व्हीएस न्युज - शंभरहून अधिक गुन्हे दाखल असलेल्या एका सराईत वाहन चोराला त्याच्या साथीदारासह अटक करण्यात आली आहे. ही कारवाई वाकड पोलीसांनी केली.

राजू बाबुराव जावळकर (वय ५०, रा. कोल्हेवाडी, ता. हवेली.) असे शंभरहून अधिक गुन्हे दाखल असलेल्या सराईत आरोपीचे नाव आहे. पोलिसांनी त्याच्यासह त्याचा साथीदार सोमनाथ सुभाष चौधरी (वय ३२, रा. भेकराईनगर, फुरसुंगी, हडपसर) याला अटक केली आहे.

पोलिसांनी दिलेल्या माहितीनुसार, वाकड पोलीस ठाणे हद्दीतून फेब्रुवारी २०१८ मध्ये टाटा कंपनीचा छोटा हत्ती (एमएच/१२/एफडी/६४२३) हा टेम्पो चोरीला गेला होता. याप्रकरणी वाकड पोलीस ठाण्यात गुन्हा देखील दाखल आहे. या गुन्ह्याचा तपास करत असताना वाकड पोलिसांना त्यांच्या खबऱ्याकडून माहिती मिळाली या प्रकरणातील चोरीचा टेम्पो हा खेड शिवापूर येथे आहे. यावर पोलिसांनी त्याठिकाणी जाऊन शोध घेतला असता एका शेड मध्ये आरोपी राजू आणि सोमनाथ हे दोघेही गॅस कटरच्या साहाय्याने तो टेम्पो कट करत असल्याचे आढळून आले. पोलिसांनी तातडीने त्या दोघांना ताब्यात घेऊन टेम्पो जप्त केला. आरोपींची कसून चौकशी केली असता त्यांनी हा टेम्पो रहाटणी येथील बीआरटी रोडवरून चोरी केल्याचे पोलिसांना सांगितले. त्यावरून दोघा आरोपींना अटक करण्यात आली.

आरोपी राजू जावळकर याच्यावर पुणे शहर, सातारा, नगर येथे तब्बल १०० पेक्षा अधिक गुन्हे दाखल आहेत. तर सोमनाथ चौधरी याच्यावर २० ते २५ वाहनचोरीचे गुन्हे दाखल आहेत. या कारवाईमुळे चिखली पोलीस ठाण्यातील दोन, वाकड, इंदापूर, चाकण, तळेगाव दाभाडे, कराड शहर पोलीस ठाण्यातील प्रत्येकी एक असे एकूण सात वाहन चोरीचे गुन्हे उघड झाले आहेत.

ही कामगिरी पोलीस आयुक्त आर के पद्मनाभन, अप्पर पोलीस आयुक्त मकरंद रानडे, पोलीस उपायुक्त नम्रता पाटील, सहाय्यक पोलीस आयुक्त श्रीधर जाधव यांच्या मार्गदर्शनाखाली वरिष्ठ पोलीस निरीक्षक सतीश माने, पोलीस निरीक्षक (गुन्हे) सुनील पिंजण, सहाय्यक पोलीस निरीक्षक एन डी सस्ते, पोलीस उपनिरीक्षक हरीश माने, पोलीस कर्मचारी देविदास शेळके, डी. डी. सणस, बापूसाहेब धुमाळ, बिभीषण कन्हेरकर, नितीन ढोरजे, जावेद पठाण, सुरेश भोसले, प्रमोद भांडवलकर, रमेश गायकवाड, विक्रम जगदाळे, दीपक भोसले, भैरोबा यादव, विजय गंभीरे, विक्रम कुदळ, नितीन गेंगजे, शाम बाबा, मधुकर चव्हाण, विक्रांत गायकवाड यांच्या पथकाने केली.

