असताना महापालिकेच्या सभागृहापर्यंत पोहचतात. मात्र, पोलीस यंत्रणा हिंगे यांच्यापर्यंत पोहचू शकत नाही. याबाबच आश्‍चर्य व्यक्त केले आहे. हिंगे अजून किती दिवस पोलिसांपासून फरार राहणार, असा प्रश्‍न देखील उपस्थित होतो आहे.

मेट्रोच्या निगडीपर्यंतच्या प्रवासाला पालकमंत्र्यांचा खोडा

व्हीएस न्यूज - पिंपरी चिंचवड शहरातील महत्त्वाकांक्षी मेट्रो प्रकल्पाच्या निगडी आणि कात्रजच्या विस्तारामध्ये पुणे-पिंपरीचे कारभारी आणि पालकमंत्री गिरीश बापट यांनीच खोडा घातला आहे. ‘आधी पिंपरीपर्यंतची मेट्रो धावू दे, मग निगडीच्या विस्ताराचे पाहू,’ अशा शब्दांत त्यांनी गेल्या काही दिवसांपासून सुरू असलेल्या विस्ताराच्या चर्चेला पूर्णविराम दिला. त्यामुळे, आता मेट्रोचा निगडी आणि कात्रजचा विस्तार पहिल्या टप्प्यात होण्याबाबत प्रश्नचिन्ह निर्माण झाले आहे.

पुणे मेट्रोच्या पहिल्या टप्प्यात पिंपरी चिंचवड ते स्वारगेट आणि वनाझ ते रामवाडी असे दोन मार्ग विकसित केले जाणार आहेत. मात्र, पिंपरीचा मार्ग निगडीपर्यंत हवाच, अशी मागणी स्थानिक लोकप्रतिनिधींसह स्वयंसेवी संस्था आणि सर्वसामान्य नागरिकांकडून होत आहे. पिंपरी चिंचवडच्या आयुक्तांनी निगडीचा सविस्तर प्रकल्प अहवाल (डीपीआर) तयार करण्याच्या सूचना महाराष्ट्र मेट्रो रेल्वे कॉर्पोरेशनला (महामेट्रो) केल्या आहेत. तसेच, त्यासाठीचा निधी देण्याची तयारी पिंपरी चिंचवड महापालिकेने दाखवली होती. मात्र, पिंपरीतील पहिल्या मेट्रो स्टेशनच्या भूमिपूजन सोहळ्यात मेट्रोचा विस्तार सध्या शक्य नसल्याचे स्पष्टीकरण बापट यांनी दिले. डीपीआर तयार होऊन त्याला केंद्र-राज्याची मान्यता घेण्यात बराच कालावधी जातो. त्यामुळे, सध्या हे काम पूर्णत्त्वास जाऊ दे, त्यानंतर विस्ताराकडे पाहू, अशी टिप्पणी त्यांनी केली.

पुणे मेट्रो पहिल्याच टप्प्यात निगडीपर्यंत नेण्यास केंद्र सरकारची संमती – श्रीरंग बारणे

व्हीएस न्यूज - पुणे महामेट्रोच्या ३१ किलोमीटर या मार्गाला केंद्र सरकारने ७ डिसेंबर २०१६ रोजी मान्यता दिली आहे. पुणे महामेट्रो निगडीपर्यंत नेण्यास केंद्र सरकारची संमती आहे. निगडीपर्यंत मेट्रो नेण्याबाबत राज्य सरकारने उचित निर्णय घ्यावे, असे पत्र केंद्रीय शहरी विकास राज्यमंत्री हरदीपसिंग पुरी यांनी राज्य सरकारला दिले आहे. मंत्री पुरी यांनी हे पत्र खासदार श्रीरंग बारणे यांना देखील पाठविले आहे. त्यामुळे पुणे मेट्रो पहिल्याच टप्प्यात निगडीपर्यंत नेण्याचा निर्णय राज्य सरकार घेऊ शकणार आहे. मुख्यमंत्री देवेंद्र फडणवीस यांची भेट घेऊन पुणे मेट्रो पहिल्याच टप्प्यात निगडीपर्यंत नेण्याची विनंती खासदार बारणे यांनी केली आहे.

पुणे मेट्रो पहिल्याच टप्प्यात निगडीपर्यंत नेण्याची मागणी शिवसेना खासदार श्रीरंग बारणे यांनी केंद्रीय शहरी विकास मंत्री हरदीप सिंग पुरी यांच्याकडे केली होती. मंत्री पुरी यांनी महापालिका सर्वाधिक आर्थिक सहभाग उचलण्यास तयार असेल तर पिंपरी ते निगडीपर्यंतच्या मेट्रो मार्गाला तत्काळ मंजुरी दिली जाईल, असे सांगितले होते. मेट्रो पहिल्याच टप्प्यात निगडीपर्यंत नेण्यास केंद्र सरकारने संमती दर्शविली आहे. मेट्रो निगडीपर्यंत नेण्याबाबत राज्य सरकाराने उचित कारवाई करावी, असे पत्र त्यांनी राज्य सरकारला पाठविले आहे. त्यामुळे मेट्रो निगडीपर्यंत नेण्याचा निर्णय राज्य सरकार घेऊ शकणार आहे.

