व्हीएस न्युज-चालकाचे नियंत्रण सुटल्याने कार ग्रेड सेपरेटरमध्ये अडकून भीषण अपघात झाला. या अपघातात एका तरूणाचा जागीच मृत्यू झाला असून एकजण गंभीर जखमी झाला आहे. हा अपघात आज सकाळी पाचच्या सुमारास पिंपरी ग्रेडसेपरेटर येथे झाला.

शिवम जाधव (वय 20 राहणार - खराळवाडी ) असे अपघातात मृत्यू झालेल्या चालक तरुणाचे नाव आहे. तर हृषीकेश पवार गंभीर जखमी झाला असून त्याला जवळच्या रुग्णालयात उपचारासाठी दाखल करण्यात आले आहे. अग्निशमन विभागाने दिलेल्या माहितीनुसार, आज सकाळी पाचच्या सुमारास मुंबईकडून पुण्याच्या दिशेने एक मारुती एस एक्स 4 (एम एच 04 / ए डी 8461) कार भरधाव वेगात जात होती. कार पिंपरी ग्रेडसेपरेजटजवळ आली असता, चालकाचे कारवरील नियंत्रण सुटले. त्यामुळे कार रस्त्याच्या दुभाजकावरील खांबाला धडकली. कार भरधाव वेगात आसल्याने दुभाजकावरून सुमारे 500 मीटर घसरत गेली. या अपघातामध्ये चालकाचा जागीच मृत्यू झाला. तर त्याच्यासोबत असलेला हृषीकेश पवार गंभीर जखमी झाला.

अग्निशमन विभागाला याबाबत माहिती मिळताच संत तुकाराम नगर अग्निशमन विभागाचे जवान तात्काळ घटनास्थळी दाखल झाले. गाडी कापून कारमध्ये अडकलेल्या दोघांना बाहेर काढण्यात आले. जखमीला जवळच्या रुग्णालयात उपचारासाठी दाखल करण्यात आले आहे.

व्हीएस न्यूज - जागतिक कामगार दिन व महाराष्ट्र दिनाचे औचित्य साधून पाणी फाऊंडेशने “चला गावाकडे” हा उपक्रम हाती घेतला आहे. या दिवशी महाश्रमदान दिन म्हणून साजरा करण्यात आला. या आवाहनाला साथ देत पिंपळे सौदागर येथील उन्नती सोशल फाऊंडेशनच्या सुमारे २०० सदस्यांनी पुरंदर तालुक्यातील पानवडी गावात श्रमदान केले. या स्पर्धेत उन्नती सोशल फाऊंडेशनला प्रथम क्रमांक मिळाला.

राज्यात पाण्याचे संकट मोठ्या प्रमाणात असल्याने राज्यातील शेतकरी आत्महत्या करीत आहे. यावर मात करण्यासाठी पाणी फाऊंडेशने मागील अनेक वर्षांपासून राज्यातील खेड्यापाड्यात श्रमदानातून जमिनीत पाणी जिरविण्यासाठी शेतात, माळावर सोर्स खडे तयार केले जात आहेत. जेणे करून जमिनीतील पाण्याची पातळी वाढण्यास मदत होईल. यासाठी पाणी फाऊंडेशन दिवसरात्र काम करीत आहे. याला नागरिकही चांगला प्रतिसाद देत आहेत. याच उपक्रमाचा एक भाग म्हणून जागतिक कामगार दिनानिमित्त व महाराष्ट्र दिनानिमित्त एका अनोख्या प्रकारचा उपक्रम राबविण्यात आला. “चला गावाकडे”

अशी हाक देताच राज्यातील अनेक गावांत या दिवशी लाखो नागरिकांनी सहभाग नोंदविला. शेतकर्याप्रती आपले योगदान दिले. अनेक गावांत स्पर्धा घेण्यात आल्या ज्या टीमने चांगले व जास्त काम केले, अशा टीमला पुरस्कार देऊन गौरविण्यात आले.

