VS News

Breaking News

देशातील ५० लाख चालकांना संघटीत करण्याचा लोड एक्सवनचा संकल्प

व्हीएस न्यूज - माल वाहतूक क्षेत्राचे देश विकासात मोठे योगदान आहे. वाहन चालक हा देशाच्या विकासाचा कणा समजला जातो. कुटुंबाचा त्याग करणारा चालक आजही दुर्लक्षित व असुरक्षित राहिला आहे. यामुळे माल वाहतूक क्षेत्राला मरगळ आलेली आहे. ही आलेली मरगळ दूर करण्यासाठी आणि चालकांच्या उन्नतीसाठी चिंचवड येथील लोड एक्सवन या संस्थेने देशभरातील ४० ते ५० लाख वाहन मालक-चालक संघटीत करून त्यांना व्यवसाय उपलब्ध करून देण्याचा संकल्प केला आहे.

लोडएक्सवन संस्थेने ट्रक चालक मालकांसाठी “अच्छा दाम, अच्छा काम, अच्छा नाम” ही कार्यप्रणाली विकसित केली आहे. ही कार्यप्रणाली जगात प्रथमच आपण विकसित केल्याचा दावा लोडएक्स वनचे संचालक मनोज बक्षी, आशिष राठी, परिन पारेख यांनी पत्रकार परिषदेत केला.

यावेळी बोलताना मनोज बक्षी म्हणाले की, आज देशात अडीच टन क्षमतेच्या वरचे ९५ लाख ट्रक आहेत. यापैकी १ ते १० ट्रक असलेले ९४ टक्के ट्रकर्स आहेत. यामध्ये ४०-५० लाख तरुण चालक आहेत. छोटे वाहतूक व्यावसायिक कर्जे काढून ट्रक खरेदी करतात, ट्रकर्स व ग्राहक यांच्यापेक्षा दलाल मोठे झाले.कमी ट्रक असलेल्या ट्रकर्सना आज व्यवसाय मिळत नाही. कारण त्यांना कोणत्या मार्गावर भाडे असेल याची माहिती नसणे, रेट, व्यवसायिक भांडवला अभावी माल वाहतूक व्यवसाय मेटाकुटीला आला.

पुढे ते म्हणाले, भविष्यात सुमारे ७० टक्के माल वाहतूकीचा व्यवसाय आम्ही मिळवून देणार असून यासाठी देशातील बड्या २८ संस्थांशी संबंध प्रस्थापित केले आहे. आम्ही दूध, मद्ययुक्त उत्पादने, वाळू, पाणी या क्षेत्रात आम्ही सेवा देणार नाही. शेतीच्या माल वाहतूकीसाठी अधिक प्राधान्य देणार आहोत. ट्रकर्सला माल वाहतूकीचे काम देणाऱ्या ३ हजार कंपन्या आमच्या संपर्कात आहेत. सर्व चालक मालकांना एकत्र जोडण्यासाठी एक कृत्रिम बुद्धिमत्ता (आर्टिफिशियल इंटेलिजन्स) या अत्याधुनिक तंत्रज्ञानाच्या आधारावर एक ही कार्यप्रणाली आहे.संघटनात्मक कार्य पद्धत, तंत्रज्ञानाचा उपयोग, पर्यावरणपूरक हे या कार्यप्रणालीचे वैशिष्ट्ये आहे.

सध्या लोडएक्स वन सोबत एका महिन्यात सुमारे २७ हजार ट्रक जोडले गेलेत. यामुळे चालकांना रोजगारातून स्वावलंबी जीवन जगता येईल. जीवनमान उंचावेल, बेरोजगारी कमी होईल. चालकांना समजात एक प्रतिष्ठा मिळेल. चालकांना अत्यंल्प दरात निवास व भोजन, सुरक्षा व प्रथमोपचार, तपासणी या सुविधा उपलब्ध करुन देण्यासाठी देशभरात ८४ निर्मोह शेल्टर्सची उभारणी केली जाणार आहे. या उपक्रमातून डिजिटल इंडिया,पारदर्शक कारभार, स्वच्छ भारत, स्टार्ट अप इंडिया हे धोरण साध्य होणार आहे. अधिक माहितीसाठी –www.loadxone.net या संकेतस्थळाला भेट द्या असे आवाहन त्यांनी यावेळी केले.