चोरीच्या पैशांमधून मुलांचे शिक्षण

चोरीच्या कामातून मिळणाऱ्या पैशांमधून दोघेही संसार आणि मुलांच्या शिक्षणासाठी येणारा खर्च भागवायचे. राजू जावळकरला दोन मुले असून ते नेवासा येथील बोर्डिंगमध्ये शिक्षण घेत आहेत.त्यासाठी राजू हा दरवर्षी दोघांची ८० हजार रुपये फी भरतो. तर पत्नी ही गृहिणी आहे. आई-वडील हे पुण्याजवळील एका खेड्यात राहतात. राजू हा गेली २० वर्ष वाहनचोरीचे गुन्हे करत आहे. चार चाकी चोरुन ती भंगारात विकायचा. कवडीमोल किंमतीमध्ये भंगारात विकायचा. या पैशांमधून तो संसार आणि मुलांच्या शिक्षणाचा खर्च भागवतो. राजू इयत्ता ७ वी पर्यंत शिकलेला असून कमी कष्टात जास्त पैसे कमावण्यासाठी तो चोरी करु लागला. दरम्यान, चोरी केलेल्या गाडीमध्ये जीपीएस सिस्टम तर नाही ना हे पाहण्यासाठी चोरी केलेली गाडी निर्जनस्थळी ठेवली जायची. तिथे दोन दिवस पोलीस किंवा गाडी मालक तर येत नाही ना याची खात्री करून ते गाडी भंगारात काढायचे.

व्हीएस न्युज - मोबाईल दुकानाचे पत्रे उचकटून अज्ञात चोरट्यांनी दुकानातील विविध कंपन्यांचे मोबाईल फोन आणि रोख रक्कम असा एकूण ४ लाख ६७ हजार २१० रुपयांचा ऐवज चोरुन नेला. ही घटना शनिवारी (दि.१५) रात्री अकरा ते रविवारी (दि.१६) पहाटे चारच्या दरम्यान भोसरी आळंदी रस्ता येथील शरयु एंटरप्रायजेस या मोबाईल विक्रीच्या दुकानात घडली.

याप्रकरणी दुकानाचे मालक विशाल प्रकाश पाटील (वय २३, रा. पसायदान सोसायटी, फ्लॅट नं.१०५, ए विंग परांदेनगर, दिघी) यांनी भोसरी पोलीस ठाण्यात फिर्याद दिली आहे. त्यानुसार, अज्ञात चोरट्यांविरोधात गुन्हा दाखल करण्यात आला आहे.

पोलिसांनी दिलेल्या माहितीनुसार, फिर्यादी विशाल यांचे भोसरी आळंदी रस्ता येथे शरयु एंटरप्रायजेस नावाचे मोबाईल विक्रीचे दुकान आहे. शनिवारी (दि.१५) रात्री अकराच्या सुमारास दुकानाला कुलुप लावून घरी गेले असता. रात्री अकरा ते पहाटे चारच्या दरम्यान अज्ञात चोरट्यांनी दुकानाच्या छताचा पत्रा उचकटून दुकानात प्रवेश केला. तसेच दुकानातील विविध कंपन्यांचे ४५ मोबाईल आणि रोख रक्कम असा एकूण ४ लाख ६७ हजार २१० रुपयांचा ऐवज चोरुन नेला आहे. पोलीस उपनिरीक्षक प्रमोद कठोरे तपास करत आहेत.

व्हीएस न्युज - बेपत्ता विवाहितेच्या चौकशीसाठी तिच्या वयोवृद्ध वडिलांना भोसरी पोलीस ठाण्यात बोलावून सर्व नातेवाईकांसमोर मारहाण केल्याचा धक्कादायक प्रकार समोर आला आहे. ही घटना भोसरी पोलीस ठाण्यात रविवारी (दि. १६) दुपारी दोनच्या सुमारास घडली.

वयोवृध्द इसमाला मारहाण करणाऱ्या भोसरी पोलीस ठाण्यातील सहायक निरीक्षकाचे नाव विकास देशमुख असे आहे.