पुरंदर तालुक्यातील पानवडी गावात ठिकठिकाणच्या १८ गटातून सुमारे ६०० नागरिकांनी सहभाग घेतला होता. यावेळी गावकार्यानी कामाची पाहणी करून स्पर्धेचे बक्षिस जाहीर केले. यावेळी प्रथम, द्वितीय व तृतीय क्रमांक जाहीर करण्यात आले. प्रथम क्रमांक पिंपळे सौदागर येथील उन्नती सोशल फाऊंडेशनला मिळाला. संस्थापक संजय भिसे, अध्यक्षा कुंदा भिसे यांना पानवडीचे सरपंच सुषमा भिसे व पुरंदर पंचायत समिती सदस्य नलिनी लोळे यांच्या हस्ते पारितोषिक देण्यात आले.

यावेळी उपसरपंच संदीप भिसे, ग्रामपंचायत सदस्य अनिता लोळे, मंगल दिवार, निवृत्ती लोळे, सुरेखा लोळे, रामदास भिसे, माजी सरपंच हरिभाऊ लोळे, सामाजिक कार्यकर्ते ज्ञानदेव भिसे, अनिल भिसे, आबा लोळे, अमोल लोळे, रमेश दिवार यांच्यासह ग्रामस्त व महाश्रमदानासाठी आलेले नागरिक, योगा हास्य क्लब पिंपळे सौदागर सदस्य व उन्नतीचे सदस्य मोठ्या प्रमाणात उपस्थित होते.

समाजासाठी बांधिलकी आपण ज्या समाजात रहातो त्या समाजाचे आपण काहीतरी देणे लागतो. ही भावना सध्या अनेकांच्या मनात जागृत होत आहे. पाणी फाऊंडेशने एक दिवस महाश्रमदान अशी हाक देताच अगदी लहानांपासून ते जेष्ठांपर्यंत सर्वांनीच उस्फूर्तपणे सहभाग नोंदविला. प्रत्येकांनी जमेल तेवढे श्रमदान केले, त्यामुळे समाजातील शेतकऱ्याबद्दलच्या भावना जागृत होत आहे. आणि सामाजिक बांधिलकी काय आहे याची जाणीव होत आहे.

व्हीएस न्यूज - स्वर्गीय लोकनेते प्रमोद महाजन यांच्या १२ व्या पुण्यतिथी निमित्त पिंपरी चिंचवड शहर भाजपातर्फे अभिवादन करण्यात आले. शहराध्यक्ष आमदार लक्ष्मण जगताप यांच्या हस्ते प्रमोद महाजन यांच्या प्रतिमेचे पुजन करत पुष्पहार अर्पण करण्यात आले.

यावेळी आमदार जगताप म्हणाले, दिवंगत लोकनेते प्रमोद महाजन हे सर्वसामान्य कार्यकर्त्याला पाठबळ देऊन पक्षाला तळागाळापर्यंत पोहोचवण्याचे काम करणारे जनसेवक होते. राजनिती तज्ञ, डावा हात वर करून भाषण करायची त्यांची लकब वेगळीच होती. नुसती विरोधकांवर टीका करणारी भाषणे न करता, विरोधकांच्या मर्मावर घाला घालणारी आणि लोकांना सोप्या भाषेत स्वतःचे म्हणणे पटवून देणारी भाषणे देणारा नेता म्हणजे प्रमोद महाजन होते. मुरली मनोहर जोशी यांची एकता यात्रा त्याचे प्रमुख प्रमोद महाजन होते. अटल बिहारी वाजपेयी यांनी प्रमोद महाजन यांच्या विषयी सांगितले होते की, “जरी प्रमोद महाजन बीजेपीमध्ये नसते तरीही ते, भारतातील असंख्य सामान्य युवकांना प्रेरणास्थान राहिले असते.” अशा लोकनेत्याच्या पुण्यतिथीनिमित्त विनम्र अभिवादन.

यावेळी सत्तारूढ पक्षनेते एकनाथ पवार, शहर प्रवक्ते अमोल थोरात, नगरसेवक शत्रुघ्न काटे, नामदेव ढाके, शितल शिंदे, प्रियांका बारसे, प्रमोद निसळ, चेतन घुले, राजू सावंत, विजय लांडे, कैलास कुंजीर, प्रदिप बेंद्रे, नंदू भोगले, संजीवनी पांडे, सुरेश वाडकर, रामकृष्ण राणे यांच्यासह अनेक पदाधिकारी व कार्यकर्ते उपस्थितीत होते.