पिंपरी महापालिकेच्या ५ हजार २३५ कोटींचा अर्थसंकल्प सादर

व्हीएस न्यूज - पिंपरी चिंचवड महापालिकेच्या २०१८-१९ या आर्थिक वर्षाचा ५ हजार २३५ कोटी २३ लाख रुपयांचा केंद्र सरकारच्या निधीसह अर्थसंकल्प स्थायी समिती सभेपुढे सादर केला. महापालिकेचे मुख्य लेखाधिकारी राजेश लांडे यांनी हा अर्थसंकल्प स्थायी सभापती सीमा सावळे यांच्याकडे सादर केला. यावेळी महापालिका आयुक्त श्रावण हर्डीकर, स्थायी समिती सदस्य उपस्थित होते.

पिंपरी चिंचवड महापालिकेचे हे ३६ वे अंदाजपत्रक आहे. २०१७-१८ या आर्थिक वर्षात ५८५ कोेटी ७२ लाख (शिलकेसह) रक्कम जमा होईल. तसेच २०१८-१९ या वर्षात ३५०६ कोटी ६२ लाख उत्पन्न अपेक्षित आहे. त्याचप्रमाणे केंद्र शासनाच्या पुरस्कृत योजनांच्या निधीसह ५ हजार २३५ कोटी २३ लाखांचा अर्थसंकल्प सादर करण्यात आला.

अदांजपत्रकातील खास वैशिष्ट्ये

* महापालिकेच्या स्थापत्य विभागाच्या विकासकामांसाठी ७३७ कोटी ५४ लाखांची भरीव तरतूद करण्यात आलीय.

* शहरी गरिबांसाठी ९२८ कोटी ८९ लाखांची तरतूद

* जेंडर बजेट-महिलांच्या विविध योजनांसाठी ३३ कोटींची भरीव तरतूद

* महापौर विकास निधीसाठी ५ कोटींची तरतूद

* अपंग कल्याणकारी योजना २० कोटी

* मेट्रो विकास आराखड्यासाठी ५० कोटी तरतूद

* पाणी पुरवठा विशेषनिधी २३ कोटी

* पीएमपीएमएल करीता १६४ कोटी ५६ लाख तरतूद

* स्मार्ट सिटीसाठी १०० कोटी तरतूद

* अमृत योजनेसाठी ५९ कोटी ६३ लाख तरतूद

* पंतप्रधान आवास योजना ९२ कोटी ४५ लाख तरतूद

* स्वच्छ भारत मिशनसाठी २८ कोटी तरतूद

* नगररचना भू-संपादनाकरिता १४० कोटी तरतूद

भक्ती शक्ती उद्यानातील राष्ट्रध्वजाची दुरूस्ती

व्हीएस न्यूज - येथील भक्ती शक्ती उद्यानात भारताचा सर्वोच्च राष्ट्रध्वज दुरस्तीसाठी पाठविण्यात येणार असल्याची माहिती महापालिकेच्या वतीने देण्यात आली आहे.

देशातील सर्वोच्च राष्ट्रध्वज 26 जानेवारी रोजी निगडीत उभारण्यात आला आहे. या ध्वजाची देखरेख मनपाच्या सुरक्षा विभागामार्फत करण्यात येते. बुधवारी राष्ट्रध्वजाची देखरेखीच्या दृष्टीने खाली उतरवुन तपासणी केली. त्याचे धागे ओडले गेल्याचे व शिलाई उसवल्याचे लक्षात आले आहे. त्यामुळे ध्वज बदलण्यात येणार आहे, व सध्या वापरात असलेला ध्वज दुरुस्तीसाठी पाठविण्यात येणार आहे.
या दरम्यान राष्ट्रध्वज स्तंभातील तारा (वायर रोपची) व
इतर यंत्रणेची तपासणी करण्यात येणार असल्याने पुढील 2 दिवसामध्ये ध्वजारोहण करण्यात येणार आहे. ही प्रक्रिया अशा प्रकारच्या ध्वजांच्या बाबतीत वेळोवेळी करावी लागत असते. देशातील सर्व दिवस-रात्र फडकणाऱ्या ध्वजाबाबतीत अशाप्रकारे कार्यवाही करण्यात येत असते.