मिळालेल्या माहितीनुसार, भोसरी पोलीस ठाण्याच्या हद्दीतून गुरुवारी (दि. १३) एक विवाहित महिला एक वर्षाच्या मुलासह बेपत्ता झाली होती. सगळीकडे शोधाशोध करूनही महिला सापडत नसल्याने सासरच्यांनी भोसरी पोलीस ठाण्यात तक्रार दिली. महिलेच्या वडिलांना गावी देखील याबाबत कल्पना देण्यात आली. वडिलांनी देखील सर्वत्र शोधाशोध केली. मात्र, ती मिळून आली नाही.

या प्रकरणाच्या तपासासाठी भोसरी पोलीस ठाण्यातील सहायक निरीक्षक विकास देशमुख यांनी महिलेच्या वडिलांना चौकशीसाठी पोलीस ठाण्यात बोलावले. यावेळी महिलेचे वडील नातेवाईकांसह पोलीस ठाण्यात आल्यानंतर देशमुख यांनी त्यांना कोणावर संशय आहे का, असे विचारले. त्यावर त्यांनी महिलेचे लग्नापूर्वी एका तरुणासोबत मैत्रीचे संबंध असून त्याच्यासोबत गेल्याचा संशय वाटत असल्याचे सांगितले. ही माहिती देताच ही माहिती एवढ्या उशीरा का सांगितली म्हणत देशमुख यांनी बेपत्ता महिलेच्या वडिलांना मारहाण केली. तसेच बारा तासांच्या आत मला महिला आणि तिचा मुलगा इथे पाहिजे असे सांगून त्यांना पोलीस ठाण्यातून हाकलून काढले. या घटनेमुळे सर्वच स्थरातून संताप व्यक्त होत आहे.

याप्रकरणी परिमंडळ एकच्या पोलीस उपायुक्त स्मार्तना पाटील यांना विचारले असता त्यांनी, हा प्रकार अत्यंत धक्कादायक आहे. मात्र याप्रकरणी वडिलांनी सुरुवातीला ही माहिती देणे अपेक्षीत होते. ती दिली नाही म्हणून त्यांच्यावर थोडा दबाव आणल्याचे प्राथमिक माहिती मिळत आहे. मात्र संबंधीत अधिकाऱ्याने मारहाण केली आहे का याची चौकशी करण्यात येत आहे, अशी माहिती दिली.

व्हीएस न्युज - दुचाकी घेऊन देतो असे सांगून एका महिलेकडून कागदपत्रे आणि २८ हजार ६०० रुपये घेऊन तिला दुचाकी घेऊन न देता तिघाजणांनी मिळून फसवणूक केली. ही घटना मंगळवार (दि.१३ नोव्हेंबर) ते मंगळवार (दि.४ डिसेंबर) दरम्यान नेहरुनगर येथील राजीव गांधी शाळे शेजारील इमारतीमध्ये घडली.

याप्रकरणी फसवणूक झालेल्या महिलेचे बंधू अभिशेक सुभाष पाटील (वय २१, रा. वारंगवाडी रोड, डी.वाय.पाटील कॉलेज आंबीगाव तळेगाव) यांनी पिंपरी पोलीस ठाण्यात फिर्याद दिली आहे. त्यानुसार, महेंद्र सुरेश जैसवाल (रा. राजीव गांधी शाळेशेजारील पांढऱ्या रंगाची इमारत, रुम नं.३, नेहरुनगर, पिंपरी) आणि त्याचे इतर दोघा साथीदारांविरोधात गुन्हा दाखल करण्यात आला आहे.

पोलिसांनी दिलेल्या माहितीनुसार, मंगळवार (दि.१३ नोव्हेंबर) ते मंगळवार (दि.४ डिसेंबर) या दरम्यान फिर्यादी अभिषेक यांच्या बहिणीला आरोपी महेंद्र आणि इतर दोघा आरोपींनी नवी दुचाकी घेऊन देतो असे सांगून त्यांच्याकडून त्यांचे घरभाडे अॅग्रीमेंट, आधार कार्ड आणि पॅनकार्ड घेतले. त्यानंतर एकूण २८ हजार ६०० रुपये त्यांच्याकडून घेऊन त्यांना दुचाकी घेऊन न देता त्यांची फसवणूक. आरोपींनी महिलेचे पैसेही परत केले नाही तसेच देलेल्या कागदपत्रांचा स्वत:च्या फायद्यासाठी उपयोग केला.

