व्हीएस न्यूज - विश्वाला मैत्री, बंधुता आणि मानवतेचा संदेश देणारा सामाजिक समता तसेच न्यायाचा धम्म डॉ. बाबासाहेब आंबेडकरांनी 14 ऑक्टोबर 1956 रोजी नागपुर येथे देऊन धम्मचक्र परिवर्तन केले. माणसाने माणसाशी माणसाप्रमाणे वागण्याचे मार्गदर्शन संविधान करते. भारतीयांचे कल्याण संविधानाव्दारेच शक्य आहे. संविधान हाच खरा मानवतेचा आदर्श धर्मग्रंथ आहे. हा मानवतावादी विचार सर्व भारतीयांनी स्विकारला पाहिजे. असे मार्गदर्शन प्रबोधनकार, सप्तखंजिरी वादक सत्यपाल महाराज यांनी केले.

पिंपळे गुरव येथे 61 व्या धम्मचक्र प्रवर्तन दिनानिमित्त आयोजित सांगवी, नवी सांगवी, पिंपळे गुरव, औंध कॅंम्प, दापोडी परिसरातील संयुक्त जयंती महोत्सव समिती आणि नागविदर्भ असोसिएशन तसेच सेहेचाळीस बुध्द विहारांच्या वतीने पिंपळे गुरव येथील महालक्ष्मी मंगल कार्यालयात रविवारी (दि. 8 ऑक्टोबर) आयोजित कार्यक्रमात माजी आमदार आण्णा बनसोडे, परराष्ट्र मंत्रालयाचे संचालक अतुल गोतसुर्वे, डॉ. बाबासाहेब आंबेडकर संयुक्त जयंती महोत्सवाचे अध्यक्ष अमरसिंग आदियाल, ओबीसी परिषदेचे राज्य संघटक उल्हास राठोड, राहूल काकडे, ॲड. राजेश नितनवरे, ज्येष्ठ पत्रकार बबन कांबळे, संदीप नितनवरे, चंद्रकांत वाकोडे, प्रा. रवींद्र इंगोले, नयन अहिरे, सुनील निकम, दिपक म्हस्के, पारधे सर उपस्थित होते.

परराष्ट्र मंत्रालयाचे संचालक अतुल गोतसुर्वे यांचा विशेष सत्कार यावेळी करण्यात आला. सत्काराला उत्तर देताना गोतसुर्वे म्हणाले की, मृत्यूनंतर पुढे काय होते, या प्रश्नाचे उत्तर शोधत बसण्यापेक्षा वर्तमानात चांगल्या गोष्टींचे आचरण करा, अशी शिकवण देणारा धर्म म्हणजे बौध्द धर्म होय. समाजात समतेने जगण्याचा मार्ग बुध्दांनी दिला. बुध्दांची पंचशील तत्व आचरणात आणल्यास दु:ख कमी होण्यास मदत होईल. डॉ. बाबासाहेब सुध्दा सुखकारक आयुष्य जगले असते. मात्र, त्यांनी बहुजनांसाठी त्याग केला. बाबासाहेबांच्या विचारांचा वारसा पुढे चालविण्यासाठी आधी स्वयंप्रकाशित व्हा. असेही गोतसुर्वे म्हणाले. स्वागत अमरसिंह आदियाल, सुत्रसंचालन दीपक म्हस्के आणि आभार नयन अहिरे यांनी मानले.

व्हीएस न्यूज - पिंपरी चिंचवड महानगरपालिकेच्या डॉ. बाबासाहेब आंबेडकर पुतळा परिसरात उभारण्यात येणा-या भिमसृष्टीचे कामकाजास गती देण्यात येवून भिमसृष्टीचे काम मार्च 2018 पूर्वी पूर्ण करण्यात यावे अशा सुचना महापौर नितिन काळजे व स्थायी समिती सभापती सिमा सावळे यांनी दिल्या. तसेच भिमसृष्टी मध्ये माता रमाई आंबेडकर यांचा पुतळा बसविण्याचा निर्णयही यावेळी घेण्यात आला. पिंपरी चौक येथील डॉ.बाबासाहेब आंबेडकर पुतळा परिसरात भिमसृष्टी उभारणे कामी गठीत केलेल्या समितीच्याबैठकीत ते बोलत होते.

