व्हीएस न्यूज - बहिणीच्या शोधात आईसोबत चाललेल्या तरुणीचा बाप-लेकाने विनयभंग केल्याची घटना काळेवाडी येथे घडली.
याबाबत 22 वर्षीय तरुणीने वाकड पोलीस ठाण्यात फिर्याद दिली आहे. दोघांविरोधात गुन्हा दाखल करण्यात आला आहे.
मिळालेल्या माहितीनुसार, 22 वर्षीय तरुणी आपल्या आईसोबत बहिणीच्या शोधात काळेवाडी येथे जात असताना दोन इसमांनी घरगुती भांडणाच्या कारणावरून तिचा विनयभंग केला. आरोपीने पीडितेच्या शरीराचा चावा घेतला. यामध्ये तरुणी गंभीर जखमी झाली आहे. वाकड पोलीस अधिक तपास करत आहेत.

व्हीएस न्यूज - तरुणाने राहत्या घरात गळफास घेऊन आत्महत्या केली. घरातून उग्र वास आल्याने मंगळवारी रात्री ही घटना उघडकीस आली. तरूणाने तीन-चार दिवसांपुर्वी आत्महत्या केल्याचा संशय पोलीसांनी व्यक्त केला आहे.
रमाकर फुलचंद राजभर (रा.कुदळवाडी, चिखली) असे आत्महत्या केलेल्या तरुणाचे नाव आहे.
पोलीसांनी दिलेल्या माहितीनुसार, रमाकर यांचे घर गेल्या तीन-चार दिवसापासून बंद होते. मंगळवारी त्यांच्या घरातून उग्र वास येऊ लागल्याने शेजाऱ्यांनी पोलिसांना कळविले. निगडी पोलीस घटनास्थळी दाखल झाल्यावर त्यांनी दरवाजा तोडला. रमाकर यांचा कुजलेला मृतदेह आढळून आला. रमाकर हा मित्रासोबत राहत होता. मागील काही दिवसांपूर्वी मित्र गावी गेला होता. तीन दिवसांपूर्वी रमाकर यांनी आत्महत्या केली असावी, अशी शक्यता पोलीसांनी व्यक्त केली. त्याच्या आत्महत्येचे नेमके कारण समजू शकले नाही. निगडी पोलीस अधिक तपास करीत आहेत.

व्हीएस न्यूज - बॅकेतून पैसे घेवून बाहेर आलेल्या एका ज्येष्ठ नागरिकांच्या अंगावर दोघांनी खाज येणारी पावडर टाकली. पावडर धुण्यासाठी हॉटेलमध्ये गेलेल्या ज्येष्ठाकडील सव्वा लाख रूपयांची रोकड, पासबुक असलेली बॅग पळवून नेली. ही घटना भोसरीतील चांदणी चौकातील मेघदुत हॉटेलमध्ये मंगळवारी भरदिवसा दुपारी एकच्या सुमारास घडली.
तुकाराम साळवी (वय-64, रा. प्राधिकरण, आकुर्डी) यांनी भोसरी पोलीस ठाण्यात फिर्याद दिली आहे.
याबाबत पोलीस निरीक्षक (गुन्हे) अजय भोसले यांनी माहिती दिली. साळवी हे मंगळवारी दुपारी एकच्या सुमारास चांदणी चौकातील देना बॅंकेतून एक लाख 23 हजार रूपये काढून बाहेर आले होते. बॅकेच्या बाहेर काही अंतरावर आल्यानंतर दोघांनी त्यांच्या अंगावर खाज येणारी पावडर टाकली. साळवी पावडर साफ करण्यासाठी मेघदुत हॉटेलमध्ये गेले. साळवी यांनी पैशांची बॅग पाण्याच्या कुलर जवळ ठेवून अंगावरील पावडर साफ करत होते. पाठीमागून आलेल्या एका आरोपीने सव्वा लाख रूपयांची रोकड व पासबुक असलेली बॅग घेवून पोबारा केला. साळवी यांनी आरडा-ओरड केली तोपर्यंत आरोपी पसार झाला.
फौजदार चामले अधिक तपास करत आहेत.

व्हीएस न्यूज - पायी जाणाऱ्या एका पादचाऱ्याला दुचाकीवरून आलेल्या चौघांनी शिवीगाळ व मारहाण करून जीवे मारण्याची धमकी देवून 2200 रूपये लुटले. हा प्रकार दि. 12 फेब्रुवारी रोजी भोसरीतील गुळवे वस्ती येथे घडला.
अनिल सरदार (वय-33, रा. भोसरी) यांनी भोसरी पोलीस ठाण्यात फिर्याद दिली आहे.
सरदार 12 फेब्रुवारी रोजी गुळवे वस्ती येथून पायी जात होते. पाठीमागून दुचाकीवरून आलेल्या चौघांनी त्यांना अडविले. शिवीगाळ करत हाताने मारहाण केली. तसेच जीवे मारण्याची धमकी देत त्यांच्या खिशातील दोन हजार दोनशे रूपये जबरदस्तीने काढून घेत पसार झाले. फौजदार कठोरे अधिक तपास करत आहेत.