याप्रकरणी महेंद्र आणि त्यांच्या दोघा साथीदारांविरोधात पिंपरी पोलीस ठाण्यात गुन्हा दाखल करण्यात आला आहे. आरोपी अद्याप फरार असून अटक करण्यात आलेले नाहीत. पोलिस उपनिरीक्षक बोचरे तपास करत आहेत.

व्हिएस न्युज - नेहरुनगर संतोषी माता चौकाजवळील टेल्को रोडवर सोमवारी दुपारी साडेबाराच्या सुमारास रस्त्याच्या कडेला उभी असलेल्या एका इंडिका कारला अचानक आग लागली. या आगीत इंडिका कार जळून खाक झाली.

घटनेची माहिती मिळताच संत तुकारामनगर येथील अग्निशमन दलाचा एक बंब घटनास्थळी दाखल झाला आणि १५ ते २० मिनिटातच आग विझवण्यात यश आले. मात्री आगीमुळे कारचे मोठ्या प्रमाणात नुकसान झाले आहे. आगीचे कारण अद्याप समजू शकले नाही. कोणत्याही प्रकारची जिवीत हाणी झालेली नाही.

व्हीएस न्युज - तरुण वर्गापर्यंत डॉ. बाबासाहेब आंबेडकरांचे विचार पोहचवून त्यांच्यात सकारात्माक सक्षमता निर्माण करण्यानची गरज आहे, असे प्रतिपादन करीत येत्या १ जानेवारी रोजी विजयस्तंभ येथे होणारा अभिवादन कार्यक्रम शांततेत संपन्न होईल असा विश्वास जिल्हा पोलीस अधीक्षक संदीप पाटील यांनी व्यक्त केला.

जिल्हाधिकारी कार्यालयात आयोजित बैठकीत ते बोलत होते. यावेळी जिल्हाधिकारी नवल किशोर राम, उपमहापौर डॉ. सिध्दार्थ धेंडे, निवासी उपजिल्हाधिकारी डॉ. जयश्री कटारे, उपविभागीय अधिकारी भाऊसाहेब गलांडे, ज्योती कदम, उपविभागीय पोलीस अधिकारी संदीप पखाले आदी उपस्थित होते.

जिल्हा पोलीस अधीक्षक संदीप पाटील यांनी पोलीस प्रशासनाने केलेल्या नियोजनाची माहिती यावेळी दिली. सोशल मिडीयावर बारकाईने लक्ष ठेवण्यात आले असून प्रतिबंधात्मक कार्यवाही चालू आहे. देशविघातक, समाजविघातक शक्ती कार्यरत असतात, जाती-जातींमध्येच भांडणे लागावीत हाच त्यांचा हेतू असतो, अशा शक्तींपासून आपण सावध रहायला हवे. प्रशासन त्यांच्यावर योग्य ती कारवाई करत आहे.

प्रत्येेक नागरिक हा ‘पोलीस’ असतो असे नमूद करुन नागरिकांनी त्यांना काही नकारात्मक बाबी आढळून आल्यास प्रशासनाच्या निदर्शनास आणाव्यात, असे आवाहन पाटील यांनी केले. प्रारंभी विविध संस्था, संघटना आणि व्यक्तींनी प्रशासनाकडून असलेल्या अपेक्षा व्यक्त केल्या. यावेळी विविध संघटना, पक्षांचे प्रतिनिधी आणि नागरिक उपस्थित होते.

मोरया गोसावी संजीवन समाधी महोत्सवास उत्साहात सुरुवात

व्हीएस न्युज - आत्ताची तरुण पिढी काहीशी भरकटत चालली आहे. त्या तरुणाईला योग्य मार्ग दाखवायला हवा. तसेच त्यांना अध्यात्मिक ज्ञानाची गोडी लागायला हवी. त्यामुळे संस्कृतीचा विकास होईल, असे मत पोलीस आयुक्त आर. के. पद्मनाभन यांनी व्यक्त केले. महान गणेशभक्त श्रीमन् महासाधू श्री मोरया गोसावी यांच्या ४५७ वा संजीवन समाधी महोत्सवास सोमवारी (दि. १७) सुरुवात झाली. महोत्सवाचे उदघाटन पिंपरी-चिंचवड पोलीस आयुक्तालयाचे पोलीस आयुक्त आर. के. पद्मनाभन यांच्या हस्ते झाले. महोत्सवाच्या उदघाटनप्रसंगी आयुक्त ते बोलत होते.