महापौर नितिन काळजे यांच्या अध्यक्षतेखाली स्थायी समिती सभागृहात आयोजित करण्यात आलेल्या या बैठकिस उपमहापौर शैलजा मोरे, आयुक्त श्रावण हार्डीकर, शहर सुधारणा समिती सभापती सागर गवळी, मनसे गटनेते सचिन चिखले, नगरसदस्य शैलेश मोरे, बाबासाहेब त्रिभुवन, नगरसदस्या कमल घोलप, अनुराधा गोरखे, आशा धायगुडे-शेंडगे, माजी नगरसदस्य ॲड गोरक्ष लोखंडे, शहर अभियंता अंबादास चव्हाण, सहाय्यक आयुक्त अण्णा बोदडे, कार्यकारी अभियंता संजय कांबळे, निवृत्त कार्यकारी अभियंता शरद जाधव, उपअभियंता एन.एन.मोरे, व्हि.के.जाधव, सामाजिक कार्यकर्ते संतोष जोगदंड, अशोक शिलवंत, वास्तु विशारद शिरिष चिद्दरवार, शिल्पकार महेंद्र थोपटे, चित्र शिल्पकार डॉ.जी.एन.आंबे आदी उपस्थित होते.

भीमसृष्टि अंतर्गत उभारण्यात येणा-या म्युरल्सचे सादरीकरण यावेळी करण्यात आले. महापौर नितिन काळजे व स्थायी समिती सभापती सिमा सावळे यांनी भीमसृष्टी उभारण्यात येणा-या म्युरल्सला तसेच डॉ. बाबासाहेब आंबेडकर पुतळा परिसरात माता रमाई यांचा पुतळा उभारण्यासही यावेळी मान्यता देण्यात आली. डॉ. बाबासाहेब आंबेडकर यांच्या पुतळ्याचे पावित्र्य राखण्यासाठी पुतळ्याभोवती पोष्टर, फ्लेक्स, बॅनर्स लावण्यास प्रतिबंध करण्यात येवून परिसर संरक्षित करण्यात यावा असे स्थायी समिती सभापती सिमा सावळे यांनी सागितले. बैठकिचे सुत्रसंचालन कार्यकारी अभियंता संजय कांबळे यांनी केले तर आभार सहाय्यक आयुक्त अण्णा बोदडे यांनी मानले.

व्हीएस न्यूज - अंत्योदय योजना लाभार्थींकरिता शिधापत्रिकेवर वाटप केली जाणाऱ्या साखरेचे अनुदान केंद्र सरकारने बंद केले आहे. त्यामुळे या महिन्यानंतर अंत्योदय लाभार्थींना शिधापत्रिकेवर मिळणारी साखर बंद होणार आहे. याचा शहरातील तीन हजार लाभार्थ्यांना याचा फटका बसणार आहे. यापूर्वीच दारिद्य्र रेषेखालील आठ हजार लाभार्थ्यांना गेली चार महिन्यांपासून साखर वाटप करणे बंद करण्यात आले आहे.

पिंपरी-चिंचवड शहरात अ आणि ज या दोन परिमंडळ कार्यालयांतर्गत एकूण 197 स्वस्त धान्य दुकाने आहेत. या दोन्ही कार्यालयांतर्गत स्वस्तधान्य दुकानदारांमार्फत शिधापत्रिकाधारकांना गहू व तांदळाचा पुरवठा केला जातो. अंत्योदय योजनेअंतर्गत अ कार्यालयाकडे 412 शिधापत्रिकाधारकांची नोंद असून नव्याने 36 नागरिकांचे अर्ज नुकतेच कार्यालयाला प्राप्त झाले आहेत. तर ज कार्यालयाकडे 1,989 शिधापत्रिकाधारकांची नोंद आहे. याशिवाय अन्न सुरक्षा योजनेअंतर्गत अ कार्यालयाकडे 1 लाख, 46 हजार 552 तर ज कार्यालयाकडे 1 लाख, 53 हजार 59 शिधापत्रिकाधारकांची नोंद आहे. या दोन्ही कार्यालयांतर्गत अंत्योदय लाभार्थ्यांची संख्या सुमारे तीन हजार आहे. तर दारिद्य्र रेषेखालील लाभार्थी सुमारे आठ हजार आहेत.

या दोन्ही घटकांना केंद्र सरकारकडून रेशनिंगवर गहू व तांदूळ दिले जाते. याशिवाय साखरेचे वाटप केले जात आहे. मात्र, साखरेला दिले जाणारे अनुदान केंद्र सरकारने बंद केल्याने गेली चार महिन्यांपासून दारिद्य्र रेषेखालील लाभार्थी साखरेपासून वंचित आहेत. दरम्यानच्या काळात अंत्योदय लाभार्थीना प्रति माणसी 500 ग्रॅम अनुदानित साखर वाटप केली जात असायची. त्यानंतर यामध्ये प्रत्येक शिधापत्रिकेला 500 ग्रॅम वाटपाचे आदेश निघाले. त्यात पुन्हा बदल करुन प्रत्येक शिधापत्रिकेला एक किलो साखर वाटपाचा बदल करण्यात आला. या सर्व घडामोडींच्या पार्श्‍वभूमीवर केंद्र सरकारने साखरेला दिले जाणारे अनुदान बंद करण्यात आले आहे. त्यामुळे आता पुढील महिन्यापासून या सर्वच लाभार्थींना साखर वाटप होणार नाही.

