व्हिएस न्यूज - महापालिकेतील सत्ताधाऱ्यांकडून सर्वपक्षीय गटनेत्यांना अपमानास्पद वागणूक दिली जात आहे. तसेच, कोणी आपल्या विरोधात बोलू नये म्हणून सत्ताधाऱ्यांकडून गळचेपीचा प्रकार सुरू असून कुठलेही कारण नसताना गेल्या पाच ते सहा दिवसांपासून महापालिकेतील शिवसेना गटनेते राहुल कलाटे यांच्या कार्यालयातील संगणक महापालिकेने दप्तरी जमा केले आहे. अद्यापही या मागील कारण स्पष्ट होऊ शकलेले नाहीत. ही घटना निंदनीय असून शहर मनसेच्या वतीने या घटनेचा निषेध करण्यात आला आहे. या संदर्भात पिंपरी- चिंचवड महापालिकेचे महापौर तसेच आयुक्त यांना निवेदन देण्यात आले असून शिवसेना गटनेते यांच्या कार्यालयातील संगणक परत करा , अशी मागणी केली आहे. निवेदनात म्हटले आहे की, महापालिकेने गटनेत्यांना दिलेल्या सोई- सुविधांचा वापर गटनेता व नगरसदस्य नागरिकांच्या तक्रार निवारण्यासाठी करीत असतात. या संगणकाचा वापर देखील नागरिकांच्या हितासाठी करण्यात येत होता. परंतु, गटनेत्यांना विश्वासात न घेता संगणक गटनेते यांच्या कार्यालयातून त्यांना कुठलीही पूर्व सूचना न देता संगणक काढून नेण्यात आला. हा तर सर्वपक्षीय गटनेत्यांचा अपमान आहे. यापूर्वी, अनेक राजकीय पक्षांनी या महापालिकेवर सत्ता भोगली आहे. परंतु, अशी अपमानास्पद वागणूक कुठल्याही सत्ताधारी पक्षाने गटनेता अथवा सत्ताधाऱ्यांना दिलेली नाही. त्यामुळे, त्वरित शिवसेना कार्यालयातील संगणक बसविण्यात यावा, अशी विनंती मनसेचे शहराध्यक्ष तथा गटनेते सचिन चिखले यांनी केली आहे. यावेळी, हेमंत डांगे, बाळ दाणवले, संजय यादव, रुपेश पटेकर, राजू सावळे, हेमंत तिवारी, अंकुश तापकीर, संतोष यादव, अमित तापकीर, बंटी सवाई, सखाराम मटकर, महेश ठाकर, सचिन कांबळे, प्रतीक शिंदे, सागर भोपळे, नासिर शेख उपस्थित होते.

Download Android Application