यावेळी मुख्य विश्वस्त मंदार देव महाराज, हवेली पंचायत समितीच्या सभापती हेमलता काळोखे, आळंदी देवस्थानचे अध्यक्ष अॅड. विकास ढगे, उपमहापौर सचिन चिंचवडे, विश्वस्त विनोद पवार, अॅड. राजेंद्र उमाप, आनंद तांबे, विठ्ठल भोईर, विघ्नहरी देव महाराज, विश्राम देव, नगरसेविका करुणा चिंचवडे, नगरसेवक नामदेव ढाके, सुरेश भोईर, राजेंद्र गावडे, मोरेश्वर शेडगे आदी उपस्थित होते.

आयुक्त आर के पद्मनाभन म्हणाले, “माझी आजवर सर्वात जास्त पोलीस सेवा तीर्थक्षेत्र असलेल्या शहरात झाली. तीर्थक्षेत्र असलेल्या शहरात काम करताना संस्कृती आणि अध्यात्माचे वातावरण असलेले जाणवते. त्यातून मलाही काही प्रमाणात अध्यात्माची गोडी लागली आहे. आताही पिंपरी चिंचवड शहराचा पहिला पोलीस आयुक्त म्हणून मोरया गोसावी नगरीची सेवा करताना आनंद होत आहे.

आपण प्रत्येकजण आपल्या समाजाला अध्यात्मिक देणे लागतो. तो वसा मोरया गोसावी देवस्थान समर्थपणे पार पाडत आहेत, असे हेमलता काळोखे म्हणाल्या. उपस्थितांच्या हस्ते २०१९ च्या दिनदर्शिकेचे अनावरण करण्यात आले. प्रास्ताविक विश्राम देव यांनी केले. आभार आनंद तांबे यांनी मानले.

व्हीएस न्युज - पिंपरी-चिंचवड पोलिसांनी एका हरवलेल्या चिमुकलीला अवघ्या दोन तासात शोधून काढले आहे. गेल्या आठ दिवसात पोलिसांनी हरवलेली मुले शोधण्याची ही तिसरी वेळ आहे. ही घटना ताजी असताना रविवारी दिघी परिसरातून सहा वर्षीय ईश्वरी राम भागवत शाळेच्या परिसरातून हरवली होती. तिचा अवघ्या दोन तासात दिघी पोलिसांनी शोध घेतला.

याच आठवड्यात १० वर्षीय मुलगा घरातून निघून गेला होता, त्यानंतर आई वडिलांनी मुलगा हरवल्याची तक्रार देण्यासाठी पोलीस ठाणे गाठले होते. त्यामुळे पोलिसांची धावपळ उडाली. मात्र मुलगा हा आपल्याच परिसरात मित्रांसोबत फिरत होता. तर शुक्रवारी भोसरी परिसरातून साडेचार वर्षीय मुलगी खेळता-खेळता घरातून निघून गेली होती. तिला शोधण्यासाठी पोलीस उपायुक्त स्मार्तना पाटील यांच्यासह अधिकारी आणि कर्मचाऱ्यांनी कंबर कसली होती.

दरम्यान, दिघी परिसरातल्या मोजे शाळेत ईश्वरीची आज सकाळी चित्रकलेची परीक्षा होती. साडेदहा वाजता परीक्षा संपल्यानंतर ती नेहमीप्रमाणे शाळेच्या बाहेर येऊन थांबली. परंतु, आज रविवार असल्याने तिला घ्यायला बस येणार नव्हती. ईश्वरी अर्धा किलोमीटर पुढे निघून गेली. तिला रस्ता समजला नाही.