अंत्योदय व दारिद्य्र रेषेखालील लाभार्थींना पुरेसे धान्य वाटप करणे दोन्ही शासनाचे कर्तव्य आहे. मात्र, सणासुदीच्या काळात धान्य वाटपावर मर्यादा लादणे चुकीचे आहे. हळुहळू वितरण व्यवस्था बंद करण्याचा राज्य सरकारचा प्रयत्न असल्याचे दिसून येत आहे. त्यामुळे दिवसेंदिवस अन्नधान्य वितरण व्यवस्था क्षीण करण्याचे प्रयत्न सुरु आहेत.

- गजानन बाबर, अध्यक्ष, ऑल महाराष्ट्र फेअर प्राईस शॉपकीपर्स फेडरेशन.

व्हीएस न्यूज – दिवाळीच्या तोंडावर महागाईचा भडका उडाल्याच्या निषेधार्थ भारतीय मायनॉरिटीज सुरक्षा महासंघाच्या वतीने केंद्र सरकारच्या विरोधात सोमवारी निदर्शने करण्यात आली. भाजप सरकारच्या नावाने “शिमगा’ करत निषेध व्यक्‍त करण्यात आला.

प्रदेशाध्यक्ष मारुती कदम यांच्या नेतृत्वाखाली पिंपरीतील डॉ. बाबासाहेब आंबेडकर पुतळा चौकात हे आंदोलन झाले. यावेळी महिला प्रदेशाध्यक्षा डॉ. रंजना पेडणेकर म्हणाल्या की, केंद्र सरकारच्या चुकीच्या धोरणांमुळे पेट्रोल, डिझेल, गॅस अशा जीवनावश्‍यक वस्तुंचे दर गगनाला भिडले आहे. व्यापाऱ्यांवर लादलेली जीएसटी चूकीची असल्याचे लक्षात आल्यानंतर आता “जीएसटी’मध्ये सुधारणा करण्यात आली आहे. हे सरकारचे अपयश आहे. गो हत्या बचावच्या नावाखाली निरपराध नागरिकांचे खून सत्र सुरु आहे. न्यायालयाने फटकारल्यानंतरही केंद्र सरकार या प्रश्‍नाकडे गांभिर्याने पाहत नाही, ही दुर्दैवी बाब आहे.

प्रदेशाध्यक्ष मारुती कदम यांनी राज्य सरकारच्या चुकीच्या निर्णयावर टीका केली. शेतकऱ्यांना जाहीर केलेली कर्जमाफी दिवास्वप्नच ठरली आहे. अंगणवाडी सेविकांना मानधनवाढीसाठी जेलभरो आंदोलन करावे लागले. याशिवाय पिंपरी-चिंचवड शहरातील गुन्हेगारी दिवसेंदिवस वाढत असताना, स्वतंत्र पोलीस आयुक्तालयाचा प्रश्‍न सोडविण्यात चालढकल केली जात आहे. शहराच्या कायदा सुव्यवस्थेच्यादृष्टीने ही बाब योग्य नाही. त्यामुळे शहराच्या पोलीस आयुक्तालयाचा प्रश्‍न त्वरित मार्गी लावण्याची गरज आहे.

या निदर्शनामध्ये अमित कांबळे, कल्याण अडागळे, संतोष खाडे, रवींद्र आडागळे, चंद्रकांत मुळे, आमीर शेख, दशरथ वाघमारे, रितेश देशमुख, पार्वती कांबळे, वंदना अडागळे, विजया बेंदळे, रेश्‍मा डोगरा, रंजना भोसले, नसीम कांबळे, सुषमा सोनवणे, मंजुषा वाघमारे, सतिश कदम आदी सहभागी झाले होते.

व्हीएस न्यूज – नवीन संशोधनासाठी भारताला आजही पाश्‍चात्य देशांवर अवलंबून रहावे लागते. हे चित्र बदलण्यासाठी तरुणांनी संशोधन क्षेत्राकडे वळावे, असे आवाहन नवी मुंबई महापालिकेच्या नगरसचिव चित्रा बाविस्कर यांनी चिंचवड येथे केले.

अखिल महाराष्ट्र वाणी समाज प्रबोधन संस्थेच्या पिंपरी-चिंचवड शाखेच्या वतीने गुणवंत विद्यार्थ्यांचा सत्कार समारंभ कार्यक्रमाचे आयोजन चिंचवड येथील प्रा. रामकृष्ण मोरे प्रेक्षागृह येथे करण्यात आले होते. कार्यक्रमाच्या उद्‌घाटन प्रसंगी नगरसचिव चित्रा बाविस्कर बोलत होत्या. राष्ट्रपती पुरस्कार प्राप्त मिलिंद वाणी, सुरेश बागड, प्रबोधन संस्थेचे राष्ट्रीय संघटक दीपक येवले, प्रदेशाध्यक्ष सुरेश शिरुडे, संस्थेचे अध्यक्ष रविंद्र मालपुरे, संस्थेच्या महिला शाखेच्या अध्यक्षा प्रतिभा पाखले, युवा अध्यक्ष प्रशांत ब्राम्हणकर यावेळी उपस्थित होते. दहावीतील नव्वद टक्के पेक्षा जास्त गुण मिळवलेल्या विद्यार्थ्यांना अखिल महाराष्ट्र वाणी समाज प्रबोधन संस्थेतर्फे बक्षीस वितरण करण्यात आले.