खासदार श्रीरंग बारणे म्हणाले की, ”केंद्र सरकारच्या वतीने पुणे महानगर क्षेत्रातील सार्वजनिक व्यवस्था सक्षम करण्याच्या दृष्टीने पिंपरी चिंचवड महापालिका क्षेत्रातील मेट्रो रेल्वे कार्यान्वित करण्याचा निर्णय राज्य शासनाने पुणे मेट्रो रेल्वे प्रकल्पातील मार्ग क्र.१ स्वारगेट ते पिंपरीला मान्यता दिली आहे. पहिल्या टप्प्यामध्येच निगडी भक्ती-शक्ती चौकापर्यंत मेट्रो सुरु व्हावी, ही पिंपरी चिंचवडमधील नागरिकांची मागणी आहे. त्यानुसार निगडीपर्यंत मेट्रो नेण्याबाबत मी केंद्रीय शहरी विकास मंत्री हरदीपसिंग पुरी यांची भेट घेऊन निवेदन दिले होते. त्यांना पहिल्याच टप्प्यात निगडीपर्यंत मेट्रो नेण्याची विनंती केली होती”.

”पुणे महामेट्रोच्या ३१ किलोमीटर या मार्गाला केंद्र सरकारने सात डिसेंबर २०१६ रोजी मान्यता दिली आहे. पुणे महामेट्रो निगडीपर्यंत नेण्यास केंद्र सरकारची संमती आहे. निगडीपर्यंत मेट्रो नेण्याबाबत राज्य सरकारने उचित निर्णय घ्यावे, असे पत्र केंद्रीय शहरी विकास राज्यमंत्री हरदीपसिंग पुरी यांनी राज्य सरकारला दिले आहे. त्यामुळे मेट्रो निगडीपर्यंत नेण्याबाबतचा निर्णय आता राज्य सरकारच्या कोर्टात आहे”, असेही बारणे म्हणाले.

मुख्यमंत्री देवेंद्र फडणवीस यांची भेट घेऊन पुणे मेट्रो पहिल्याच टप्प्यात निगडीपर्यंत नेण्याची विनंती केली आहे. पिंपरी चिंचवड शहराची लोकसंख्या विचारात घेता. तसेच नागरिकांच्या मागणीचा विचार करुन पिंपरी ते निगडीपर्यंतच्या मेट्रोच्या मार्गास राज्य सरकारने त्वरित मान्यता द्यावी. राज्यसरकारतर्फे आर्थिक मदत करुन महामेट्रोला निगडीपर्यंतच्या मेट्रोचा डीपीआर त्वरित तयार करण्याचे आदेश द्यावेत, अशी विनंती मुख्यमंत्र्यांना केली आहे, असेही बारणे यांनी सांगितले.

बारणे म्हणाले, ”मेट्रो पहिल्याच टप्प्यात निगडीपर्यंत नेण्याची शहरवासियांची मागणी आहे. त्याला केंद्र सरकारने त्वरित मान्यता दिली आहे. पिंपरीपर्यंत मेट्रोचे काम वेगात सुरु आहे. त्याला राज्य सरकारने मान्यता द्यावी. निगडीपर्यंत मेट्रो नेण्याबाबत आर्थिक सहकार्य करावे. काही आर्थिक भार पिंपरी चिंचवड पालिका पेलेल. त्यामुळे पहिल्याच टप्प्यात मेट्रो निगडीपर्यंत नेण्यास कोणतीही अडचण येणार नाही. चालू कामात निगडीपर्यंतचे देखील काम मार्गी लागेल. त्यासाठी राज्य सरकारने सकारात्मक निर्णय घ्यावा”.

नागरी प्रश्न जलदगतीने मार्गी लावण्यासाठी प्रभाग स्तरावर विशेष बैठका – एकनाथ पवार

व्हीएस न्यूज – महापालिकेच्या सर्व प्रभागातील नागरी प्रश्न व समस्या जलद गतीने मार्गी लावण्यासाठी सर्व प्रभाग स्तरावर विशेष बैठकांचे आयोजन करण्यात येत असल्याचे पक्षनेते एकनाथ पवार यांनी सांगितले. तर बैठकीत पदाधिकारी नगरसदस्य, नगरसदस्या यांनी केलेल्या सुचनांचे पालन करण्याबाबत व प्रभागातील प्रलंबित सर्व कामे तातडीने पूर्ण करण्याबाबतचे निर्देश आयुक्त श्रावण हर्डीकर यांनी संबंधित अधिकाऱ्यांना दिले. आज अ प्रभागात आयोजीत करण्यात आलेल्या प्रभागस्तरीय विशेष बैठकीमध्ये ते बोलत होते.