अवघ्या दहा मिनिटांच्या फरकाने तिचे वडील राम भागवत हे शाळा परिसरात ईश्वरीला घेण्यासाठी आले. परंतु ईश्वरी कुठेच दिसत नव्हती. सर्व मुले शाळेतून निघून गेली होती. वडिलांनी तिचा शोध घेतला. मात्र ईश्वरी सापडली नाही. तब्बल एक तास तिचा शोध सुरू ठेवला. अखेर दिघी पोलिसांकडे तक्रार देण्यासाठी वडील राम हे गेले. वरिष्ठ पोलीस निरीक्षक लावंड, पोलीस अधिकारी अशोक तरंगे, महिला पोलीस अधिकारी कदम यांच्या पथकाने ईश्वरीचा शोध घेण्यासाठी ३ अधिकारी आणि १२ कर्मचारी कामाला लावत स्वतः शोध घ्यायला सुरुवात केली. संपूर्ण परिसरात शोध मोहीम राबवली. दुपारी एकच्या सुमारास दिघी पोलिसांना ईश्वरीला शोधण्यात यश आले. ईश्वरी साई पार्क परिसरात सापडली. ईश्वरीला पाहताच आई-वडिलांना अश्रू अनावर झाले होते.

पालकांनी सतर्क राहावे

पालकांनी आपल्या मुलांवर लक्ष ठेवावे. मुलांची योग्य ती काळजी घेतली पाहिजे. गेल्या आठ दिवसात मुले शोधण्याची ही तिसरी वेळ आहे. पालकांनी मुलांवर लक्ष ठेवले, तर अशा घटना टाळता येतील.

स्मार्तना पाटील, पोलीस उपायुक्त

व्हीएस न्युज - गुन्हेगारी विश्वावर आधारीत ‘मुळशी पॅटर्न’ हा सिनेमा सुरु असताना पोलिसांनी पुण्याच्या मंगला थिएटरमधून कोल्हापूरातील एका कुख्यात गुंडाला अटक केली. थिएटरच्या स्क्रीन नंबर ३ मध्ये मुळशी पॅटर्न सिनेमाचा खेळ सुरु असताना रात्री ११.३०च्या सुमारास पोलीस थिएटरमध्ये शिरले. चित्रपटाचा खेळ थांबवून लाईट सुरु केल्या व मॅनेजरच्या मदतीने त्या गुंडाला ताब्यात घेतले.

उमेश भाऊसाहेब अरबाळे (२६) असे अटक केलेल्या आरोपीचे नाव असून तो कोल्हापूर इंचलकरंजीचा राहणारा आहे. हत्या, दरोडा, बेकायदा शस्त्रास्त्र बाळगणे अशा अनेक गंभीर गुन्ह्यांमध्ये पोलिसांना तो हवा होता. शनिवारी रात्री कोल्हापूर पोलिसांनी शिवाजीनगर पोलिसांना संशयित गुन्हेगार शहरामध्ये असल्याची माहिती दिली.

हर्षवर्धन ठाकूरदेसाई यांच्या हत्या प्रकरणात उमेश भाऊसाहेब अरबाळे तिसरा गुन्हेगार आहे. ११ डिसेंबरला सहा जणांनी मिळून ठाकूरदेसाई यांची हत्या केली. उमेशही त्या गुन्ह्यामध्ये सहभागी होता. हत्या केल्यानंतर पुण्यामध्ये लपून बसला होता. चित्रपटगृहावर धाड टाकून अशा प्रकारे अटकेच्या केलेल्या कारवाईमुळे चित्रपट पाहणाऱ्या अन्य प्रेक्षकांना त्रास झाला नाही. काही मिनिटांमध्ये आरोपीला ताब्यात घेऊन पोलीस बाहेर निघाले असे तपास करणाऱ्या पोलिसांनी सांगितले.