बाविस्कर म्हणाल्या की, पालकांनी लहानपणापासून मुलांच्या सर्जनशीलतेला आणि जिज्ञासू प्रवृत्तीला खतपाणी घातले तरच अधिकाधिक तरुण संशोधन क्षेत्राकडे वळतील. जे संशोधक होणार नाहीत, ते आपल्या आवडीच्या क्षेत्रांमध्ये निश्‍चितच सरस कामगिरी करून दाखवतील. धकाधकीच्या जीवनात आजचा भारतीय तरुण फक्त पैसा, प्रमोशन ह्याच्याच मागे धावत आहे. मात्र, देशाला संशोधकांची गरज आहे. त्यामुळे तरुणांनी संशोधन क्षेत्रात उतरायला हवे, असे आवाहन त्यांनी केले.

प्रदेशाध्यक्ष सुरेश शिरुडे म्हणाले की, समाजाचे संघटन होण्यासाठी प्रबोधन संस्थेची स्थापना केली आहे. संस्थेच्या माध्यमातून समाजोपयोगी उपक्रम राबवत आहोत. समाजातील प्रत्येक घटकाला व्यासपीठ मिळवून देण्याचे काम प्रबोधन संस्थेतर्फे करण्यात आले आहे. अशावेळी समाजातील संघटनामुळे गरजू घटकापर्यंत पोहचता येणे सहज शक्‍य आहे. मात्र, त्यासाठी संघटन मजबूत असावे, अशी अपेक्षा त्यांनी व्यक्त केली. यावेळी अखिल महाराष्ट्र वाणी समाज प्रबोधन संस्थेच्या पिंपरी-चिंचवड शाखाध्यक्षपदी किरण अमृतकर, महिला अध्यक्षपदी भारती दशपुते, युवक अध्यक्षपदी स्वप्निल पाचपुते तसेच सामुदायिक विवाह सोहळा समन्वयकपदी रविंद्र मालपुरे यांची निवड जाहीर करण्यात आली. प्रदेशाध्यक्ष सुरेश शिरुडे यांनी ही निवड केली. मिलिंद वाणी, सुरेश बागड, दीपक येवले यांनी मनोगत व्यक्त केले. प्रास्ताविक ऋतुजा अमृतकर यांनी केले. प्रा. उदय पाटकर यांनी सूत्रसंचालन केले आणि आभार मानले.

व्हीएस न्यूज - आज ज्या ठिकाणी मी आहे तिथून मागे वळून पाहिले तर दुसरे तिसरे कोणी नसून मीच आहे. इतकी मी आता पुढे गेलीय. ना दुःख ना आनंद यात खचले असते तर कधीच मरून गेले असते. जगतेय ती फक्त माझ्या लेकरांसाठी, असे मत अनाथांची माय सिंधुताई सपकाळ यांनी चिंचवड येथे व्यक्त केले.

इनरव्हील क्लब पिंपरी-चिंचवड यांच्या संयुक्त विद्यमाने त्यांचा सन्मान सोहळा आयोजित करण्यात आला होता. त्यावेळी त्या बोलत होत्या. यावेळी इनर व्हील निगडी प्राईडच्या अध्यक्षा सविता राजापूरकर, पिंपरीच्या अध्यक्षा संगीता देशपांडे, पिंपरी स्टारच्या अध्यक्षा राधिका माकन, निगडी झेनेक्स संजुश्री मुनोत, क्लबचे सभासद व रोटरीयन आदी उपस्थित होते. यावेळी इनरव्हील क्लबच्या वतीने सिंधुताई सपकाळ यांच्या संस्थेस 51 हजाराची देणगी स्वरूपात चेक देण्यात आला.

त्या पुढे म्हणल्या की, जगा, ठामपणे स्वाभिमानाने जगा. तुम्हीच जगू व जगवू शकता. माझी लेकरच माझी उर्मी आहेत. संकटांनी मला उभे केले. मी संसारात रमले असते तर एक दोन मुलांचा सांभाळ करू शकले असते. मी माझ्या लेकरांची माय बनले, त्यांना सक्षम करू शकले, असे त्या म्हणाल्या. प्रास्ताविक सविता राजापूरकर यांनी केले. सूत्रसंचालन सुमन शिरूर यांनी केले. आभार प्रिती पाटील यांनी मानले.