व्हीएस न्यूज - पाण्याची टाकी साफ करत असताना विजेचा धक्का बसल्याने एका कामगाराचा मृत्यू झाला असून एक जण जखमी झाला आहे. ही घटना आज (शुक्रवारी) सकाळी दहाच्या सुमारास चिखली घरकुल प्रकल्पाजवळ घडली.

अमर खिलारे (वय २५. रा. थेरगाव) असे मृत्यू झालेल्या तरुणाचे नाव आहे. तर, सिद्धार्थ काळे (वय – ३०) हा जखमी झाला असून त्याला उपचारासाठी रुग्णालयात दाखल करण्यात आले आहे.

मिळालेल्या प्राथमिक माहितीनुसार, चिखलीतील घरकुल प्रकल्पाच्या मागे आशीर्वाद या नावाने सोसायटी आहे. अमर आणि सिद्धार्थ शुक्रवारी सकाळी सोसायटीतील पाण्याची टाकी मशिनच्या सहाय्याने साफ करत होते. त्यावेळी अचानक विजेचा धक्का अमर आणि सिद्धार्थ या दोघांना बसला. तसेच वीज प्रवाह पाण्यात उतरला. दोघेही टाकीत पडले. त्यात अमर याचा जागीच मृत्यू झाला आहे. तर, सिद्धार्थ गंभीर जखमी झाला असून त्याला उपचारासाठी पिंपरीतील यशवंतराव चव्हाण स्मृती (वायसीएम) रुग्णालयात दाखल करण्यात आले. निगडी पोलीस घटनास्थळी दाखल झाले असून तपास सुरु आहे.

व्हीएस न्यूज - फेसबुक किंवा व्हॉट्‌सऍपवरील पोस्टला लाईक, शेअरिंग करताना अथवा त्यावर कमेंट करताना घटनेचे गांभीर्य बाळगणे आवश्‍यक असते. त्यावर विचारपूर्वक प्रतिक्रिया देणे अपेक्षित असते. मात्र, अलीकडच्या काळात नेमके याच बाबीकडे दुर्लक्ष होत असल्याचे दिसून येत आहे. या माध्यमांचे चांगले-वाईट असे दोन्ही परिणाम दिसत असले तरीही सकारात्मक उपयोग अधिक होत आहे, असे मत प्रसार माध्यमातील जाणकार शेफाली वैद्य यांनी प्राधिकरण येथे व्यक्त केले .

निगडीतील स्वातंत्र्यवीर सावरकर मंडळाच्या वतीने दरवर्षीप्रमाणे १ ते ५ मे या कालावधीत ३४ व्या छत्रपती शिवाजी व्याख्यानमालेचे आयोजन करण्यात आले आहे. या व्याख्यानमालेचे तिसरे पुष्प “सोशल मीडिया-संधी व आव्हाने” या विषयावर त्या बोलत होत्या. यावेळी पिंपरी चिंचवड महापालिकेच्या उपमहापौर शैलजा मोरे, इंद्रायणी बँकेच्या संचालिका सुवर्णा झोळ, विनीता श्रीखंडे, अॅड. पद्मजा शिंदे, विनिता पाचरने, मिलिंद देशपांडे, सावरकर मंडळाचे अध्यक्ष एस.बी.पाटील, उपाध्यक्ष सदाशिव रिकामे, कार्याध्यक्ष विनोद बंन्सल, सचिव भास्कर रिकामे आदी उपस्थित होते.