तळेगाव हद्दीत ऑनलाईन 7/ 12 चे काम अंतिम टप्यात

व्हीएस न्यूज - महाराष्ट्र शासनाच्या बहुउद्देशीय प्रकल्प इ-चावडी अंतर्गत येणारा इ फेरफार प्रकल्पासाठी हस्तलिखित सात बाऱ्यानुसार तळेगाव हद्दीतील आँनलाईन करण्याचे काम अंतिम टप्यात आले आहे. त्यामधील चुका दुरुस्त करण्याची वेळ वाढून देण्यात आल्याची माहिती तलाठी एस. बी.जाधव यांनी सांगितली.
राज्यशासनाच्या या प्रकल्प अंतर्गत 7/12 उतारे आँनलाईन करण्याचे काम शासनाने हाती घेतले होते. परंतु आँनलाईन करताना काही 7/12 वर भोगवटादाराची नावे, भोगावट्यांमधील क्षेत्र, 7/12 उतारे नावआले पण आँनलाईन नाही, भोगवटादार वर्ग झाला, पिक पाहणी व अन्य काही त्रुटी आढळल्यास त्यादुरुस्त करून घेण्याची मुदत शासनाने दि. 21 फेब्रुवारी पर्यंत वाढविली आहे.
याबाबत सात बाऱ्यावर दुरुस्ती करण्यासाठी संबधितांनी तलाठी कार्यालयास संपर्क करून दुरुस्तीसाठी अर्ज दाखल करावा, असे आवाहन एस.बी.जाधव यांनी केले आहे.

महाशिवरात्रीनिमित्त 1 हजार 101 नारळांनी साकारले शिव लिंग

व्हीएस न्यूज - महाशिवरात्रीनिमित्त प्रजापिता ब्रह्माकुमारी ईश्वरी विश्व विद्यालयाच्या हिंजवडी सेवा केंद्रातर्फे म्हातोबा देवस्थानच्या प्रांगणात 1 हजार 101 नारळांनी 6 फुटी शिवलिंग साकारले होते.
यावेळी आध्यात्मिक चित्र प्रदर्शन, लेझर शोचेही आयोजन करण्यात आले होते. शिवलिंगाचे दर्शन घेण्यासाठी हजारो भाविकांनी गर्दी केली होती. या कार्यक्रमाचे आयोजन ब्रह्माकुमारी मंगल दिदी यांनी केले होते.
...Read More

सांगवीतील महेश मंडळला 'रक्तमित्र पुरस्कार'

व्हीएस न्यूज - सामाजिक कार्य करीत असताना कोणाचेही मन दुखवणार नाही, याची काळजी घ्यावी आणि त्यानुसार आपले कर्म असावे, असे उद्गगार आमदार राहुल कुल यांनी काढले.

दौंड येथे स्व. रोहीणी जाधव ट्रस्टच्या वतीने गेल्या 22 वर्षापासून नियमीत दरवर्षी देण्यात येणारे राज्य पातळीवरील विविध सामाजिक पुरस्कार प्रदान करण्यात आले. या प्रसंगी ऍड. असीम सरोदे, प्रेमसुख कटारिया, ट्रस्टचे अध्यक्ष रविंद्र जाधव उपस्थित होते.
रक्तदाते अथवा रक्त मिळवुन मदत करणारे तसेच रक्तदान शिबीर घेवून रक्त मिळवुन देणाऱ्या कार्यकर्त्यास देण्यात येणारा 'रक्तमित्र पुरस्कार' पिंपरी- चिंचवड येथील सांगवी परीसर महेश मंडळचे अध्यक्ष सत्यनरायण लोहीया यांना देण्यात आल्या. तर गेल्या 10 वर्षापेक्षा जास्त वेळा रक्तदान केल्याबद्दल राज्यस्तरीय रक्तदाता पुरस्कार जळगाव येथील राजेश यावलकर यांना बहाल करण्यात आला. तर एडस जनजागृती पुरस्कार मिरज येथील बारामतीचे आरटीओ अधिकारी अनिल शामराव वळीव यांना देण्यात आला. नंदुरबार जिल्हयातील तळोदे येथील विठ्ठल चंदु मगरे यांना निसर्ग पर्यावरण मित्र हा पुरस्कार देण्यात आला.
केंद्र सरकार आणि राज्य सरकार नैसर्गिक संपत्तीचा नाश करीत असून, मिडीया त्याला खतपणी घालत आहे, असे मत ऍड. असीम सरोदे यांनी व्यक्त केले. देशाची लोकशाही अबादीत राहण्यासाठी सर्वांनी निष्ठेने प्रयत्न करणे गरजेचे असल्याची अपेक्षाही ऍड. सरोदे यांनी यावेळी व्यक्त केली.
...Read More