अ प्रभाग अध्यक्ष केशव घोळवे यांच्या अध्यक्षतेखाली झालेल्या या बैठकीस उपमहापौर शैलजा मोरे, स्थायी समिती सभापती सिमा सावळे, सत्तारूढ पक्षनेते एकनाथ पवार, आयुक्त श्रावण हर्डीकर, नगरसदस्य राजू मिसाळ, जावेद शेख, अमित गावडे, नगरसदस्या अनुराधा गोरखे, शर्मिला बाबर, क्षेत्रीय अधिकारी आशादेवी दुरगुडे कार्यकारी अभियंता सतीश इंगळे, विशाल कांबळे, देवाण्णा गट्टूवार, सहाय्यक आरोग्य अधिकारी एम.एम.शिंदे, प्रशासन अधिकारी रामकिसन लटपटे यासह प्रभागातील अधिकारी कर्मचारी उपस्थित होते.

या बैठकीत पाणी पुरवठा, जलनि:सांरण, विद्युत पोल व एलईडी दिवे, अनधिकृत बांधकामे व नळ जोडणी, स्वच्छता, आरोग्य, घंटा गाडी, पाणी टँकर, भटकी कुत्री, हॉकर्स व हॉकर्सझोन, फुटपाथ व त्यावर लावण्यात येणारे ब्लॉक, महापौर निवास, वृक्ष गणना, पशु दफन भूमी, ड्रेनेज लाईन, ड्रेनेज चोकप, साठलेला कचरा, राडारोडा, भिकारी निवारा केंद्र, मोकळ्या जागेवर होणारे अतिक्रमण, आदी विषयांवर चर्चा झाली. यावेळी पक्षनेते एकनाथ पवार म्हणाले, शहरातील सर्वभागात मुबलक पाणी पुरवठा होणे कामी तातडीने कार्यवाही करण्यात यावी. प्रत्येक प्रभागात पाणी वितरणा कामी किमान एक टँकर उपलब्ध करुन देण्यात यावा. प्रभागात अनधिकृत बांधकामे व अनधिकृत नळ जोडनी होऊ नये याबाबत अधिकारी व नगरसदस्यांनी काळजी घ्यावी. प्रभाग स्वच्छतेबाबात आरोग्य विभागाने तर रस्त्यावरील राडारोडा उचलणे बाबत स्थापत्य विभागाने दक्षता घ्यावी. प्रभाग स्तरावरील बैठकीत मांडण्यात आलेले प्रश्न त्वरीत निकाली काढण्यासाठी अशा प्रकारच्या विशेष बैठकांचे आयोजन सर्व प्रभागांमध्ये केले जाणार असल्याचे यावेळी ते म्हणाले.

स्थायी समिती सभापती सिमा सावळे म्हणाल्या, शहरात वाढणाऱ्या भटक्या कुत्र्यांचा बंदोबस्त करणे आवश्यक असून शहरातील पशु दफन भूमी सुस्थीतीत असणे गरजेचे आहे. तसेच शहरात नव्याने पशु दफन भूमी बांधणे आवश्यक आहे. शहरातील सर्व भागात समान पाणी पुरवठा होणे कामी तातडीने कार्यवाही करण्यात यावी असेही त्या यावेळी म्हणाल्या.

शहरात वाढणाऱ्या भटक्या कुत्र्यांचा बंदोबस्त करण्यात यावा शहरात बेगर शेल्टर योजना राबविण्यात यावी. तसेच प्रभागातील प्रलंबीत कामे तातडीने पूर्ण करण्याबाबतच्या सुचना यावेळी उपमहपौर शैलजा मोरे यांनी केल्या.

अ प्रभाग अध्यक्ष केशव घोळवे यांनी प्रभागातील आरोग्य प्रश्न गंभीर असून ड्रेनेजचे चोकअप तातडीने काढण्यात यावे. साठलेला कचरा व राडा रोडा तातडीने उचलण्यात यावा. चालु असणाऱ्या स्थापत्य विषयक कामाच्या ठिकाणी कामाची सुरुवात, मुदत व येणारा खर्च आदी बाबत वर्णन असणारा फलक लावण्यात यावा. प्रभागातील पाणी पुरवठा सुरळीत व्हावा पदपथा वरील अतिक्रमणे काढण्यात यावीत. पालिकेच्या मोकळ्या जागेवरील अतिक्रमण थांबवावे. प्रभागात सर्व ठिकाणी एलईडी दिवे लावण्यात यावेत, अशा सुचना केल्या. प्रभागातील पाईप लाईनसाठी खोदलेले खड्डे बुजवण्यात यावे, अपुर्ण ड्रेनेजचे काम पुर्ण करण्यात यावे. विद्यानगर मध्ये असलेल्या महापालिकेच्या सांस्कृतीक भवनांवर नियंत्रन असावे अशा सुचना नगरसदस्या अनुराधा गोरखे यांनी यावेळी केल्या.