वैद्य पुढे म्हणाल्या की, ट्‌विटरच्या माध्यमातूनही आपल्या भावनांना वाट करून देण्याचा मार्ग सोशल मीडियात उपलब्ध झालेला आहे. देश-विदेशातील सेलिब्रिटी, पंतप्रधान,मुख्यमंत्री आणि विविध खात्यांचे मंत्री किंवा उच्चपदस्थ व्यक्ती ट्‌विट करून आपल्या भूमिका स्पष्ट करतात. ट्‌विटरवर आलेल्या ट्टिटला रिट्विट करून त्याचे उत्तर अथवा प्रतिक्रियाही देण्याची व्यवस्था यात आहे. ट्‌विटरच्या माध्यमाने आलेल्या प्रतिक्रियेला अलीकडच्या काळात अधिक महत्व निर्माण झालेले आहे. त्यामुळे अनेक वेळा तात्काळ मदत उपलब्ध होऊन पुढील दुर्घटना टाळण्यास मदत होते. हे अलीकडच्या काळात दिसून येत आहे. ट्‌विटरवर फोटो, व्हीडीओ क्‍लिप टाकण्याचीही व्यवस्था असल्याने फेसबुक,व्हॉट्‌सऍपप्रमाणे हेही अत्यंत लोकप्रिय माध्यम झालेले आहे.

हल्ली जगात कुठेही घडलेले अपघात, घातपात, हल्ले, बॉम्बस्फोट अशा कोणत्याही दुर्घटनांचं वृत्त त्या घडल्याच्या काही क्षणांमध्ये सोशल मीडियावर येतं. ही बातमी कोण्या वार्ताहरानं केलेली आणि संपादकानं तपासून जबाबदारीनं दिलेली असतेच असं नाही. बहुसंख्य वेळा त्या घटनेमध्ये असलेल्या किंवा प्रत्यक्ष पाहणाऱ्यांनी सोशल मीडियावर पोस्ट केल्यामुळे ही बातमी पसरते. घटना अनुभवणारे किंवा प्रत्यक्ष पहाणारे त्यांना दिसणाऱ्या गोष्टी किंवा घटना पोस्ट करत राहतात. नेमकं काय घडत आहे आणि ते का घडत आहे याचा सर्वंकष विचार ते त्या क्षणी करू शकत असतातच असं नाही. त्यामुळे कुठेतरी काहीतरी भीषण घडलं आहे, घडत आहे हे सोशल मीडियावर लगेच पसरतं. परंतू त्यामुळे देशाची प्रतिमा मलीन होते. पण नेमकं काय घडलं आणि ते का हे समजण्यासाठी मात्र अनेक तुकड्यांमधली माहिती एकत्र जोडून पाहावी लागते किंवा दुसऱ्या दिवशीपर्यंत वाट पाहून एखाद्या जबाबदार वर्तमानपत्रात आलेलं वृत्तांकन वाचावं लागतं.

तंत्रज्ञान हे चांगलेच असते पण त्याचा वापर चांगल्या गोष्टीसाठी केला. तर चांगले ठरते आणि त्याचा चुकीचा वापर केला. तर ते घातक ठरते. प्रत्येक चांगल्या गोष्टींसोबत वाईटही येत असते. त्यामुळे सोशल मीडियाचा नीट वापर न करता कधी कधी लोकांच्या भावना भडकावण्यासाठीही केला जातो. याची अनेक उदाहरणे आपण नेहमी पाहत असतो. या अप्रत्यक्ष जगात वावरताना लांबची माणसे जवळ करण्याच्या प्रयत्नात आपण आपली जवळची माणसे लांब करत चाललो आहोत. हेही तितकेच खरे आहे. मात्र असे असले तरीही,सोशल मीडियाचा खरा अर्थ आहे, तो विधायक घटनांच्या बाबतीत शेअरिंग करणे होय.

अनुजा वनपाळ यांनी प्रास्ताविक केले. शिल्पा बिबीकर यांनी सूत्रसंचालन केले. शैलजा सांगळे यांनी आभार मानले.

व्हीएस न्यूज - ज्येष्ठ नाट्यदिग्दर्शक दिलीप कोल्हटकर यांचे शुक्रवारी सकाळी पुण्यात निधन झाले. ते ७१ वर्षांचे होते. पुण्यातील दीनानाथ रुग्णालयात दीर्घ आजाराने त्यांचे निधन झाले. त्यांची ‘कवडी चुंबक’, ‘राजाचा खेळ’, ‘मोरूची मावशी’, ‘उघडले स्वर्गाचे दार’ ही नाटके गाजली होती.