व्हीएस न्यूज – महापालिकेच्या आरक्षित जागांवर अतिक्रमण झाल्यामुळे थेरगाव येथील विकासाला खीळ बसली आहे. इच्छाशक्ती असताना देखील विकास साधता येत नसल्याची खंत नगरसेवकांनी व्यक्त केल्यानंतर आयुक्त श्रावण हर्डीकर यांनी थेरगाव येथे जाऊन विविध आरक्षित जागांची पाहणी केली. अतिक्रमणे हटविण्याचे आदेश ग क्षेत्रीय कार्यालयातील अधिकाऱ्यांना आयुक्तांनी दिले आहेत. सर्व आरक्षणे ताब्यात घेऊन तातडीने विकसित केली जातील, असेही आश्‍वासन आयुक्त हर्डीकर यांनी दिले.

थेरगाव परिसर प्राधिकरणाच्या हद्दीत असल्यामुळे पिंपरी-चिंचवड महापालिकेकडून या भागातील विकास दुर्लक्षीत राहिली आहे. सर्व्हे क्रमांक 33 मधील बस डेपोचे80 गुंठे जागा, सर्व्हे क्रमांक 36, 37 मधील खेळाच्या मैदानाची सुमारे तीन एकर जागा, सर्व्हे क्रमांक 32 आणि 33 पैकी या जागेतील प्रस्तावित उद्यानासाठी अडीच एकर जागा आरक्षित आहे. त्याचबरोबर कुणाल रेसिडन्सी ते थेरगाव स्मशानभूमी 12 मीटरचे दोन रस्ते प्रस्तावित आहेत. संबंधित जागा मालकांचा ताबा देण्यास विरोध असल्यामुळे आरक्षणे विकसित करण्यात अडथळे येत आहेत. या जागेची पाहणी करून आरक्षणे ताब्यात घेण्याकरिता जागा मालकांना विश्‍वासात घेण्यासाठी आयुक्त श्रावण हर्डीकर यांना स्थानिक अपक्ष नगरसेवक कैलास बारणे यांनी पत्र दिले होते.

त्यावर आयुक्त हर्डिकर यांनी थेरगाव परिसरात जाऊन आरक्षित जागांची पाहणी केली. त्यातील काही जागांवर पत्राशेडचे अतिक्रमण हटवण्याचे आयुक्तांनी ग क्षेत्रीय कार्यालयातील अधिकाऱ्यांना दिले. त्याचबरोबर आरक्षीत जागा ताब्यात घेण्यासाठी लवकरच जागा मालकांसोबत बैठक घेऊन प्रश्‍न सोडवला जाईल. लवकरात लवकर आरक्षणे विकसित केली जातील, असे हर्डीकर यांनी सांगितले. तर, जागा मालकांना योग्य मोबदला मिळवून देण्याचा प्रयत्न आहे, असे नगरसेवक कैलास बारणे यांनी सांगितले. यावेळी नगररचना विभागाचे उपसंचालक प्रकाश ठाकूर, स्थापत्य विभागाचे प्रवक्ते शिरीष पोरेडी, सव्हेअर सुहास शिंदे, उपअभियंता सुनील बागवानी, कनिष्ठ अभियंता राजेंद्र जगताप, नितीन निंबाळकर आदी उपस्थित होते.

व्हीएस न्यूज - पिंपरी चिंचवड शहरासाठी कळीचा मुद्दा बनलेला अनधिकृत बांधकामांचा प्रश्न राज्य सरकारने अखेर मार्गी लावला आहे. सरकारने राज्यभरातील अनधिकृत बांधकामे अधिकृत करण्याची अधिसूचना प्रसिद्ध केली असून, त्याचे कायद्यात रुपांतर झाले आहे. त्यानुसार ३१ डिसेंबर २०१५ पूर्वीची अनधिकृत बांधकामे दंड आकारून नियमित केली जाणार आहेत. त्यामुळे पिंपरी चिंचवडमधील हजारो नागरिकांना मोठा दिलासा मिळणार आहे.

अनधिकृत बांधकामांचा हा प्रश्न सुटावा म्हणून भाजप सरकारवर विरोधकांकडून वारंवार दबाव टाकण्यात येत होता. त्यासाठी राष्ट्रवादीने जन हाहाकार आंदोलन काढून या प्रश्नांसह अनेक प्रलंबित विषयांवर आवाज उठवला होता. अखेर या प्रश्नावर सरकारने अंतिम निर्णय घेऊन पिंपरी चिंचवडमधील जनतेला दिवाळीची भेटच दिली आहे.