व्हीएस न्युज - पुणे दहशतवादी विरोधी पथकाने एका संशयित दहशतवाद्याला चाकण परिसरातून देशी बनावटीचे पिस्तुल आणि पाच जिवंत काडतुसांसह अटक केली. अटक करण्यात आलेला संशयित हा स्वतंत्र खलिस्तान निर्मितीचा पुरस्कर्ता असल्याचे समजते.

हरपालसिंग प्रतापसिंग नाईक (वय ४२, मुळ रा. रोपर, पंजाब, सध्या रा. चाकण) असे अटक करण्यात आलेल्या आरोपीचे नाव आहे.

प्राप्त माहितीनुसार, पुणे दहशतवादी विरोधी पथकाने अतिशय गुप्तपने हरपालसिंग याला रविवारी (दि.२ डिसेंबरला) चाकण येथून अटक केली. यावेळी त्याच्याकडून एक देशी बनावटीचे पिस्तुल आणि पाच जिवंत काडतुस ही जप्त करण्यात आले.

सोमवारी (दि.३ डिसेंबरला) त्याला न्यायालयात हजर केले असता त्याला सात दिवसांची पोलीस कोठडी सुनावण्यात आली. सोमवारी (दि.१०) त्याला पुन्हा न्यायालयात हजर केल्यानंतर धक्कादायक माहिती समोर आली आहे. हरपालसिंग त्याच्या साथीदारांच्या मदतीने दहशतवाद्यांची टोळी बनवून देशाच्या एकात्मतेला धोका निर्माण करण्याच्या तयारीत होता. तो इंटरनेट आणि सोशल मीडियाचा प्रभावीपणे वापर करुन देशातील तरुणांना दहशतवादी कारवाया करण्यास भडकवत होता. तसेच दहशतवादी कारवायांसाठी तो सोशल मीडियाचा वापर करुन शस्त्र जमवण्याचे काम ही करत असल्याचे समोर आले आहे.

पुणे दहशतवादी विरोधी पथकाला हरपालसिंग हा पाकिस्तान आणि विदेशातील दहशतवादी विचारसरणी असलेल्यांच्या संपर्कात असल्याचा दाट संशय आहे. तसेच पंजाबच्या सरहद पोलीसांनी मोईन नावाच्या त्याच्या साथीदाराला अटक केली आहे. लवकरच पुढील कारवाईसाठी पुणे दहशतवादी विरोधी पथक त्याला ताब्यात घेणार आहेत.

व्हीएस न्युज - विद्यार्थ्यांच्या शारिरीक व मानसिक विकासाला चालना देण्याच्या उद्देशाने सांगवीतील अरविंद एज्युकेशन सोसायटीच्या लीटल फ्लॉवर इंग्लिश मीडियम स्कूलच्यावतीने आयोजित केलेल्या ‘एक दिवस उद्यानात’ उपक्रमात विद्यार्थ्यांनी धमाल केली. तसेच निसर्गाबद्दल अधिक माहिती जाणून घेण्याची संधीही दवडली नाही.

शाळेच्यावतीने दरवर्षी एकदिवसीय सहलीचे आयोजन केले जाते. यंदा जुनी सांगवीतील छत्रपती शिवाजी महाराज उद्यानात पहिली ते सहावीच्या विद्यार्थ्यांची सहल नेत मनोरंजनात्मक खेळ घेण्यात आले. एवढेच नाही तर शिक्षकांकडून गोष्टी ऐकूण घेण्याची संधीही विद्यार्थ्यांनी सोडली नाही. विद्यार्थ्यांनीही मुखोद्गत असलेल्या गोष्टी सर्वांना ऐकविल्या. विद्यार्थ्यांनी योगा केला, गाणी गायली. मुख्याध्यापिका हर्षा बाठिया यांनी विद्यार्थ्यांसाठी कृतियुक्त शब्दांचा खेळ घेतला. विद्यार्थ्यांनी चांगला प्रतिसाद देत धमाल केली.