दर्जेदार नाटकांनी मराठी नाट्यसृष्टीला नव्या उंचीवर नेणारे ज्येष्ठ नाट्दिग्दर्शक दिलीप कोल्हटकर हे गेल्या काही दिवसांपासून आजारी होते. त्यांच्यावर पुण्यातील दिनानाथ रुग्णालयात उपचार सुरु होते. शुक्रवारी सकाळी त्यांनी रुग्णालयात अखेरचा श्वास घेतला. दिलीप कोल्हटकर यांचा मुलगा अमेरिकेवरुन रात्री उशिरापर्यंत पुण्यात येणार आहे. शनिवारी कोल्हटकर यांच्या पार्थिवावर अंत्यसंस्कार केले जातील, अशी माहिती त्यांच्या निकटवर्तीयांनी दिली.

मराठी रंगभूमीवर करड्या शिस्तीचे दिग्दर्शक म्हणून ते ओळखले जात होते. शेजारी शेजारी आणि ताईच्या बांगड्या या मराठी चित्रपटांचे दिग्दर्शन त्यांनी केले. रंगभूमीवर कवडी चुंबक, राजाचा खेळ, मोरुची मावशी, बिघडले स्वर्गाचे दार ही त्यांची नाटके प्रेक्षकांना भावली होती. मराठी रंगभूमीवर ठसा उमटवणाऱ्या दिलीप कोल्हटकर यांच्या निधनावर हळहळ व्यक्त होत आहे.

व्हीएस न्यूज - पुण्यातील मार्केटयार्ड येथे आयोजित करण्यात आलेल्या कृषी आंबा महोत्सवाला भीषण आग लागली. या दुर्घटनेत सर्व स्टॉल्स जळून खाक झाले आहेत. या आगीचे नेमके कारण समजू शकलेले नाही.

अग्निशामक दलाच्या आधिकाऱ्यांनी दिलेल्या माहितीनुसार मार्केटयार्ड येथे आंबा महोत्सवाचे आयोजन करण्यात आले होते. या महोत्सवामध्ये 50 पेक्षा अधिक स्टॉल्स होते. त्यामुळे महोत्सवात मोठ्या प्रमाणात आंब्याच्या लाकडी पेट्या आणि टोपल्याची संख्या मोठ्या प्रमाणावर होती.

या ठिकाणी साडेबाराच्या सुमारास अचानक आग लागण्याची घटना घडली. लाकडी पेट्या, टोपल्या आणि गवतामुळे मोठ्या प्रमाणात असल्याने काही क्षणात सर्व स्टॉल्स आगीमध्ये जळून खाक झाले आहेत. या आगीचे नेमके कारण समजू शकले नसल्याचे त्यांनी सांगितले. चार अग्निशामक गाडीच्या मदतीने आगीवर नियंत्रण मिळवण्यात आले असल्याचे त्यांनी सांगितले.

व्हीएस न्युज - पिंपरी-चिंचवड येथील अजमेरा कॉलनी च्या परिसरात असलेल्या नाना-नानी पार्क समोर रस्त्याचे खोदकाम सुरू आहे. सदरचे खोदकाम हे जिओ कंपनीने ठेकेदाराला दिले आहे. सदरच्या खोदकामामुळे वाहनांची वर्दळ असलेल्या या मार्गावर वाहतूक कोंडी होत आहे. जिओ कंपनीचे खोदकाम हे नियोजनबद्ध पद्धतीचे नसून बेशिस्त पद्धतीने पार पाडण्यात येत आहे स्थानिक नागरीकांचे म्हणने आहे.

व्हीएस न्यूज - केंद्रात व राज्यात भाजपा सेनेचे सरकार येऊन चार वर्षे झाली. तर पिंपरी चिंचवड मनपात भाजपाला एक वर्ष झाले. एक वर्षापुर्वी भ्रष्टाचाराच्या मुद्यांवर आरोप करणारे भाजपा सेनेच्या पदाधिका-यांनी नागरिकांच्या डोळ्यात धुळफेक करीत बहुमताच्या जोरावर ‘वेस्ट टू एनर्जी’ सारखी कोट्यावधी रुपयांची भ्रष्टाचाराची कामे मंजूर करुन घेतली. त्यामुळे मतदारांमध्ये ‘वेस्ट ऑफ वोट’ची भावना निर्माण झाली आहे. अशी टिका पिंपरी चिंचवड शहर जिल्हा कॉंग्रेसचे अध्यक्ष सचिन साठे यांनी केली.