३१ डिसेंबर २०१५ पूर्वीची बांधकामे अधिकृत -

भाजप सरकारने जुलै महिन्यात अनधिकृत बांधकामे अधिकृत करण्याची प्रारूप नियमावली जाहीर केली होती. या नियमावलीला महाराष्ट्र टाऊन प्लॅनिंग (एकत्रित संरचना) नियम २०१७ असे म्हटले होते. या निमयावलीमध्ये कोणती अनधिकृत बांधकामे अधिकृत करायची आणि कोणती करायची नाहीत, त्याबाबतचे स्पष्ट निकष प्रसिद्ध करण्यात आले होते. त्यानुसार ३१ डिसेंबर २०१५ पूर्वी झालेल्या अनधिकृत बांधकामांनाच अधिकृत करणे, नद्या, कालवे, पूररेषा, रेडझोन, ऐतिहासिक क्षेत्र, कचरा डेपो, पर्यावरणाच्या दृष्टीने संवेदनक्षम म्हणजे डोंगराळ उतार भागातील आणि धोकादायक अनधिकृत बांधकामे अधिकृत करण्यात येणार नसल्याचे सरकारने स्पष्ट केले होते. तसेच कोणती बांधकामे अधिकृत होऊ शकतात, त्याची वर्गवारी प्रसिद्ध करण्यात आली होती.

या निर्णयामुळे इनामाच्या जागेत संबंधित मालकाचे ना-हरकत प्रमाणपत्र न घेता अनधिकृत बांधकाम केले असल्यास असे प्रमाणपत्र घेऊन बांधकाम अधिकृत होणार आहे. आरक्षणाच्या जागेत झालेली अनधिकृत बांधकामे सुद्धा अधिकृत केली जाणार आहेत. मात्र संबंधित आरक्षण मैदान, उद्यान, मोकळी जागा वगळून अन्य ठिकाणी हलविल्यानंतरच आरक्षणातील अनधिकृत बांधकामे अधिकृत होतील. पिंपरी चिंचवडमधील हजारो अनधिकृत बांधकामधारकांसाठी हा मोठा दिलासा देणारा निर्णय मानला जात आहे.

व्हीएस न्यूज - आपल्या दिलखेच अदाकारीने आणि नृत्याविष्काराने लावणी रसिकांना घायाळ करणार्‍या आणि राज्यातील तमाम लावणी रसिकांवर गेली अनेक दशके अधिराज्य गाजविणार्‍या ज्येष्ठ तमाशा कलावंत, लावणी सम्राज्ञी मंगला बनसोडे यांना कलेतील योगदानाबद्दल राष्ट्रपती रामनाथ कोविंद यांच्या हस्ते सन्मानित करण्यात आले. सोमवारी दिल्ली येथील शानदार समारंभात ‘वयोश्रेष्ठ सन्मान’ या पुरस्काराने त्यांचा गौरव करण्यात आला.

यावेळी नागपूर जिल्ह्याचे डॉ. महादेवराव मेश्राम आणि कोल्हापूरच्या मनोरमा कुलकर्णी यांनाही सन्मानित करण्यात आले. केंद्रीय सामाजिक न्याय व अधिकार मंत्रालयाच्यावतीने दिल्लीतील विज्ञान भवनात आयोजित कार्यक्रमात मंचावर राष्ट्रपती कोविंद, केंद्रीय सामाजिक न्याय व अधिकारीता मंत्री थावरचंद गहलोत, केंद्रीय सामाजिक न्याय राज्यमंत्री क्रिष्णपाल गुर्जर, रामदास आठवले, सचिव जी. लता कृष्णराव उपस्थित होत्या. सृजनशील कलेच्या क्षेत्रात मंगला बनसोडे यांना सन्मानित करण्यात आला. यावर्षी वयोश्रेष्ठ सन्मान हा विविध ११ श्रेणींमध्ये २२ लोकांना प्रदान करण्यात आला. पुरस्काराचे स्वरूप सन्मान चिन्ह आणि प्रशस्ती पत्र असे होते.

महाराष्ट्राची लोककला म्हणून ओळखल्या जाणार्‍या लावणी कलेतील एक आग्रगण्य कलाकार म्हणून मंगला बनसोडे यांचे नाव घेतले जाते. पणजोबा नारायण खुडे, आजोबा भाऊ नारायणगावकर, आई विठाबाई नारायणगावकर यांच्यापासून चालत आलेली लोककला जोपासत त्यांनी आपला मुलगा नितीनकुमार बनसोडे यालाही या कलेत उतरविले. या कलेत त्यांची पाचवी पिढी नितीन बनसोडेच्या रुपाने कार्यरत आहे.

तमाशा कलेतील मंगला बनसोडे यांचे आजोबा भाऊ बापू नारायणगावकर यांना १९६१ साली तात्कालीन राष्ट्रपती डॉ. राजेंद्र प्रसाद यांच्या हस्ते सन्मानित करण्यात आले होते. त्यानंतर त्यांच्या आई विठाबाई नारायणगावकर यांना १९९० साली तत्कालीन राष्ट्रपती आर. व्यंकटरमण यांच्या हस्ते राष्ट्रपती पुरस्काराने सन्मानित करण्यात आले होते. आता मंगला बनसोडे यांना राष्ट्रपती कोविंद यांच्या हस्ते सन्मानित करण्यात आले. त्यामुळे कलेतील योगदानाबद्दल एकाच घरातील तिघांचा राष्ट्रपतींच्या हस्ते सन्मान करण्यात आला आहे.