व्हीएस न्यूज - जिन्याच्या खाली असलेल्या पाण्याच्या टाकीचा कॉक सुरू करण्यासाठी गेलेल्या वृद्ध महिलेचा तोल जाऊन पाण्याच्या टाकीत पडल्याने मृत्यू झाला. हा प्रकार बुधवारी सकाळी साडेनऊच्या सुमारास घडला.
चंद्रप्रभा अंबादास आबडेकर (वय-65, रा. पोटे वसाहत, सखुबाई गार्डनजवळ, भोसरी) असे मृत्यू झालेल्या वृद्ध महिलेचे नाव आहे.
पोलीसांनी दिलेल्या माहितीनुसार, चंद्रप्रभा आंबेडकर दररोज सकाळी व संध्याकाळी पाण्याचा कॉक चालू-बंद करत होत्या. बुधवारी सकाळी त्या कॉक सुरू करण्यासाठी गेल्या. आणि तोल जाऊन पाण्याच्या टाकीत पडल्या. बराच वेळ झाला तरी चंद्रप्रभा परत आल्या नाहीत म्हणून घरच्यांनी बघितले असता, त्यांची एक चप्पल टाकीबाहेर पडलेली आढळली. टाकीत बघितले असता, त्यांचा मृतदेह आढळून आला.
भोसरी पोलीस पुढील तपास करीत आहेत.

व्हीएस न्यूज - जगाच्या इतिहासात भुतो न भविष्यती राजा शिवाजी महाराजांसारखा सर्वगुणसंपन्न, पराक्रमी राजा पुन्हा होणे अशक्यच आहे. सर्व बाबींचा विचार करून त्यानुसार स्वराज्याची कार्यप्रणाली चालविणारे राजे शेतक-यांचे कैवारी होते. आजची प्रशासन व्यवस्था पाहून शिवबांची आठवण झाल्या शिवाय रहात नाही. शिवशाही” काळात एकाही शेतकऱ्याने कधी आत्महत्या केली नाही, किंबहूना तशी परिस्थिती उद्भवू न देणारे जगातील सर्वाेच्च आदर्शांचा मानबिंदू म्हणजे छत्रपती शिवाजी महाराज होत. असे प्रतिपादन अमित बच्छाव यांनी केले.

निगडी,भक्ती-शक्ती समुह शिल्प येथे शिवजयंती विविध कार्यक्रमांच्या माध्यमातून साजरी करण्यात आली. यावेळी आयोजित कार्यक्रमात राष्ट्रवादी काँग्रेसचे शहर उपाध्यक्ष अमित बच्छाव बोलत होते. जगदगुरू संत तुकाराम महाराज व छत्रपती शिवाजी महाराजांना पुष्पहार अर्पण करून कार्यक्रमाची सुरुवात करण्यात आली. बच्छाव म्हणाले,”आज शिवरायांच्या नावावर मत मिळविली जातात, निवडणूकांपुरता त्यांच्या नावाचा उदो-उदो केला जातो. परंतू राज्यकर्त्यांनी शिवाजी महाराज,त्यांची विचारप्रणाली समजून घेतली आहे का? हा ही एक मोठा प्रश्न आहे. आज मंत्रालयात आत्महत्या केल्या जात आहेत. ज्या ठिकाणी न्यायाच्या अपेक्षेने शेतकरी येतो, तेथे त्यांची महात्वाकांक्षाच का संपतेय? का असे घडतेय. आज शेकडो वर्षांनी पुन्हा एकदा शिवबांची शासनप्रणाली समजून घेणे गरजेचे आहे.

आज महाराष्ट्र शेतक-यांच्या आत्महत्येत देशात आघाडीवर आहे. शेतकरी आत्महत्यांना दुष्काळाचे कारण देणा-या राज्यकर्त्यांनी एक लक्षात ठेवावे की शिवबांच्या काळातही दुष्काळ पडत होता. परंतू त्या परिस्थितीत शिवबांनी शेतक-यांना एक नवचैतन्याची ताकद देऊन शेतक-यांच्या पाठीशी ते खंबीरपणे थांबले होते. त्या काळात एकाही शेतकऱ्याने कधी आत्महत्या केली नाही. आज त्यावर सरकारने विचार करून शेतक-यांच्या हाल-अपेष्ठा जाणून घेऊन उपाययोजनांची आखणी केल्यास राजांना ख-या अर्थाने अभिवादन ठरेल. यावेळी मोठ्या संख्येने जनसमुदाय उपस्थित होता.

