गरीबांच्या मुलांना फीअभावी शाळेतून काढले जाते, तर अधिकारी गडगंज संपत्ती गोळा करतात; पिंपरी-चिंचवडमधील कथित लाचखोरी प्रकरणावर बहुजन कष्टकरी जनता आघाडीचा संताप
व्हिएस न्युज - पिंपरी-चिंचवड महानगरपालिकेतील पाणीपुरवठा विभागाशी संबंधित कथित लाचखोरी आणि कोट्यवधी रुपयांच्या मालमत्तेच्या प्रकरणावर बहुजन कष्टकरी जनता आघाडीचे राष्ट्रीय अध्यक्ष डॉ. बाबा कांबळे यांनी तीव्र संताप व्यक्त केला आहे. भ्रष्टाचाराची ही कीड केवळ काही अधिकाऱ्यांपुरती मर्यादित नसून, ती प्रशासन आणि राजकीय व्यवस्थेच्या विविध स्तरांपर्यंत पसरल्याचा आरोप त्यांनी केला आहे.
पिंपरी-चिंचवड महानगरपालिकेच्या पाणीपुरवठा विभागातील मुख्य अभियंता प्रमोद ऑबासे यांच्याशी संबंधित प्रकरणात लाचलुचपत प्रतिबंधक विभागाच्या (ACB) तपासादरम्यान सुमारे २.१९ कोटी रुपयांची संपत्ती आढळल्याचे समोर आल्याच्या पार्श्वभूमीवर डॉ. कांबळे यांनी ही प्रतिक्रिया दिली.
एका बाजूला गोरगरीब आणि कष्टकरी नागरिकांना पोटाची खळगी भरण्यासाठी संघर्ष करावा लागत आहे. अनेक कुटुंबांना मुलांची शैक्षणिक फी भरणेही कठीण होत असून आर्थिक अडचणींमुळे विद्यार्थ्यांच्या शिक्षणावर परिणाम होत आहे. तर दुसऱ्या बाजूला काही अधिकारी जनतेच्या पैशांवर डल्ला मारून मोठ्या प्रमाणात संपत्ती जमा करत असल्याच्या घटना संतापजनक असल्याचे डॉ. कांबळे यांनी म्हटले आहे.
या प्रकरणावर प्रतिक्रिया देताना डॉ. बाबा कांबळे म्हणाले, “भ्रष्टाचाराची ही कीड केवळ काही अधिकाऱ्यांपुरती मर्यादित नसून खालच्या स्तरापासून ते उच्च प्रशासकीय आणि राजकीय स्तरापर्यंत पसरलेली आहे. जोपर्यंत लाचखोरी आणि भ्रष्टाचार मुळापासून संपत नाही, तोपर्यंत सर्वसामान्य जनतेच्या जीवनात अपेक्षित सुधारणा होणार नाही.”
महापालिकेसारख्या नागरिकांना मूलभूत सुविधा पुरविणाऱ्या लोककल्याणकारी संस्थांमध्येच जर कथित गैरप्रकार आणि लाचखोरीची प्रकरणे समोर येत असतील, तर प्रशासकीय यंत्रणेच्या कार्यक्षमतेवर गंभीर प्रश्नचिन्ह निर्माण होत असल्याचे त्यांनी नमूद केले. पिंपरी-चिंचवडमधील या कथित लाचखोरी प्रकरणाचा तपास केवळ एका अधिकाऱ्यापुरता मर्यादित न ठेवता, या प्रकरणामागे अन्य व्यक्ती, हितसंबंध किंवा संबंधित घटक आहेत का, याचाही सखोल आणि निष्पक्ष तपास करण्यात यावा, अशी मागणी बहुजन कष्टकरी जनता आघाडीने केली आहे.
डॉ. बाबा कांबळे यांच्या प्रमुख मागण्या
१) सक्षम आणि कडक कायद्याची अंमलबजावणी : भ्रष्टाचाराची कर्करोगाप्रमाणे पसरत चाललेली कीड समूळ नष्ट करण्यासाठी देश आणि राज्य स्तरावर अधिक सक्षम व कडक कायद्यांची प्रभावी अंमलबजावणी करण्यात यावी.
२) सखोल व निष्पक्ष चौकशी : या प्रकरणाशी संबंधित सर्व बाबींची कसून चौकशी करून दोषी आढळणाऱ्या अधिकारी, कर्मचारी अथवा इतर संबंधितांवर कायद्यानुसार कठोर कारवाई करण्यात यावी.
३) जनतेने एकत्रितपणे आवाज उठवावा : सर्वसामान्य नागरिकांच्या हक्कांवर परिणाम करणाऱ्या भ्रष्टाचाराविरोधात कष्टकरी, गरीब आणि सर्वसामान्य जनतेने एकत्र येऊन लोकशाही मार्गाने आवाज उठवावा, असे आवाहन डॉ. कांबळे यांनी केले.
“भ्रष्टाचाराविरोधातील लढा हा केवळ एखाद्या संघटनेचा नसून संपूर्ण समाजाचा आहे. जनतेचा पैसा आणि जनतेच्या हक्कांचे संरक्षण करण्यासाठी भ्रष्टाचाराविरोधात कठोर भूमिका घेणे काळाची गरज आहे,” असेही डॉ. बाबा कांबळे यांनी स्पष्ट केले.