कलेच्या सेवेची पावती मिळाली - मंगला बनसोडे

पणजोबा, आजोबा, आई यांच्यापासून चालत आलेली कला जोपासण्याचे काम लहानपणापासून गेली साठ वर्षे करत आहे. मुलगाही आज कलेची सेवा करत आहे. आयुष्यभर कलेची जी निस्वार्थीपणे सेवा केली. त्या सेवेची पावती राष्ट्रपतींच्या हस्ते झालेल्या सन्मानाने मिळाली आहे. हा सन्मान माझा एकटीचा नाही. तो माझी आई, माझे संपूर्ण राज्यातील सहकारी कलाकार आणि मला डोक्यावर घेणार्‍या रसिक मायबापांचा आहे. या सन्मानामुळे धन्य झाल्यासारखे वाटते. आयुष्याच्या शेवटापर्यंत कलेची आणि रसिकांची सेवा करणार.

व्हीएस न्यूज - चैतन्य आणि मांगल्याचे वातावरण निर्माण करणारा, लक्ष लक्ष दिव्यांनी आसमंत उजळून टाकणारा, सर्वत्र प्रकाश, फटाक्‍यांची आतषबाजी, पंचपक्वानांची गोडी आणि नात्या-नात्यांमध्ये स्नेह व मैत्रीची मधुरता वाढविणारा दीपोत्सवाचा सण आता केवळ काही दिवसांवर येऊन ठेपला आहे. दिवाळीच्या पार्श्वभूमीवर सज्ज झालेल्या बाजारपेठा ग्राहकांच्या गर्दीने फुलून गेल्या आहेत.

बालचमूंकडून किल्ले बांधकामाची लगबग सुरू झाली आहे. सर्वांच्या घरा-घरांतील स्वच्छता आणि रंगरंगोटीची कामे अंतिम टप्प्यात असून दिवाळीचा फराळ बनविण्याची जोरदार तयारी महिलांनी सुरू केली आहे. आता मुलांना शाळांना सुटी मिळणार असल्याने त्यांच्यात आनंदाचे वातावरण आहे. विद्यार्थ्यांसह सर्वांना आता उत्सवाचे वेध लागले आहेत. चिमुकल्यांनी किल्ले बांधकाम सुरू केले असून, सैन्य खरेदीसाठी तर त्यांचे आईबाबा त्यांना नवीन कपडे खरेदीसाठी बाजारपेठेत धाव घेत आहेत. उत्सवानिमित्तच्या मोठ्या आर्थिक उलाढालीसाठी बाजारपेठ सज्ज झाली आहे. आकर्षक आणि रंगीबेरंगी पणत्या रस्त्यांवर ठिकठिकाणी विक्रीसाठी मांडल्या आहेत. दुकानांबाहेर लटकणारे छोट्या-मोठ्या आकारातील रंगीबेरंगी आकाशकंदील, तोरण, रांगोळ्या ग्राहकांचे लक्ष वेधून घेत आहेत. यामुळे बाजारपेठा इंद्रधुष्यासारख्या दिसत आहेत.

आधी मातीच्या साध्या रंग नसलेल्या पणत्या असायच्या मात्र, काही वर्षांपासून मातीच्याच पण नव-नवीन आणि विविध रंगांतील आकर्षक पणत्या विक्रीसाठी बाजारात दाखल झाल्या आहेत. विशेष म्हणजे मातीच्या पणत्यांबरोबरच पेटवल्यानंतर सुगंध आणि सुवास पसरवणाऱ्या फॅशनेबल पणत्या ग्राहकांना भुरळ पाडत आहेत. ग्रीन, ऍपल, लेमन, स्ट्रॉबेरी अशी त्या नवीन बाजारात आलेल्या पणत्यांची नावे आहेत. शहरातील ठराविक दुकानांमध्ये विक्रीसाठी उपलब्ध असलेल्या या पणत्यांच्या किंमती ५० रुपयांपासून २५० रुपयांपर्यंत आहेत. बारामतीत भिगवण चौक, मंडई व दुकानांमध्ये या रंगेबेरंगी पणत्या उपलब्ध आहेत.