व्हीएस न्यूज - पिंपरी चिंचवड महापालिकेच्या मुख्यालयात आज मनसेच्यावतीने पाणी दरवाढी विरोधात आंदोलन करण्यात आले. आज होणार्या महासभेत पाणी दरवाढ करण्याबाबत शिक्कामोर्तब होणार आहे. त्यामुळेच ही दरवाढ करू नये या मागणीसाठी मनसे शहराध्यक्ष सचिन चिखले यांच्या नेतृत्वात आंगोलन करण्यात आले.

यावेळी बोलताना सचिन चिखले म्हणाले की, शहरवासियांचे पाणी चौपट महाग करण्याचा घाट घातला जात आहे. या दरवाढीला मनसेचा पूर्णपणे विरोध आहे. महासभेत सत्तेच्या जोरावर भाजपने दरवाढ केल्यास तीव्र आंदोलन करू असा इशारा त्यांनी यावेळी दिला. यावेळी सत्ताधारी भाजप विरोधात जोरदार घोषणाबाजी करण्यात आली.

व्हीएस न्यूज - शिवजयंतीनिमित्त पिंपरी एच.ए.कंपनी समोरील छत्रपती शिवाजी महाराजांच्या पुतळ्यास पिंपरी चिंचवड शहर जिल्हा कॉंग्रेस अध्यक्ष सचिन साठे व महिला शहराध्यक्षा गिरीजा कुदळे यांच्या हस्ते पुष्पहार अर्पण करुन अभिवादन करण्यात आले.

यावेळी महाराष्ट्र प्रदेश महिला कॉंग्रेसच्या माजी अध्यक्षा शामला सोनवणे, प्रदेश कमिटीच्या महिला सचिव बिंदू तिवारी, भोसरी ब्लॉक अध्यक्ष विष्णुपंत नेवाळे, चिंचवड ब्लॉक अध्यक्ष परशूराम गुंजाळ,अल्पसंख्यांक सेलचे प्रदेश उपाध्यक्ष राजेंद्रसिंह वालिया, युवक अध्यक्ष नरेंद्र बनसोडे, ज्येष्ठ नागरीक सेलचे अध्यक्ष लक्ष्मण रुपनर, चिंचवड युवा अध्यक्ष मयूर जैयस्वाल, अल्पसंख्यांक सेलचे शहराध्यक्ष शहाबुद्दीन शेख, शोभा बोराटे, सरचिटणीस सज्जी वर्की, विजय ओव्हाळ, विरेंद्र गायकवाड, विनीता तिवारी, हिरामण खवळे, सिध्दार्थ वानखेडे, हिरा जाधव, अर्जुन खंडागळे, अनिरुध्द कांबळे, तारीक रिजवी, फारुक इनामदार आदी उपस्थित होते.

व्हीएस न्यूज - प्रदेश काँग्रेसच्या पर्यावरण विभागातर्फे छत्रपती शिवाजी महाराजांची ३८८ वीं जयंती कार्यक्रम अजमेरा कॉलनीतील कार्यालयात साजरा झाला. महाराष्ट्र प्रदेश काँग्रेस पर्यावरण विभागाचे अध्यक्ष अशोकराव मोरे यांनी छत्रपती शिवाजी महाराजांच्या प्रतिमेचे पूजन केले. यावेळी प्रदेश महासचिव अशोक मंगल, पुणे शहर अध्यक्ष राजन पानसे, अमर नानेकर, पिंपरी शहर अध्यक्ष उमेश बनसोडे़, प्रवक्ता आयुष मंगल, पराग आठवले, सोनू वाघमारे, श्वेता मंगल, नेहा मंगल, अक्षांश मंगल, मिताली चक्रवर्ती, राजेश नायर, साक्षी राणीम आदि उपस्थित होते.

व्हीएस न्यूज - शिवसेना प्रभाग प्रमुख युवराज दाखले यांच्या ‘अखंड जनसेवा’ या अॅपचा लोकार्पण सोहळा आज संपन्न झाला. शिवसेना सचिव खासदार आनिल देसाई यांच्या हस्ते शिवसेना भवन दादर मुंबई या ठिकाणी या अॅपचे उद्घाटन झाले.

पिंपरी चिंचवडमध्ये प्रथमच अशा पध्दतीचे अॅप तयार करण्यात आले आहे. या ‘अखंड जनसेवा’ अॅपमुळे शहरातल्या जनतेच्या विविध समास्याचे निराकरण होण्यासाठी मदत होणार आहे. लोकार्पण सोहळ्यानंतर अनिल देसाई यांनी युवराज दाखले यांचे व अॅप डेव्हलपर्स रविकिरण घटकार यांचे कौतुक केले.

यावेळी शिवसेना भंडारा-गोदींयाचे जिल्हा संपर्कप्रमुख निलेश धुमाळ, शिवसेना प्रभाग प्रमुख युवराज दाखले, गणेश आहेर,निलेश भोरे, तसेच चाणक्य आय.टी. सोल्युशनचे रविकिरण घटकार तसेच शिवसैनिक उपस्थित होते.