पिंपरी चिंचवड अॅड. बार असो. तर्फे वार्षिक क्रीडा स्पर्धेचे आयोजन करण्यात आले

व्हीएस न्यूज - पिंपरी चिंचवड अॅड. बार असो. तर्फे ८ मार्च रोजी होणाऱ्या पिंपरी न्यायालयाच्या वर्धापन दिन निमित्त कॅरम, बुद्धिबळ ,लिंबुचामचा, रांगोळी स्पर्धा तसेच क्रिकेट स्पर्धा अशा विविध स्पर्धेचे आयोजन करण्यात आले आहे . या स्पर्धे मध्ये विजेत्या संघ व स्पर्धक यांना वर्धापन दिनी बक्षिसे वितरण करण्यात येणार आहे. या स्पर्धेचे उदघाटन पिंपरी अॅड. बार असो.चे अध्यक्ष अॅड राजेश पुणेकर ,अॅड मदनलाल छाजेड व अॅड. अनिल तेजवानी यांच्या हस्ते करण्यात आले. या वेळी अॅड. सुनील कड, अॅड. विजय शिंदे ,अॅड. कालिदास इंगळे, अॅड. सुजाता बिडकर,अॅड. अतिश लांडगे, अॅड. बाळकृष्ण रणपिसे,अॅड. योगेश थंबा, अॅड. सविता तोडकर, अॅड संजय दातिरपाटील, अॅड.शोभा कदम आदी मान्यवर उपस्तित होते.
...Read More

पीसीसीओईआरमध्ये आंतरराष्ट्रीय शिक्षक विकास परिषदेचे आयोजन

व्हिएस न्यूज - पिंपरी चिंचवड एज्युकेशन ट्रस्टच्या (पीसीईटी) पिंपरी चिंचवड अभियांत्रिकी महाविद्यालयात गुरुवारी व शुक्रवारी (दि. 15 व 16 फेब्रुवारी) आंतरराष्ट्रीय शिक्षक विकास परिषदेचे आयोजन करण्यात आले आहे. पीसीईटी आणि सावित्रीबाई फुले पुणे विद्यापीठाच्या संयुक्त विद्यमाने आयोजित केलेल्या या परिषदेत ‘माहिती संकलन शास्त्र आणि यांत्रिक बुध्दीमत्ता’ (Data Science and Machine Intelligence) या विषयावर ऑस्ट्रेलियातील एडिथ कोवन विदयापिठाच्या डॉ. लिसा आर्मस्ट्रॉंग, डॉ. अमिया त्रिपाठी, पीसीसीओईचे प्राचार्य डॉ. ए.एम.फुलंबरकर,पीसीसीओईच्या आयटी विभाग प्रमुख डॉ. स्वाती शिंदे,नांदेडचे डॉ. उदय कुलकर्णी आदी मार्गदर्शन करणार आहेत. सावित्रीबाई फुले पुणे विद्यापीठाच्या गुणवत्ता सुधार कार्यक्रमा अंतर्गत हा कार्यक्रम होणार आहे.

मोहन भागवतांवर देशद्रोहाचा गुन्हा दाखल करा.....संजोग वाघेरे

राष्ट्रवादी युवक कॉग्रेसच्या वतीने पिंपरीत भागवतांचा निषेध

व्हिएस न्युज - वेळप्रसंगी स्व:ताच्या जीवाची बाजी लावून देशवासीयांचे रक्षण करणा-या भारतीय सैन्याबाबत अनुद्‌गार काढणारे आरएस्‌एस्‌चे सरसंघचालक मोहन भागवत यांच्यावर देशद्रोहाचा गुन्हा दाखल करावा अन्यथा राष्ट्रवादी युवक कॉंग्रेस राज्यभर आणखी तीव्र आंदोलन करेल असा इशारा राष्ट्रवादी कॉंग्रेस पार्टीचे शहराध्यक्ष संजोग वाघेरे पाटील यांनी पिंपरीत दिला.