पिंपरी चिंचवड मनपाच्या मागील सर्वसाधारण सभेत मोशी कचरा डेपो येथे उभारण्यात येणा-या ‘वेस्ट टू एनर्जी’ प्रकल्पाची निविदा भाजपाने बहुमताच्या जोरावर मंजूर करुन घेतली. त्यानंतर भाजपाच्या लोकप्रतिनिधींनी व शिवसेनेच्या दोन्ही खासदारांनी शहर प्रमुखांसमवेत पत्रकार परिषद घेऊन हा प्रकल्प ‘वेस्ट टू मनी’ असल्याचा आरोप केला. यावर सचिन साठे यांनी म्हटले आहे की, पिंपरी चिंचवड मनपामध्ये भ्रष्टाचाराच्या विविध प्रकरणांवरुन शिवसेना भाजपमध्ये सुरु असणारा ‘कलगीतुरा’ म्हणजे ‘वेस्ट ऑफ वोट’ अशी मतदारांची भावना झाली आहे. शिवसेना मनपामध्ये विरोध केल्याचे चित्र निर्माण करते व प्रत्येक वेळी आंदोलन तीव्र करण्याचा इशारा देते. देशात, राज्यात हे सत्तेचे भागीदार,मनपात टक्केवारीत हिस्सेदार. आता शिवसेनेने आंदोलन करायचेच असेल तर भाजपालाही बरोबर घेऊन पाकिस्तानच्या पंतप्रधानांसमोरच जाऊन आंदोलन केले तरच कदाचित त्यांना न्याय मिळण्याची शक्यता आहे. शिवसेनेच्या खासदारांना व नगरसेवकांना खरोखरच हा प्रकल्प रद्द व्हावा असे वाटत असेल तर त्यांनी ‘नाणार’ प्रकल्पाप्रमाणे ‘वेस्ट टू एनर्जी’प्रकल्प देखील पर्यावरण मंत्र्यांकडून रद्द करुन आणावा व नागरिकांचा विश्वास संपादन करावा.

65 वर्षांच्या इतिहासात कॉंग्रेस सरकारच्या विरोधात कॉंग्रेसचेच कार्यकर्ते सत्तेसाठी उपोषणास बसले असे कधी घडले नाही. प्रभाग समित्यांवर आपली वर्णी लागली नाही म्हणून भाजपाच्या निष्ठावंतांनी केलेले आमरण उपोषण अवघ्या बारा तासातच गुंडाळले. तत्वांचे आणि शिस्तिचे गोडवे गाणा-या व ‘पार्टी विथ डिफरन्स’ असे बिरुद मिरविणारे सत्तेसाठी कोणत्या थराला जातील हे त्यांनी अवघ्या एक वर्षात दाखवून दिले आहे. लोकसभा, विधानसभा आणि मनपा निवडणूकीपूर्वी मतदारांना दिलेले एकही आश्वासन भाजप सेनेला पुर्ण करता आले नाही. हे अपयश झाकण्यासाठी भाजप सेनेने केलेला हा ‘शो’ आहे. अशीही टिका साठे यांनी केली आहे.

आंतरराष्ट्रीय बाजारात घसरलेले पतमानांकन, महागाईचा उसळलेला आगडोंब, बेरोजगारीत झालेली वाढ, शेतक-यांच्या आत्महत्या, देशभर कायदा सुव्यवस्थेचा उडालेला बोजवारा आणि शहरातील नागरिकांना भेडसावणा-या शास्तीकराच्या समस्या, अनधिकृत बांधकाम, रेझ झोन, बीआरटी, चौविसतास मुबलक स्वच्छ पाणीपुरवठा या समस्या अद्याप सुटल्या नाहीत. त्यामुळे स्थानिक मतदारांसह देशभरातील मतदारांमध्ये आता ‘वेस्ट ऑफ वोट’ ची भावना निर्माण झाली असल्याचीही टिका साठे यांनी केली आहे.