आकाश कंदिलांच्या किमती वाढल्या…

दरवर्षीप्रमाणे बाजारपेठांमध्ये आकाश कंदिलांचा झगमगाट आहे. यंदाही आकाश कंदिलांमध्ये नवीन प्रकार पाहायला मिळत आहेत. साध्या पातळ व जाड रंगीबेरंगी कागदापासून बनविलेले, प्लास्टिकचे तसेच कापडी आकाशकंदील सुद्धा ग्राहकांच्या पसंतीस उतरत आहेत. यावेळी आकाश कंदिलांमध्ये नवीन प्रकार दिसत आहेत,सजावटीसाठी वापरले जाणारे छोट्या आकारांतील आकाश कंदील ५ रुपयांना मिळत आहेत. तर इतर प्रकारांतील आकाश कंदिलांच्या किमती साधारणपणे २५ रुपयांपासून ८०० रुपयांपर्यंत आहेत. यावर्षी २० ते २५ टक्‍क्‍यांपर्यंत किमती वाढल्या आहेत.

किराणा मालांच्या दुकानांमध्ये गर्दी…

दिवाळी म्हटले की, पंचपक्कवानांचा फराळ आलाच. लाडू, करंजी, चकल्या, शंकरपाळ्या, अनारसे, चिवडा या प्रमुख पदार्थांबरोबरच इतर अनेक पदार्थांची फराळात रेलचेल असते. हे पदार्थ बनविण्यासाठी आवश्‍यक साहित्य खरेदीसाठी सध्या ग्राहकांनी किराणा मालाच्या दुकानांमध्ये मोठी गर्दी केली आहे. रवा, तेल, साखर, मैदा, पोहे, चना डाळ, खोबरे या वस्तुंच्या किमतींही गगनाला भिडल्या आहेत.

रंगीबेरंगी तोरण, हार, फुलमाळा…

बाजारात यंदा ग्राहकांना आकर्षित करतील असे तोरण, हार दिसत आहेत. गृहसजावटीसाठी महिला तोरण, हार, नकली फुलमाळा यांना अधिक महत्त्व देतात. त्यामुळे जरी त्यांच्या किंमतीत वाढ जरी झाली तरी घर सुंदर बनवण्याच्या दृष्टीने ग्राहक फुल माळा, तोरण यांना अधिक पसंती देत आहेत.

लहान मुलांना परीक्षा संपून आता सुट्या लागल्या आहेत. त्यामुळे मुलांनी किल्ले बनवण्यास सुरुवात केली आहे. तसेच त्यांनी बनवलेल्या किल्ल्यावर ठेवण्यासाठी लागणारे सैन्य बाजारात उपलब्ध झाले आहेत. ते घेण्यासाठी मुले गर्दी करत आहेत.

व्हीएस न्यूज – महापालिका आणि क्रीडा विभागाकडून ठिकठिकाणी बॅडमिंटन हॉल बांधण्यात आलेले आहेत. या ठिकाणी खेळण्यासाठी नागरिकांना आपला ग्रुप तयार करून “ऑनलाइन बुकिंग’रावी लागते. मात्र या “बुकिंग’मध्येच“सेटींग’ होत असल्याचा आरोप माजी विरोधी पक्षनेते संतोष बारणे यांनी केला आहे.

यासंदर्भात संतोष बारणे यांनी पिंपरी-चिंचवड महापालिका आयुक्त श्रावण हर्डीकर यांना निवेदन दिले असून याप्रकरणाच्या चौकशीची मागणी केली आहे. त्यांनी निवेदनात म्हटले आहे की, शहरामध्ये नागरिकांच्या सोईसाठी महापालिकेच्या माध्यमातून क्रीडा विभागातर्फे सुसज्ज असे एकुण 11 बॅडमिंटन हॉल बांधण्यात आले आहेत. या ठिकाणी खेळण्यासाठी आपला ग्रुप व वेळ याची “ऑनलाइन बुकींग’ करणे गरजेचे आहे. यासाठी महापालिकेने क्रीडा विभागाचे स्वतंत्र संकेतस्थळ देखील उपलब्ध केले आहे. “बुकींग’ खुल्या होण्याच्या वेळांविषयीची माहिती महापालिकेच्या संकेतस्थळासह क्रीडा संकेतस्थळावरही दिली जाते.

त्यानुसार, नागरीक “बुकींग’ करतात. मात्र, विशिष्ट वेळेचे काही ठराविक लोकांनाच “बुकींग’ मिळते. इतरांना मात्र त्या वेळेची “बुकींग’ उपलब्ध होत नाही. क्रीडा विभाग आणि बुकींग करणारा संगणक विभाग यांच्या संगनमताने तर हे“सेटींग’ होत नाही, अशी चर्चा खेळाडूंमध्ये आहे. अनेक खेळाडूंना बुकींग अभावी बॅडमिंटनच्या सरावाला मुकावे लागत आहे. त्यामुळे त्यांच्यामध्ये महापालिकेच्या कारभाराविरोधात नाराजी आहे. याबाबत तोडगा काढणे गरजेचे असून बॅडमिंटनसाठीच्या “ऑनलाइन बुकींग’च्या प्रक्रियेची सखोल चौकशी करण्याची मागणी संतोष बारणे यांनी केली आहे.