पिंपरी चिंचवड शहर (जिल्हा) राष्ट्रवादी युवक कॉंग्रेसचे अध्यक्ष विशाल वाकडकर यांच्या नेतृत्वाखाली मंगळवारी (दि. 13 फेब्रुवारी) पिंपरी (पुणे) येथील डॉ. बाबासाहेब आंबेडकर पुतळा चौकात भागवतांच्या वक्तव्याचा निषेध करण्यात आला. यावेळी राष्ट्रवादी शहराध्यक्ष संजोग वाघेरे पाटील, महिला अध्यक्षा वैशाली काळभोर, कार्याध्यक्ष प्रशांत शितोळे, नगरसेवक रोहित काटे, राजू बनसोडे, शिक्षण मंडळाचे माजी अध्यक्ष फझल शेख, शिक्षण मंडळ माजी सदस्य लता ओव्हाळ, युवती अध्यक्षा वर्षा जगताप, व्यापारी सेलचे अध्यक्ष प्रदिप गायकवाड, युवक प्रदेश संघटक विशाल काळभोर, लाला चिंचवडे, शहर युवक उपाध्यक्ष आलोक गायकवाड, हर्षवर्धन भोईर, मयुर जाधव, विशाल पवार, कुणाल थोपटे, मंगेश बजबळकर , शेखर काटे, निलेश निकाळजे, सरचिटणीस योगेश मोरे, सैफ खान, अब्दुल क्षिरसागर, साहीश कोकाटे, सनी ढाळे, कविता खराटे, पुष्पा शेळके, मनिषा गटकळ, रशिद सैय्यद, मनोज जाधव, रोझारीओ डिसुझा, दिपक गायकवाड, दिपक साकोरे, वंदना कांबळे, आशा शिंदे, निर्मला माने आदींसह राष्ट्रवादीचे कार्यकर्ते उपस्थित होते.

युवक अध्यक्ष विशाल वाकडकर निषेध व्यक्त करताना म्हणाले की, सैनिकांच्या जीवावर ‘सर्जिकल स्ट्राईक’ करायचा आणि त्याची वारेमाप प्रसिध्दी घ्यायची असे भाजपाचे प्रसिध्दी लोलूप नेते वागतात. जगभर भारतीय सैनिकांचा दबदबा आहे. अशा सैनिकांबाबत अनादर करणारे वक्तव्य करुन भागवतांनी सैनिकांचा व देशभरातील सव्वाशे कोटी जनतेचा अपमान केला आहे. भागवतांनी सैनिकांची व जनतेची जाहीर माफी मागावी नाहीतर त्यांच्यावर सरकारने देशद्रोहाचा गुन्हा दाखल करावा. अन्यथा राष्ट्रवादी युवक कॉग्रेस राज्यभर तीव्र आंदोलन करेल असे वाकडकर म्हणाले.

कार्याध्यक्ष प्रशांत शितोळे निषेध करताना म्हणाले की, सीमेवर जाऊन सैनिकांबरोबर फोटो काढून पंतप्रधान स्व:ताची प्रसिध्दी करुन घेतात. मनुवादी प्रवृत्तीचे सरसंघचालक मोहन भागवत सैनिकांचा अपमान करणारे वक्तव्य करतात. त्यांचा निषेध करावा तेवढा कमीच आहे. भागवतांवर देशद्रोहाचा गुन्हा दाखल करुन त्यांना अटक करावी अशी मागणी शितोळे यांनी केली आहे. यावेळी वैशाली काळभोर, वर्षा जगताप, लता ओव्हाळ, पुष्पा शेळके आदींनी निषेधाचे भाषण केले.

नायलॉन मांजा विक्री करणाऱ्या दोघांवर गुन्हा

व्हीएस न्यूज - पुणे येथे मांज्यामुळे एका महिलेचा मृत्यू झाला, तर पिंपरी-चिंचवड शहरात मांज्यामुळे दोन जण गंभीर जखमी झाले. पोलिसांनी मांजाविक्री करणाऱ्यांवर धडक कारवाई सुरू केली आहे. वाकड पोलिसांनी डांगे चौकातील दुकानातून एक हजार 215 रुपयांचा मांजा जप्त करून दुकान चालकावर गुन्हा दाखल करण्यात आला आहे.
डांगे चौकातील क्लासिक स्टेशनरी मालक रताराम रघुनाथराम सोळंकी (वय-37, रा. विशालनगर, वाकड) आणि चंपालाल रघुनाथ सोळंकी (वय-34) या दोघांविरुद्ध कारवाई करत गुन्हा दाखल करण्यात आला आहे.
बंदी असलेला पतंगाच्या नायलॉन मांज्यामुळे पुण्यातील सुवर्णा मुजुमदार या महिलेचा 11 फेब्रुवारी रोजी गंभीर जखमी होऊन मृत्यू झाला. तर जानेवारी महिन्यात काळेवाडीतील हमजा खान या दोन वर्षाच्या मूलाच्या पतंगाच्या मांज्यामुळे जबर जखम झाली होती. यामध्ये त्याच्या डोळ्याला तब्बल 32 टाके पडले आहेत. तर रंगनाथ बाळकृष्ण भुजबळ (रा. ज्योतिबा नगर काळेवाडी), गंभीर जखमी झाले होते. त्यामुळे बंदी असलेल्या माजा विक्री करणाऱ्या दुकानदारांवर कठोर कारवाई करण्याची मागणी जोर ध़रू लागली होती. याची गंभीर दखल घेत
वाकड पोलीसांनी मंगळवारी डांगे चौकातील क्लासिक स्टेशनरी या दुकानावर कारवाई करत एक हजार 215 रुपयांचा मांजा जप्त केला. दुकान चालकावर गुन्हा दाखल करण्यात आला आहे.
वाकड पोलीस अधिक तपास करत आहेत.

