तळेगाव दाभाडे येथे रविवारी पोलीस पाटील परिक्षा

व्हीएस न्यूज - तळेगाव दाभाडे येथील इंद्रायणी महाविद्यालयात सकाळी पोलीस पाटील पदासाठी रविवारी (दि. 19) अकरा ते दुपारी साडेबारा या वेळेत परीक्षा घेण्यात येणार आहे. या पदासाठी अर्ज केलेल्या 808 पैकी 25उमेदवारांचे अर्ज छाननीमध्ये बाद ठरले आहेत. त्यानुसार पात्र उर्वरीत उमेदवारांची परीक्षा होणार आहे.

मावळ- मुळशी उप विभागीयमध्ये 271 रिक्‍त पदे भरण्याबाबत उपविभागीय अधिकारी सुभाष बागडे यांच्या कार्यालयाकडून जाहिरनामा प्रसिद्ध करण्यात आला होता. त्यानुसार मावळ तालुक्‍यातील 156 रिक्त पदासाठी तालुक्‍यातून808 उमेदवारांनी पोलीस पाटील पदासाठी अर्ज दाखल केले होते. यापैकी 25 उमेदवारांचे अर्ज छाननीमध्ये बाद ठरले आहेत. या परीक्षेसाठी तहसीलदार रणजित देसाई यांची केंद्रप्रमुख म्हणून नियुक्ती करण्यात आली आहे

नायब तहसीलदार सुनंदा भोसले पाटील यांची उपकेंद्र प्रमुख म्हणून नेमणूक करण्यात आली आहे. परीक्षेसाठी 7 पर्यवेक्षक व 44 समावेक्षकांची नेमणूक करण्यात आली आहे. पोलीस पाटील परीक्षेचे प्रवेशपत्र हे संबंधित कामगार तलाठी यांच्यामार्फत उमेदवारांना वितरित करण्यात आले आहेत. ज्या उमेदवारांना परीक्षा प्रवेशपत्र मिळाले नाहीत, अशा उमेदवारांनी तत्काळ तहसील कार्यालय मावळ किंवा उपविभागीय अधिकारी मावळ मुळशी उपविभाग पुणे यांच्या कार्यालयाशी संपर्क साधून प्रवेशपत्र प्राप्त करून घेण्याचे आवाहन उपविभागीय अधिकारी यांनी केले आहे.