शिक्षिका राजश्री..... आणि अंजुम पिरजादे यांनी विविध गाणी गात विद्यार्थ्यांचे मनोरंजन केले. विद्यार्थी शुभम घोरपडे आणि कुणाल साळवी यांनी कार्टूनची वेषभूषा करून विद्यार्थी आणि शिक्षकांचे स्वागत आणि मनोरंजन केले. निसर्गाच्या अगदी जवळ जात निसर्गाची विविध रूपे विद्यार्थ्यांनी अनुभवली. आपण राहत असलेल्या जवळच्या परिसराची मिळालेली माहिती आपल्या स्मरणात ठेवून विद्यार्थ्यांनी निसर्गाशी एकप्रकारे मैत्री केली असल्याचेच यावेळी जाणवत होते.

शाळेच्या शिक्षिका, तसेच कर्मचारी यांनी विद्यार्थ्यांच्या सुरक्षिततेची पुरेपूर काळजी घेत सहकार्य केले. यावेळी सोसायटीच्या अध्यक्षा आरती राव, उपाध्यक्ष प्रणव राव, मुख्याध्यापिका हर्षा बाठिया, गीता येरुणकर, तेजल कोळसे पाटील, भटू शिंदे, राजश्री येन्गुन्दूल, अंजुम पिरजादे आदींसह शिक्षकवृंद उपस्थित होते.

व्हीएस न्युज - केंद्रीय सामाजिक न्याय राज्यमंत्री रामदास आठवले यांच्यावर शनिवारी अंबरनाथ येथे झालेल्या भ्याड हल्ल्याच्या निषेधार्थ पुण्यात रास्ता रोको करण्यात आला. रिपब्लिकन पार्टी ऑफ इंडियाच्या वतीने हा निषेध नोंदविण्यात आला. पुणे स्टेशन येथील भारतरत्न डॉ. बाबासाहेब आंबेडकर यांच्या पुतळ्यासमोर रस्ता रोको करण्यात आला. मुख्य चौकातील वाहतूक अडवल्याने याठिकाणी वाहतुकीची कोंडी झाली होती.

यावेळी उपमहापौर डॉ. सिद्धार्थ धेंडे, आरपीआयचे शहराध्यक्ष अशोक कांबळे, शहर संपर्क प्रमुख अशोक शिरोळे, नगरसेविका सुनीता वाडेकर, हिमाली कांबळे तसेच पक्षाचे अनेक कार्यकर्ते उपस्थित होते.

उपमहापौर डॉ. सिद्धार्थ धेंडे म्हणाले की, रामदास आठवले यांच्यावर झालेला हल्ला निंदनीय असून त्याचा पक्षाच्या वतीने आम्ही निषेध करतो. रामदास आठवले हे सामान्य जनतेच्या अडचणी सोडवणारे नेते आहेत. त्यांच्या वाढत्या लोकप्रियतेमुळेच त्यांच्यावर हल्ला झाला आहे. त्यामुळे या प्रकरणातील हल्लेखोरांवर लवकरात लवकर कठोर कारवाई करावी अशी मागणीही धेंडे यांनी यावेळी केली. तर ‘मी लोकप्रिय नेता असल्याने कदाचित कोणीतरी एखाद्या मुद्द्यावरुन नाराज असेल त्यामुळे माझ्यावर हल्ला केला असावा, अशी प्रतिक्रिया रामदास आठवले यांनी दिली. तर याप्रकरणी मुख्यमंत्र्यांना भेटणार असल्याचेही त्यांनी सांगितले.

अंबरनाथ येथील नेताजी मैदानावर ‘रिपब्लिकन पार्टी ऑफ इंडिया’च्या वतीने संविधान गौरव महोत्सव आयोजित करण्यात आला होता. या कार्यक्रमाला आठवले उपस्थित होते. रात्री १० वाजता हा कार्यक्रम संपल्यानंतर ते व्यासपीठावरून खाली येत असताना प्रवीण गोसावी या तरुणाने त्यांच्या अंगावर धावून जात मारहाण केली. या प्रकारानंतर ‘आरपीआय’च्या कार्यकर्त्यांनी गोसावीला बेदम मारहाण करीत गंभीर जखमी केले. त्यानंतर पोलिसांनी त्याला ताब्यात घेत मध्यवर्ती रुग्णालयात दाखल केले.