महिलेची गळफास घेऊन आत्महत्या

व्हीएस न्यूज - ब्युटी पार्लर चालविणाऱ्या महिलेने गळफास घेऊन आत्महत्या केल्याची घटना उघडकीस आली आहे. ही घटना मोशी प्राधिकरण सेक्टर नंबर सहा येथे सोमवारी सायंकाळी चारच्या सुमारास घडली.
रोहिणी राजेंद्र अष्टेकर (वय 35, रिद्धी-सिद्धी संस्कृती अपार्टमेंट, सेक्टर नं. 6, मोशी प्राधिकरण, पुणे) असे आत्महत्या केलेल्या महिलेचे नाव आहे.
पोलीसांनी दिलेल्या माहितीनुसार, रोहिणी अष्टेकर मोशी ब्युटी पार्लर चालवतात. त्यांचे पती राजेंद्र अष्टेकर एका खाजगी कंपनीत काम करतात. सोमवारी रोहिणी यांनी आपल्या राहत्या घरी गळफास घेऊन आत्महत्या केली. आत्महत्येचे नेमके कारण अद्याप समजू शकले नाही. पोलीस उपनिरीक्षक हेमंत कोकणी अधिक तपास करत आहेत.
...Read More

दोन सराईत वाहन चोरटे गजाआड; 13 गुन्हे उघडकीस

व्हीएस न्यूज - वाहन चोरी रोखण्यासाठी लावलेल्या सापळ्यात दोन सराईत चोरट्यांना गजाआड करण्यास एमआयडीसी पोलीसांना यश आले आहे. त्यांच्याकडून 13 दुचाकी व सहा मोबाईल जप्त करण्यात आले असून 13 गुन्हे उघडकीस आले आहेत.
अमोल रखमाजी खंडाळे (वय-34, रा. स्वराज गार्डन समोर, हिंद कॉलनी पिंपळे-सौदागर), राजेश ऊर्फ मुन्ना हरीचंद्र डोलारे (वय-28, रा. आनंदनगर, चिंचवड) असे अटक केलेल्या सराईत चोरट्यांची नावे आहेत.
तसेच संशयावरून ताब्यात घेतलेल्या एकाकडून एक घरफोडीचा गुन्हा उघडकीस आला आहे. सोनाजी विष्णु लगाडे (वय-31, रा. तळवडे, चव्हाणनगर, निगडी) असे अटक केलेल्या आरोपीचे नाव आहे.
त्याच्याकडून 1 सोन्याची चैन, 1 अंगठी असा 70 हजार रूपये किंमतीचा ऐवज जप्त करण्यात आला. तिन्ही आरोपींकडून 4 लाख 78 हजार 500 रूपयांचा ऐवज पोलीसांनी जप्त केला आहे. ही कारवाई सहाय्यक पोलीस आयुक्त सतीश पाटील यांच्या मार्गदर्शनाखाली एमआयडीसी पोलीस ठाण्याचे वरिष्ठ पोलीस निरीक्षक भिमराव शिंगाडे, तपास पथकातील पोलीस उपनिरीक्षक रावसाहेब बांबळे, फौजदार भालेराव आदींनी केली.

PIMPRI-CHINCHWAD WEATHER

.

ADDRESS
VS News, Khararwadi,
Pimpri-Chinchwad

CONTACTS
Email: vsnews24x7@gmail.com
Phone: +91 91724 53002